Ezequiel 47:1-23
47 Rü yemawena ga gumá yatü rü wenaxarü Tupanapata ga taxü̃nearü ĩã̱xwa choxü̃ namu. Rü yexguma yema ĩã̱xwa changuxgu rü nüxü̃ chadau ga dexá ga yema ĩã̱xtüxü̃wa ibaibexü̃ ga éstewaama yáxü̃ ga Tupanapata ídaxü̃chixü̃waama. Rü yema dexá rü Tupanapataarü tügünecüwaguama nida ga ãmarearü guruü̃arü súrcüwawa.
2 Rü yemawena ga gumá yatü rü Tupanapataarü naanewa choxü̃ ínamuxũchi, rü yema ĩã̱x ga nórtewa yexmaxü̃wa choxü̃ ínayaxũxũxẽxẽ. Rü yexguma marü düxétüwa changuxgu rü chomaxã nagu ínayaxüegu ñu̱xmata yema ücuchica ga éstewaama üxü̃wa chomaxã nangu. Rü nüxü̃ chadau ga dexá ga Tupanapataarü súrwa ne yáxü̃.
3 Rü gumá yatü rü wüxi ga napana̱xã ga nangenütaxü̃maxã éstewaama naxũ. Rü yema napana̱xãmaxã nanangugü ga 500 metru. Rü yema natü ga poraxüchixü̃wa choxü̃ nixüexẽxẽ. Rü norü mátama rü cho̱xme̱xtüü̃wa nangu.
4 Rü yexguma ga gumá yatü rü to ga 500 metru inangu, rü ñu̱xũchi yema dexá i poraxüchixü̃wa choxü̃ nixüexẽxẽ. Rü yexguma chixüegu rü yema dexá rü chauxã́pü̱xügu nixü. Rü yexguma ga nüma rü to ga 500 metru inangu, rü ñu̱xũchi yema dexá i poraxüchixü̃wa choxü̃ nixüexẽxẽ. Rü yexguma chixüegu rü yema dexá rü chauayegu nixü.
5 Rü yexguma ga gumá yatü rü to ga 500 metru inangu, rü yema natü ga poraü̃chiüxü̃ rü wüxi ga natü ga taxucürüwa nawa chixüexü̃ nixĩ. Rü yema nax wüxi ga natü ga mátamaxü̃ nax yixĩxü̃ rü wẽxẽẽãcüxicatama tocutüwa tangu.
6 Rü yexguma ga gumá yatü rü choxü̃ ñanagürü: “¡Meama nangugü i ngẽma nüxü̃ cudauxü̃!” ñanagürü. Rü yemawena rü natüxanacügu choxü̃ nataeguxẽxẽ.
7 Rü yéma naxãnacügüwa nüxü̃ chadau ga muxũchixü̃ ga naigü ga nawa rüxügüxü̃.
8 Rü yexguma ga gumá yatü rü choxü̃ ñanagürü: “Ñaa dexá rü ngẽma naane i éstewa ngẽxmaxü̃wa nixĩ i nayaxü̃ rü ñu̱xmata natü i Yudáü̃wa nangu. Rü ngéma rü tá Már i Ngearü Maxü̃ã́xü̃wa narügoxü̃chíü. Rü ngẽxguma ngéma nagoxü̃chíügu rü ngẽma Már i Ngearü Maxü̃ã́xü̃arü dexá rü tá dexá i ngearü yucüraã́xü̃ tá nananguxuchi.
9 47:9-10 Rü ñaa dexá rü ngextá ínanguxü̃wa rü marü tá name nax nawa namaxẽxü̃ i naguxü̃raü̃xü̃ i naeü̃gü rü muxü̃ma i choxnigü. Erü ñaa natüarü dexá rü tá ngẽma dexá i yucüraã́xü̃ rü dexá i ngearü yucüraã́xü̃xü̃ tá nayangucuchixẽxẽ nax dexá i mexü̃ yixĩxü̃ca̱x. Rü ngéma tá nangẽxma i naguxü̃raü̃xü̃ i ta̱xacü i maxü̃xü̃. Rü En-gádiwa tá inaxügü rü ñu̱xmata En-egaríü̃wa nangu nax nangẽxmagüxü̃ i choxnietanüxü̃ i ngẽxma yatexechigüxü̃ i norü püchagü nax yapagüãxü̃ca̱x. Rü ngẽma ñu̱xma Már i Ngearü Maxü̃ã́xü̃wa tá nangẽxma i muxü̃ma i naguxü̃raü̃xü̃ i choxni, ngẽma Már i Mediteráneuwarüxü̃.
10 Nüü̃ nadau 47:9
11 Natürü ngẽma ãcharaxanexü̃wa rü ngóxü̃wa rü taxũtáma nangẽxma i dexá i mexü̃. Rü ngéma ngẽxmaxü̃ i dexá rü tá nayucürachíxü nax ngéma yucüra nayauxgüxü̃ca̱x.
12 Rü ngẽma taxre i naxãnacüwa i ngẽma natü rü tá narüxügü i naguxü̃raü̃xü̃ i ori̱xgü. Rü ngẽma ori̱xgü rü taguma nagüátügü, rü ñu̱xũchi guxü̃gutáma nixoecha. Rü guxcüma ya tauemacügu rü tá nixo erü ngẽma dexá i Tupanapata ya taxü̃newa ne yaxü̃chiüxü̃maxã nimegü. Rü ngẽma norü o rü tá name nax nangṍxü̃ rü ngẽma naatü rü üxüxü̃wa tá name”, ñanagürü.
Iraéanearü üyeanechiga
13 47:13-14 Rü choma ya Cori ya Tupana rü nüxü̃ chixu rü ñacharügü: —Ñaa tá nixĩ i norü üyeanechigü i ngẽma naane i tá nayauxgüxü̃ i ngẽma 12 tücumü i Iraétanüxü̃. Rü ngẽma Yúchena üxü̃ rü taxre i naane tá nixĩ. Rü choma rü marü perü o̱xigümaxã chanaxuegu nax nüxna chanaxãxü̃ i ñaa nachixü̃ane. Rü ñu̱xma rü chanaxwa̱xe nax nawüxiguxü̃ i norü ta i wüxichigü i ngẽma naane i pegü pinuxü̃, erü ñaa nachixü̃ane i pexna chaxãxü̃ rü woetama perü nixĩ.
14 Nüü̃ nadau 47:13
15 47:15-16 Rü ngẽma norü üyeane i nórtewa rü Már i Mediteráneuwa tá inaxügü. Rü ĩanegü ya Elóü̃wa rü Chedáxwa tá nadapetü. Rü ñu̱xũchi ĩanegü ya Amáwa rü Berotáwa rü Chibraíü̃wa tá nadapetü. (Rü yima ĩane ya Chibaríü̃ rü Damácuane rü Amáanearü ngãxü̃wa nangẽxma.) Rü ĩane ya Achá-aticóü̃gu tá nixĩ i yacuáxü̃ i ngẽma üyeane i nórtewa ne daxü̃. (Rü yima ĩane ya Achá-aticóü̃ rü Auráü̃anearü üyeanewa nangẽxma.)
16 Nüü̃ nadau 47:15
17 Rü ngẽmaãcü i ngẽma üyeane i nórtewa ne daxü̃ rü Már i Mediteráneuwa inaxügü rü ñu̱xmata Achá-enáü̃gu nayacua̱x. Rü ngẽmaãcü Damácuarü naane rü Amáarü naane rü Iraéanearü nórtewa nangẽxmagü.
18 Rü ngẽma Iraéanearü üyeane i éstewaama rü ngẽma Auráü̃anearü üye rü Damácuanearü üye iyacuáxü̃wa tá inaxügü nax éstewaama nadaxü̃. Rü natü i Yudáü̃anacügu tá nida i Garaáxanecüwagu rü ñu̱xmata ĩane ya Tamárawa nangu. Rü yima ĩane ya Tamára rü Már ya Ngearü Maxü̃ã́xü̃cutüwa nangẽxma. Rü ngẽma tá nixĩ i Iraéanearü üyeane i éstewaama ngẽxmaxü̃.
19 Rü ngẽma Iraéanearü üyeane i súrwaama daxü̃ rü ĩane ya Tamárawa inaxügü. Rü Meribá-cadéarü nataxawa nadapetü rü Equítuanearü natüanacügu nida ñu̱xmata Már i Mediteráneuwa nangu. Rü ngẽma tá nixĩ i Iraéanearü üyeane i súrwaama ngẽxmaxü̃.
20 Rü ngẽma Iraéanearü üyeane i oéstewaama rü Equítuanearü üyeanewa tá inaxügü. Rü Már i Mediteráneupechinügu tá nida ñu̱xmata Amáanearü üyeanewa nangu. Rü ngẽma tá nixĩ i Iraéanearü üyeane i oéstewaama ngẽxmaxü̃.
21 Rü ngẽma tá nixĩ i ngẽma naane i pegümaxã tá piyauxyechigüxü̃, Pa 12 tücumü i Iraétanüxü̃x.
22 Rü ngẽma tá nixĩ i ngẽma naane i woetama pexna üxü̃. Rü ngẽma naane rü ngẽxgumarüxü̃ tá ta nüxna naxü i ngẽma to i nachixü̃anecüã̱x i petanüwa maxẽxü̃ rü ixãxacügüxü̃. Rü pema rü tá penaxwa̱xe nax ñoma Iraétanüxü̃rüü̃ãcütama nüxü̃ pengechaxü̃güxü̃ ñoma Iraéanegutama nabuexü̃rüxü̃. Rü ngẽxguma pema nax Iraétanüxü̃ pixĩgüxü̃ pegütücumüxü̃ peyanuxgu i ngẽma naane, rü nüxna rü tá ta penaxã i norü naane i ngẽma to i nachixü̃anecüã̱x i petanüwa maxẽxü̃.
23 Rü ngẽma duü̃xü̃gü i to i nachixü̃anecüã̱x i wüxichigü i petücumüwa maxẽxü̃, rü petücumüarü naanewa tá nüxna penaxã i norü naane. Rü choma ya Cori ya Tupana nixĩ i pexü̃ chamuxü̃ nax ngẽmaãcü penaxüxü̃ —ñanagürü.
