Ezequiel 48:1-35
48 Rü Cori ya Tupana rü ñanagürü: —Ñaa tá nixĩ i norü naane i wüxichigü i ngẽma Iraétücumü. Rü Dáü̃tücumüwa tá inaxügü i ngẽma naane. Rü norü tá nixĩ i ngẽma naane i nórtewaama üxü̃. Rü ngẽma norü üye rü Már i Mediteráneuwa tá inaxügü. Rü Elóü̃wa rü Amáwa tá nada i norü üye ñu̱xmata Achá-enáü̃wa nangu. Rü ngẽma naane rü Damácuanearü súrwa rü Amáanearü súrwa nangẽxma. Rü ngẽmaãcü i ngẽma naane rü éstewa tá inaxügü rü ñu̱xmata oéstewa nangu.
2 Rü Dáü̃tücumüwena rü Achétücumüna nanaxãgü i norü naane. Rü ngẽma naane rü éstewa tá inaxügü rü ñu̱xmata oéstewa nangu.
3 Rü Achétücumüwena rü Netarítücumüna nanaxãgü i norü naane. Rü ngẽma naane rü éstewa tá inaxügü rü ñu̱xmata oéstewa nangu.
4 Rü Netarítücumüwena rü Manachétücumüna nanaxãgü i norü naane. Rü ngẽma naane rü éstewa tá inaxügü rü ñu̱xmata oéstewa nangu.
5 Rü Manachétücumüwena rü Efraíü̃tücumüna nanaxãgü i norü naane. Rü ngẽma naane rü éstewa tá inaxügü rü ñu̱xmata oéstewa nangu.
6 Rü Efraíü̃tücumüwena rü Rubéü̃tücumüna nanaxãgü i norü naane. Rü ngẽma naane rü éstewa tá inaxügü rü ñu̱xmata oéstewa nangu.
7 Rü Rubéü̃tücumüwena rü Yudátücumüna nanaxãgü i norü naane. Rü ngẽma naane rü éstewa tá inaxügü rü ñu̱xmata oéstewa nangu.
8 Rü Yudátücumüwena rü tá Tupanaca̱x penaxüüchi i wüxi i naane. Rü ngẽma naane rü éstewa tá inaxügü rü ñu̱xmata oéstewa nangu. Rü ngẽma naane rü 12,500 metru tá nixĩ i norü tatachinü. Rü norü ma̱x i éstewa ixügüxü̃ rü ñu̱xmata oéstewa nguxü̃ rü ngẽma togü i naanegüarü ma̱x tá nüxü̃́ nangẽxma. Rü ngẽma naanearü ngãxü̃gu tá nixĩ i naxüxü̃ ya Tupanapata.
Naane i Tupanaca̱x íxüxüchixü̃
9 Rü ngẽma naane i Cori ya Tupanaca̱x tá ípexüxüchixü̃ rü 12 quirumétruarü ngãxü̃ tá nixĩ i norü ma̱x, rü 10 quirumétru tá nixĩ i norü tatachinü.
10 Rü ngẽma naanewa rü tá nangẽxma i wüxi i naane i woetama chacherdótegüca̱x ixĩxü̃. Rü ngẽma naane rü nórtewa rü ñu̱xmata súrwa nangu rü 12 quirumétruarü ngãxü̃ tá nixĩ i norü ma̱x. Rü éstewa rü ñu̱xmata oéstewa nangu rü 5 quirumétru tá nixĩ i norü tatachinü. Rü ngẽma naanearü ngãxü̃gu tá nixĩ i naxüxü̃ ya Tupanapata.
11 Rü ngẽma naane rü ngẽma chacherdótegü i Chadóxtaagü i choma ya Cori ya Tupana nüxü̃ unetaxü̃ca̱x tá nixĩ. Rü nümagü rü tama yema Lebítanüxü̃rüxü̃ choxna nixĩgachi ga yexguma Iraétanüxü̃ choxna ixĩgachigu. Rü nümagü ga yema chacherdótegü rü nanaxügüama ga chorü puracü.
12 Rü ngẽmaca̱x i ngẽma chacherdótegü rü tá nüxü̃́ nangẽxma i norü naane nawa i ngẽma naane i üünexü̃ i Cori ya Tupanaarü ixĩxü̃. Rü ngẽma naane rü wüxi i naane i guxü̃ma i naanegüxü̃ rüxüünemaexü̃ nixĩ. Rü ngẽma naane rü Lebítanüxü̃güarü naanecüwawa tá nangẽxma.
13 Rü ngẽma chacherdótegüarü naanecüwawa rü ngẽma Lebítanüxü̃ tá nüxü̃́ nangẽxma i norü naane. Rü ngẽma naane rü 12 quirumétruarü ngãxü̃ tá nixĩ i norü ma̱x, rü norü tatachinü rü 5 quirumétru tá nixĩ. Rü guxü̃wama i ngẽma naane i üünexü̃ i Cori ya Tupanaarü ixĩxü̃ rü tá nüxü̃́ nangẽxma i 12 quirumétruarü ngãxü̃ i norü ma̱x, rü 10 quirumétru i norü tatachinü.
14 Rü ngẽma naane rü guxü̃ma i to i naane i Iraéanewa ngẽxmagüxü̃xü̃ narümemae. Rü woo íxraxü̃ i ngẽma naane rü taxucürüwa namaxã tataxe rüe̱xna ta̱xacümaxã tanaxüchicüü rüe̱xna texéna tanaxã. Erü ngẽma naane rü Cori ya Tupanaarü nixĩ.
15 Natürü ngẽma naane i íyaxüxü̃ i 12 quirumétruarü ngãxü̃ i norü ma̱x rü 2 quirumétruarü ngãxü̃ i norü tatachinü, rü ngexerüxüeca̱xmare nixĩ. Rü ngẽma naane rü name nax duü̃xü̃gü nagu üpataxü̃, rü ngẽmawa nüxü̃́ nangẽxmagüxü̃ i norü wocachitaü̃gü. Rü ngẽma naanearü ngãxü̃wa tá nixĩ i nangẽxmaxü̃ ya ĩane.
16 Rü ngẽma naane i ĩane nagu üxü̃ rü norü guxü̃cüwawa rü 2,000 rü naétü 250 metru tá nixĩ i norü ma̱x. Rü ngẽma ãgümücü i nacüwagü rü nawüxigu i norü mã̱xwa.
17 Rü norü guxü̃cüwawa ya yima ĩane rü tá nangẽxmagü i maxẽnecügü. Rü wüxichigü i ngẽma maxẽnecügü rü 125 metru tá nixĩ i norü ma̱x.
18 Rü yima ĩanearü éstecüwawa tá nangẽxma i wüxi i naane. Rü ĩanearü oéstecüwawa rü ta nangẽxma i to i naane. Rü ngẽma naanegü rü üünexü̃ i naane i Cori ya Tupanaarü ixĩxü̃na nayaxũ̱xgü. Rü ngẽma naane i éstecüwawa ngẽxmaxü̃ rü 5 quirumétru tá nixĩ i norü ma̱x. Rü ngẽma to i naane i oéstecüwawa ngẽxmaxü̃ rü ngẽxgumaepü̱xtama tá nixĩ i norü ma̱x. Rü guxü̃ma i nabü i ngẽma naanegüwa yaxuxü̃ rü duü̃xü̃gü i ĩanewa puracüexü̃arü ngõ̱xruxü̃ tá nixĩ.
19 Rü ngẽma duü̃xü̃gü i ĩanewa puracüexü̃ rü tá ngẽma naanegügu natoe, woo ngexü̃rüüxü̃mare i Iraétücumüwa naxü̱xgu.
20 Rü guxü̃ma i ngẽma naane i Tupanana üxü̃ rü ñu̱xũchi ngẽma naane i ĩane nagu üxü̃maxã rü nawüxigumare i norü ma̱x rü norü tatachinü. Rü 12 quirumétruarü ngãxü̃ nixĩ i norü ma̱x rü norü tatachinü.
Ãẽ̱xgacüarü naane
21 Rü ngẽma taxre i naane i Tupanaarü naanecüwawa rü ñu̱xũchi ngẽma naane i ĩane nagu üxü̃cüwawa íyaxügüxü̃, rü ãẽ̱xgacüarü naane tá nixĩ. Rü ngẽma taxre i naane rü Yudáanearü rü Bẽyamíü̃anearü ngãxü̃wa nangẽxmagü. Rü ngẽma ãẽ̱xgacüarü naane i éstecüwawa ngẽxmaxü̃ rü 12 quirumétruarü ngãxü̃ tá nixĩ i norü tatachinü. Rü éstewaama tá nada ñu̱xmata norü üye i éstewa ngẽxmaxü̃wa nangu. Rü ngẽma norü naane i oéstecüwawa ngẽxmaxü̃ rü 12 quirumétruarü ngãxü̃ tá nixĩ i norü tatachinü. Rü oéstewaama tá nada ñu̱xmata norü üye i oéstewa ngẽxmaxü̃wa nangu. Rü guxü̃ma i ngẽma ãẽ̱xgacüarü naane rü Tupanaarü naane rü wüxiwa nadagü namaxã i ngẽma togü i naanegü. Rü ngẽma naanegüarü ngãxü̃wa tá naxǘ i Tupanaarü naane rü napata ya taxü̃ne.
22 Rü Yudáanearü üye rü Bẽyamíü̃anearü üyearü ngãxü̃wa tá naxü i Dabítanüxü̃arü naane rü ĩanearü naane. Rü ngẽma taxre i naanegü rü ãẽ̱xgacüarü naanegüarü ngãxü̃wa tá naxügü.
Togü i Iraétücumügüarü naane
23 Rü ngẽma togü i Iraétücumügüarü naane rü ĩanearü naanearü súrwaama inanaxügü nax yanuaxü̃. Rü wüxichigü tá nanayaxu i norü naane i üyeane i éstewa ixügüxü̃ rü ñu̱xmata oéstegu yacuá. Rü Bẽyamíü̃tücumüwa inanaxügü nax nüxna naxãgüãxü̃ i norü naane. Rü ngẽma naane rü éstewa tá inaxügü rü ñu̱xmata oéstewa nangu.
24 Rü Bẽyamíü̃tücumüwena rü Chimeóü̃tücumüna nanaxãgü i norü naane. Rü ngẽma naane rü éstewa tá inaxügü rü ñu̱xmata oéstewa nangu.
25 Rü Chimeóü̃tücumüwena rü Ichacátücumüna nanaxãgü i norü naane. Rü ngẽma naane rü éstewa tá inaxügü rü ñu̱xmata oéstewa nangu.
26 Rü Ichacátücumüwena rü Chaburóü̃tücumüna nanaxãgü i norü naane. Rü ngẽma naane rü éstewa tá inaxügü rü ñu̱xmata oéstewa nangu.
27 Rü Chaburóü̃tücumüwena rü Gáxtücumüna nanaxãgü i norü naane. Rü ngẽma naane rü éstewa tá inaxügü rü ñu̱xmata oéstewa nangu.
28 Rü ngẽma üyeane i Gáxtücumüarü naanearü súrwaama daxü̃ rü éstewa inaxügü rü oéstegu nayacua̱x. Rü ĩane ya Tamárawa inaxügü rü Meribá-cadéarü nataxawa nadapetü, rü Equítuanearü natüanacügu nida rü ñu̱xmata Már i Mediteráneuwa nangu.
29 Rü ngẽma tá nixĩ i ngẽma naane i pema i Iraétanüxü̃ i sortéuãcü pegü pinuxü̃. Rü ngẽma naane rü guxü̃gutáma perü nixĩ, rü ngẽmaãcü tá nixĩ i pegü peyanuxü̃ i ngẽma naane. Rü choma ya Cori ya Tupana nixĩ i pemaxã nüxü̃ chixuxü̃ i ngẽma —ñanagürü.
Yerucharéü̃arü ĩã̱xgü
30 48:30-31 Yima ĩane ya Yerucharéü̃ rü tá nüxü̃́ nangẽxma i norü poxeguxü̃tápü̱x i 2,250 metru ixüxü̃ i wüxichigü i nacüwagü. Rü wüxichigü i norü ãgümücü i nacüwawa rü tá nangẽxma i tomaepü̱x i norü ĩã̱xgü. Rü wüxichigü i ngẽma ĩã̱xgü rü tá Iraétücumügu nixãéga. Rü ngẽma naxtapü̱x i nórtewa üxü̃arü ĩã̱xgü rü Rubéü̃gu rü Yudágu rü Lebígu tá nixãéga.
31 Nüü̃ nadau 48:30
32 Rü ngẽma naxtapü̱x i éstewa üxü̃ rü 2,250 metru nixĩ i norü ma̱x. Rü ngẽma naxtapü̱xarü ĩã̱xgü rü Yúchegu, rü Bẽyamíü̃gu rü Dáü̃gu tá nixãéga.
33 Rü ngẽma naxtapü̱x i súrwa üxü̃ rü 2,250 metru nixĩ i norü ma̱x. Rü ngẽma naxtapü̱xarü ĩã̱xgü rü Chimeóü̃gu rü Ichacágu rü Chaburóü̃gu tá nixãéga.
34 Rü ngẽma naxtapü̱x i oéstewa üxü̃ rü 2,250 metru nixĩ i norü ma̱x. Rü ngẽma naxtapü̱xarü ĩã̱xgü rü Gáxgu, rü Achégu rü Netarígu tá nixãéga.
35 Rü ngẽma ĩanearü poxeguxü̃tápü̱x rü guxü̃wama rü 9,000 metru tá nixĩ i norü ma̱x. Rü yema ngunexü̃guwena rü naéga ya yima ĩane rü “Cori ya Tupana Nua Nangexma”, tá nixĩ.
