Ezequiel 5:1-17
5 Rü nüma ga Cori ya Tupana rü choxü̃ ñanagürü: —Cuma, Pa Yatüx, ¡tüxü̃ nayaxu ya wüxi ya cüxchi ya ñoma nowayarüxü̃ texéchixe! ¡Rü cugü idüeru rü ñu̱xũchi cugü idüxchinagu! ¡Rü ngẽmawena rü nayaxu i wüxi ya yáruxü̃, rü tomaepü̱xgu yatoye i ngẽma cuyae!
2 Rü ngẽxguma marü yapugüãgu ya yima ĩane ya Yerucharéü̃ ¡rü ngẽma tomaepü̱xtücumü i cuyaewa nayaxu i wüxitücumü, rü ĩanearü ngãxü̃wa yagu! ¡Ngẽmawena rü nayaxu i ngẽma norü taxretücumü i cuyae! ¡Rü wüxi ya cüxchimaxã yima ĩanecüwagu yawíü̃güchigü! ¡Rü ngẽma norü tomaepü̱xtücumü i cuyae rü buanecügu nawogü! Rü choma rü yimá ĩanecüã̱xgü i duü̃xü̃güweama tá chixũchigü namaxã i wüxi i tara i cho̱xme̱xgu tá chingexü̃.
3 ¡Rü ngẽma nayáegüwa rü ñuxre i nayae nade rü ñu̱xũchi cuxchirupechinüwa yana̱i̱xgü!
4 ¡Ngẽmawena rü nade i ñuxre i cuyae rü üxüwa yawocu nax yaxaexü̃ca̱x! Rü ngéma tá ínaxũxũ ya üxü i guxü̃táma i Iraétanüxü̃wa nguxü̃ne —ñanagürü.
5 Rü nüma ya Cori ya Tupana rü ñanagürü ta choxü̃: —Dücax ya yima ĩane ya Yerucharéü̃. Rü choma nixĩ ga chanataxẽẽxü̃ natanüwa ya yima togü i nachixü̃anecüã̱xarü ĩanegü.
6 Natürü yema norü duü̃xü̃gü ya yima ĩane ya Yerucharéü̃ rü chomaxã nanue rü tama naga naxĩnüechaü̃ i chorü mugü rü ucu̱xẽgü. Rü guxü̃nema ya yima togü i nachixü̃anegüarü ĩanegü ya nüxna ngaicamanearü duü̃xü̃güarü yexera chixexü̃gu namaxẽ i ngẽma Yerucharéü̃cüã̱x rü tama naga naxĩnüe i ngẽma chorü mugü rü chorü ucu̱xẽgü.
7 Rü ngẽmaca̱x i chomax ya Cori ya Tupana rü ñachagürü: “Pemax rü guxü̃ i togü i duü̃xü̃gü i pexna ngaicamaxü̃arü yexera tama ipexĩnüechaü̃ rü tama naga pexĩnüe i ngẽma chorü mugü rü bai i ngẽma togü i nachixü̃anegüarü mugü.
8 Rü ngẽmaca̱x i choma ya Cori ya Tupana rü nüxü̃ chixu rü ñachagürü: ‘Choma rü tá ta pemaxã chanu, Pa Yerucharéü̃cüã̱xgüx, rü tá pexü̃ chapoxcue nape̱xewa i ngẽma togü i nachixü̃anecüã̱xgü.
9 Rü poraãcü tá pexü̃ chapoxcue erü poraãcü nachixexüchi i ngẽma pexüxü̃. Rü ngẽma poxcu i ñu̱xma tá pexca̱x íchanguxẽẽxü̃ rü yema poxcu ga ü̃pama namaxã pexü̃ chapoxcuxü̃arü yexera tá nixĩ. Rü ngẽmawena rü nataxutama i nangexgumaraxü̃xü̃ i poxcu.
10 Curü duü̃xü̃gütanüwa, Pa Yerucharéü̃x, rü tá nangẽxma i duü̃xü̃gü i nanegüxü̃ tátama ngõ̱xgüxü̃, rü nanegü i nanatügüxü̃ tátama ngõ̱xgüxü̃. Rü cuxü̃ tá chapoxcu, Pa Yerucharéü̃x, rü ngẽma duü̃xü̃gü i maxẽxü̃ i íyaxügüxü̃ rü guxü̃ i naanegu tá chanawoone.
11 Rü choma nax Cori ya Tupana chixĩxü̃ rü chauégagu poxcu pemaxã chaxuegu. Yerü ga pema rü penaxãũãchixẽxẽ ga guma chopata ya üünene namaxã ga perü naxchicüna̱xãgü ga ãũãchixü̃ rü pecümagü ga chixexü̃. Rü ngẽmaca̱x i choma rü tá pexü̃ chadai. Rü taxũtáma pemaxã chixãũxãchi rü taxũtáma choxü̃́ pengechaxütümüxü̃gü.
12 Rü wüxi i norü tomaepü̱xtücumü i curü duü̃xü̃gü rü da̱xaweanemaxã rü taiyamaxã tá cugu nayue, Pa Yerucharéü̃x. Rü ngẽma to i tomaepü̱xtücumü rü cucüwagu tá norü uanügü nanadai. Rü ngẽma to i tomaepü̱xtücumü i íyaxügüxü̃ rü guxü̃ i naanegu tá chanawoone. Rü choma rü tá ngẽma duü̃xü̃güweama chixũchigü namaxã i wüxi i tara i cho̱xme̱xgu tá chingexü̃.
13 Rü choma rü chorü numaxã tá chanapoxcue, rü ngẽxgumaxica tá nixĩ i charüngüxmüxü̃. Rü nawena nax chorü numaxã ngẽma duü̃xü̃güxü̃ chapoxcuxü̃, rü tá nüxü̃ nicua̱xãchitanü nax choma ya Cori ya Tupana chixĩxü̃ ga chorü numaxã namaxã chanaxueguxü̃ ga yema poxcu.
14 Rü chomax, Pa Yerucharéü̃cüã̱xgü rü tá nagu chapogü ya yima perü ĩane. Rü ĩpata ya iwa̱xgünexica tá ngéma nayaxügü. Rü ngẽmaãcü tá guxü̃ i togü i nachixü̃anegüpe̱xewa pexü̃ chaxãneexẽxẽ. Rü guxü̃ma i duü̃xü̃gü i ngéma chopetüxü̃ tá nüxü̃ nadaugü i ngẽma chixexü̃ i pexü̃ ngupetüxü̃.
15 Rü ngẽxguma chorü numaxã perü chixexü̃gagu taxü̃ i poxcumaxã pexü̃ chapoxcuegu, rü guxü̃ma i ngẽma togü i duü̃xü̃gü rü tá pemaxã naguxchigagü rü pexü̃ nacugüe. Rü guxü̃ma i ngẽma togü i nachixü̃anegü i pexna ngaicamaxü̃arü dauxcüraxü̃ruxü̃ tá pixĩgü. Rü choma ya Cori ya Tupana nixĩ i nüxü̃ chixuxü̃ i ngẽma.
16 Rü choma rü taxü̃tama i taiya tá pexca̱x íchanguxẽxẽ rü ñoma naxnegü ya pexü̃ daixü̃nerüxü̃ tá nixĩ. Rü ngẽma taiya rü tá poraãcü nitachigü rü tá pengebüe rü ngẽmagagu tá düxwa peyue.
17 Rü aixcüma pexca̱x tá íchananguxẽxẽ i taiya rü da̱xaweane rü yu. Rü ngéma tá chanamugü i aigü i pexacügü tüxü̃ ngõ̱xcuxü̃. Rü ngẽxgumarüxü̃ ta ngéma tá chanamugü i perü uanügü nax daigu peyuexü̃ca̱x. Rü choma ya Cori ya Tupana nixĩ i chanaxunagüxü̃ i ngẽma’ ” —ñanagürü.
