Ezequiel 6:1-14
6 6:1-2 Rü nüma ga Cori ya Tupana rü ñanagürü choxü̃: —¡Iraéanearü ma̱xpǘanexü̃guama nadawenü rü chauégagu poxcu namaxã naxuegu i ngẽma duü̃xü̃gü i ngéma maxẽxü̃!
2 Nüü̃ nadau 6:1
3 Rü ñacurügü tá: “¡Iperüxĩnüe, Pa Duü̃xü̃gü i Iraéanearü Máxpüxanexü̃wa Maxẽxü̃, i ñaa Cori ya Tupanaarü ore i pexca̱x ixĩxü̃ i pema i ma̱xpǘnegüwa maxẽxü̃, rü ngüchitaerugüwa maxẽxü̃, rü natügücutüwa maxẽxü̃, rü doxonexü̃güwa maxẽxü̃! Rü ñanagürü: Choma rü tá pexca̱x íchanangugüxẽxẽ i perü uanügü nax pexü̃ nada̱i̱xü̃ca̱x. Rü tá nagu chipogügü ya yima ĩpatagü ya ma̱xpǘnegüwa ngẽxmagüne ya nawa naxchicüna̱xãgüxü̃ picua̱xüü̃güne.
4 Rü íxraxü̃gu tá chanapoü̃gü i ngẽma nachicagü i nawa perü ãmaregü pigugüxü̃ rü perü pumarate̱xe i yixichixü̃ nawa pigugüxü̃. Rü ngẽma curü duü̃xü̃gü i ngéma maxẽxü̃ rü tá chanadai nape̱xegu i ngẽma tupananetachicüna̱xãgü.
5 Rü naxü̃negü i ngẽma Iraétanüxü̃ i yuexü̃ rü ngẽma naxchicüna̱xãgüpe̱xewa tá chayawogü. Rü yimá naxchina̱xãgü rü norü ãmarearü guruü̃gücüwagu tá chanawoone.
6 Rü guxü̃ma i ngẽma naane i nawa pemaxẽxü̃arü ĩanegü rü tá inayarüxo. Rü ngẽma perü tupananetagüarü ãmarearü guruü̃gü rü tá nagu nipogügü. Rü ngẽmaãcü i ngẽma ãmarearü guruü̃gü rü tá noxtacüma nayarüxo. Rü ngẽma perü tupananetachicüna̱xãgü rü íxraxü̃gu tá napoü̃gü. Rü ngẽma perü pumaraarü guruü̃gü rü tá niwa̱xgü. Rü guxü̃táma i ngẽma pema pexügüxü̃ rü tá inayarüxo.
7 Rü ngẽxguma nüxü̃ pedaugügu nax petanüwa nayuexü̃ i ngẽma muxü̃ma i duü̃xü̃gü, rü ngẽxguma tá nixĩ i nüxü̃ picua̱xãchitanüxü̃ nax aixcüma choma chixĩxü̃ ya perü Cori ya Tupana.
8 Rü tá nangẽxma i ñuxre i petanüxü̃ i taxũtáma yuexü̃. Natürü nümagü rü togü i nachixü̃anegügu tá nawoone.
9 Rü ngẽma maxẽxü̃ i íyaxügüxü̃ rü ngẽma nachixü̃anegüwa tá choxna nacua̱xãchie. Rü tá nüxna nacua̱xãchie nax ñuxãcü ngúxü̃ nüxü̃ chingexẽxẽgüxü̃ nagagu nax choxna yaxĩgachixü̃ nax norü tupananetachicüna̱xãgüxü̃ yacua̱xüü̃güxü̃ca̱x. Nümagü rü nügütátama naxãnẽẽxẽẽgü nagagu ga yema chixexü̃ ga naxügüxü̃ rü yema nacümagü ga nagu namaxẽxü̃.
10 Rü ñu̱xũchi tá nüxü̃ nicua̱xãchitanü nax aixcüma choma chixĩxü̃ ya Cori ya Tupana. Rü tá nüxü̃ nicua̱xãchitanü nax tama natüca̱xma yixĩxü̃ i namaxã chanaxueguxü̃ ga yema poxcugü ga naxca̱x íchanguxẽxẽxü̃” —ñanagürü.
11 Rü yemawena ga nüma ga Cori ya Tupana rü choxü̃ ñanagürü: —¡Ẽcü curü ngechaü̃maxã napéxme̱x rü cucutümaxã ipu̱xnecüxü! ¡Rü aixta naxü naxcha̱xwa i ngẽma Iraétanüxü̃arü taxü̃ i chixexü̃gü! Rü nümagü rü tá daigu rü taiyamaxã rü da̱xaweanemaxã nayue.
12 Rü ngẽma yáxü̃wa ngẽxmagüxü̃ rü da̱xaweanemaxã tá nayue. Rü ngẽma ngaicamana ngẽxmagüxü̃ rü daigu tá nayue. Rü ngẽma maxẽxü̃ i íyaxügüxü̃ rü taiyamaxã tá nayue. Rü ngẽmaãcü tá chorü numaxã chanapoxcue i ngẽma duü̃xü̃gü.
13 Rü ngẽxguma ngẽma maxẽxü̃ i duü̃xü̃gü nüxü̃ daugügu i ngẽma yuexü̃ i naxchicüna̱xãgüpe̱xegu nuquegüxü̃, rü ãmarearü guruü̃gücüwagu nuquegüxü̃, rü guxü̃ma i ngüchitaerugüxü̃gu nuquegüxü̃, rü ma̱xpǘnegügu nuquegüxü̃, rü guxü̃ma i nai i taetaxü̃tüü̃gu nuquegüxü̃, rü guxü̃ma i castaña i taetaxü̃tüü̃gu nuquegüxü̃, rü ñu̱xũchi ngẽma nachicagü i norü naxchicüna̱xãgüca̱x pumarate̱xe íyagugüxü̃gu nuquegüxü̃, rü ngẽxguma ngẽmaxü̃ nadaugügu i ngẽma duü̃xü̃gü i íyaxügüxü̃ rü tá nüxü̃ nicua̱xãchitanü nax choma chixĩxü̃ ya Cori ya Tupana.
14 Rü choma rü chorü numaxã tá chawexnagüchacüxü nax chanapoxcuexü̃ca̱x i ngẽma duü̃xü̃gü i íyaxügüxü̃. Rü ngẽma nachixü̃ane rü nachicagü i duü̃xü̃gü nawa ngẽxmagüxü̃ rü tá chianexü̃xü̃ chayanguxuchixẽxẽ. Rü chianexü̃ i súrwaama ngẽxmaxü̃wa tá ichanaxügü rü ñu̱xmata yima ĩane ya Ribá ya nórtewa ngẽxmanewa nangu. Rü ngẽxguma i ngẽma duü̃xü̃gü rü tá nüxü̃ nicua̱xãchitanü nax choma chixĩxü̃ ya Cori ya Tupana —ñanagürü.
