Ezequiel 7:1-27
7 7:1-2 Rü nüma ga Cori ya Tupana rü choxü̃ ñanagürü: —Pa Yatüx, choma ya Cori ya Tupana ya Guxãétüwa nax changexmaxü̃ rü Iraéanecüã̱xgüxü̃ ñachagürü: “Marü nawa nangu i pechixü̃anearü poxcu. Rü guxü̃ma i ngẽma pechixü̃anewa ngẽxmagüxü̃ rü marü nawa nangu nax iyagúxü̃.
2 Nüü̃ nadau 7:1
3 Rü marü nawa nangu i perü gu̱x, Pa Iraéanecüã̱x. Rü chorü numaxã tá pexü̃ chapoxcu. Rü pexna tá naxca̱x chaca i ngẽma pecüma i chixexü̃, rü tá pexü̃ chapoxcu naxca̱x ga yema chixexü̃gü ga pexügüxü̃.
4 Rü marü taxũtáma choxü̃́ pengechaxü̃tümüxü̃gü. Rü ngẽma pecüma i chixexü̃gagu tá pexü̃ chapoxcu nax ngẽmaãcü penaxütanüxü̃ca̱x ga yema chixexü̃gü ga pexügüxü̃. Rü pema rü ngẽmaãcü tá nüxü̃ picua̱xãchitanü nax choma chixĩxü̃ ya Cori ya Tupana” —ñanagürü.
5 7:5-6 Rü ñanagürü ta: —Choma ya Cori ya Tupana rü ñachagürü: “Dücax, Pa Duü̃xü̃güx, marü ningaica i ngẽma guxchaxü̃gü i nügüwe ãgüxü̃ i pexca̱x tá íngugüxü̃. Rü marü ningaica i perü gu̱x.
6 Nüü̃ nadau 7:5
7 Pa Duü̃xü̃gü i Ñoma i Naanewa Maxẽxü̃x, marü ningaica rü marü nawa nangu i ngẽma ngunexü̃ i nagu tá penaxĩ̱xãchiãẽgüxü̃. Rü marü nayagu̱x ga yema taãxẽ ga ma̱xpǘnegüwa yexmaxü̃, rü ñu̱xma rü muü̃xicatama nangẽxma.
8 Rü ñu̱xmatatama pegu chananguxẽxẽ i ngẽma chorü nu rü ngẽxgumaxica tá nixĩ i charüngüxmüxü̃. Rü pexna tá naxca̱x chaca i ngẽma pecüma i chixexü̃. Rü ñu̱xũchi tá pexü̃ chapoxcue naxca̱x i guxü̃ma i ngẽma chixexü̃gü i nagu pemaxẽxü̃.
9 Rü marü taxũtáma choxü̃́ pengechaxü̃tümüxü̃gü. Rü ngẽma pecüma i chixexü̃gagu tá pexü̃ chapoxcu nax ngẽmaãcü penaxütanüxü̃ca̱x ga yema chixexü̃gü ga pexügüxü̃. Rü pema rü ngẽmaãcü tá nüxü̃ picua̱xãchitanü nax choma ya Cori ya Tupana yixĩxü̃ nax pexü̃ chapoxcuexü̃.
10 Rü ñaa nixĩ i ngẽma ngunexü̃, rü marü nawa nangu. Rü marü ínangu i ngẽma poxcu. Rü ngẽma chixexü̃ rü guxü̃wama i ñaa naanewa nangẽxma. Rü duü̃xü̃gü rü guxü̃wama nügü nicua̱xüü̃gü.
11 Rü paxa tá ínangu i pechixü̃anearü uanü i poraxü̃ rü daimaxã tá nanapoxcue i Yudáanearü duü̃xü̃güarü chixexü̃. Rü ngẽma duü̃xü̃gü i diẽruã̱xgüxü̃ rü taxuxü̃táma ínayaxü i norü duü̃xü̃gü rü bai i norü diẽrugü, rü bai ya napatagü ya mexẽchine. Rü ngẽmaãcü taxuxü̃táma ínayaxü i ta̱xacü i mexü̃.
12 Marü nawa nangu i ngẽma ngunexü̃, rü ínangu i ngẽma ora. Rü ngẽma taxetanüxü̃ rü taxuca̱xma ta̱xacüca̱x nataãxẽ, rü ngẽma naxca̱x taxexü̃ rü taxuca̱xma ta̱xacüca̱x nangechaxü̃. Erü chorü numaxã tá chanapoxcu i guxü̃ma i ngẽma Iraétanüxü̃ i ñu̱xma nügü icua̱xüü̃güxü̃.
13 Rü yíxema tümaarü naanemaxã taxexe rü ngẽxguma tamaxü̃gu rü marü taxucürüwama tümaarü naaneca̱x tataxe. Rü taxucürüwa wena tanayaxu i ngẽma tümaarü naane i namaxã tataxexü̃. Rü ngẽma duü̃xü̃gü i chixexü̃gu maxẽxü̃ rü taxucürüwa norü maxü̃na nadaugü, rü tá nayue.
14 Rü nayacuegü tá ya cornéta nax daiwa naxĩxü̃ca̱x, rü guxü̃táma nügü nimexẽẽgü, natürü taxuxü̃táma daiwa naxũ. Rü chorü numaxã tá chapoxcue i guxü̃ma i ngẽma Iraétanüxü̃.
15 Rü yima ĩanearü düxétüwa rü dai nangẽxma, rü aixepewa rü da̱xaweanegü rü taiya nangẽxma. Rü yíxema naanewa ngẽxmagüxe rü daigu tá tayue. Rü yíxema ĩanewa ngẽxmagüxe rü taiyamaxã rü da̱xaweanemaxã tá tayue.
16 Rü woo togü rü máxpüxanexü̃wa nabuxmügu ñoma muxtucugü i baixãchiexü̃rüxü̃, natürü guxãtáma tümaarü pecadugagu tayueama.
17 Rü guxãtáma taturaechacüxü, rü tümaarü muü̃maxã tá tiyoyoã́pü̱xügü.
18 Rü guxãtáma tümachiru i techaraxü̃gu ticu̱xgü erü ngechaü̃wa tangexmagü. Rü guxü̃watáma tidu̱xruxünegü rü ãnemaxã tanadeãchichametügü. Rü guxãtáma tügü tidüxpü̱xüerugü.
19 Rü ngẽma ngunexü̃ i Cori ya Tupana nagu napoxcuexü̃gu i duü̃xü̃gü rü taxuwatáma nüxü̃́ name i ngẽma norü úirugü rü norü diẽrugü. Rü ngẽma duü̃xü̃gü rü ñoma guxchirerüxü̃ ĩanearü namagügu tá tüxü̃ nawogü ya norü diẽru rü norü úirugü. Erü nataxutama i õna rü ngẽmaca̱x taxuwatáma nüxü̃́ name i ngẽma norü úirugü rü norü diẽrugü nax tümamaxã nachibüexü̃ca̱x rü norü taiya tümamaxã yañaxẽẽgüxü̃ca̱x. Rü ngẽmaãcü tá namaxã nangupetü i ngẽma duü̃xü̃gü erü ngẽma úirugagu nixĩ ga chixexü̃ naxügüxü̃.
20 Rü nümagü rü norü ngã̱xãẽruü̃gümaxã nügü nicua̱xüü̃gü rü yemawa nixĩ ga naxügüãxü̃ ga norü tupananetachicüna̱xãgü ga poraãcü ichixexü̃. Rü ngẽmaca̱x i choma rü tá guxchirexü̃ chayanguxuchixẽxẽ i ngẽma norü ngã̱xãẽruü̃gü.
21 Rü natanüwa tá chanamugü i to i nachixü̃anecüã̱xgü nax nüxü̃́ nadeaxü̃ca̱x i norü ngẽmaxü̃gü. Rü ngẽmaãcü tá natanüwa naxĩxü̃ca̱x i ngẽma duü̃xü̃gü i guxü̃ i naanewa yexeraãcü naxchi naxaiexü̃ nax nüxna yapuxü̃ãxü̃ca̱x i norü ngã̱xãẽruü̃gü rü ñoma ãũãchixü̃rüxü̃ namaxã yaxĩgüxü̃ca̱x.
22 Choma rü tá nüxna chixũgachi i ñaa nachixü̃ane, rü tá chanangexrü nax chixexü̃maxã yapaxẽẽgüãxü̃ ya yima chopata ga taxü̃ne ga chorü meruxü̃ ixĩxü̃ne. Rü tá ínangugü i ngĩ́xta̱xagüxü̃ rü tá nanaxãũãchixẽxẽ ya yima chopata.
Tupana rü Yerucharéü̃cüã̱xgüna naca norü chixexü̃ca̱x
23 Rü cumax, Pa Echequiéx ¡rü wüxi ya cadéna ínamexẽxẽ naxca̱x i chorü duü̃xü̃gü i Yerucharéü̃cüã̱xgü! Erü tá chanapoxcue naxca̱x nax poraãcü namáetagüxü̃. Rü yima norü ĩane ya Yerucharéü̃ rü poraãcü máetamaxã nanapá.
24 Rü choma rü tá ngéma chanamugü i togü i nachixü̃anecüã̱xgü i duü̃xü̃gü i chixecümaxü̃ nax ngẽmamaxã yayoraã́xü̃ca̱x ya napatagü i ngẽma Yerucharéü̃cüã̱xgü. Rü ngẽmaãcü tá chayanaxoxẽxẽ nax nügü yacua̱xüü̃güxü̃ i ngẽma yatügü i muarü ngẽmaxü̃ã̱xgüxü̃. Rü ngẽma nachicagü i nawa norü tupananetachicüna̱xãgüxü̃ yacua̱xüü̃güxü̃, rü tá chanamu i ngẽma norü uanügü nax nagu napogüexü̃ca̱x.
25 Rü nüma i Yerucharéü̃cüã̱xgü rü poraãcü tá namuü̃e. Rü ngẽmaca̱x tá naxca̱x nadaugü nax norü uanügü namaxã irüngüxmüexü̃. Natürü ngẽma norü uanügü rü taxũtáma naga naxĩnüe.
26 Rü nügüwe tá naxãgü i ngẽma guxchaxü̃gü i Yerucharéü̃cüã̱xgüca̱x ínguxü̃. Rü ngẽxgumarüxü̃ ta i ngẽma chixexü̃ i nachigagü rü tá nügüwe naxãgü. Rü tá naxca̱x nadaugü i wüxi i chorü orearü uruxü̃ nax ngẽma namaxã nüxü̃ ixuxü̃ca̱x nax ta̱xacüchiga yixĩxü̃ i ngẽma ngupetüxü̃. Natürü i ngẽma rü tá natüca̱xmamare nixĩ. Rü nataxutama i chacherdótegü i nangúexẽxẽxü̃ rü bai i yaxguã̱xgü i tayaxucu̱xẽgüxü̃.
27 Rü nüma ya Yudáanecüã̱xarü ãẽ̱xgacü rü ñoma nayutanüxü̃rüxü̃ tá ngechaü̃ nüxü̃́ nangu̱x. Rü ngẽma ãẽ̱xgacü nane i duü̃xü̃gümaxã icuáxü̃ rü tá ta ngechaü̃ nüxü̃́ nangu. Rü nüma i Yerucharéü̃cüã̱x i duü̃xü̃gü rü norü muü̃maxã tá nidu̱xrue. Rü ngẽma nax tama mea namücügümaxã inacua̱xgüxü̃ãcü tátama namaxã ichacua̱x. Rü ngẽmatama poxcu i namücügümaxã naxuegugüxü̃ãcü tátama chanapoxcue. Rü ngẽmaãcü tá nixĩ i nüxü̃ nacua̱xgüxü̃ nax choma rü Cori ya Tupana nax chixĩxü̃” —ñachagürü.
