Ezequiel 8:1-18
8 Rü guma norü 6 ga taunecüarü 6 ga tauemacüarü 5 ga ngunexü̃gu rü choma rü chopatawa charüto namaxã ga Yudáanearü ãẽ̱xgacügü. Rü ngürüãchi Cori ya Tupana choxü̃ ningogü.
2 Rü nüxü̃ chadau ga wüxi ga nayatüxü̃raü̃xü̃. Rü yema naayetüü̃waama rü ñoma wüxi ga üxüemarüxü̃ nixĩ. Rü yema naayearü daxũwaama rü niyaura ñoma wüxi ga bróũche i baixẽẽxü̃rüxü̃.
3 Rü yema yatü rü niwexechichacüxü rü chauyaegu niyauxãchi. Rü nüma ga Tupanaãxẽ rü nayachü̱xüxãchixẽxẽ ga chauãxẽ. Rü Tupana rü yema chorü ngo̱xetüwa Yerucharéü̃wa nanaga ga chauãxẽ. Rü guma ĩanearü ĩã̱x ga aixepewaama yexmaxü̃gu nayamu. Rü yema ĩã̱x rü guma ĩanearü nórtewaama naxü. Rü yéma nixĩ ga nayexmaxü̃ ga yema tupananetachicüna̱xã ga poraãcü Tupanaxü̃ nuxẽẽxü̃.
4 Rü yéma nüxü̃ chadau ga Cori ya Iraétanüxü̃arü Tupanaarü üüne, yema ínadoxonexü̃wa chorü ngo̱xetüwa nüxü̃ chada̱u̱xgurüxü̃.
5 Rü yexguma ga nüma ga Tupana rü choxü̃ ñanagürü: —¡Ñu̱xma rü nórteguama nadawenü! —ñanagürü choxü̃. Rü yexguma ga choma rü nórteguama chadawenü, rü yema ixücuxü̃wa ga ãmarearü guruü̃arü ĩã̱xü̃tawa nüxü̃ chadau ga yema tupananetachicüna̱xã ga Cori ya Tupanaxü̃ nuxẽẽxü̃.
6 Rü ñu̱xũchi choxü̃ ñanagürü: —¿Marü nüxü̃ cudauxü̃ i ngẽma chixexü̃ i Iraétanüxü̃ ügüxü̃? Rü yemamaxã nixĩ ga nüxna choxü̃ yaxũgachixẽẽgüxü̃ ga guma chopata ga üünene. Rü ñu̱xma rü tá nüxü̃ cudau i to i yexeraxü̃ ichixexüchixü̃ —ñanagürü choxü̃.
7 Rü ñu̱xũchi guma Tupanapataã̱xtüarü ĩã̱xwa choxü̃ naga. Rü yema norü poxeguxü̃tápü̱xwa nüxü̃ chadau ga wüxi ga boxmaxetüxü̃.
8 Yexguma rü choxü̃ ñanagürü: —¡Nüxü̃ nataneta i ngẽma boxmaxetüxü̃ i naxtapü̱xwa ngẽxmaxü̃! —ñanagürü choxü̃. Rü yexguma ga choma rü nüxü̃ chataneta ga yema boxmaxetüxü̃ rü namaxã ichayarüxũ ga wüxi ga ücuchica.
9 Rü yexguma rü choxü̃ ñanagürü: —¡Ngẽxma naxücu! Rü tá nüxü̃ cudau i ngẽma chixexüchixü̃gü i ngéma naxügüxü̃ —ñanagürü choxü̃.
10 Rü yexma chaxücu, rü guxü̃ma ga yema naxtapü̱xarü ma̱xwa nüxü̃ chadau nax yexma naxüchicüna̱xãgüxü̃ ga naguxü̃raü̃xü̃ ga yema waixü̃müanegu nügü itúgüxü̃chicüna̱xãgü, rü ñu̱xũchi naeü̃gü ga ãũãchixü̃chicüna̱xãgü, rü naguxü̃raü̃xü̃ ga Iraétanüxü̃arü tupananetachicüna̱xãgü.
11 Rü yéma nayexmagü ga 70 ga Iraétanüxü̃arü ãẽ̱xgacügü. Rü yematanüwa nayexma ga Yaachanía ga Chapáü̃ nane. Rü guxü̃ma ga yemagü rü yema tupananetachicüna̱xãgüxü̃ nicua̱xüü̃gü. Rü wüxichigü ga yema ãẽ̱xgacügü rü naxme̱xwa nanange ga wüxi ga pumarate̱xearü guruxü̃. Rü yema pumarate̱xearü guruü̃wa ínaxũxũ ga wüxi ga caixemaxü̃ ga pamüemaxü̃ ga yixixü̃.
12 Rü yexguma ga nüma ya Tupana rü choxna naca rü ñanagürü choxü̃: —¿Nüxü̃ cudauxü̃ i ngẽma Iraétanüxü̃arü ãẽ̱xgacügü cúãcü norü tupananetachicüna̱xãgüpe̱xegu ixügüxü̃? Rü wüxichigü i ngẽma ãẽ̱xgacügü rü ngéma ẽanexü̃wa noxrütama tupananetachicüna̱xãxü̃ nicua̱xüü̃gü. Rü nümagü rü nagu naxĩnüegu nax choma rü marü nüxna chixũgachixü̃ i ngẽma nachixü̃ane, rü ngẽmaca̱x marü tama nüxü̃ chadauxü̃ i ngẽma inaxügüxü̃ —ñanagürü choxü̃.
13 Rü yemawena rü ñanagürü choxü̃: —Rü tá nüxü̃ cudau i to i yexeraxü̃ chixexü̃ inaxügüxü̃ —ñanagürü choxü̃.
14 Rü ñu̱xũchi nawa choxü̃ naga ga yema ĩã̱x ga nórtewaama üxü̃ ga Cori ya Tupanapata ga taxü̃neca̱x nawa ixücuxü̃. Rü yéma narütogü ga ñuxre ga ngexü̃gü ga poraãcü auxexü̃ naxca̱x ga norü tupananeta ga Tamú.
15 Rü yemawena ga nüma ga Tupana rü choxna naca rü ñanagürü choxü̃: —¿Rü nüxü̃ cudauxü̃ i ñaa? Rü tá nüxü̃ cudau i to i yexeraxü̃ chixexü̃ inaxügüxü̃ —ñanagürü choxü̃.
16 Rü ñu̱xũchi Tupanapata ga taxü̃neã̱xtü ga aixepewaama yexmaxü̃wa choxü̃ naga ga Tupanapataca̱x ixücuxü̃wa. Rü yema ãmarearü guruü̃pe̱xewa nüxü̃ chadau ga 25 ga yatügü ga Tupanapata ga taxü̃nena ãca̱xwe̱xgüxü̃ ga ésteguama caxã́pü̱xügüxü̃. Rü waixü̃müanegu nangücuchitanü rü üa̱xcüxü̃ nicua̱xüü̃gü.
17 Rü yexguma ga nüma ga Cori ya Tupana rü choxna naca rü ñanagürü choxü̃: —¿Nüxü̃ cudauxü̃ i ngẽma chixexü̃ i ngẽma Yudátanüxü̃ ügüxü̃? Natürü naétü rü máetamaxã nayapaxẽxẽ i ñaa nachixü̃ane. Rü guxü̃ i ngunexü̃gu choxü̃ nanuxẽẽgüecha. Rü ngẽma norü ãũãchixü̃ i naxügüxü̃ rü düxwa choxmaraü̃wa nanguema.
18 Rü ngẽmaca̱x i choma rü chorü numaxã tá chanapoxcue. Rü taxũtáma namaxã chixãũxãchi. Rü woo aita cha̱u̱xca̱x naxüegu rü taxũtáma nüxü̃ chaxĩnü —ñanagürü choxü̃.
