Habacuc 1:1-17
1 Ñaa nixĩ ga yema ore ga Cori ya Tupana norü orearü uruxü̃ ga Abacúmaxã nüxü̃ yaxuxü̃ ga yexguma nango̱xetügu.
2 Rü nüma ga Abacú rü ñanagürü: —Pa Corix ¿ñuxguxüratáta nixĩ i choxü̃ cuxĩnüxü̃ nax yexü̃cürü tagaãcü cuxna chacaechaxü̃ nax toxü̃ curüngü̃xẽẽxü̃ca̱x? Natürü i cuma rü tama choxü̃ cuxĩnü. ¿Rü ñuxguxüratáta i tagaãcü cumaxã nüxü̃ chixuechaxü̃ naxca̱x nax yanaxoxü̃ca̱x i ngẽma dai i totanüwa ngẽxmaxü̃? Natürü i cuma rü tama nua cuxũ nax nawa toxü̃ ícunguxü̃xẽẽxü̃ca̱x.
3 ¿Rü tü̱xcüü̃ choxü̃ nüxü̃ cudauxẽxẽ i ñaa taxü̃ i guxchaxü̃ rü chixexü̃ i guxü̃wama ngẽxmaxü̃? Rü choxü̃ ínachomaegu i duü̃xü̃gü i chixexü̃ ügüxü̃ rü máetagüxü̃. Rü guxü̃wama i duü̃xü̃gü rü nügümaxã nanue rü nügü nadai.
4 Rü duü̃xü̃gü rü tama aixcüma nagu namaxẽ i ngẽma Tupanaarü mugü rü tochixü̃anearü mugü. Rü ngẽma mugü i duü̃xü̃güétüwa idexaxü̃ rü tama naga naxĩnüe. Rü ngẽma duü̃xü̃gü i chixexü̃gu maxẽxü̃ rü tüxü̃ napoxcu ya yíxema mexü̃ ügüxe. Rü ngẽmaãcü ínayatoxẽẽgü i ngẽma aixcüma we̱xguxü̃ —ñanagürü.
Cori ya Tupanaarü ngãxü̃ga
5 Rü nüma ga Cori ya Tupana rü Abacúxü̃ nangãxü̃ rü ñanagürü: —¡Dücax, nüxü̃ pedau i ngẽma nachixü̃anegü i pexü̃ íchomaeguãchixü̃ nax ta̱xacü nüxü̃ ngupetüxü̃! ¡Rü nüxü̃ pedau rü peba̱i̱xãchie! Erü ngẽma tá chaxüxü̃ rü pema rü taxũchima peyaxõgü woo ega texé pemaxã nüxü̃ ixuxgu.
6 Rü choma rü tá ichanachigüxẽxẽ i ngẽma Cadéuanecüã̱xgü* nax guxü̃wama dai naxügüxü̃ca̱x. Rü nümagü rü duü̃xü̃gü i tama togü i duü̃xü̃güxü̃ ngechaü̃güxü̃ nixĩgü, rü ínamemaregü nax nayauxanegüãxü̃ca̱x i ngẽma naanegü i tama noxrü ixĩxü̃.
7 Rü niporaxüchi rü nixãũcümaxü̃chi, rü ngẽma norü mugüxicatama nixĩ i naga naxĩnüexü̃. Rü tama naga naxĩnüe i togü i mugü.
8 Rü norü cowarugü rü aixü̃ narüporamaegü, rü naixnecücüã̱x i airugüarü yexera nidürae. Rü norü churaragü i cowarugu ĩxü̃ rü muxü̃ inaxĩ. Rü nümagü rü ñoma ĩyü i naeü̃ca̱x yáxü̃wa ne ñaxü̃rüxü̃ nixĩgü.
9 Rü ngexta íyaxĩẽtanüxü̃wa rü nayachixexẽẽgü i guxü̃ma rü muü̃ ínanguxẽẽgü. Rü yíxema duü̃xẽgü ya tüxü̃ ínayauxü̃xe rü tamuxũchi ñoma naxnücü ya márpechinüwa ngẽxmacürüxü̃.
10 Rü nümagü rü to i nachixü̃anegüarü ãẽ̱xgacügügu nidaucüraxü̃ rü nüxü̃ nacugüe i ngẽma duü̃xü̃gü i tachigagüxü̃. Rü nüxü̃ nacugüe i ngẽma ĩanearü poxeguxü̃tápü̱x erü nacüwawa rü waixü̃mümaxã nanagünagügü nax ngẽmaãcü nagu nachocuxü̃ca̱x rü yapugüãxü̃ca̱x ya yima ĩane.
11 Rü ngexta ínachopetüxü̃wa rü ñoma buanecü ya poraemacü rü íxã̱ũ̱xẽmacürüxü̃ nixĩgü. Rü nümagü rü norü poragutama nayaxõgü, rü taxuxü̃ma i ta̱xacürü tomaxã natupanaã̱xgü —ñanagürü.
Abacú rü wenaxarü naxca̱x nidexa nax chixexü̃ ngupetüxü̃
12 Dücax, Pa Corix, Pa Chorü Tupanax ¿tama ẽ̱xna i cuma i guxü̃guma cungexmaechaxü̃? Erü cuma rü üünecü rü taguma yucü quixĩ. Pa Corix, Pa Chorü Poxü̃ruxü̃x, cuma nixĩ i pora nüxna cuxãxü̃ i ngẽma Cadéugü nax nawa cuyanguxẽẽxü̃ca̱x i ngẽma poxcu i tomaxã cuxueguxü̃.
13 Rü cumax, Pa Tupanax, nax aixcüma üünecü quixĩxü̃ rü tama yáxna namaxã cuxĩnü i ngẽma chixexü̃ rü tama namaxã cutaãxẽ i ngẽma duü̃xü̃gü i chixexü̃ ügüxü̃. ¿Rü ñuxũcürüwa i cunangexrü rü taxu ñacurügümare i ñu̱xma nax toxü̃ nada̱i̱xü̃ i ngẽma Cadéuanecüã̱xgü i torü yexera chixexü̃ ügüxü̃?
14 ¿Rü ta̱xacüca̱x nixĩ i cuma i ñoma choxnigü i márwa ngẽxmagüxü̃ rü naeü̃gü i ngearü ãẽ̱xgacüã́xü̃rüxü̃ tomaxã quixĩxü̃?
15 Rü ngẽma Cadéugü rü to i nachixü̃anecüã̱xgüxü̃ ínayauxü̃, ñoma wüxi i choxniexü̃ norü poxwamaxã rüe̱xna norü püchamaxã choxni íyauxü̃rüxü̃. Rü ngẽxguma wüxigu nanuãgu i choxni rü nüma rü nataãxẽ.
16 Rü ngẽmaca̱x i ngẽma choxniexü̃ rü norü püchaxü̃ rü norü poxwaxü̃ nicua̱xüxü̃ rü ãmaregü rü pumarate̱xe naxca̱x ínagu. Rü moxẽ nüxna naxã ya norü poxwa rü norü pücha, erü ngẽma poxwagagu rü püchagagu nixĩ i mexü̃ i õna nangṍxü̃ rü taguma nangewemüxü̃.
17 ¿Rü yadaxẽẽgüãxü̃ tá i ngẽma Cadéugü nax ñoma püchagu choxni iyaxuxü̃rüxü̃ duü̃xü̃güxü̃ ínayauxü̃xü̃? ¿Rü yadaxẽẽgüãxü̃ tá nax tama nüxü̃́ nangechaü̃tümüxü̃ãcüma nadaiãcuãxü̃ i wüxichigü i nachixü̃anegü?
Notas
^ 1:6 I Babiróniaanecüã̱x.
