Habacuc 2:1-20
2 Nüma ga Abacú rü ñanagürü: —Choma rü tá íchaxuãxẽ, ñoma wüxi i dauxü̃taexü̃rüxü̃, nax ngẽmaãcü nüxü̃ chacuáxü̃ca̱x rü ta̱xacümaxã tá choxü̃ nangãxü̃ ya Tupana naxca̱x i ngẽma naxca̱x íchaca̱xaxü̃ —ñachagürü.
2 Rü nüma ga Cori ya Tupana rü choxü̃ nangãxü̃ rü ñanagürü: —¡Wüxi i mürapewatachinügu naxümatü i ngẽma tá cuxü̃ chawéxü̃ nax ngẽmaãcü tauxchaãcü duü̃xü̃gü nüxü̃ daumatüxü̃ca̱x!
3 Rü ñu̱xma rü taxũta nawa nangu nax yanguxü̃ ga yema cuxü̃ chawéxü̃. Natürü taxũtáma nangupetümare nax yanguxü̃. ¡Cumax rü mea ínanguxẽxẽ ega woo tama paxa yanguxgu! Erü aixcüma tá ningu i ngẽxguma norü ngunexü̃wa nanguxgux.
4 ¡Rü naxümatü i ñaa ore! “Ngẽma duü̃xü̃gü i chixexü̃ ügüxü̃ rü nügü nicua̱xüü̃gü. Natürü yíxema chope̱xewa imexe rü tá tamaxẽ erü chomaxã tixaixcümagü” —ñanagürü.
Ngẽma Cadéuanecüã̱xgümaxã tá ngupetüxü̃chiga
5 Rü ngẽma Cadéuanecüã̱xgü rü nügü nicua̱xüü̃gü rü nanaxwa̱xegü nax ngẽma togü i duü̃xü̃gümaxã inacua̱xgüxü̃. Rü ngẽmaca̱x guxü̃guma naxca̱x nadaugü nax nügüme̱xẽwa nangẽxmagüxẽẽãxü̃ca̱x i ngẽma togü i nachixü̃anegü woo ngẽma naxügüxü̃ rü guxchaxü̃ naxca̱x ínanguxẽxẽ. Rü nümagü i ngẽma Cadéuanecüã̱xgü rü ñoma yurüxü̃ rü naxmaxü̃rüxü̃ taguma nüxü̃́ ningu i ngẽma naxme̱xwa ngẽxmagüxü̃. Rü nanaxwa̱xe nax guxü̃ma i nachixü̃anegü naxme̱xwa ngẽxmagüxü̃ nax ngẽmaãcü guxü̃ma i duü̃xü̃gümaxã inacu̱axgüxü̃ca̱x.
6 Natürü guxü̃ma i ngẽma nachixü̃anegü i ngẽma Cadéuanecüã̱xgü nügüme̱xẽwa ngẽxmagüxẽẽxü̃ rü tá wüxi i ngunexü̃gu ngẽma Cadéuanecüã̱xgüxü̃ nacugüe. Rü wiyaeãcüma tá ñanagürügü: —¡Cugümaxã nangechaü̃ erü ngẽma naxca̱x cungĩ́xü̃maxã cumuarü diẽruã̱x! ¿Rü ñuxguxüratáta nixĩ i nüxü̃ curüxoxü̃ nax cungĩ́echaxü̃ nax ngẽmaãcü cumuarü diẽruã́xü̃? —ñanagürügü.
7 Rü ngẽxguma taxũtáma nagu ícurüxĩnügu rü ngẽma duü̃xü̃gü i nüxü̃́ cungĩ́xü̃, rü tá cuxü̃tawa nangugü. Rü nümagü rü tá muü̃maxã cuxü̃ nidu̱xruxẽẽgü rü tá cuxna nanapuxü̃ i guxü̃ma i ngẽma cuxü̃́ ngẽxmaxü̃.
8 Dücax, Pa Cadéuanecüã̱xgü, pema rü muxü̃ma ga nachixü̃anegümaxã poraãcü chixexü̃ pexü, rü penadeãcu ga norü ĩanegü. Natürü i ñu̱xmax rü ngẽma nachixü̃anegü rü tá pexca̱x nügü nanutaque̱xe rü tá nüxí perü ĩanegü nadeãcugü yema pema penadeãcuxü̃rüxü̃. Rü ngẽmaãcü tá nüxü̃́ peyangutanüxẽxẽ ga yema máeta ga norü ĩanegüwa pexüxü̃.
9 ¡Rü pegümaxã pengechaü̃, i pema nax naxca̱x pengĩxü̃maxã penaxüãcuxü̃ ya pepata nax ngẽmamaxã pegü ípepoxü̃güxü̃ca̱x na̱xcha̱xwa i guxü̃ma i ãũcümaxü̃gü!
10 Natürü ngẽma chixexü̃ i pexüxü̃wa rü taxü̃ i ãne tá pegüca̱x ípenguxẽxẽ. Rü ngẽxguma peyanaxoxẽẽgügu i muxü̃ma i nachixü̃anegü rü pegüca̱xtátama ípenangu̱xẽxẽ i taxü̃ i chixexü̃.
11 Rü woo yima omütagü rü nutagü i perü ĩanegüarü poxeguxü̃wa ngẽxmagüxü̃ rü tá pechiga aixta naxüe nax pexü̃ yaxugüexü̃.
12 Rü wüxi i taxü̃ i ãũcümaxü̃wa pengẽxmagü, Pa Cadéuanecüã̱xgüx, yerü penadai ga duü̃xü̃gü rü penapuxü̃ ga norü yemaxü̃gü nax yemaacü perü ĩanegü pexügüxü̃ca̱x.
13 Rü nüma ya Cori ya Tupana ya Guxãétüwa Ngẽxmacü rü tá nayanaxoxẽxẽ i ngẽma perü puracü i natüca̱xma nagu pipaexü̃. Erü guxü̃ma i ngẽma pexüxü̃ rü üxüwa tá nayagu.
14 Rü ngẽma Cori ya Tupanaarü üüne rü tá ñoma i naane namaxã nanapa ñoma már nax meama dexámaxã yapaxü̃rüxü̃.
15 ¡Rü pegümaxã pengechaü̃, Pa Cadéugüx! Erü perü chixexü̃maxã penachixexẽxẽ i ngẽma nachixü̃anegü i pexna ngaicamagüxü̃ ñoma bínumaxã penangaxexẽẽxü̃rüxü̃. Rü ngẽmaãcü pepe̱xewa ãne nüxü̃ pingexẽẽgü ñoma wüxi i duü̃xü̃ i ngexchiruãcüma ãne ingexü̃rüxü̃.
16 Rü woo duü̃xü̃gü pexü̃ nicua̱xüü̃gü i ñu̱xmax, natürü nawa tá nangu nax taxü̃ i ãne tá pingegüxü̃. Erü nüma ya Cori ya Tupana rü tá duü̃xü̃güpe̱xewa pexü̃ naxãneexẽxẽ ñoma wüxi i duü̃xü̃ i ngexchiruãcüma ãne ingexü̃rüxü̃. Rü ngẽmaãcü perü taãxẽ rü ãnexü̃ tá pexü̃́ nananguxuchi.
17 Rü yema chixexü̃ ga Líbanuarü máxpü̱xanexü̃wa pexüxü̃ rü tá pegutátama nangu. Rü ngẽxgumarüxü̃ ta pegutátama nangu i ngẽma nax penadaixü̃ ga yema naeü̃gü ga yéma yexmagüxü̃. Rü ngẽma guxchaxü̃gü rü tá pegu nangu nagagu nax nagu pepogüexü̃ ga yema nachixü̃anearü ĩanegü rü penadaixü̃ ga norü duü̃xü̃gü.
18 Rü wüxi i naxchicüna̱xã i naiwa üxü̃ ¿rü ta̱xacüwa namexü̃ ega marü yanguxgu? ¿Rü ta̱xacüwa namexü̃ i wüxi i tupananetachicüna̱xã i wüxi i doramare ixĩxü̃? Rü ngẽma tupananetachicüna̱xãgü rü tama nidexagü. ¿Rü ñuxãcü nüxü̃́ yaxõõxü̃ ya yima yatü ya nümatama naxücü i ngẽma naxchicüna̱xã?
19 Rü wüxi i ngechaü̃ nixĩ i tümaca̱x ya yíxema norü üruxü̃ erü ñatagürü nüxü̃: ¡Naba̱i̱xãchi! ñatagürü, rü wüxi ya nuta ya tama idexacüxü̃ tamu rü ñatagürü: ¡Inachi! ñatagürü. ¿Rü duü̃xü̃gümaxã yadexagüxü̃ yixĩxü̃ i ngẽma naxchicüna̱xãgü? Tama nidexagü erü ningearü maxü̃ã̱x woo nax úirumaxã rü diẽrumümaxã yaxãxü̃nexü̃.
20 Natürü nüma ya Cori ya Tupana ya Maxü̃cü rü napata ya üünenewa nangẽxma. Rü guxãma i pema i ñoma i naanecüã̱x rü name nixĩ i nape̱xewa pechianegümare.
