Jeremías 1:1-19
1 Ñaa nixĩ ga Yeremíaarü ore. Rü nüma ga Yeremía rü chacherdóte ga Irichía nane nixĩ, rü ĩane ga Anatógu naxãchiü̃ ga Bẽyamíü̃tanüxü̃arü naanewa.
2 Rü yexguma Amóx nane ga Yochía rü marü 13 ga taunecü ãẽ̱xgacü yixĩxgu ga Yudáanewa, rü nüma ga Tupana rü Yeremíamaxã nidexa.
3 Rü yexgumarüxü̃ ta Yeremíamaxã nidexa ga yexguma Yochía nane ga Yoaquíü̃ ãẽ̱xgacü ixĩxgu ga Yudáanewa. Rü yemaacü Yeremíamaxã nidexa ñu̱xmata nai ga Yochía nane ga Chedequía rü 11 ga taunecü yanguxẽẽgu nax ãẽ̱xgacü yixĩxü̃ ga Yudáanewa. Rü yexguma gumá taunecüarü 5 ga tauemacüwa nanguxgu nixĩ ga Yerucharéü̃cüã̱x ga duü̃xü̃gü ga to ga nachixü̃anewa nagagüãxü̃.
Cori ya Tupana rü Yeremíaxü̃ naxuneta norü puracüca̱x
4 Nüma ga Cori ya Tupana rü chomaxã nidexa rü ñanagürü choxü̃:
5 —Yexguma taxũta cuxü̃ chango̱xẽẽgu rü woetama marü choma cuxü̃ chaxuneta. Rü naxü̃pa nax cubuxü̃ rü choma rü marü cuxü̃ chayaxu rü nachixü̃anegüarü orearü uruxü̃ cuxü̃ chixĩxẽxẽ —ñanagürü.
6 Rü yexguma ga chomax rü chanangãxü̃ rü ñachagürü: —Acha̱xa, Pa Corix, Pa Tupanax, choma rü changextüxüxüchi rü tama nüxü̃ chacua̱x nax mea chidexaxü̃ —ñachagürü.
7 Natürü nüma ga Cori ya Tupana rü choxü̃ ñanagürü: —¡Taxṹ i nüxü̃ quixuxü̃ nax cungextü̱xüxü̃! Rü chanaxwa̱xe i cuxü̃ íchamuxü̃wa nax cuxũxü̃. Rü tá nüxü̃ quixu i ngẽma choma cuxü̃ chamuxü̃ nax nüxü̃ quixuxü̃.
8 ¡Rü taxṹ i texéxü̃ cumuü̃xü̃! Erü choma rü tá cuxü̃tawa changexma nax cuxna chadauxü̃ca̱x. Rü choma ya Cori ya Tupana nixĩ i cumaxã nüxü̃ chixuxü̃ i ñaa chorü ore —ñanagürü.
9 Rü ñu̱xũchi nüma ya Cori ya Tupana rü chaua̱x ningõgü rü ñanagürü choxü̃:
10 —Ñu̱xma i choma rü cuxna chanaxã i pora nax cuyaxucu̱xẽgüxü̃ca̱x i ngẽma ãẽ̱xgacügü rü duü̃xü̃gü i guxü̃ i nachixü̃anecüã̱xgü. Rü ngẽxguma tama naga naxĩnüegu i ngẽma chorü ore i namaxã nüxü̃ quixuxü̃, rü choma rü choxü̃́ nangẽxma i pora nax chanamuxü̃ca̱x i norü uanügü nax nagu napogüexü̃ca̱x i norü ĩanegü rü ínawoxü̃ãxü̃ca̱x i norü duü̃xü̃gü rü ngẽmaãcü iyanaxoxü̃ca̱x i ngẽma nachixü̃anegü. Natürü ngẽma naga ĩnüexü̃ i chorü ore i namaxã nüxü̃ quixuxü̃ rü ngẽxgumarüxü̃ ta choxü̃́ nangẽxma i pora nax wena ichanachixẽẽxü̃ rü chanatachigaxẽẽxü̃ —ñanagürü ga Tupana.
11 Rü nüma ya Cori ya Tupana rü choxna naca rü ñanagürü: —Pa Yeremíax ¿ta̱xacü nixĩ i nüxü̃ cudauxü̃? —ñanagürü. Rü choma chanangãxü̃ rü ñachagürü: —Nüxü̃ chadau i wüxi i arméndrachacüxü i paxa dauxü̃ i norü o —ñachagürü.
12 Rü nüma ya Cori ya Tupana rü choxü̃ ñanagürü: —Aixcüma nixĩ i ngẽma nüxü̃ cudauxü̃. Rü tá chaxuãxẽ nax paxa yanguxü̃ca̱x i ngẽma chorü ore —ñanagürü.
13 Rü nüma ga Cori rü wena chomaxã nidexa rü choxna naca rü ñanagürü: —¿Ta̱xacü nixĩ i nüxü̃ cudauxü̃? —ñanagürü. Rü choma rü chanangãxü̃ rü ñachagürü: —Nüxü̃ chadau ya wüxi ya buetare ya idocacü ya nórtewa ngẽxmacü rü súrguama baãcuchaü̃cü i Yudáarü naanewa —ñachagürü.
14 Rü yexguma ga nüma ga Cori ya Tupana rü chomaxã nüxü̃ nixu rü ñanagürü: —Ngẽma taxü̃ i guxchaxü̃ i nórtewaama ixügüxü̃ rü tá nüxna nangu i guxü̃táma i duü̃xü̃gü i nua Yudáanewa maxẽxü̃.
15 Rü choma ya Cori ya Tupana rü aixcüma nüxü̃ chixu rü tá naxca̱x changema i guxü̃ma i nachixü̃anegüarü ãẽ̱xgacügü i nórtewaama ngẽxmagüxü̃. Rü nua Yudáanewa tá naxĩ. Rü ngẽma ãẽ̱xgacügü rü Yerucharéü̃arü poxeguxü̃arü ĩã̱xgu tá nanangutaque̱xexẽxẽ i norü churaragü rü tá ínanachomaeguãchi ya yima ĩanearü poxeguxü̃. Rü tá naxca̱x ínayaxüãchi ya yima naigü ya ĩanegü ya Yudáanewa ngẽxmagüne.
16 Rü ngẽma tá nixĩ i ngẽma poxcu i namaxã chaxueguxü̃ i ngẽma duü̃xü̃gü i chixexü̃ ügüxü̃ rü choxna ixĩgachixü̃. Erü nüxü̃ nicua̱xüü̃gü rü pumarate̱xe naxca̱x ínagugü i ngẽma togü i nachixü̃anegüarü tupanachicüna̱xãgü i nümatama ügüxü̃.
17 ¡Rü ñu̱xma i cumax, rü inachi rü cugü naporaxẽxẽ, rü ngẽma duü̃xü̃gütanüwa naxũ rü namaxã nüxü̃ yarüxu i ngẽma choma cumaxã nüxü̃ chixuxü̃! ¡Rü taxṹ i nüxü̃ cumuü̃xü̃! Erü ngẽxguma taxũtáma ngẽma cumaxã nüxü̃ chixuxü̃ãcüma cunaxüxgux, rü choma rü tá ngẽma duü̃xü̃güpe̱xewa muü̃maxã cuxü̃ chidu̱xruxẽxẽ.
18 Rü ñu̱xma i chomax, rü pora cuxna chaxã. Rü ñoma wüxi ya ĩane ya meama ípoxegunerüxü̃ rü wüxi ya caxta ya fierunaxca̱xrüxü̃, rü ñoma poxeguxü̃ i bróũchenaxca̱xrüxü̃ cuxü̃ chixĩxẽxẽ nax ngẽmaãcü tama cumuü̃ãcüma cuxunagüxü̃ i chorü ore nape̱xewa i Yudáanecüã̱xarü ãẽ̱xgacügü rü chacherdótegü rü guxü̃ma i duü̃xü̃gü i Yudáanewa ngẽxmagüxü̃.
19 Rü nümagü rü tá cumaxã nanueama, natürü taxũtáma cuxü̃ narüporamaegü. Erü choma rü tá chacuxü̃tagu rü cuxna chadau rü cuxü̃ íchapoxü̃. Rü chomatama ya Cori ya Tupana nixĩ i nüxü̃ chixuxü̃ i ñaa chorü ore —ñanagürü.
