Jeremías 10:1-25
10 ¡Pa Iraétanüxü̃x, iperüxĩnüe i ñaa ore i Cori ya Tupana pemaxã nüxü̃ ixuxü̃!
2 Rü nüma ya Cori ya Tupana rü ñanagürü: —¡Taxṹ i nacümagügu pexĩxü̃ i ngẽma togü i nachixü̃anecüã̱xgü! ¡Rü taxṹ i namaxã peba̱i̱xãchiexü̃ ega dauxü̃wa ta̱xacüxü̃ peda̱u̱xgu ngẽma togü i nachixü̃anecüã̱xgü namaxã baixãchiexü̃rüxü̃!
3 Rü ngẽma togü i nachixü̃anecüã̱xgü ixõgüxü̃ i naxchicüna̱xãgü rü taxuwama name. Nümagü rü naixnecüwa wüxi rü naixpüta nidaegü. Rü wüxi i nüxü̃ cuáxü̃ rü norü purumóü̃maxã nanaxü i ngẽma naxchicüna̱xã.
4 Rü ngẽmawena rü diẽrumümaxã rü úirumaxã nananga̱xãẽgü. Rü ñu̱xũchi itapuagümaxã ínayapotagü nax tama yawáxü̃ca̱x.
5 Rü ngẽma naxchicüna̱xãgü rü ñoma naanegu pugüxü̃ i duü̃xü̃chicüna̱xãgü i werigüarü muü̃xẽẽruü̃rüxü̃mare nixĩgü. Rü tama nidexagü, rü nanaxwa̱xe nax yangegüxü̃ erü taxuacüma inaxĩ. ¡Rü taxṹ i nüxü̃ pemuüẽxü̃! Erü taxúexü̃ma nachixexẽxẽ, rü taxúeca̱x mexü̃ naxü —ñanagürü.
6 Rü nüma ga Yeremía rü ñanagürü: —Pa Corix, nataxuma i to i cumaxã wüxiguxü̃. Cuma rü cupora rü ngẽma cuéga rü natachiga rü napora.
7 Rü tataxuma ya texé i ñoma i naanewa i tama cuxü̃ muü̃xe Pa Guxü̃ i Nachixü̃anearü Ãẽ̱xgacüx. Rü cumawaxi nixĩ i namexü̃ nax cuxü̃ tamuü̃exü̃. Rü natanüwa i guxü̃ma i ngẽma nüxü̃ cua̱xüchixü̃ rü ãẽ̱xgacügü ixĩgüxü̃ i ñoma i naanewa ngẽxmagüxü̃, rü nataxuma i to i cumaxã wüxiguxü̃.
8 Rü guxü̃ma i ngẽma duü̃xü̃gü i ngẽma naxchicüna̱xãgüwe rüxĩxü̃ rü naechitamare namaxẽ, rü taxuxü̃ma i cua̱x nüxü̃́ nangẽxmagü. Rü ngẽma naxchicüna̱xãgü i naiwa naxügüxü̃ rü taxuxü̃ma nanangúexẽxẽ.
9 Rü ngẽma naxchicüna̱xãgü rü Tárchixwa ne naxü̃ i diẽrumünaxca̱x nixĩgü, rü Ufáwa ne naxü̃ i úirunaxca̱x nixĩgü. Rü yatügü i naxchicüna̱xãarü üxü̃ cuáxü̃ rü yatügü i úiruwa rü diẽrumüwa puracüxü̃ nixĩ i naxügüxü̃. Rü ñu̱xũchi nayaxüxchiru namaxã i naxchiru i dauxracharaxü̃ rü daucharaxü̃. Rü guxü̃ma i ngẽma naxchicüna̱xãgü rü yatügü i norü üxü̃ icua̱xüchixü̃ nixĩ i ínaxüxü̃xü̃.
10 Natürü, Pa Corix, cuma nixĩ ya aixcüma Tupana ixĩcü. Rü cuma nixĩ ya Tupana ya Maxü̃cü ya guxü̃guma ãẽ̱xgacü quixĩxü̃. Rü ngẽxguma cunuxgu rü nidu̱xru i ñoma i naane. Rü ngẽma nachixü̃anecüã̱xgü rü tama namaxã naporae ega cunuxgu —ñanagürü.
11 Rü Tupana rü ñanagürü: —¡Pa Iraétanüxü̃x, ngẽma duü̃xü̃gü i tama choxü̃ cua̱xgüxü̃maxã nüxü̃ pixu rü ngẽma tupananetachicüna̱xãgü i tama dauxü̃guxü̃ i naane ügüxü̃ rü tama ñoma i naane ügüxü̃, rü tá inayarüxogü i ñoma i naanewa, rü bai i wüxi tá íyaxüxü̃ i daxũguxü̃ i naanetüü̃wa! —ñanagürü.
Wiyae i namaxã Tupanaxü̃ yacua̱xüü̃güxü̃
12 Cori ya Tupana rü norü poramaxã nanaxü ga ñoma i naane. Rü norü cua̱xmaxã nanamexẽxẽ. Rü yexgumarüxü̃ ta norü cua̱xmaxã nayangeechi ga daxũguxü̃ i naane.
13 Rü ngẽxguma yadexaxgu rü dauxü̃wa nayacuxcuxẽxẽ ya pucü. Rü ñoma i naane íyacuáxü̃wa ngẽxmagüxü̃ i caixanexü̃gü rü ínanangu̱xẽxẽ. Rü pucügu rü ãẽmacügümaxã nanangóonexẽxẽ. Rü ngẽma ngextá namaxã ínanguxü̃xü̃wa rü inanamuãchi ya buanecü.
14 Rü guxü̃ma i duü̃xü̃gü rü taxuxü̃ma nacua̱x rü naechitamare namaxẽ. Rü ngẽma naxchicüna̱xãgü rü tama tüxü̃ narüngü̃xẽxẽ ya yíxema naxügüxe. Rü ngẽma naxchicüna̱xãgü rü womüxẽẽruü̃mare nixĩgü, erü ningearü maxü̃ã̱x.
15 Rü ngẽma naxchicüna̱xãgü rü taxuwama name, rü cugüruü̃mare nixĩgü. Rü ngẽxguma Cori ya Tupana ínanguxẽẽgü i poxcu, rü tá inayarüxo.
16 Natürü nüma ya yima Acóbuarü Tupana ya naxücü i guxü̃ma i ñu̱xma ngẽxmagüxü̃ rü namaxü̃. Rü ngẽmaãcü tama namaxã nawüxigu i ngẽma naxchicüna̱xãgümare. Rü nüma ya Cori ya Tupana nixĩ i Iraétanüxü̃xü̃ naxunetaxü̃ nax norü duü̃xü̃gü yixĩgüxü̃ca̱x.
Cori ya Tupana rü norü naanewa tá ínanawoxü̃ i Iraétanüxü̃
17 Rü pema, Pa Iraétanüxü̃, rü marü pexü̃ ínachomaeguãchi i perü uanügü. ¡Rü penade i ngẽma perü ngẽmaxü̃gü!
18 Erü nüma ya Cori ya Tupana rü ñanagürü: —Ñu̱xma rü yaxü̃watáma chanamugü i ñaa nachixü̃anecüã̱xgü i duü̃xü̃gü. Rü guxchaxü̃wa tá chanangexmagüxẽxẽ, rü tá chanangexrü nax norü uanügü ínayauxü̃xü̃ca̱x —ñanagürü.
19 Rü nüma ga Yeremía rü ñanagürü: —Chaugümaxã changechaxü̃ rü poraãcü ngúxü̃ chinge. Rü ngẽma chorü o̱xri rü nangearü üxüxü̃ã̱x. Rü ngẽmaca̱x tá namaxã chaporaama i ñaa ngúxü̃ ichingexü̃.
20 Rü chopatagü ya naxchirunaxca̱x rü marü nichixe, rü guxü̃ma i ngẽma nacunügü rü nicauyegü. Rü chaunegü rü nua choxü̃ nata̱xgü rü ñu̱xma rü marü natauxe. Rü marü tataxuma nax texe wena choxü̃ naxüxü̃ ya yima chopatagü ya naxchirunaxca̱x ixĩgüne. Rü marü tataxuma nax texe choxü̃ yangeechigüxü̃ i naxchirugü.
21 Rü ngẽma ñaa duü̃xü̃gümaxã icua̱xgüxü̃ rü naechitamare namaxẽ, rü tama Cori ya Tupanaca̱x nadaugü. Rü ngẽmaca̱x nixĩ i nagu yanachixegüxü̃, rü ñu̱xũchi nawoonexü̃ i ngẽma norü duü̃xü̃gü.
22 ¡Dücax, Iperüxĩnüe! Nua nangu i wüxi i ore. Rü wüxi i nachixü̃ane i nórtewaama ngẽxmaxü̃wa inanaxũ i wüxi i taxü̃ i naga i ãũcümaxü̃. Rü ngẽma nachixü̃anearü churaragü rü tá nagu napogüe i Yudáanearü ĩanegü nax wüxi i chianexü̃ yaxĩxü̃ca̱x i ngexta ngowagüxicatama nawa maxẽxü̃.
23 Pa Corix, choma nüxü̃ chacua̱x nax wüxichigü i duü̃xü̃ rü tama norü maxü̃arü yora nax yixĩxü̃, rü tama nüxü̃ nacua̱x nax ta̱xacü tá nüxü̃ ngupetüxü̃.
24 ¡Rü toxü̃ íyarüwe̱xãchixẽxẽgü, natürü tama cunuãcüma nax tama tayuexü̃ca̱x!
25 ¡Ẽcü curü numaxã napoxcue i ngẽma duü̃xü̃gü i tama cuxü̃ cua̱xgüchaü̃xü̃ rü tama cuxü̃́ yaxõgüxü̃! Erü ngẽmagü nixĩ i Acóbutanüxü̃xü̃ daixü̃ rü noxtacüma iyanaxoxẽẽgüaxü̃. Rü ngẽmagü nixĩ i nachitaxü̃xica ngéma yaxǘgüxü̃ i ngẽma nachixü̃ane —ñanagürü.
