Jeremías 11:1-23
11 Nüma ya Cori ya Tupana rü Yeremíamaxã nidexa rü ñanagürü choxü̃:
2 11:2-3 —Ngẽma Iraétanüxü̃ rü chanaxwa̱xe nax mea nagu naxĩnüexü̃ i ngẽma uneta i chomaxã naxügüxü̃ nax ta̱xacüchiga yixĩxü̃ i ngẽmawa namaxã nüxü̃ chixuxü̃. ¡Rü ngẽma Yudáanecüã̱xgümaxã, rü Yerucharéü̃cüã̱xgümaxã idexa! ¡Rü namaxã nüxü̃ ixu nax choma i Iraétanüxü̃arü Tupana rü nüxü̃ chixu nax chixri tá tüxü̃ nangupetüxü̃ ya yíxema tama naga ĩnüxe i ngẽma uneta!
3 Nüü̃ nadau 11:2
4 Rü yexguma Equítuanewa nayexmagügu ga nũxcümaü̃güxü̃ ga norü o̱xigü rü poraãcü ngúxü̃ ningegü. Yerü yema nachixü̃anecüã̱x rü ñoma wüxi ya üxü i fieruarü dexexü̃ruü̃rüxü̃ nixĩ naxca̱x ga yema duü̃xü̃gü. Rü yexguma yema naanewa íchanagaxü̃gu rü ñaãcü namaxã ichaxuneta rü ñachagürü nüxü̃: “¡Chauga pexĩnüe, rü penaxü̱x i guxü̃ma i ngẽma choma pexü̃ chamuxü̃! Rü ngẽxguma i pema rü chorü duü̃xü̃gü tá pixĩgü rü choma rü tá perü Tupana chixĩ.
5 Rü ngẽxguma chi pema chauga pexĩnüegu, rü choma rü tá chayanguxẽxẽ i ngẽma uneta ga nũxcümaü̃güxü̃ ga perü o̱xigümaxã chaxueguxü̃ nax nüxna chanaxãgüxü̃ i wüxi i naane. Rü ngẽma naane nixĩ i ñaa naane i ñu̱xma nawa pengẽxmagüxü̃ i ngextá mexü̃ i õna rü lechi rü ira ñoma dexárüxü̃ taguma ítaxuxü̃wa” —ñanagürü ga Tupana. Rü yexguma ga choma ga Yeremía rü chanangãxü̃ rü ñachagürü: —Ngẽmaãcü yixĩ, Pa Corix —ñachagürü.
6 Rü yexguma ga Cori ya Tupana rü choxü̃ ñanagürü: —¡Yudáanearü ĩanegüwa, rü Yerucharéü̃arü namagüwa duü̃xü̃gümaxã nüxü̃ yarüxu i ñaa ore i ñaxü̃: “Inaxĩnüe nax ta̱xacüchiga yixĩxü̃ i tüxü̃ namuxü̃ i ñaa uneta, rü ñu̱xũchi naga naxĩnüe!
7 Rü yexguma Equítuanewa íchanagaxü̃gu ga yema nũxcümaü̃güxü̃ ga perü o̱xigü rü namaxã nüxü̃ chixu nax chauga naxĩnüexü̃ca̱x. Rü yexgumacürüwa namaxã nüxü̃ chixuecha ñu̱xmata ñoma i ngunexü̃wa nangu.
8 Natürü ga nümagü rü tama chauga naxĩnüechaü̃, rü yemaca̱x nanaxügü ga yema chixexü̃gü ga naãẽwa nagu naxĩnüexü̃. Rü tama nayanguxẽẽgüchaü̃ ga yema mugü ga choma namaxã nüxü̃ chixuxü̃, rü yemaca̱x nixĩ ga naxca̱x íchananguxẽẽxü̃ ga yema poxcu ga yema unetawa namaxã nüxü̃ chixuxü̃” —ñanagürü.
9 Rü yexguma ga Cori ya Tupana rü chomaxã nüxü̃ nixuchigüama rü ñanagürü choxü̃: —Ngẽma Yudáanecüã̱xgü i duü̃xü̃gü, rü ñu̱xũchi ngẽma Yerucharéü̃cüã̱xgü rü chomaxã nanue.
10 Rü naxca̱x nawoegu ga yema pecadugü ga nũxcümaü̃güxü̃ ga norü o̱xigü ügüxü̃, rü yemaca̱x tama chauga naxĩnüechaü̃ rü tupananetachicüna̱xãgüwe narüxĩ rü nüxü̃ nicua̱xüü̃gü. Rü yemaacü ga yema duü̃xü̃gü ga Iraéanecüã̱xgü rü Yudáanecüã̱xgü rü nüxü̃ naxoe ga yema uneta ga nũxcümaü̃güxü̃ ga norü o̱xigümaxã nüxü̃ chixuxü̃.
11 Rü ngẽmaca̱x tá naxca̱x íchananguxẽxẽ i wüxi i guxchaxü̃ i taxũtáma na̱xcha̱xwa yabuxmüxü̃. Rü woo aita naxüegu rü chorü ngü̃xẽẽca̱x ínacagügu rü taxũtáma nüxü̃ chaxĩnü. Rü chomatama ya Cori ya Tupana nixĩ i nüxü̃ chixuxü̃ i ngẽma ore.
12 Rü ngẽxguma i ngẽma Yudáanecüã̱xgü rü ngẽma Yerucharéü̃cüã̱xgü i duü̃xü̃gü rü tá ngü̃xẽxẽca̱x nüxna nayacagü i ngẽma tupananetachicüna̱xãgü i pumarate̱xe naxca̱x yagugüxü̃. Natürü ngẽma tupananetachicüna̱xãgü rü taxũtáma ínanapoxü̃gü i ngẽxguma ngẽma guxchaxü̃ naxca̱x ínguxgu.
13 Rü cumax, Pa Yudáanex, rü curü ĩanegürüxü̃ namu i curü tupananetachicüna̱xãgü. Rü ngẽma Yerucharéü̃arü namagü i muxü̃rüxü̃ namu i ngẽma ãmarearü guruü̃gü i nawa Baáca̱x pumarate̱xe yagugüxü̃.
14 Rü ngẽmaca̱x i cumax, Pa Yeremíax, ¡rü taxṹ i naxca̱x cuyumüxẽxü̃ i ñaa duü̃xü̃gü! ¡Rü taxṹ i choxü̃ naxca̱x cuca̱a̱xü̃xü̃ nax nüxü̃ charüngü̃xẽxẽxü̃ca̱x! Erü ngẽxguma guxchaxü̃ naxca̱x ínguxgu, rü choma rü taxũtáma nüxü̃ chaxĩnü woo chorü ngü̃xẽxẽca̱x ínacagügu.
15 Pa Iraétanüxü̃ ya Pexü̃ Changechaü̃güxe, rü ¿ta̱xacüca̱x chopatagu naxca̱x pedaugüxü̃ i chorü ngü̃xẽxẽ nawena nax taxü̃ i chixexü̃ chope̱xewa pexügüxü̃? ¿Rü pema nagu perüxĩnüegu rü ngẽma nax chíxü̃ rü namachi cha̱u̱xca̱x pigugüxü̃gagu tá pexna nixũgachi i ngẽma guxchaxü̃ nax ngẽmaãcü na̱xcha̱xwa pibuxmüxü̃ca̱x?
16 Rü choma ya Cori ya Tupana rü wüxi i oribu i baxcaxü̃ imearü oṍxü̃ãcü pexü̃ chaxu. Natürü i ñu̱xma rü ãẽmacü ya poracümaxã tá íchanagu i cuatügü, rü tá nixae i cuchacüügü.
17 Rü choma ya Cori ya Tupana ya Guxãétüwa Ngẽxmacü nixĩ ga noxri ñaa naanewa pexü̃ chayexmagüxẽẽxü̃. Natürü yema chixexü̃ ga pexügüxü̃gagu, Pa Iraéanecüã̱xgüx rü Pa Yudáanecüã̱xgüx, rü pexca̱x íchananguxẽxẽ i guxchaxü̃ i ñu̱xma. Yerü chope̱xewa rü taxü̃ ga chixexü̃ pexü yexguma Baáca̱x pumarate̱xe pigugügu —ñanagürü ga Cori ya Tupana.
Yeremíaarü uanügü rü nayama̱xgüchaü̃
18 Rü nüma ga Cori ya Tupana rü choxü̃ nüxü̃ nacua̱xẽxẽ nax yema chorü uanügü rü wüxi ga chixexü̃ cha̱u̱xca̱x ínamexẽẽgüxü̃. Natürü nüma ga Tupana rü choxü̃ ningo̱xnaãẽxẽxẽ nax yemaacü nüxü̃ chicua̱xãchixü̃ca̱x.
19 Rü noxri ga choma rü taxuguma charüxĩnü ñoma wüxi i carnéruxacü i norü ma̱xchicawa nagagüxü̃rüxü̃ rü tama nüxü̃ chacua̱x nax wüxi i chixexü̃ cha̱u̱xca̱x ínamexẽẽgüxü̃. Rü yema uanügü rü chauchiga nidexagü rü nügümaxã ñanagürügü: —Ngĩxã tayadaxüchi i ngẽma nai i nanetü i baxcaxüchixü̃, rü wüxicana tayanaxoxẽxẽ natanüwa i ngẽma ñoma i naanewa maxẽxü̃ nax ngẽmaãcü taxúema nüxna cua̱xãchixü̃ca̱x —ñanagürügü.
20 Natürü i cumax Pa Corix, Pa Tupana ya Guxãétüwa Ngẽxmacüx, rü wüxi ya ãẽ̱xgacü ya mecü quixĩ. Cuma rü aixcüma nüxü̃ cucua̱x nax mea cunangugüxü̃ i wüxichigüarü maxü̃. ¡Rü choxü̃ nüxü̃ nadauxẽxẽ nax ñuxãcü tá cunapoxcuexü̃ i ngẽma duü̃xü̃gü! Erü marü cumaxã nüxü̃ chixu i chorü guxchaxü̃ rü cuxme̱xwa chanangexmaxẽxẽ i ngẽma.
21 Rü yema Anatócüã̱x ga duü̃xü̃gü ga naxca̱x daugüxü̃ nax choxü̃ yama̱xgüxü̃, rü choxna nanachu̱xgü nax tama Cori ya Tupanaégagu chidexaxü̃ca̱x nax yemaacü tama choxü̃ yama̱xgüxü̃ca̱x.
22 Rü nüma ya Cori ya Tupana ya Guxãétüwa Ngẽxmacüx rü ñanagürü nüxü̃: —Choma rü tá wüxi i guxchaxü̃ naxca̱x íchanguxẽxẽ. Rü guxü̃ma i norü ngextü̱xücügü rü daigu tá nayue, rü yíxema nanegü rü naxacügü rü taiyamaxã tá tayue.
23 Nümagü rü tá bai i wüxi ínayaxü. Erü tá ínangu i ngunexü̃ i nagu chapoxcuexü̃ i ngẽma Anatóarü duü̃xü̃güx. Rü naxca̱x tá íchananguxẽxẽ i wüxi i taxü̃ i guxchaxü̃ i ãũcümaxü̃ —ñanagürü.
