Jeremías 12:1-17
12 Rü Yeremía rü Cori ya Tupanaxü̃ ñanagürü: —Pa Corix, ngẽxguma cumaxã chaporagagu, rü cuma rü guxü̃guma nawe̱xgu i ngẽma namaxã choxü̃ cungãxü̃xü̃. Rü ngẽmaca̱x cuxna chacaxchaü̃ nachiga i ngẽma ñoma i naanewa ngupetüxü̃. ¿Rü ta̱xacüca̱x nixĩ i mea nüxü̃ nangupetügüxü̃ i ngẽma chixexü̃gu maxẽxü̃? ¿Rü ta̱xacüca̱x nataãẽgü i ngẽma chixri maxẽxü̃?
2 Cuma rü wüxi i nanetürüxü̃ icunatogü, rü nümagü rü narüxügüchúma̱xã, rü ñu̱xũchi nayae rü nixo̱x. Rü nümagü rü naã̱xmaxã cuxü̃ nicua̱xüü̃gü, natürü naãẽwa rü yáxü̃wama cuxü̃ nangẽxmagü.
3 Natürü i cumax, Pa Corix, rü choxü̃ cucua̱x, rü choxü̃ cudau, rü nüxü̃ cucua̱x i ngẽma cumaxã nagu charüxĩnüxü̃. ¡Rü ngẽma duü̃xü̃gü rü carnérugü i norü daichícaxü̃wa nagagüxü̃rüxü̃ ngéma nagagü, rü nagu yaxümatü i ngẽma ngunexü̃ i nagu tá cunada̱i̱xü̃!
4 ¿Rü ñuxgura tá ta iyanaxoxü̃ nax yapagüanexü̃, rü nayuexü̃ i maxẽgü i naanewa rüxügüxü̃? Rü naeü̃gü, rü werigü rü niyueetanü nagagu i ngẽma chixexü̃ i ñaa nachixü̃anecüã̱xgü ügüxü̃. Rü nümagü nagu naxĩnüegu rü tama nüxü̃ cudau i ngẽma chixexü̃ i naxügüxü̃ —ñanagürü ga Yeremía.
Cori ya Tupana rü Yeremíaxü̃ nangãxü̃
5 Rü nüma ga Cori ya Tupana rü Yeremíaxü̃ nangãxü̃ rü ñanagürü: —Ngẽxguma duü̃xü̃gü i nacutümaxã ixüãchixü̃na curüpaxgu ¿rü ñuxãcü tá nüxü̃ curüporamaexü̃ i ngẽma duü̃xü̃gü i cowarumaxã ixüãchixü̃? Rü ngẽxguma tauxchaxü̃wa cungexmagu rü cutaãxẽ, ¿natürü ta̱xacü tá cuxü i ngẽxguma guxchaxü̃ i taxü̃wa cungexmagu?
6 Rü woo ngẽma cuenexẽgü rü woo cupatacüã̱xgü rü cuechita chixexü̃ cumaxã nixugüe. ¡Rü taxṹ i nüxü̃́ cuyaxõxü̃ ega woo mexü̃ i dexamaxã cumaxã yadexagügu! —ñanagürü ga Cori ya Tupana.
Cori ya Tupana rü nangechaxü̃ naxca̱x i ngẽma norü duü̃xü̃güxü̃ ngupetüxü̃
7 Cori ya Tupana rü ñanagürü: —Marü nüxna chixũgachi i chorü duü̃xü̃gü, rü nüxü̃ chaxo ga yema choxrügüchire̱x ixĩgüxü̃. Rü norü uanügüme̱xẽwa chanangexmagüxẽxẽ i ngẽma duü̃xü̃gü ga noxri nüxü̃ changechaü̃xü̃chixü̃.
8 Rü ñaa duü̃xü̃gü ga choxrüchire̱x ixĩgüxü̃, rü ñu̱xma i cha̱u̱xca̱x rü ñoma wüxi i leóü̃ i naixnecüwa ngẽxmaxü̃rüxü̃ nixĩgü. Rü poraãcü chixri chauchiga nidexagü, rü ngẽmaca̱x nixĩ i naxchi chaxaixü̃.
9 Rü ngẽma chorü duü̃xü̃gü rü ñoma wüxi i weri i mexpachixü̃ i togü i werigü naxchi aiexü̃rüxü̃ nixĩgü. ¡Rü nua pexĩ, Pa Guxü̃ma i Naeü̃gü i Idüraexü̃x! ¡Rü wüxiwa pexĩ rü penangõ̱xcu!
10 Rü muxü̃ma i ãẽ̱xgacügü i uanügü ixĩgüxü̃ rü nanachixexẽẽgü i chorü úbanecü, rü nagu napugüe i chauane. Rü nanangeãcuanexẽẽgü ga yema naane ga yexera chanaxwa̱xexü̃.
11 Rü nanangeãcuxẽẽgü ga yema naane, rü ñu̱xũchi nanachixexẽẽgü. Rü yexguma nüxü̃ chada̱u̱xgu rü poraãcü changechaü̃. Rü guxü̃wama ga yema nachixü̃anewa rü nachianemare, natürü taxuxü̃ma naxca̱x naxoegaãxẽ.
12 Rü guxü̃ma ga yema ínachianexü̃arü ngüchitaeruxü̃wa ne naxĩ ga duü̃xü̃gü ga máxwa̱xegüxü̃. Erü choma ya Cori ya Tupana rü choxü̃́ nangẽxma i wüxi i tara i tá guxü̃wama namaxã chanadaixü̃ i ngẽma nachixü̃ane. Rü taxuwatáma nangẽxma i taãxẽ naxca̱x i ngẽma duü̃xü̃gü.
13 Rü yema chorü duü̃xü̃gü rü trigu inatogü, natürü tuxumare nüxü̃́ narüxügü. Rü guxü̃ma ga norü puracügü rü natüca̱xmamare nixĩ. Rü taxuxü̃ma ga trigu nabuxgü nagagu ga yema chorü nu ga taxü̃ —ñanagürü.
Cori ya Tupana rü yema nachixü̃anegü ga Iraéanena ngaicamagüxü̃maxã nanaxuegu ga poxcu
14 Rü Cori ya Tupana rü ñanagürü: —Rü ngẽma togü i nachixü̃anecüã̱xgü i chixecümaxü̃ i Iraéanena ngaicamagüxü̃ rü marü nanachixexẽxẽ i ngẽma naane i Iraétanüxü̃na chaxãxü̃ nax guxü̃guma norü yixĩxü̃ca̱x. Rü choma rü norü naanewa tá íchanawoxü̃ i ngẽma togü i nachixü̃anegüarü duü̃xü̃gü i chixecümaxü̃. Rü ngẽma nachixü̃ane i nawa Yudáanecüã̱xgüxü̃ nagagüxü̃, rü choma rü tá ngẽma nachixü̃anewa íchanagaxü̃ i ngẽma Yudáanecüã̱xgü nax norü naaneca̱x nawoeguxü̃ca̱x.
15 Natürü nawena nax íchanawoxü̃xü̃ i nachixü̃anegüwa i ngẽma togü i nachixü̃anecüã̱xgü i duü̃xü̃gü rü wena tá choxü̃́ nangechaü̃tümüü̃gü. Rü norü naanegüca̱x rü nachixü̃anegüca̱x tá chanawoeguxẽxẽ i ngẽma duü̃xü̃gü.
16 Rü aixcüma nixĩ ga nümagü ga noxri chorü duü̃xü̃güxü̃ nangúexẽẽxü̃ nax Baáxégagu inaxunetagüxü̃ca̱x. Natürü i ñu̱xma rü chorü duü̃xü̃gütanüwa tá chanangexmagüxẽxẽ i ngẽma duü̃xü̃gü ega aixcüma yaxõgüãgu i chorü ore i chorü duü̃xü̃gütanüwa ngẽxmaxü̃ rü aixcüma chauégagu inaxunetagügu rü ñagügu: “Tupana ya Maxü̃cüégagu cumaxã nüxü̃ chixu”, ñagügu.
17 Natürü ngẽma nachixü̃anecüã̱x i duü̃xü̃gü i tama chauga ĩnüexü̃, rü tá noxtacüma nachixü̃anewa íchanawoxü̃, rü tá ichayanaxoxẽxẽ. Rü chomatama ya Cori ya Tupana nixĩ i nüxü̃ chixuxü̃ i ngẽma ore —ñanagürü.
