Jeremías 13:1-27
13 Rü nüma ga Cori ya Tupana rü ñanagürü choxü̃: —¡Naxca̱x yataxe i wüxi i goyexü̃ i línuchinaxca̱x! ¡Rü ñu̱xũchi cugü namaxã igoye! ¡Natürü taxũtáma cuyawaixẽxẽ! —ñanagürü choxü̃.
2 Rü choma rü naxca̱x chayataxe ga yema goyexü̃, yema Cori ya Tupana choxü̃ muxü̃ãcüma, rü ñu̱xũchi chaugü namaxã chigoye.
3 Rü yexguma ga Cori ya Tupana rü wena chomaxã nidexa rü ñanagürü choxü̃:
4 —¡Nayaxu i ngẽma goyexü̃ i naxca̱x cutaxexü̃ i cugü namaxã quigoyexü̃! ¡Rü ñu̱xũchi natü i Eufrátewa naxũ rü ngẽxma wüxi ya nutamachate̱xegu yanacu̱x! —ñanagürü choxü̃.
5 Rü yexguma ga choma rü natü ga Eufrátewa chaxũ rü yexma wüxi ga nutamachate̱xegu chayanacu̱x ga yema goyexü̃, yema Cori ya Tupana choxü̃ muxü̃ãcüma.
6 Rü muxü̃ma ga ngunexü̃guwena ga Cori ya Tupana rü choxü̃ ñanagürü: —¡Ngéma natü i Eufrátewa naxũ rü nua nange i ngẽma goyexü̃ i cuxü̃ ngẽxma chayarücu̱xẽẽxü̃! —ñanagürü.
7 Rü choma rü natü ga Eufrátewa chaxũ, rü yema nutamachate̱xegu naxca̱x chadau. Rü yema nachica ga nagu chayacúxü̃gu nüxü̃ ichayangau ga yema goyexü̃. Rü chanayaxu, natürü marü nangau rü taxuwama name.
8 13:8-9 Rü yexguma ga Cori ya Tupana rü wena chomaxã nidexa rü choxü̃ ñanagürü: —Rü ngẽma goyexü̃rüxü̃ tátama ichayanaxoxẽxẽ nax nügü yacua̱xüü̃güxü̃ i Yudáanecüã̱xgü rü Yerucharéü̃cüã̱xgü.
9 Nüü̃ nadau 13:8
10 Rü ñaa duü̃xü̃gü i chixexü̃gu maxẽxü̃ rü tama naga naxĩnüechaü̃ i chorü mugü, rü nanaxügü i ngẽma norü ngúchaü̃ i chixexü̃ i naãẽwa nagu naxĩnüexü̃. Rü tupananetachicüna̱xãgüwe narüxĩ nax nüxü̃́ napuracüexü̃ca̱x rü nüxü̃ yacua̱xüü̃güxü̃ca̱x. Rü ngẽma goyexü̃ i taxuwama mexü̃rüxü̃ nixĩgü i ngẽma duü̃xü̃gü.
11 Rü ñoma goyexü̃ i yigümena̱xãwa itúãchixü̃rüxü̃ chaugüna chayaxũ̱xgüxẽxẽ ga guxü̃ma ga yema Iraéanecüã̱xgü rü Yudáanecüã̱xgü ga duü̃xü̃gü nax yemaacü chorü duü̃xü̃gü yaxĩgüxü̃ca̱x rü togü i duü̃xü̃güxü̃ nüxü̃ nacua̱xẽẽgüxü̃ca̱x i chauéga. Yerü chanaxwa̱xe nax choxü̃ natachigaxẽẽgüxü̃ca̱x rü chorü mexü̃ nawa ngóxü̃ca̱x. Natürü ga nümagü rü tama chauga naxĩnüechaü̃. Rü chomatama ya Cori ya Tupana nixĩ i nüxü̃ chixuxü̃ i ngẽma ore —ñanagürü choxü̃.
To i cua̱xruxü̃ nachiga i ngẽma poxcu i Iraétanüxü̃ca̱x tá ínguxü̃
12 Rü nüma ga Cori ya Tupana rü choxü̃ ñanagürü: —¡Ngẽma duü̃xü̃gümaxã idexa rü ñanagürü nüxü̃! “Nüma ya Cori ya Iraétanüxü̃arü Tupana rü ñanagürü: ‘Ngexü̃rüüxü̃mare i tüxü̃ rü name nax bínumaxã penaxüãcuxü̃’, ñanagürü. Rü nüma ya Iraétanüxü̃ rü ñaãcü tá cuxü̃ nangãxü̃ rü ñanagürügü tá: ‘¿Cuxca̱x rü tama nüxü̃ tacua̱x nax ngẽxü̃rüü̃xü̃mare i tüxü̃ rü bínumaxã taxüãcuxü̃?’ ñanagürügü tá.
13 Rü cuma rü ñaãcü tá cunangãxü̃gü: ‘Cori ya Tupana rü ñanagürü: Choma rü tá bínumaxã chanangãxẽxẽxẽ i guxü̃ma i ñaa nachixü̃anewa maxẽxü̃ i duü̃xü̃gü, rü ãẽ̱xgacügü i Dabíarü tochicaxü̃wa rütogüxü̃, rü chacherdótegü, rü orearü uruü̃gü, rü ñu̱xũchi guxü̃ma i ngẽma Yerucharéü̃wa maxẽxü̃.
14 Rü ngẽmawena i choma rü tá nügü chanadaixẽxẽ i ngẽma duü̃xü̃gü. Rü ñoma tüxü̃ yapuxẽẽxü̃rüxü̃ tá nügü nixĩgüxẽxẽ. Rü ngẽxgumarüxü̃ ta i ngẽma nanatügü rü nanegümaxã tá nügü nadai. Rü taxũtáma choxü̃́ nangechaxü̃tümüxü̃gü. Rü taxũtáma nüxü̃́ nüxü̃ charüngüma i norü chixexü̃ i naxügüxü̃. Rü choma rü tá ichayanaxoxẽxẽ, rü taxũtáma nüxü̃ changechaü̃. Rü chomatama ya Cori ya Tupana nixĩ i nüxü̃ chixuxü̃ i ngẽma’ ” —ñanagürü ya Cori ya Tupana.
Ucu̱xẽgü ga Iraétanüxü̃ca̱x ixĩxü̃
15 Yeremía rü Iraétanüxü̃xü̃ ñanagürü: —Pa Iraétanüxü̃x, Cori ya Tupana rü nidexa. ¡Rü mea iperüxĩnüe rü taxṹ i nüxü̃ pexoexü̃ i ngẽma pemaxã nüxü̃ chixuxü̃! Erü Cori ya Tupanaarü ore nixĩ.
16 ¡Rü Cori ya Tupanaxü̃ picua̱xüxü̃gü naxü̃pa nax nüma waanexü̃ ínanguxẽẽxü̃ rü naxü̃pa nax yima ma̱xpǘnegü ya waanexü̃wa ngẽxmagünegu peyacaipetütanüxü̃, rü naxü̃pa nax waanexü̃ i ãũcümaxü̃xü̃ yanguxuchixẽxẽãxü̃ i ngẽma ngóonexü̃ i ípenanguxẽxẽxü̃!
17 Rü ngẽxguma taxũtáma ipexĩnüegu i ngẽma pemaxã nüxü̃ chixuxü̃, rü choma rü chaxica tátama chaxaxu nagagu nax pegü picua̱xüü̃güxü̃. Rü chauxetüwa tá inarüyaegü i ngẽma chauxgüxü̃etü, erü perü uanügü rü tá pexü̃ ínayauxü̃ rü tá pexü̃ nigagü i pemax nax Cori ya Tupanaarü duü̃xü̃gü pixĩgüxü̃ —ñanagürü ga Yeremía.
Ore i Tupana ãẽ̱xgacüca̱x nüxü̃ ixuxü̃
18 Cori ya Tupana rü Yeremíaxü̃ ñanagürü: —¡Ãẽ̱xgacümaxã rü naémaxã nüxü̃ ixu i ñaa ore: “¡Ipechigü i ngẽma perü tochicaxü̃wa rü ñaxtüanewamare perütogü! Erü marü taxũtáma ãẽ̱xgacügü pixĩgü, rü ngẽma perü nga̱xcueruxü̃ rü marü taxũtáma peeruwa nangẽxma”, ñanagürü.
19 Rü yima Négueanearü ĩanegü rü norü uanügü rü nüxü̃ ínachomaeguãchi rü taxúema taxüpetü. Rü guxü̃ma i Yudátanüxü̃ rü to i nachixü̃anewa nanagagü.
20 ¡Rü pedaunagütanü rü nüxü̃ peda̱u̱x nax ñuxãcü nórtewaama ne naxĩxü̃ i uanügü! Rü ñu̱xmax, Pa Yerucharéü̃x, ¿Ngexü̃gü nixĩ i ngẽma chorü duü̃xü̃gü i cuxna nüxü̃ chadauxẽxẽxü̃ rü cugü namaxã quicua̱xüxü̃?
Cori ya Tupana rü nüxü̃ nixu nax ínawoxü̃xü̃ tá i Iraétanüxü̃
21 ¿Rü ta̱xacüxü̃ tá quixu, Pa Yerucharéü̃x, i ngẽxguma ngẽma cumatama cungúexẽxẽxü̃ i duü̃xü̃gü cumaxã icua̱xgu? Rü tá ngúxü̃ cuxca̱x ínangu ñoma wüxi ya ngexe ya ãxacüxe ya ngu̱xnecaxerüxü̃.
22 Rü ngẽxguma cugüna cuca̱xgu nax ta̱xacüca̱x cuxü̃ naxüpetüxü̃ i ngẽma guxchaxü̃, rü name nax nüxna cucua̱xãchixü̃ nax ngẽma taxü̃ i curü chixexü̃gagu yixĩxü̃ i ngẽma cuxca̱x ínguxü̃. Rü yemaca̱x nixĩ ga cuxü̃ ínacuxü̃xü̃nexü̃ rü cugu yadauxcüraxü̃güxü̃.
23 ¿Rü nüxü̃́ natauxchaxü̃ i wüxi i waxüxü̃ i duü̃xü̃ nax nügü nacho̱xẽxẽxü̃? ¿Rü nüxü̃́ natauxchaxü̃ i wüxi i ai nax iyanaxoxẽẽãxü̃ i namatü? Rü ngẽxgumarüxü̃ ta i pema nax chixexü̃gu pemaxẽxü̃, rü taxucürüwama mexü̃ pexü.
24 Rü ngẽmaca̱x tá pexü̃ chawoone ñoma chianexü̃wa ne ũcü ya buanecü maxẽ ya pacü woonecürüxü̃.
25 Rü ngẽma nixĩ i penaxwa̱xexü̃, Pa Iraétanüxü̃, rü ngẽma nixĩ i pexna üxü̃ nax pemaxã chanaxüxü̃. Rü chomatama ya Cori ya Tupana nixĩ i nüxü̃ chixuxü̃ i ngẽma. Rü pema rü choxü̃ perüngümae rü nüxü̃́ peyaxõgü ga yema tupananetachicüna̱xãgü ga taxuwama mexü̃.
26 Rü ngẽmaca̱x ñoma wüxi i duü̃xü̃ i báitücuxü̃rüxü̃ tá pexü̃ chaxãneexẽxẽ.
27 Rü pemax, Pa Yerucharéü̃cüã̱x, marü nüxü̃ chadau i ngẽma perü ngúchaü̃gü i chixexü̃gü, rü ñoma nai ya ngexü̃maxã nax ípepegüxü̃rüxü̃ pixĩgü, rü ngẽma pecüma i chixexü̃ nax pengeãẽgüxü̃, rü ngẽma chixexü̃ i pecüma i ngüchitaerugüxü̃wa rü naanegüwa pexüxü̃. Rü wüxi i taxü̃ i ngechaü̃ nixĩ i cuxca̱x, Pa Yerucharéü̃x. ¿Rü ñuxgura tá ta nüxü̃ curüxoxü̃ nax chixexü̃maxã cugü cuxãũãchixü̃? —ñanagürü ya Cori ya Tupana.
