Jeremías 14:1-22
14 Rü yema nax yapagüanexü̃gagu rü Cori ya Tupana rü Yeremíamaxã nidexa rü ñanagürü nüxü̃:
2 —Yudáanecüã̱xgü rü nangechaü̃gü rü naxauxe. Rü norü ĩanegücüã̱x i duü̃xü̃gü rü nanaxĩ̱xãchiãẽgü rü waixü̃müanegu nicama. Rü ngẽma Yerucharéü̃cüã̱xgü rü ngúxü̃ ningegü rü ngẽmaca̱x aita naxüe.
3 Rü ngẽma diẽruã̱xgüxü̃ rü norü puracütanüxü̃xü̃ dexáwa namugü. Rü nümagü i ngẽma norü puracütanüxü̃ rü puchugüwa dexáwa naxĩ. Natürü ngẽma puchugüwa rü taxuxü̃ma i dexáxü̃ inayangaugü. Rü ingeãcuxü̃ i norü tü̃xü̃gümaxã nawoegu. Rü ngẽmaca̱x naxoegaãẽgü rü norü ãnemaxã nügü nidüxchiwegü.
4 Rü yíxema naanewa puracüexe rü taxoegaãẽgü rü ãnemaxã tügü tidüxchíwegü, erü taguma napu, rü ngẽmaca̱x nipagüane.
5 Rü woo ngẽma cowügü rü naxacügü ya ngexwaca ixíraxe naanewa tüxü̃ nawogü, erü nataxuma ya maxẽ nax nangóoxü̃ca̱x.
6 Rü ngẽma búrugü i naixnecücüã̱x rü chianexü̃arü ngüchitaerugügu nachigü nax ñoma ngowagürüxü̃ buanecü ngéma nangü̃xcuemagüxü̃ca̱x. Natürü ngẽxma taiyamaxã niyuãchitanü erü nataxuma ya maxẽ ya nangõ̱xgüãcü —ñanagürü ya Cori ya Tupana.
Yeremía rü duü̃xü̃güégagu Cori ya Tupanana naca
7 Rü nüma ga Yeremía rü Cori ya Tupanaxü̃ ñanagürü: —¡Pa Corix, nüxü̃ tacua̱x nax cupe̱xewa poraãcü chixexü̃ taxüxü̃, natürü tanaxwa̱xe nax toxü̃ curüngü̃xẽẽxü̃ nax ngẽmaãcü i duü̃xü̃gü cuxü̃ natachigaxẽẽxü̃ca̱x. Rü muẽ̱xpü̱xcüna tama cuga taxĩnüe rü poraãcü cupe̱xewa chixexü̃ taxü.
8 Pa Tupanax, cuxü̃́ nixĩ i tayaxõgüxü̃ i toma i Iraétanüxü̃. Rü cuma nixĩ i toxü̃ ícunguxü̃xẽẽxü̃ i ngẽxguma guxchaxü̃wa tangexmagügu. ¿Rü ta̱xacüca̱x i ñu̱xma rü to i nachixü̃anecüã̱xrüxü̃ quixĩ i ñaa tochixü̃anewa? ¿Rü ta̱xacüca̱x ñoma wüxi i duü̃xü̃ i to i nachixü̃anewa ne ũxü̃ rü paxaãchi nuxã ípemarexü̃rüxü̃ quixĩ?
9 ¿Rü ta̱xacüca̱x ñoma wüxi i yatü i naxĩxãchiãẽxü̃rüxü̃ quixĩ? ¿Rü ta̱xacüca̱x ñoma wüxi i churara i taxuacüma tüxü̃ rüngü̃xẽẽxü̃rüxü̃ quixĩ? Natürü, Pa Corix, cuma rü totanüwa cungexma, rü guxü̃ma i toma nüxü̃ tacua̱x nax curü duü̃xü̃gü tixĩgüxü̃. ¡Rü taxṹ i toxü̃ ícuwogüxü̃! —ñanagürü ga Yeremía.
10 Rü nüma ya Cori ya Tupana rü ñanagürü nachiga i ngẽma Iraétanüxü̃: —Ñaa duü̃xü̃gü rü norü me nixĩ nax choxna yaxĩgachixü̃ naxca̱x i tupananetagü. Rü ngẽmaca̱x tama taãẽãcüma nüxü̃ chadawenü. Rü ñu̱xma rü tá nüxna chacua̱xãchi i norü pecadugü, rü tá nüxna chaca naxca̱x i norü chixexü̃ —ñanagürü.
11 Rü nüma ga Cori ya Tupana rü choxü̃ ñanagürü: —¡Taxṹ i choxü̃ cuca̱a̱xü̃xü̃ nax ñaa duü̃xü̃gümaxã mexü̃ chaxüxü̃ca̱x!
12 Rü woo tá muẽ̱xpü̱xcüna cuxaureãcüma cuyumüxẽgu, rü taxũtáma nüxü̃ chaxĩnü i ngẽma curü yumüxẽwa choxna naxca̱x cucaxü̃. Rü woo tá ãmaregü i naxü̃nagü rü trigute̱xe cha̱u̱xca̱x ícuguxgu rü taxũtáma namaxã chataãxẽ. Rü daimaxã, rü taiyamaxã, rü da̱xaweanemaxã tá chanadai —ñanagürü choxü̃.
13 Rü choma chanangãxü̃ rü ñachagürü nüxü̃: —Natürü, Pa Corix, ngẽma duü̃xü̃güarü orearü uruü̃gü rü namaxã nüxü̃ nixugüe rü nataxutama i dai, rü taiya, rü cuma rü guxü̃gutáma nüxna cunaxã i taãxẽ i ñaa nachicawa —ñachagürü nüxü̃.
14 Rü yexguma ga nüma ga Cori ya Tupana rü choxü̃ nangãxü̃ rü ñanagürü: —Ngẽxguma chauégagu ngẽmaxü̃ yaxugügu i ngẽma duü̃xü̃güarü orearü uruü̃gü, rü doraxü̃ nixugümare. Rü tama choma ichanamuãchitanü, rü bai nax choma namaxã nüxü̃ chixuxü̃, rü bai nax ñuxgu namaxã chidexaxü̃. Rü ngẽma nüxü̃ nadaugüxü̃ rü doramare nixĩ. Rü ngẽma nax nango̱xetügüxü̃ rü tama aixcüma nixĩ. Rü ngẽma ore rü nügüãẽwa nayauxgümarexü̃ nixĩ. Rü ngẽma nixĩ i ngẽma orearü uruü̃güneta nüxü̃ ixugügüxü̃.
15 Rü choma ya Cori ya Tupana, rü ñachagürü nachiga i ngẽma orearü uruü̃güneta i tama choma chamugüãcüma chauégagu nüxü̃ ixugüxü̃ nax nataxuxü̃táma i dai rü taiya i ñaa nachixü̃anewa. Rü nüma i ngẽma orearü uruü̃güneta rü daigu rü taiyamaxã tá nayue.
16 Rü ngẽma duü̃xü̃gü i natanüwa nüxü̃ yanaxugüxü̃ i ngẽma ore i tama aixcüma ixĩxü̃ rü naxma̱xgümaxã, rü nanegümaxã, rü naxacügümaxã tá daigu rü taiyamaxã nayue. Rü ngẽma naxü̃negü rü Yerucharéü̃arü namagüwa tá ninuamare, rü taxúetama itanata̱xgü. Rü ngẽmaãcü tá nixĩ i naxütanügüãxü̃ i norü chixexü̃gü i ngẽma duü̃xü̃gü.
17 ¡Rü cumax, Pa Yeremíax, rü duü̃xü̃gümaxã nüxü̃ ixu i ñaa ore rü ñanagürü nüxü̃! “Choma rü taguma íchayachaxãchi nax ngunecü rü chütacü chaxaxuxü̃ nagagu i ngẽma taxü̃ i ãũcümaxü̃ i tá chorü duü̃xü̃güxü̃ ngupetüxü̃. Erü ngẽma guxchaxü̃ i tá nüxü̃ ngupetüxü̃ rü nataxüchi.
18 Rü ngẽxguma tá naanewa chaxũxgu, rü tá nüxü̃ chadau i ngẽma daigu yuexü̃ i duü̃xü̃gü. Rü ngẽxguma ĩanegu chaxücugu, rü tá nüxü̃ chadau i duü̃xü̃gü i taiyamaxã iyuetanüxü̃. Rü woo ngẽma orearü uruü̃gü, rü ngẽma chacherdótegü rü wüxi i nachixü̃ane i tama nüxü̃ nacua̱xgüxü̃wa tá nanagagü” —ñanagürü.
Yeremía rü Cori ya Tupanana naca
19 Rü nüma ga Yeremía rü Cori ya Tupanana naca rü ñanagürü: —Pa Corix, ¿rü guxü̃gutáma e̱xna Yudátanüxü̃xü̃ cuxo? ¿Rü e̱xna düxwa marü tama yáxna namaxã cuxĩnü i ngẽma Chióü̃cüã̱xgü? ¿Rü ta̱xacüca̱x poxcu i taguma gúxü̃maxã toxü̃ cupoxcue? Rü ítayanguxẽẽgü nax mea toxü̃ nangupetügüxü̃ca̱x, natürü taxuxü̃ma i mexü̃ toxca̱x ínangu. Rü ítayanguxẽxẽ nax taãxẽ toxca̱x ínguxü̃, natürü ãũcümaxü̃xicatama toxca̱x ínangu.
20 Rü nüxü̃ tacua̱x, Pa Corix, nax poraãcü chixexü̃ taxüxü̃, naxrüxü̃ ga yema nũxcümaü̃güxü̃ ga torü o̱xigü. Rü cupe̱xewa nixĩ i chixexü̃ taxügüxü̃.
21 ¡Rü ngẽma cuéga i üünexü̃gagu, rü taxṹ i toxü̃ cuxoxü̃! ¡Rü taxṹ i nüxü̃ cuxoxü̃ ya yima ĩane ya curü tochicaxü̃ i üünexü̃ nawa ngẽxmane! ¡Rü nüxna nacua̱xãchi ga yema curü uneta ga tomaxã cuxüxü̃, rü taxṹ i nüxü̃ curüngü̃maxü̃!
22 Pa Cori ya Tupana, nataxuma i tupananetachicüna̱xã i cuxrüxü̃ nüxü̃ cuáxü̃ nax napuxẽẽãxü̃. Rü taxucürüwa i dauxü̃guxü̃ i naane nüechamatama nanapuxẽxẽ. Rü cuma nixĩ i ícunanguxẽẽxü̃ ya pucü, rü cuma nixĩ i cunaxüxü̃ i guxü̃ma i ta̱xacü i ngẽxmaxü̃. Rü cuma nixĩ i aixcüma torü Tupana quixĩxü̃. Rü ngẽmaca̱x nixĩ i cuxü̃tawa ítayanguxẽẽxü̃ i curü ngü̃xẽxẽ —ñanagürü ga Yeremía.
