Jeremías 15:1-21
15 Nüma ya Cori ya Tupana rü ñanagürü choxü̃: —Rü woo chi Moiché rü Chamué nua chauxü̃tawa ĩxgu nax naétüwa yachogüexü̃ca̱x i ñaa duü̃xü̃gü, rü marü taxũchima nüxü̃́ ichaxĩnü nax choxü̃́ nangechaü̃tümüxü̃güxü̃ i ñaa duü̃xü̃gü. ¡Rü namaxã nüxü̃ ixu rü choxna yaxĩgachitanü!
2 Rü ngẽxguma tá cuxna nacagügu ¿rü ngextá chi itaxĩxü̃? ñagügu, rü chauégagu tá ñacurügü nüxü̃: “Yíxema marü tümamaxã naxuegugüxe nax da̱xaweanemaxã tayuexü̃, rü da̱xaweanemaxã tá tayue. Rü yíxema marü tümamaxã naxuegugüxe nax daigu tayuexü̃ rü daigu tá tayue. Rü yíxema marü tümamaxã naxuegugüxe nax taiyamaxã tayuexü̃ rü tá taiyamaxã tayue. Rü yíxema marü tümamaxã naxuegugüxe nax ítawoxü̃xü̃ i ñaa nachixü̃anewa rü tá ítawoxü̃” —ñanagürü.
3 Rü choma ya Cori ya Tupana rü nüxü̃ chixu rü ñachagürü: —Naxãgümücüraü̃xü̃ i poxcu tá pexca̱x íchanguxẽxẽ. Rü daigu tá pexü̃ nadai, rü airugü tá pexü̃ nitúgü, rü ngurucugü tá pexü̃ nangõ̱xgü, rü ñu̱xũchi naeü̃gü i idüraexü̃ tá pexü̃ nangõ̱xcu.
4 Rü guxü̃táma i nachixü̃anegüarü duü̃xü̃gü rü tá naxca̱x namuü̃e i ngẽma poxcu i Yudáanecüã̱xmaxã chaxueguxü̃ nagagu ga yema chixexü̃ ga Yudáanearü ãẽ̱xgacü ga Manaché ga Echequía nane üxü̃ ga Yerucharéü̃wa.
5 ¿Rü texéaxü̃́ tá pengechaü̃tümüxü̃gü, Pa Yerucharéü̃cüã̱xgü? ¿Rü texé tá pemaxã tixauxãchi? ¿Rü texé tá pexca̱x taxoegaãxẽ rü ítaca nax ñuxãcü pexü̃ nangupetüxü̃?
6 Rü pemax, Pa Yerucharéü̃cüã̱xgüx, rü choxü̃ ípeta̱x rü choxna pexãgüca̱xwegümare. Rü choma ya Cori ya Tupana nixĩ i nüxü̃ chixuxü̃ i ngẽma. Rü ngẽma perü chixexü̃gagu rü choma rü marü düxwa chipa nax pemaxã yáxna chaxĩnüxü̃, rü ngẽmaca̱x i ñu̱xma rü tá pexü̃ chapoxcue nax peyarüxoxü̃ca̱x.
7 Rü ñoma maxẽarü pagüxü̃rüxü̃ tá pexü̃ chawoone, rü ñaa nachixü̃anearü ĩanegüwa tá pexü̃ íchamuxü̃. Rü tá chayangenexẽxẽgü rü chayangexacüxẽxẽgü i ngẽma chorü duü̃xü̃gü. Rü tá chanadai, erü tama nüxü̃ narüxoechaü̃ i ngẽma chixexü̃ ga nagu namaxẽxü̃.
8 Rü yima márpechinüwa ngẽxmacü ya naxnücüte̱xearü mumae tá tüxü̃ íchayaxügüxẽxẽ ya yíxema yutegüxe i Yerucharéü̃wa. Rü tocuchigu tá tüxü̃ chadai ya yíxema mamagü ya ingẽxtü̱xünegüxe. Rü ngürüãchi tá tümatanügu chananguxẽxẽ i ngẽma taxü̃ i ngúxü̃ rü muü̃.
9 Rü yíxema mamagü ya muxacüxe rü tá tiyuãchitanü. Rü tá tingearü buanecüã̱xgü nax tingü̃ãtanücüüxü̃ca̱x rü cugüruü̃gü tá tixĩgü erü nayue i tümaxacügü. Rü ngẽma ngóonexü̃ rü waanexü̃xü̃ tá tümaca̱x nayanguxuchigü. Rü poraãcü tá taxãneexü̃chi rü taxuwatáma time. Rü yíxema maxü̃́xẽ íyaxügüxe rü ngẽma tümaarü uanügüxü̃ tá tüxü̃ chadaixẽxẽ. Rü choma ya Cori ya Tupana nixĩ i nüxü̃ chixuxü̃ i ngẽma chorü ore —ñanagürü ya Cori ya Tupana.
Yeremía rü ngechaü̃ãcüma nidexa
10 Poraãcü changechaü̃, Pa Máx, nax ñoma i naanewa choxü̃ cungo̱xẽẽxü̃. Rü narümemae chi nixĩ ga nax chayuxü̃ ga noxritama chabuxgu, erü guxü̃wama i ngextá íchaxũxü̃wa rü duü̃xü̃gü rü chauxchi naxaie. Rü woo taguma texéaxü̃́ chananangetanü rü taguma texé choxü̃́ tanangetanü, natürü guxü̃ma i duü̃xü̃gü rü chixexü̃ chomaxã nixugüe.
11 Natürü nüetama, Pa Corix, nax chixexü̃ chomaxã yaxugüexü̃. Erü cuma rü meama nüxü̃ cucua̱x nax aixcüma mea chayanguxẽẽxü̃ i ngẽma puracü i choxna cuxãxü̃ rü poraãcü cupe̱xewa naétüwa chachogüxü̃ i ngẽma chorü uanügü nax ícunanguxü̃xẽẽxü̃ca̱x nawa i ngẽma norü guxchaxü̃gü i nagu namaxẽxü̃.
Tupana nanaxunagü nax Iraétanüxü̃xü̃ napoxcuxü̃
12 Rü Tupana rü ñanagürü: —¿Texé tá nüxü̃ tarüporamae i ngẽma duü̃xü̃gü i nórtewaama ne ĩxü̃ i ñoma fierurüxü̃ rü bróũcherüxü̃ poraxüchixü̃?
13 Rü ngẽma perü pecadugügagu, Pa Iraétanüxü̃x, rü tá perü uanügüna chanana i perü ngẽmaxü̃gü, rü perü diẽrugü, rü guxü̃ma i ta̱xacü i pexü̃́ ngẽxmaxü̃ i perü naanewa nax nüma yanaxãxü̃ca̱x.
14 Rü ñu̱xma rü tá perü uanügüme̱xẽwa pexü̃ changexmagüxẽxẽ, rü wüxi i naane i tama nüxü̃ pecuáxü̃wa tá pexü̃ nagagü. Erü poraãcüxüchima pemaxã chanu rü ñoma wüxi ya üxü ya pexü̃ iguxü̃rüxü̃ tá pexü̃ chagu̱xẽxẽ —ñanagürü ya Tupana.
Yeremía rü Tupanana nacaama
15 Rü yexguma ga Yeremía rü Tupanaxü̃ nangãxü̃ rü ñanagürü: —Pa Corix, Pa Tupanax, cuma nüxü̃ cucua̱x i guxü̃ma. ¡Rü choxna nacua̱xãchi rü paxa nua naxũ rü choxü̃ yarüngü̃xẽxẽ! ¡Rü choxü̃ naxütanü rü napoxcue i ngẽma chowe ingẽxü̃tanüxü̃! ¡Rü taxṹ i yáxna namaxã cuxĩnüxü̃ rü nüxü̃́ cunatauxchaxẽxẽxü̃ nax choxü̃ yama̱xgüxü̃! ¡Rü dücax, nagu rüxĩnü nax cuxca̱x yixĩxü̃ i poraãcü ngúxü̃ chingexü̃!
16 Rü yexguma chomaxã quidexagu rü choma rü chanayaxu ga curü ore. Rü yema curü ore nixĩ ga choxü̃ poraxẽẽxü̃ rü choxü̃ taãẽxẽẽxü̃ erü curü duü̃xü̃ chixĩ, Pa Corix, Pa Tupana ya Guxü̃étüwa Ngẽxmacüx.
17 Rü choma rü tama namaxã chaxãmücü i ngẽma duü̃xü̃gü i norü petaguxicatama rüxĩnüexü̃. Rü yexguma cuma choxü̃ cuyaxu̱xgucürüwatama rü marü chaxicatama ichayarüxũü̃xü̃. Erü cuma naxchi choxü̃ cuxaixẽxẽ i ngẽma duü̃xü̃gücüma i chixexü̃.
18 ¿Rü ta̱xacüca̱x i ngẽma ngúxü̃ i chingexü̃ rü taguma choxü̃ nangupetü? ¿Rü ta̱xacüca̱x i ngẽma chorü o̱xri rü nangearü üxü̃ã́xü̃, rü tama inaxĩnüchaü̃xü̃ i üxü̃güwa? Rü cuma rü cha̱u̱xca̱x rü ñoma wüxi i natü i ngearü dexáã́xü̃rüxü̃ chomaxã quixĩ —ñanagürü ga Yeremía.
Cori ya Tupana rü Yeremíaxü̃ nangãxü̃ga
19 Rü nüma ga Cori ya Tupana rü Yeremíaxü̃ nangãxü̃ rü ñanagürü: —Ngẽxguma cha̱u̱xca̱x cutaegu̱xgu, rü wena tá cuxü̃ chayaxu rü choxü̃́ tá cupuracü. Rü ngẽxguma chi nüxü̃ curüxoxgu nax natüca̱xmamare quidexamarexü̃, rü chi nüxü̃ quixuxgu i ore i aixcüma mexü̃, rü cuma tá nixĩ i aixcüma chorü orearü uruxü̃ quixĩxü̃. Rü name i nüma i duü̃xü̃gü cuxca̱x nawoegu, natürü tama name nax cuma naxca̱x cutaeguxü̃.
20 Choma rü ñoma wüxi i naxtapü̱x i bróũchenaxca̱x i taxúema nüxü̃ rüyexeramaexü̃rüxü̃ tá cuxü̃ chixĩxẽxẽ nape̱xewa i ñaa duü̃xü̃gü. Rü cumaxã tá nügü nadai, natürü taxũtáma cuxü̃ narüyexeramaegü. Erü choma rü cumaxã tá changexma nax cuxü̃ íchapoxü̃xü̃ca̱x rü cuxü̃ íchanguxuchixẽẽxü̃ca̱x. Rü choma ya Cori ya Tupana nixĩ i nüxü̃ chixuxü̃ i ngẽma chorü ore.
21 Rü naxme̱xwa tá cuxü̃ íchanguxuchixẽxẽ i ngẽma duü̃xü̃gü i chixexü̃gu maxẽxü̃. Rü naxme̱xwa tá cuxü̃ íchanguxuchixẽxẽ i ngẽma duü̃xü̃gü i máetagüxü̃! —ñanagürü ga Cori ya Tupana.
