Jeremías 16:1-21
16 16:1-2 Cori ya Tupana rü chomaxã nidexa, rü ñanagürü choxü̃: —Pa Yeremíax, ¡taxṹ i nagu cuxãmaxü̃ rü taxṹ i ñaa nachixü̃anewa cuxü̃́ nangẽxmaxü̃ ya cunegü rü cuxacügü!
2 Nüü̃ nadau 16:1
3 Erü choma ya Cori ya Tupana rü tá cumaxã nüxü̃ chixu nax ta̱xacü tá nüxü̃ ngupetüxü̃ i ngẽma duü̃xü̃gü nanegü rü naxacügü i ñaa nachixü̃anegu buexü̃ rü ñu̱xũchi ngẽma papagü rü mamagü i nüxü̃́ nangẽxmaxü̃ ya nanegü rü naxacügü.
4 Rü da̱xaweanegü i ãũcümaxü̃maxã tá nayue, rü taxúetama naxca̱x taxauxe, rü bai tá texé inata̱xgüxü̃. Rü ñoma naü̃rüxü̃ tá waixü̃müanewa nawogümare. Rü daigu tá nayue, rü ñu̱xũchi taiyamaxã tá nayue. Rü ngẽma naxü̃negü rü ngurucugü rü naeü̃gü i idüraexü̃ tá nanangõ̱xgü —ñanagürü.
5 Rü nüma ya Cori ya Tupana rü ñanagürü ta choxü̃: —¡Taxṹ i nagu cuxücuxü̃ ya wüxi ya ĩpata ya ngechaü̃ nawa ngẽxmane naxca̱x i wüxi i yuxü̃! ¡Rü taxṹ i cuxaxuxü̃ naxca̱x i ngẽma yuxü̃ rü taxṹ icunango̱xẽẽxü̃ nax naxca̱x cungechaxü̃xü̃ i ngẽma yuxü̃! Erü ñaa duü̃xü̃gü rü nüxna chayaxũgachixẽxẽ i chorü taãxẽ, rü chorü ngechaü̃, rü chorü ngechaü̃tümüxü̃. Rü choma ya Cori ya Tupana nixĩ i nüxü̃ chixuxü̃ i ngẽma.
6 Rü ngẽma duü̃xü̃gü i diẽruã̱xgüxü̃ rü ngẽma ngearü diẽruã̱xgüxü̃ rü tá nayue i ñaa nachixü̃anewa. Rü taxúetama itanata̱xgü, rü bai tá texé naxca̱x auxexü̃, rü bai tá texé tügü tawítüxü̃ne rüe̱xna tügü taba̱i̱xeru nax ngẽmaãcü tanango̱xẽẽxü̃ nax naxca̱x tangechaxü̃xü̃ i ngẽma yuexü̃.
7 Rü taxúetama texé i taxü̃ i õna taxü naxca̱x i natanüxü̃ i ngẽma yuexü̃, nax ngẽmaãcü nataãẽgüxü̃ca̱x. Rü woo ngẽxguma nanatü rüe̱xna naé yu̱xgu rü taxúetama tanataãẽxẽẽgü i tümatanüxü̃.
8 ¡Rü ngẽxgumarüxü̃ tá ta taxũtáma nagu cuxücu ya yima ĩpata ya taxü̃ i õna nawa ínangõ̱xgüne, rü bai tá nax natanüwa curütoxü̃ nax namaxã cuchibüxü̃ca̱x rü cuxaxexü̃ca̱x!
9 Erü choma ya Cori ya Guxãétüwa Ngẽxmacü ya Iraétanüxü̃arü Tupana ixĩcü, rü nüxü̃ chixu, rü ñachagürü: “Choma rü ñaa nachixü̃anewa tá ichayanaxoxẽxẽ i ngẽma petagüarü wiyaegü rü ngẽma taãẽgüarü wiyaegü, rü ñu̱xũchi ngẽma ngĩgüarü wiyaegü. Rü ngẽma rü perü ngunexü̃gügu tátama nixĩ i nangupetüxü̃, rü pexetügümaxã tátama nixĩ i nüxü̃ pedauxü̃”.
10 Rü ngẽxguma tá duü̃xü̃gümaxã nüxü̃ quixuxgu i ñaa ore, rü tá cuxna nacagü, rü ñanagürügü tá: “¿Rü ta̱xacüca̱x ya Cori ya Tupana rü toxca̱x ínanangu̱xẽxẽ i ngẽma taxü̃ i guxchaxü̃? ¿Rü ta̱xacü i chixexü̃ nape̱xewa taxü ya yimá torü Cori ya Tupana?” ñanagürügü tá.
11 Rü cuma rü ñaãcü tá cunangãxü̃gü: “Cori ya Tupana rü nüxü̃ nixu rü ñanagürü: ‘Rü ngẽma tá pexü̃ nangupetü yerü yema nũxcümaü̃güxü̃ ga perü o̱xigü rü choxna nixĩgachi rü tupananetachicüna̱xãgüwe narüxĩ, rü naxca̱x nangutaque̱xegü rü nüxü̃ nicua̱xüü̃gü. Rü nümagü rü choxü̃ ínata̱xgü rü tama nayanguxẽẽgü ga yema ucu̱xẽgü ga choma namaxã nüxü̃ chixuxü̃.
12 Rü pema rü yema nũxcümaü̃güxü̃ ga perü o̱xigüarü yexera chixexü̃ pexügü. Erü wüxichigü i pema rü penaxü i ngẽma chixexü̃gü i peãẽwa nagu perüxĩnüexü̃ rü ñu̱xũchi tama chauga pexĩnüe.
13 Rü ngẽmaca̱x tá nixĩ i pexü̃ íchawoxü̃xü̃ i ñaa naanewa rü wüxi i nachixü̃ane i pema rü ñu̱xũchi yema nũxcümaü̃güxü̃ ga perü o̱xigü tama nüxü̃ cua̱xgüxü̃wa tá pexü̃ chamugüxü̃. Rü ngéma tá nixĩ i ngunecü rü chütacü norü tupananetachicüna̱xãgüxü̃ picua̱xüü̃güxü̃. Choma rü taxũtáma marü pemaxã chixãũxãchi’ ”, ñacurügü nüxü̃ —ñanagürü.
14 Rü nüma ya Cori ya Tupana rü nüxü̃ nixu rü ñanagürü: —Rü tá ínangugü i ngunexü̃gü i taxũtáma nagu ñapegügüxü̃: “¡Namaxü̃ ya Cori ya Tupana ga Equítuanewa Iraétanüxü̃xü̃gü ígaxü̃cü!” ñapegügüxü̃.
15 Rü ngẽma ngunexü̃gügu rü ñapegürügü tá: “¡Namaxü̃ ya Cori ya Tupana ya Iraétanüxü̃xü̃ ínguxü̃xẽxẽcü naxme̱xwa i ngẽma nórtewaama ngẽxmaxü̃ i nachixü̃ane rü naxme̱xwa i guxü̃ma i ngẽma togü i nachixü̃anegü i nagu iwoonexü̃!” ñapegürügü tá. Erü choma rü tá naxca̱x pexü̃ chawoeguxẽxẽ i perü naane ga nũxcümaü̃güxü̃ ga perü o̱xigüna chaxãxü̃.
16 Natürü i ñu̱xma rü petanüwa tá chanamugü i muxü̃ma i perü uanügü nax ngẽmaãcü pexü̃ ínayauxü̃xü̃ca̱x ñoma choxni ínayauxü̃xü̃rüxü̃. Rü ngẽmawena rü petanüwa tá chanamugü i togü i perü uanügü i ñoma cueneetanüxü̃rüxü̃ pexca̱x daugüxü̃ i guxü̃nema ya ma̱xpǘnegügu rü ngüchitaeruxü̃gügu rü woo nutagüarü ãxmaxü̃gügu nax pexü̃ nada̱i̱xü̃ca̱x.
17 Erü nüxü̃ chadau ga guxü̃ma ga yema chixexü̃ ga pexügüxü̃, erü cha̱u̱xca̱x rü taxuxü̃ma inicu̱x. Rü ngẽma perü pecadugü rü bai i wüxi i cha̱u̱xcha̱xwa icúxü̃.
18 Rü nawa tá ichanaxügü nax taxree̱xpü̱xcüna pexü̃ chapoxcuexü̃ naxca̱x i perü chixexü̃gü rü perü pecadugü. Erü penaxãũãchixẽxẽ i chorü naane namaxã i ngẽma perü tupananetachicüna̱xãgü i ingearü maxü̃ã́xü̃. Rü yema naane ga guxü̃guca̱x pexna chaxãxü̃wa rü penaxü ga yema chixexü̃gü ga naxchi chaxaixü̃ —ñanagürü ga Cori ya Tupana.
Yeremía rü Cori ya Tupanana nacaama
19 Rü choma i Yeremía rü Cori ya Tupanana chacaama rü ñachagürü: —Pa Corix ya Chorü Poraxẽẽruxü̃ rü Chorü Tüpechitaruxü̃, rü cuma nixĩ i choxü̃ ícupoxü̃xü̃ i ngẽxguma ãũcümaxü̃wa changexmagu. Rü cuxü̃tawa tá naxĩ i nachixü̃anecüã̱xgü i naane iyacuáxü̃wa ne ĩxü̃, rü cuxü̃ tá ñanagürügü: “Yema nũxcümaü̃güxü̃ ga torü o̱xigü rü yema taxuwama mexü̃ rü ngearü poraáxü̃ ga tupananetachicüna̱xãgü nixĩ ga namaxã natupanaã̱xgüxü̃”, ñanagürügü tá.
20 “¿Rü namexü̃ ya yatü nax nümatama naxüaxü̃ i norü tupanagü? ¡Rü ngẽma tupananetachicüna̱xãgü rü tama aixcüma Tupana nixĩgü!” —ñanagürü ga Yeremía.
Cori ya Tupana rü Yeremíaxü̃ nangãxü̃
21 Rü nüma ga Cori ya Tupana rü Yeremíaxü̃ nangãxü̃ rü ñanagürü: —Ngẽmaca̱x i choma rü noxtacüma tá ngẽma duü̃xü̃güxü̃ chanawe̱x i chorü pora. Rü ngẽmaãcü tá nüxü̃ nacua̱xgü nax choma chixĩxü̃ ya Cori ya Tupana —ñanagürü.
