Jeremías 19:1-15
19 Rü nüma ya Cori ya Tupana rü ñanagürü choxü̃: —¡Ngĩxca̱x nataxe i wüxi i tü̃xü̃ rü ñu̱xũchi naxca̱x nangema i ñuxre i ĩanearü ãẽ̱xgacügü rü ñuxre i chacherdótegüarü ãẽ̱xgacügü!
2 ¡Rü ñu̱xũchi Ben-inóü̃arü Doxonexü̃wa naxũ i ĩã̱x i Tü̃xü̃gü i Puexü̃gu ãégaxü̃arü to̱xma̱xtawa! ¡Rü ngéma naxunagü i ngẽma ore i tá cumaxã nüxü̃ chixuxü̃!
3 ¡Rü ñacurügü tá: “Pa Yudáanearü Ãẽ̱xgacügüx rü Pa Yerucharéü̃cüã̱xgüx, ¡rü iperüxĩnüe ya yimá Iraétanüxü̃arü Tupana ya Guxãétüwa Ngẽxmacüarü ore i ñaxü̃! Rü ñaa naanewa tá chanamu i wüxi i taxü̃ i guxchaxü̃. Rü guxãtáma ya yíxema nüxü̃ ĩnüchigaxe rü tá taba̱i̱xãchie.
4 Erü ngẽma Iraétanüxü̃ i Yudáanewa ngẽxmagüxü̃, rü choxna nixĩgachi, rü ñaa doxonexü̃wa taxü̃ i chixexü̃ naxügü. Rü pumarate̱xe naxca̱x nigugü i tupananetagü ga noxri tama nüxü̃ nacua̱xgüxü̃ rü bai ga norü o̱xigü nüxü̃ cua̱xgüxü̃ rü bai ga yema nuxíraxü̃xü̃ ga Yudáanearü ãẽ̱xgacügü nüxü̃ cua̱xgüxü̃. Rü ñaa doxonexü̃gu rü yema tupananetagüca̱x tüxü̃ nadai ga guxema naxacügü ga taxuxü̃ma ga chixexü̃ ügüxe.
5 Rü naétü ãmarearü guruü̃gü naxügü nax yemawa naxacüxe tüxü̃ ínagu naxca̱x ga tupananeta ga Baá. Rü ngẽma nacüma i chixexü̃ rü tama choma chanamu nax naxügüã̱xü̃ca̱x rü taguma namaxã nüxü̃ chixu rü bai i ñuxgu chauãẽwa ínanguxü̃ ga yema.
6 Rü ngẽmaca̱x rü tá nawa nangu i ngunexü̃gü i ñaa nachica i doxonexü̃ rü marü taxũtáma Tópearü doxonexü̃ i Ben-inóü̃gu naxãéga. Rü tá doxonexü̃ i Máetachicagu naxãéga. Rü chomatama ya Cori ya Tupana nixĩ i nüxü̃ chixuxü̃ i ngẽma ore.
7 Rü ñaa doxonexü̃gu tá inayarüxo i ngẽma Yudáanecüã̱xgü rü Yerucharéü̃cüã̱xgü nagu rüxĩnüexü̃. Rü norü uanügüme̱xẽgu tá chanayixẽxẽ nax nadaiaxü̃ca̱x rü ngẽmaãcü ngurucugü rü aigü namaxã ãwemügüxü̃ca̱x.
8 Rü choma rü daa ĩane rü wüxi i chianexü̃xü̃ tá chananguxuchixẽxẽ. Rü ngẽxguma duü̃xü̃gü nüxü̃ daugügu rü tá naba̱i̱xãchie. Rü guxãma ya nawa chopetüxe rü tá namaxã taba̱i̱xãchie nax nachitaxü̃xica ngéma yaxüxü̃.
9 Rü daa ĩane ya Yerucharéü̃wa tá chanamugü i norü uanügü rü tá nüxü̃ ínachomaeguãchi. Rü ngẽmaca̱x taxucürüwa ngextá naxĩ ya yimá ĩanecüã̱x. Rü ngẽmagagu taiya tá naxca̱x ínangu rü ngẽmaca̱x i ngẽma duü̃xü̃gü rü düxwa tá naxacüxegü tüxü̃ nangõ̱xgü, rü nügütátama nangõ̱xcue”, ñacurügü tá nüxü̃.
10 Rü nawena nax nüxü̃ quixuxü̃ i ngẽma cumaxã nüxü̃ chixuxü̃, ¡rü yapuxẽxẽ i ngẽma tü̃xü̃ nape̱xegu i ngẽma ãẽ̱xgacügü i cuxü̃ ümücügüxü̃!
11 ¡Rü nüxü̃ ñacurügü tá: “Cori ya Tupana ya Guxãétüwa Ngẽxmacü rü ñanagürü: ‘Daa ĩane rü tá nagu chapogü ñoma wüxi i tü̃xü̃ ngĩxü̃ ipuãchixẽẽxü̃rüxü̃ i taxuacüma wena ngĩxü̃ imexẽẽcürüxü̃! Rü nüma i duü̃xü̃gü rü tá ñaa doxonexü̃ i Tópegu nanata̱xgü i norü yuexü̃gü erü marü taxugu nanata̱xgüéga.
12 Rü ngẽmaãcü tá namaxã chanaxü ya daa ĩane rü norü duü̃xü̃gü. Rü ngẽma nax Tópemaxã chaxüxü̃rüxü̃ rü tá daa ĩane ya Yerucharéü̃maxã chaxü, erü muxũchixü̃ i yuexü̃ tá nagu nata̱xgü’. Rü chomatama ya Cori ya Tupana nixĩ i nüxü̃ chixuxü̃ i ngẽma ore.
13 Rü ngẽma doxonexü̃ i Tóperüxü̃ rü chope̱xewa tá nixãũãchi ya yima ĩpatagü ya Yerucharéü̃cüã̱x rü yima Yudáanearü ãẽ̱xgacügüpatagü rü ngẽma ĩã̱xtügü ga nawa woramacurigüca̱x pumarate̱xe yagugüxü̃ rü bínu ga ãmarexü̃ nagu nabagüxü̃ naxca̱x ga yema tupananetagü” —ñanagürü ga Tupana.
14 Rü yemawena ga Yeremía rü ínixũ ga Tópewa ga Cori ya Tupana namaxã idexaxü̃wa. Rü Tupanapataa̱xtügu nayachi rü yéma guxü̃ma ga duü̃xü̃gümaxã nidexa rü ñanagürü nüxü̃:
15 —Nüma ya Cori ya Guxãétüwa Ngẽxmacü ya Iraétanüxü̃arü Tupana ixĩcü rü ñanagürü: “Daa ĩaneca̱x rü guxü̃nema ya norü ngaicamagüne ya ĩanegüca̱x tá íchananguxẽxẽ i guxü̃ma i ngẽma poxcu i pemaxã nüxü̃ chixuxü̃, erü tama naga pexĩnüechaü̃ i chorü ore” —ñanagürü.
