Jeremías 2:1-37
2 Rü yexguma ga nüma ga Cori ya Tupana rü chomaxã nidexa rü ñanagürü:
2 —¡Ngéma naxũ rü namaxã idexa i ngẽma Yerucharéü̃cüã̱x i duü̃xü̃gü! ¡Rü nataga nax mea nüxü̃ naxĩnüexü̃ca̱x i ñaa chorü ore i ñaxü̃! “Choma ya Tupana rü nüxna chacua̱xãchi rü yexguma noxri choxü̃ pecua̱xgügu rü mea chauga pexĩnüe. Rü yexguma noxri chorü duü̃xü̃gü pexü̃ chixĩxẽẽgu, rü choxü̃ pengechaü̃gü ñoma wüxi i nge i ngexwaca ãtecü rü ngĩtexü̃ ngechaü̃cürüxü̃. Rü yema choxü̃ nax pengechaü̃xü̃gagu rü chowe perüxĩ ga ínachianexü̃wa ga taxuxü̃ma i nanetü írüxüxü̃wa.
3 Rü pemax, Pa Iraétanüxü̃x, rü aixcüma chorü duü̃xü̃gü pixĩgü rü chaugu perüxĩnüe. Rü natanüwa ga guxü̃ma ga yema togü ga duü̃xü̃gütücumügü rü pema nixĩ i pexü̃ chadexü̃ ñoma rümemaexü̃ i nanetüarü orüxü̃. Rü yexguma texé chixexü̃ pemaxã uxgu, rü choma rü pexca̱x tüxü̃ chapoxcu rü tümaca̱x yéma chanamu ga guxchaxü̃gü. Rü chomatama ya Cori ya Tupana nixĩ i nüxü̃ chixuxü̃ i ngẽma ore” —ñanagürü.
4 ¡Pa Acóbutaagü Pa Iraétanüxü̃x, rü iperüxĩnüe i norü ore ya Cori ya Tupana!
5 Rü nüma ya Cori ya Tupana rü ñanagürü pexü̃: —¿Ta̱xacü rü chixexü̃ chowa nüxü̃ nadaugü ga perü o̱xigü rü yemaca̱x choxna yaxĩgachixü̃ rü nawe naxĩxü̃ ga tupananetachicüna̱xãgü ga ngearü maxü̃ã̱xgüxü̃? Rü yemagagu taxuwama nügü namexẽẽgü.
6 Rü nüma ga perü o̱xigü rü marü tama chaugu narüxĩnüe rü nüxü̃ inarüngümae nax choma ya Cori ya Tupana yixĩxü̃ ga Equítuanewa íchanguxü̃xẽẽxü̃. Rü nüxü̃ inarüngümae nax choma yixĩxü̃ ga íchayagagüxü̃ nagu ga yema naane ga chianexü̃ ga taxuxü̃ma i nanetü nawa rüxüxü̃. Rü yema ínamáxpü̱xanexü̃wa ga ínangearü dexáã́xü̃wa chanagagü ga ínaxãũcümaxü̃wa rü taxúema nagu ãchiü̃xü̃wa, rü taxúema ixüpetüxü̃wa.
7 Rü choma nixĩ i ñaa naane i guxü̃ nawa rüxüxü̃wa chanagagüxü̃ nax yemaacü nangõ̱xgüãxü̃ca̱x ga nanetüarü ogü ga rümemaegüxü̃. Natürü i pema rü nua pexĩ rü chixexü̃ nawa pexügü i ñaa chorü naane rü ngẽmaãcü naxchi choxü̃ pexaixẽxẽ i ñaa naane i choxrü ixĩxü̃.
8 Rü ngẽma perü chacherdótegü rü tama chaugu narüxĩnüe rü tama cha̱u̱xca̱x nadaugü. Rü ngẽma perü ucu̱xẽruü̃gü rü tama choxü̃ nacua̱xgü. Rü ngẽma perü ãẽ̱xgacügü rü chomaxã nanue, rü ngẽma perü orearü uruü̃gü rü Baáchigaxü̃ãma nixugüe rü ngẽma ngearü maxü̃ã́xü̃ i naxchicüna̱xãgüwe narüxĩ.
Tupana rü nayadaxẽxẽ nax nanuxü̃ namaxã i Iraétanüxü̃
9 Rü ngẽmaca̱x i chomax ya Cori ya Tupana rü pemaxã nüxü̃ chixu rü ngẽma perü chixexü̃gagu tá guxchaxü̃gü pexca̱x íchangugüxẽxẽ i pemax rü woo penegü rü petaagü.
10 2:10-11 ¡Rü ẽcü ngẽma nachixü̃anegü i yáxü̃wa ngẽxmagüxü̃wa pexĩ, rü peyangugü rü aixcüma ngẽma nachixü̃anecüã̱xgü rü norü tupanachicüna̱xãxgüxü̃ naxoe, ngẽma pema choxü̃ nax pexoexü̃rüxü̃! Rü woo ngẽma capaxũgü i oéstewa ngẽxmagüxü̃wa pexĩxgu, rüe̱xna Quedáxarü chianexü̃ i éstewa ngẽxmaxü̃wa pexĩxgu, rü ngéma rü taxũtáma nüxü̃ ipeyangau nax ngẽma nachixü̃anecüã̱xgü norü tupanachicüna̱xãxgüxü̃ naxoexü̃ woo tama aixcüma Tupanaxü̃chi nax yixĩxü̃. Natürü i pema i chorü duü̃xü̃gü nax pixĩgüxü̃ rü woo perü Tupana ya üünecü nax chixĩxü̃ rü choxü̃ pexoe naxca̱x i ngẽma tupananetachicüna̱xãgümare i taxuwama mexü̃.
11 Nüü̃ nadau 2:10
12 ¡Pa Daxũguxü̃ i Naanex, namaxã naba̱i̱xãchi i ngẽma naxca̱x ínguxü̃ i ngẽma duü̃xü̃gü! ¡Rü idu̱xrux naxcha̱xwa i ngẽma ãũcümaxü̃ i naxca̱x ínguxü̃! Rü choma ya Cori ya Tupana nixĩ i pemaxã nüxü̃ chixuxü̃ i ngẽma.
13 Rü ngẽma chorü duü̃xü̃gü rü taxre ga pecadu nixĩ ga chope̱xewa naxügüxü̃. Rü choxna nixĩgachi ga choma nax dexá i maxü̃xü̃ chixĩxü̃. Rü ñu̱xũchi nügüca̱x nanaxügü ga norü puchugü ga tama dexá nawa yexmaechaxü̃.
Norü chixexü̃gügagu Iraétanüxü̃ca̱x ínangugü i guxchaxü̃gü
14 Rü ngẽma Iraétanüxü̃ rü tama mugüruxü̃ nixĩgü. Rü tama mugüruxü̃ca̱x nangóe. ¿Rü ta̱xacüca̱x nixĩ i nachixü̃anewa nagagüãxü̃?
15 ¿Rü ta̱xacüca̱x norü uanügü ñoma leóü̃gü nada̱i̱xü̃rüxü̃ nanadai, rü tagaãcü aita naétü naxüe? Rü nachixü̃ane rü nachitaxü̃icatama ínayaxü. Rü norü ĩanegü rü ínanagu. Rü taxúema nawa tayaxü.
16 Rü yema Equítuanecüã̱xgü ga ĩanegü ga Ménficüã̱xgü rü Tafnéxcüã̱xgü rü pexü̃ narüporamaegü, Pa Iraétanüxü̃x.
17 Rü yema pexü̃ nangupetü nagagu nax choxna pixĩgachixü̃ i choma i perü Cori ya Tupana chixĩxü̃. Rü choma nixĩ ga namawa pemaxã ichacuáxü̃.
18 Rü ñu̱xma ¿rü ta̱xacürü mexü̃ tá nixĩ i peyaxuxü̃ nax Equítuanearü ngü̃xẽẽca̱x rü Achíriaanearü ngü̃xẽẽca̱x ípeyaca̱xaxü̃? ¿Rü ta̱xacüwa pexü̃́ namexü̃ nax ngẽma taxtü i Níluarü dexáwa peyaxaxegüxü̃ rü taxtü i Eufrátearü dexáwa peyaxaxegüxü̃?
19 Rü ngẽma perü chixexü̃gagu tátama nixĩ i pepoxcuexü̃, rü ngẽma nax tama choxü̃ pengechaxü̃xü̃gagu tá nixĩ i ngúxü̃ pingegüxü̃. ¡Nagu perüxĩnü rü tá nüxü̃ pedau nax poraãcü nachixexü̃ rü nangúxü̃ nax choxna pixĩgachixü̃ rü tama choxü̃ picua̱xüü̃güxü̃ i choma nax perü Cori ya Tupana chixĩxü̃! Rü choma ya Cori ya Tupana ya Guxãétüwa Ngẽxmacü chixĩ rü pemaxã nüxü̃ chixu i ngẽma.
Natürü Iraétanüxü̃ rü tama Tupanaga naxĩnüe
20 Rü nũxcümacürüwatama nixĩ ga choxna pixĩgachixü̃ rü tama chauga pexĩnüechaxü̃xü̃. Rü ñaperügügü: “Tama cuga taxĩnüechaü̃”, ñaperügügü. Pema rü pechauechitae ñoma wüxi i ngexü̃ i natena ngeãẽxü̃rüxü̃, yerü guxü̃ma ga ma̱xpǘnegüwa rü guxü̃ma ga naigü ga imeetaxü̃tüü̃wa nüxü̃ picua̱xüü̃gü ga yema tupananetachicüna̱xãgü.
21 Choma rü ñoma úbachire ya mexẽchínerüxü̃ pexü̃ ichato nax úba i baxcaxü̃ rü mexẽchixü̃rüxü̃ pixĩgüxü̃ca̱x. Natürü i pema rü ñoma úbachicürüxü̃ pegü pixĩgüxẽxẽ, rü ngẽmaca̱x i ñu̱xma rü marü tama pexü̃ chacua̱x.
22 Rü woo chi ta̱xacürü yixẽẽruü̃maxã ípenayixẽẽchaü̃gu i perü chixexü̃, rüe̱xna chaũmaxã mea pegü piyauxgügu, rü perü chixexü̃maxã tá pexãũãchiama i chope̱xewa. Rü choma ya Cori ya Tupana nixĩ i pemaxã nüxü̃ chixuxü̃ i ngẽma.
23 ¿Rü ñuxãcü i pema rü ñaperügügü: “Toma rü tama nixĩ i togü taxãũãchixü̃, rü bai nax tupananetagü ga Baágüxü̃ ticua̱xüü̃güxü̃?” ñapegürügü. Rü dücax, ¿ta̱xacü yixĩxü̃ ga yema pexügüxü̃ ga doxonexü̃wa? ¡Rü nüxna pecua̱xãchie ga guxü̃ma ga yema chixexü̃ ga pema pexügüxü̃! Rü pema rü ñoma caméyu i ngexü̃ i yatüxü̃ca̱x nu ne nañaxü̃rüxü̃ pixĩgü.
24 Pema rü ñoma naixnecücüã̱x i búru i ngexü̃ i worexü̃ i yatüxü̃ca̱x dauxü̃ i buanecüemagu ngü̃xgüxü̃rüxü̃ pixĩgü. Rü ngẽxguma naworegu rü taxúema ítayachaxãchixẽxẽ nax yatüxü̃ca̱x nadauxü̃. Rü ngẽxguma yatüxü̃ naxca̱x da̱u̱xgu rü tauxchaãcüma nüxü̃ yangauxü̃. Rü ngẽxgumarüü̃tama pixĩgü i pema nax ngẽma naxchicüna̱xãgüca̱x pedaugüxü̃.
25 Pa Iraétanüxü̃, ¡taxṹ i pegü pengu̱xcutüxẽẽgüxü̃ nax ngearü chapatuãcüma ipexüãchixü̃ rü taxṹ i pegü pipaxmanaaxẽẽgüxü̃ nax ngẽma naxchicüna̱xãgüwe perüxĩxü̃ca̱x! Natürü ga pema rü ñaperügügüama: “Taxucürüwa nüxna tixĩgachi i ngẽma naxchicüna̱xãgü. Erü toma rü nüxü̃ tangechaxü̃ i ngẽma togü i nachixü̃anegüarü tupananetachicüna̱xãgü, rü ngẽmaca̱x nawe tarüxĩ”, ñaperügügü.
Iraétanüxü̃ rü norü chixexü̃gügagu tá napoxcue
26 Rü ñoma wüxi i ngĩ́xta̱xaxü̃ rü ngẽxguma íyanguéü̃güãgu rü ixãneãchixü̃rüxü̃ tá nixĩ i yaxãneãchitanüxü̃ i ngẽma Iraétanüxü̃ i duü̃xü̃gü, rü norü ãẽ̱xgacügü, rü ngẽma ãẽ̱xgacügüarü ngü̃xẽẽruü̃gü, rü norü chacherdótegü, rü ngẽma norü orearü uruü̃gü.
27 Rü pemax, Pa Iraétanüxü̃x, rü wüxi ya nai rü ñaperügügü nüxü̃: “Cuma nixĩ i tonatü quixĩxü̃”, ñaperügügü nüxü̃. Rü wüxi ya nuta rü ñaperügügü nüxü̃: “Cuma nixĩ i toé”, ñaperügügü nüxü̃. Natürü i choma rü choxna pexãgüca̱xwexmare rü tama choxü̃ perüdaunüchaü̃. Natürü ngẽxguma ãũcümaxü̃wa pengẽxmagügu rü cha̱u̱xca̱x peca rü ñaperügügü: “¡Paxa nua naxũ nax toxü̃ curüngü̃xẽẽxü̃ca̱x!” ñaperügügü.
28 Pa Yudátanüxü̃x, ¿ngexü̃gü nixĩ i ngẽma tupananetachicüna̱xãgü ga pematama pexügüxü̃? Pema rü perü ĩanegüe̱xpü̱x nixĩ i ngẽma perü tupananetachicüna̱xãgü. ¡Ẽcü nua naxĩ i ngẽma naxchicüna̱xãgü nax nüxü̃ pedauxü̃ca̱x rü tá aixcüma pexü̃ yanangü̃xẽẽgü i ngẽxguma guxchaxü̃ pexca̱x ínguxgu!
29 ¿Rü ta̱xacüca̱x nixĩ i chauchiga pidexagüxü̃? Rü guxãma i pema nixĩ i chomaxã perüxuanüxü̃. Rü choma ya Cori ya Tupana nixĩ i pemaxã nüxü̃ chixuxü̃ i ngẽma.
30 Rü choma rü chanapoxcu ga petanüxü̃gü, natürü tama chauga naxĩnüe, rü yemaacü natüca̱xmamare nixĩ nax chapoxcuexü̃. Rü pematama penadai ga perü orearü uruü̃gü, ñoma leóü̃gü i idüraexü̃ nada̱i̱xü̃rüxü̃.
31 Rü pemax i ñomaü̃cüxü maxẽxü̃ i duü̃xü̃gü ¡ẽcü iperüxĩnüe i chorü ore! Pa Iraétanüxü̃x ¿pexca̱x rü ñoma wüxi i naane i paanexü̃rüxü̃ chixĩ? ¿Pexca̱x rü ñoma wüxi i naane i waanexü̃rüxü̃ chixĩ? Pa Chorü Duü̃xü̃güx ¿ta̱xacüca̱x ñaperügügü choxü̃: “Tomagü rü taxúeme̱xẽwa tangexmagü rü marü tagutáma cuxca̱x tawoegu”, ñaperügügü?
32 Rü wüxi i pacü rü tama nüxü̃ iyarüngüma i ngẽma ngĩrü ngã̱xãẽruü̃gü. Rü ngẽxguma yangĩxgu rü tama nüxü̃ iyarüngüma nax ngĩgü naxüaxü̃ i ngẽma ngĩrü meruü̃gü. Natürü ngẽma chorü duü̃xü̃gü rü nũxcümatama choxü̃ inayarüngümae.
33 Rü cumax, Pa Yudáanex, rü mea nüxü̃ cucua̱xüchi nax naxca̱x cudauxü̃ i togü i nachixü̃anegüarü ngü̃xẽxẽ. Rü woo i ngẽma ngexü̃gü i chixri maxẽxü̃ rü cuwa nixĩ i nangúexü̃.
34 Rü guxü̃wama cuxãũãchichiru tümagümaxã ya yíxema duü̃xẽ ya ingearü diẽruã́xẽ rü yíxema taxuxü̃ma i chixexü̃ ügüxe, rü yíxema i tama tümawa nüxü̃ cuyangauxe i ta̱xacürü chixexü̃ nax taxügüxü̃.
35 Natürü guxü̃ma i ngẽma chixexü̃ i cuxüxü̃étüwa rü cugü ícupoxü̃ rü ñacurügü: “Choma rü taxuxü̃ma i chixexü̃ chaxü, rü Tupana rü tama chomaxã nanu”, ñacurügü. Rü ñu̱xma nax nüxü̃ quixuxü̃ nax taxuxü̃ma i chixexü̃ cuxüxü̃, rü choma rü tá cuxna chaca rü cuxü̃ íchaxuaxü̃ naxca̱x i ngẽma chixexü̃ i cuxüxü̃.
36 ¿Rü ta̱xacüca̱x cuñu̱xãẽxü̃chi nax naxca̱x cudauxü̃ i to i nachixü̃anearü ngü̃xẽxẽ? Rü ngẽma Equítuane rü tá cumaxã ínayatü, yema Achíriaane cumaxã íyatüxü̃rüxü̃.
37 Rü curü ãnemaxã tá Equítuanewa cutaegu, erü choma rü marü nüxü̃ chaxo i ngẽma nachixü̃anegü i nüxü̃́ cuyaxõxü̃. Rü taxuwatáma cuxü̃́ name nax namaxã cuxãmücüxü̃ i ngẽma nachixü̃anegü —ñanagürü ya Cori ya Tupana.
