Jeremías 21:1-14
21 Rü Yudáanearü ãẽ̱xgacü ga Chedequía rü nanamu ga Pachú ga Maquía nane, rü ñu̱xũchi chacherdóte ga Chofonía ga Maachía nane nax Yeremíaxü̃tawa naxĩxü̃ca̱x rü ñaa orexü̃ namaxã yanaxugüxü̃ca̱x, rü Yeremíaxü̃ ñanagürügü:
2 21:2-3 —¡Toxü̃ rüngü̃xẽxẽ, rü toxca̱x Cori ya Tupanamaxã idexa! Erü Nabucudonochó i Babiróniaanearü ãẽ̱xgacü rü toxca̱x ínayaxüãchi. Rü ngürüãchi nüma ya Cori ya Tupana rü norü poramaxã wüxi i mexü̃ toxca̱x naxü̱x nax ngẽmaãcü Nabucudonochó toxna yaxĩgachixü̃ca̱x —ñanagürügü. Rü yexguma ga Cori ya Tupana rü Yeremíamaxã nidexa. Rü nüma ga Yeremía rü nanangãxü̃ ga yema duü̃xü̃gü ga Chedequía yéma mugüxü̃ rü ñanagürü nüxü̃:
3 Nüü̃ nadau 21:2
4 —Chedequíamaxã nüxü̃ pixu rü Cori ya Iraétanüxü̃arü Tupana rü ñanagürü: “Choma rü tá ĩanegu chanaxücuxẽxẽ i ngẽma curü churaragü i ĩanearü düxétügu Babiróniaanearü ãẽ̱xgacüarü churaragümaxã nügü daixü̃. Rü ñu̱xũchi ngẽma Babiróniacüã̱x i Cadéutanüxü̃ i poxeguxü̃arü düxétüwaama pexü̃ íchomaeguxü̃ rü daa ĩanearü ngãxü̃gu tá chanangutaque̱xexẽxẽ.
5 Rü chomatátama chorü poramaxã, rü taxü̃ i chorü numaxã tá pemaxã yigü tadai.
6 Rü tá chanadai i guxü̃ma i duü̃xü̃gü i daa ĩanecüã̱x. Rü wüxi i da̱xaweane i poraxü̃maxã tá nayue i duü̃xü̃gü rü naxü̃nagü.
7 Rü ngẽmawena rü Nabucudonochóme̱xẽwa, rü ñu̱xũchi ngẽma togü i uanügü i máxwa̱xegüxü̃me̱xẽwa, tá chanangexmagüxẽxẽ i Yudáanearü ãẽ̱xgacü i Chedequía wüxigu namaxã i norü churaragüerugü, rü churaragü, rü ñu̱xũchi yima ĩanecüã̱x i duü̃xü̃gü i tama da̱xawemaxã, rü daimaxã, rü taiyamaxã yuexü̃. Rü choma rü tá chanamu i Nabucudonochó nax tama nüxü̃́ nangechaü̃tümüü̃güãcüma, rü tama namaxã yaxãũxãchieãcüma taramaxã nadaiaxü̃ i ngẽma duü̃xü̃gü. Rü choma ya Cori ya Tupana nixĩ i nüxü̃ chixuxü̃ i ngẽma ore.
8 ¡Rü ngẽxgumarüxü̃ ta duü̃xü̃gümaxã nüxü̃ ixu rü choma ya Cori ya Tupana rü ñachagürü! ¿Rü ngexü̃rüxüxü nixĩ i penaxwa̱xegüxü̃, rü maxü̃ rüe̱xna yu?
9 Rü yíxema daa ĩanewatama tügü inuxü̃güxe rü aixcüma daigu rüe̱xna taiyamaxã rüe̱xna da̱xaweanemaxã tá tayue. Natürü yíxema tügü ixãgüxe rü nawe rüxĩxe i ngẽma Cadéutanüxü̃ i ñu̱xma daa ĩaneca̱x íyaxüãchixü̃ rü taxũtáma tayue. Rü ngẽmaãcü tá yuwa tügü ítanguxü̃xẽxẽ.
10 Erü choma rü daa ĩanemaxã chanaxuegu nax guxchaxü̃ naxca̱x íchanguxẽẽxü̃ rü taxuxü̃ma i mexü̃. Rü Babiróniaanearü ãẽ̱xgacüme̱xẽgu tá chananguxẽxẽ ya daa ĩane, rü nüma rü tá nayagu. Rü choma ya Cori ya Tupana nixĩ i nüxü̃ chixuxü̃ i ngẽma”, ñanagürü.
Cori ya Tupana rü guxchaxü̃ Yudáanearü ãẽ̱xgacümaxã naxuegu
11 21:11-12 Rü Cori ya Tupana rü Yeremíaxü̃ ñanagürü ta: “¡Yudáanearü ãẽ̱xgacü ya Dabítaxamaxã chauégagu nüxü̃ ixu i ñaa ore i ñaxü̃: Írüxĩnü i ñaa Cori ya Tupanaarü ore: Guxü̃ i ngunexü̃gu mea curü duü̃xü̃gümaxã inacua̱x! ¡Rü ngẽma diẽruã̱xgüxü̃me̱xẽwa tüxü̃ ínanguxü̃xẽxẽ ya yíxema duü̃xẽgü i chixri tümamaxã inacua̱xgüxe nax tama ngẽma chixexü̃ i cuxüxü̃gagu cuxna nanguxü̃ca̱x i chorü nu, ñoma üxüema i inaixü̃ i taxucürüwama texe ixoxẽẽxü̃rüxü̃!” ñanagürü.
12 Nüü̃ nadau 21:11
Cori ya Tupana rü nüxü̃ nixu i ngẽma poxcu i Yerucharéü̃ca̱x tá inguxü̃
13 Rü Cori ya Tupana rü ñanagürü ta: “Pa Ĩane ya Yerucharéü̃x, cuma rü doxonexü̃maxã icucua̱x ñoma wüxi ya nuta ya taxüchicü ya doxonexü̃wa ngẽxmacürüxü̃. Natürü choma ya Cori ya Tupana rü poraãcü cumaxã chanu. Pemax rü ñapegürügü: ‘¿Rü ta̱xacü tá nüxü̃́ natauxcha nax taxca̱x íyaxüãchixü̃? ¿Rü ta̱xacü tá nüxü̃́ natauxcha nax nua tórü cu̱xchicaxü̃wa nangugüxü̃?’ ñaperügügü.
14 Choma rü tá pexü̃ chapoxcue, erü ngẽma nixĩ i pexna üxü̃ nagagu i ngẽma chixexü̃gü i pexügüxü̃. Rü nawa tá chanangixichi i ngẽma perü naixnecügü. Rü yima üxüema rü tá nayaxaxẽxẽ i guxü̃ma i ngẽma naixnecügü i perü ĩanecüwawa ngẽxmagüxü̃. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü ga Yeremía.
