Jeremías 22:1-30
22 22:1-2 Cori ya Tupana rü choxü̃ ñanagürü: —Pa Yeremíax, ¡ãẽ̱xgacüpatawa naxũ rü yima Yudáanearü ãẽ̱xgacü ya Dabíarü tochicaxü̃wa rütocüpe̱xewa, rü ngẽma norü ngü̃xẽẽruü̃güpe̱xewa, rü ñu̱xũchi guxü̃ma ya yima ĩanearü duü̃xü̃güpe̱xewa ñanagürü nüxü̃!: “¡Iperüxĩnüe i Cori ya Tupanaarü ore!
2 Nüü̃ nadau 22:1
3 ¡Rü mea duü̃xü̃gümaxã inacua̱x rü mexü̃ i nacümagu pemaxẽ i ñaa nachicawa! ¡Rü ngẽma diẽruã̱xgüxü̃me̱xẽwa tüxü̃ ínanguxü̃xẽxẽ ya yíxema duü̃xẽgü i chixri tümamaxã inacua̱xgüxe! ¡Rü taxṹ i chixri namaxã pixĩgüxü̃ i ngẽma to i nachixü̃anecüã̱xgü, rü yíxema taxcutagü, rü ñu̱xũchi yíxema yutegüxe! ¡Rü taxṹ i ñaa nachicagu tüxü̃ pimáxü̃ ya yíxema duü̃xẽ ya taxuxü̃ma i chixexü̃ üxe!
4 Rü ngẽxguma tá aixcüma peyanguxẽẽgu i ngẽma pexü̃ chamuxü̃ rü guxü̃gutáma Dabítanüxü̃ nixĩ i Yudáanearü ãẽ̱xgacügü ixĩgüxü̃ rü Dabíarü tochicaxü̃wa rütogüxü̃. Rü nümagü rü guxü̃gutáma norü carugümaxã rü norü cowarugümaxã daa ĩanegu nachocu namaxã i norü ngü̃xẽẽruü̃gü rü daa ĩanearü duü̃xü̃gü
5 Natürü ngẽxguma taxũtáma naga pexĩnüegu i ñaa pemaxã nüxü̃ chixuxü̃ rü naxchipe̱xexica tá ngéma nayaxü ya daa ãẽ̱xgacüpata. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü ya Cori ya Tupana.
6 Erü Cori ya Tupana rü ñanagürü nachiga ya daa Yudáanearü ãẽ̱xgacüpata: —Cuma ga ü̃pa rü cha̱u̱xca̱x rü yima ma̱xpǘne ya Garaáxrüxü̃ quixĩ nax cumexü̃, rü ñoma Líbanuarü ngüchitaeruxü̃rüxü̃ cha̱u̱xca̱x quixĩ nax cumexü̃. Natürü i ñu̱xma rü cumaxã chanaxuegu rü tá chianexü̃xü̃ cuxü̃ chixĩxẽxẽ rü wüxi i nachica i ngearü duü̃xü̃ã́xü̃ tá quixĩ.
7 Rü uanügü i ixãxnexü̃ tá cuxca̱x ngéma chamugü nax cugu yapogüexü̃ca̱x. Rü nagu tá nachexgüe ya yima curü caxtagü ya imexẽchine ya ocayiwanaxca̱x, rü ñu̱xũchi tá üxüétüwa nayawocu.
8 Ngẽmawena rü muxü̃tama i nachixü̃anecüã̱x i duü̃xü̃gü rü tá nawa nachopetü ya daa ĩane, rü ñu̱xũchi nügüna tá nacagü, rü ñanagürügü tá: “¿Ta̱xacüca̱x ya Cori ya Tupana rü ñaãcü nanapoxcu ya daa ĩane ya taxü̃ne?” ñanagürügü tá.
9 Rü nügü nangãxü̃gü tá, rü ñanagürügü tá nügümaxã: “Yerü yema duü̃xü̃gü nüxna nixĩgachitanü ga yema uneta ga norü Cori ya Tupana namaxã üxü̃, rü naxca̱x nangutaque̱xegü rü nüxü̃ nicua̱xü̃gü ga tupananetachicüna̱xãgü”, ñanagürügü tá nügümaxã —ñanagürü ya Cori ya Tupana.
Yeremía rü ãẽ̱xgacü ga Charúü̃chiga (Yoáca) nidexa
10 ¡Rü taxṹ i ãẽ̱xgacü ya yucü ya Yochíaca̱x pexauxexü̃! Rü narümemae nixĩ nax nane i Charúü̃ca̱x pexauxexü̃, erü nüma rü to i nachixü̃anewa nanagagü rü tagutáma nataegu. Rü ngẽxma tá nayu, rü tagutáma wena nüxü̃ nadau i ngẽma norü naane i nagu nabuxü̃.
11 22:11-12 Erü nüma ya Cori ya Tupana rü nachiga nidexa i Charúü̃ i Yochía nane i nanatüwena Yudáanearü ãẽ̱xgacü ixĩcü rü marü to ga nachixü̃anewa nagagüãcü. Rü ñanagürü: —Nüma ga Charúü̃ rü tagutáma nataegu, rü ngẽma nachica i nawa nagagüáxü̃gu tá nayu, rü tagutáma wena nüxü̃ nadau i ñaa nachixü̃ane —ñanagürü.
12 Nüü̃ nadau 22:11
Ore i ãẽ̱xgacü i Yoachíü̃chiga
13 Rü nüma ga Cori ya Tupana rü ãẽ̱xgacü ga Yoachíü̃chiga ñanagürü: —Pa Ãẽ̱xgacüx, wüxi i ngechaü̃ nixĩ i cuxca̱x, erü cuma rü cunaxü ya ãẽ̱xgacüpata rü naigü ya ĩpatagü ya itaxü̃ne, natürü chixexü̃ cuxü erü tama tüxü̃́ cunaxütanü ya yíxema cuxü̃́ naxügüxe.
14 Rü cuma rü ñacurügü: “Wüxi ya taxü̃ne ya ãẽ̱xgacüpata tá chaugüxü̃́ chaxü. Rü norü dauxü̃chixü̃wa rü tá nangẽxma i ñuxre i naxmachiãgü i taxü̃”, ñacurügü. Rü cuyataxẽxẽ i norü beü̃tánagü. Rü ngẽma naxtapü̱xgü rü mürapewa i ocayiwamaxã cuyapexgü. Rü ñu̱xũchi chauxruxü̃ i dauxü̃maxã cuyachagü.
15 ¿Ẽ̱xna nagu curüxĩnü nax wüxi i ãẽ̱xgacü i mexü̃ quixĩxü̃ ega mexü̃ne ya ãẽ̱xgacüpata ya ocayiwamaxã pexmachianewa cungexmagu? Rü gumá cunatü rü taãẽãcüma namaxü̃ yerü aixcüma mea duü̃xü̃gümaxã inacua̱x. Rü yemaca̱x nixĩ ga duü̃xü̃gü ga nüxü̃ nangechaxü̃güxü̃.
16 Rü tüxü̃ ínapoxü̃ ga guxema ingearü diẽruã̱xgüxe rü guxema guxchaxü̃wa yexmagüxe. Rü yemaca̱x nixĩ ga mea nüxü̃ nangupetüxü̃ ga gumá cunatü. Rü yema naxüxü̃wa inanawe̱x nax aixcüma choxü̃ nacuáxü̃. Rü choma ya Cori ya Tupana nixĩ i nüxü̃ chixuxü̃ i ngẽma ore.
17 “Natürü i cuma rü naxca̱x cuxoegaãxẽ i ngẽma curü ngẽmaxü̃gü i chixexü̃wa cuyaxuxü̃. Rü cuyama̱x ya yíxema taxuxü̃ma i ta̱xacürü chixexü̃ ügüxe. Rü ñu̱xũchi chixri tümamaxã icucua̱x rü ngetanüãcü tüxü̃ cupuracüexẽxẽ ya yíxema curü duü̃xẽgü” —ñanagürü ga Cori ya Tupana.
18 Rü Cori ya Tupana rü Yudáanearü ãẽ̱xgacü ya Yoaquíü̃ ya Yochía nanechiga nidexa rü ñanagürü: —Taxúetama cuxca̱x taxaxu i ngẽxguma cuyu̱xgu. Rü taxúetama texé ñatagürü: “¡Ãẽ̱xgacüca̱x changechaü̃, Pa Chauenexẽ! ¡Rü ãẽ̱xgacüca̱x changechaü̃, Pa Chaueya̱x! ¡Rü ãẽ̱xgacüca̱x changechaü̃, Pa Corix! ¡Rü cuxca̱x tangechaxü̃, Pa ãẽ̱xgacüx!” ñatagürü. Rü ngẽmaãcü taxúetama cuxca̱x tangechaxü̃ i ngẽxguma cuyu̱xgu.
19 Rü ngẽxguma cuyu̱xgu rü Yerucharéü̃arü namagügu tá cuxü̃ nitúgümare. Rü Yerucharéü̃arü düxétüwa tá cuxü̃ nayata̱xgü ñoma wüxi i búru ítáxü̃rüxü̃ —ñanagürü ga Cori ya Tupana.
Cori ya Tupanaarü ore ga Yerucharéü̃chiga
20 Cori ya Tupana rü yema Yudátanüxü̃xü̃ ñanagürü: —Pa Yudátanüxü̃x, ¡ẽcü ma̱xpǘne ya Líbanugu pexĩgü rü ngéma aita pexügü! ¡Rü ma̱xpǘne ya Bacháü̃wa rü petagae! ¡Rü ngẽma Abaríü̃arü ngüchitaeruü̃güwa aita pexügü! Erü guxü̃ma i ngẽma nachixü̃anegü i nüxü̃́ peyaxõgüxü̃ rü uanügüme̱xẽwa nangẽxmagü.
21 Choma rü pemaxã chidexachire̱x ga yexguma mea pexü̃ nangupetügu, natürü ga pema rü tama chauga pexĩnüechaü̃. Rü woetama yemaacü pixĩgü ga yexguma noxri pengóegu, rü taguma chauga pexĩnüechaü̃.
22 Rü guxü̃táma i perü ãẽ̱xgacügü rü tá nigagü ñoma buanecü yagagüxü̃rüxü̃. Rü guxü̃ma i ngẽma togü i nachixü̃anegü i nüxü̃́ peyaxõgüxü̃ rü tá ta uanügüme̱xẽwa nangẽxmagü. Rü pema rü tá pexãnee rü taxuwatáma pime nagagu i guxü̃ma i ngẽma chixexü̃gü i pexügüxü̃.
23 Rü ñu̱xma i cumax, Pa Ãẽ̱xgacüx, rü cutaãxẽ nawa ya yima mexü̃ne ya ãẽ̱xgacüpata i Líbanuwa ne naxü̃ i ocayiwamaxã pexcüwagüne. Natürü ngúxü̃ tá quinge i ngẽxguma ngẽma ãũcümaxü̃gü cuxca̱x íngugügu, ñoma wüxi ya ngexe ya íxraxacüxe i ngúxü̃ ingexerüxü̃ —ñanagürü ga Cori ya Tupana.
Tupanaarü ore ga Yeconíaca̱x ixĩxü̃
24 22:24-25 Rü yexguma nayu̱xgu ga Yoaquíü̃ rü nane ga Yeconía nachicüxü Yudáanearü ãẽ̱xgacü ningucuchi. Rü Cori ya Tupana rü Yeconíaxü̃ ñanagürü: —Chauégagu cumaxã chanaxuegu rü woo nax ñoma wüxi i ãnera i chorü tügüneme̱xẽwa ixücuchixü̃rüxü̃ nax quixĩxü̃, rü tá cuxü̃ íchata̱xüchi nax ãẽ̱xgacü quixĩxü̃ nax ngẽmaãcü curü uanügü i nüxü̃ cumuü̃xüchixü̃güna cuxü̃ chamuxü̃ca̱x. Rü ngẽma Babiróniaanearü ãẽ̱xgacü i Nabucudonochóna, rü ñu̱xũchi ngẽma Cadéugüna tá cuxü̃ chamu.
25 Nüü̃ nadau 22:24
26 Rü wüxigu cuémaxã ñaa naanewa tá pexü̃ íchawoxü̃ nax wüxi i naane i tama nagu pebuexü̃gu peyuexü̃ca̱x i pema i taxre.
27 Rü ngẽmaãcü i pema rü tagutáma naxca̱x pewoegu i ngẽma naane i naxca̱x pewoeguchaü̃xüchixü̃ —ñanagürü.
Tupanaarü orearü uruxü̃ rü Yeconíachiga nidexa
28 Yeconía rü ñoma wüxi i tüxü̃ i púxü̃ i taxuwama mexü̃rüxü̃ nixĩ. Rü wüxi i naxchipe̱xe i taxúema naxwa̱xexü̃rüxü̃ nixĩ. ¿Rü ta̱xacüca̱x i nüma rü nanegü rü naxacügü i wüxi i naane i tama nüxü̃ nacua̱xgüxü̃wa nagagüãxü̃?
29 ¡Pa Ñoma i Naanex, Pa Ñoma i Naanex, Pa Ñoma i Naanex! ¡Nüxü̃ naxĩnü i ngẽma Cori ya Tupanaarü ore!
30 Rü Cori ya Tupana rü ñanagürü: —Ngẽxguma poperagu penaxümatüégagu i ñaa yatü i Yeconía, rü yatü i ngexacüxü̃ ñaxü̃ ngẽxma tá pexümatü. Rü yatü i taxuwama mexü̃ ñaxü̃ tá ngẽxma pexümatü. Erü taxuxü̃táma i nanegü ãẽ̱xgacüwa nangu nax Dabíarü tochicaxü̃wa natoxü̃ca̱x rü ngẽmaãcü Yudáanearü ãẽ̱xgacü nax yixĩxü̃ca̱x —ñanagürü ya Cori ya Tupana.
