Jeremías 23:1-40
23 Nüma ya Cori ya Tupana rü ñanagürü: —Nügümaxã nangechaü̃gü i ngẽma ãẽ̱xgacügü i tama mea nüxna daugüxü̃ i chorü duü̃xü̃gü, rü ngẽmaca̱x inarütauxe rü nawoone —ñanagürü.
2 Rü nüma ya Cori ya Tupana rü ñanagürü nüxü̃ i ngẽma ãẽ̱xgacügü i Iraétanüxü̃maxã icuáxü̃: —Pema rü penawoone i chorü duü̃xü̃gü, rü penaxĩgüxẽxẽ rü tama aixcüma mea nüxna pedaugü. Dücax, ñu̱xma i choma rü ngẽma chixexü̃gü i pexügüxü̃ca̱ tá pexü̃ chapoxcue. Rü chomatama ya Cori ya Tupana nixĩ i pemaxã nüxü̃ chixuxü̃ i ngẽma.
3 Rü chomatátama chayagagü i ngẽma chorü duü̃xü̃gü ga togü ga nachixü̃anegügu chawoonexü̃. Rü tá chanaxĩtaque̱xexẽxẽ nax wena nachixü̃aneca̱x nawoeguxü̃ca̱x, rü ngẽmaãcü ngéma yamuxü̃ca̱x.
4 Rü natanügu tá chanamugü i ãẽ̱xgacügü i aixcüma mea nüxna dauxü̃ nax ngẽmaãcü taxuca̱xma namuü̃exü̃ca̱x, rü taxuxü̃ma iyarütaxuxü̃ca̱x. Rü chomatama ya Cori ya Tupana nixĩ i nüxü̃ chixuxü̃ i ngẽma —ñanagürü.
5 Rü nüma ya Cori ya Tupana rü ñanagürü: —Wüxi i ngunexü̃ rü wüxi ya Dabítaxaxüchi tá Iraétanüxü̃arü ãẽ̱xgacü nixĩ. Rü nüma rü tá mea chorü duü̃xü̃gümaxã inacua̱x, erü aixcüma tá cua̱x nüxü̃́ nangẽxma. Rü nüma rü aixcüma tá nüxü̃ narüngü̃xẽxẽ i chorü duü̃xü̃gü nax ngẽmaãcü yanawe̱xãchixẽẽãxü̃ca̱x i norü guxchaxü̃gü i ñoma i naanewa.
6 Rü ngẽxguma nüma ãẽ̱xgacü yixĩxgu rü Yudáane rü taxũtáma to i nachixü̃ane namaxã inacua̱x rü ngẽma Iraéanearü duü̃xü̃gü rü taxuca̱xtama namuü̃e. Rü ngẽma tá namaxã naxugüãxü̃ ya yimá ãẽ̱xgacü rü “Cori ya Tamaxã Poracü”, tá nixĩ i naéga —ñanagürü ga Tupana.
7 Rü nüma ya Cori ya Tupana rü ñanagürü: —Tá ínangugü i ngunexü̃gü i taxũtáma nagu ñapegügüxü̃: “Namaxü̃ ya Cori ya Tupana ga Equítuanewa Iraétanüxü̃xü̃ ínguxü̃xẽẽcü”.
8 Natürü ñapegürügü tá: “Namaxü̃ ya Cori ya Tupana ga nachixü̃ane ga nórtewaama yexmaxü̃wa rü yema togüama ga nachixü̃anegü ga nagu tawoonexü̃wa tüxü̃ ínguxü̃xẽẽcü i yíxema i Iraétanüxü̃”, ñapegürügü tá. Rü perü naanewa tátama peyamaxẽ —ñanagürü ya Tupana.
Ore nachiga ga orearü uruü̃güneta
9 Cori ya Tupana chomaxã nüxü̃ nixu i wüxi i ore i pechiga Pa Orearü Uruxü̃günetax. Rü ngẽmaca̱x i choma i Yeremía rü poraãcü choxü̃́ nangu̱x rü nidu̱xru i chauxune, rü ñoma wüxi i duü̃xü̃ i bínumaxã ngãxü̃xü̃rüxü̃ chixĩ nape̱xewa ya Cori ya Tupana rü norü ore i üünexü̃.
10 Rü ñaa nachixü̃ane rü namaxã nayapa i duü̃xü̃gü i Tupanana ixĩgachixü̃ rü tama aixcüma naga ĩnüexü̃. Rü ngẽma orearü uruü̃güneta rü paxa naxca̱x nadaugü nax chixexü̃ naxügüxü̃. Rü ngẽmaca̱x ya Cori ya Tupana rü chixexü̃ namaxã naxuegu i ñaa naane rü chianexü̃xü̃ nayangucuchixẽxẽ. Rü ñu̱xma i ngẽma wocachitaü̃güarü maxẽgü rü marü nipagü.
11 23:11-12 Rü Cori ya Tupana rü ñanagürü: —Woo ngẽma orearü uruü̃gü, rü ngẽma chacherdótegü rü tama aixcüma choxü̃́ nayaxõgü. Rü chopatagu nüxü̃ ichayangau nax chixexü̃ naxügüxü̃. Rü ngẽmaca̱x ngẽma nama i nagu naxĩxü̃ rü tá naxẽane rü tá nacorama. Rü tá ngéma nüxü̃ nacu̱xnetagü nax ngẽxma yayixü̃ca̱x. Rü ngẽma ngunexü̃ i nagu tá nüxna chacaxü̃ i norü chixexü̃güchiga, rü guxchaxü̃wa tá nangẽxmagü. Rü choma ya Cori ya Tupana nixĩ i nüxü̃ chixuxü̃ i ngẽma ore.
12 Nüü̃ nadau 23:11
13 Choma rü marü nüxü̃ chadau i ngẽma Chamáriaanearü orearü uruü̃güneta nax chixexü̃ naxügüxü̃ rü ngẽmaãcü choxü̃ nanuxẽẽgüxü̃. Erü nüxü̃ nixugü nax tupana yixĩxü̃ i Baá rü ngẽmaãcü choxna nayaxĩgachixẽxẽ i chorü duü̃xü̃gü i Iraétanüxü̃.
14 Rü choma rü marü nüxü̃ chadau i ngẽma Yerucharéü̃arü orearü uruü̃güneta nax poraãcü chixexü̃ naxügüxü̃. Rü ngexü̃gü i ãtéxü̃maxã namaxẽxü̃ rü duü̃xü̃güxü̃ nawomüxẽẽgüxü̃. Rü ngẽma duü̃xü̃gü i chixexü̃gu maxẽxü̃axü̃́ nanangúchaü̃xẽxẽ nax tama nüxna yaxĩgachixü̃ca̱x i ngẽma chixexü̃ i nagu namaxẽxü̃. Rü nümagü i ngẽma orearü uruü̃güneta rü ñu̱xũchi ngẽma ĩanecüã̱xgü rü chope̱xewa rü ñoma Chodómacüã̱x rü Gomóracüã̱xrüxü̃ nixĩgü.
15 Rü ngẽmaca̱x i choma ya Cori ya Tupana ya Guxü̃étüwa Ngẽxmaxe, rü namaxã chanu i ngẽma orearü uruü̃güneta rü ñachagürü nüxü̃: “Pexü̃ tá chanangõ̱xẽxẽ i ta̱xacü i üxüxü̃, rü pexü̃ tá nawa chaxaxegüxẽxẽ i dexá i üxchíüxü̃, erü pemax, Pa Yerucharéü̃arü Orearü Uruü̃günetax, rü pegagu nixĩ nax guxü̃ i ñaa nachixü̃anewa nanguxü̃ i chixexü̃” —ñanagürü.
16 Rü Cori ya Tupana ya Guxü̃étüwa Ngẽxmacü rü ñanagürü: —¡Pa Iraétanüxü̃, taxṹ i naga pexĩnüexü̃ i ngẽma orearü uruü̃güneta nüxü̃ ixugüxü̃! Erü ngẽma nüxü̃ yaxugüxü̃ rü doramare nixĩ, rü dexagü i nügüãẽwatama nayauxgüxü̃ i tama choma namaxã nüxü̃ chixuxü̃ nixĩ.
17 Rü ngẽma orearü uruü̃güneta rü ñanagürügü nüxü̃ i ngẽma duü̃xü̃gü i tama chorü orega ĩnüexü̃xü̃: “Guxü̃táma mea pexü̃́ ínanguxuchi”, ñanagürügü. Rü ngẽma orearü uruü̃güneta rü ñanagürügü nüxü̃ i ngẽma duü̃xü̃gü i nümatama nagu naxĩnüexü̃gu rüxĩnüexü̃: “Taxuxü̃táma i chixexü̃ pexca̱x ínangu”, ñanagürügü —ñanagürü ya Tupana.
Yeremíaarü dexa
18 ¿Natürü texé nüxü̃ tacua̱x i ngẽma ẽxü̃guxü̃ i Cori ya Tupanaxicatama nagu rüxĩnüxü̃? ¿Rü texé nüxü̃ tadau rüe̱xna nüxü̃ taxĩnü i ngẽma norü ore? ¿Rü texé nüxü̃́ itarüxĩnü?
19 Rü ngẽma norü nu ya Cori ya Tupana rü ñoma wüxi ya tacü ya buanecürüxü̃ nixĩ, rü ñoma wüxi ya tacü ya buanecü ya ixã̱ũ̱xẽmacürüxü̃ nixĩ naxca̱x i ngẽma chixexü̃arü üruü̃gü.
20 Rü ngẽma norü nu ya Cori ya Tupana rü taxũtáma ínayachaxãchi ñu̱xmata yanguxẽẽã i ngẽma nagu naxĩnüxü̃. Rü tá ínangugü i ngunexü̃gü i nagu tá aixcüma nagu perüxĩnüexü̃ i ngẽma pexü̃ ngupetüxü̃, rü tá aixcüma nüxü̃ pecua̱x nax ta̱xacüchiga yixĩxü̃ i ngẽma pexü̃ ngupetüxü̃.
Tupanaarü ore nachiga i ngẽma orearü uruü̃güneta
21 Cori ya Tupana rü ñanagürü: —Choma rü tama chayamugü i ngẽma orearü uruü̃güneta, rü bai ga namaxã nax chidexaxü̃. Natürü nümagü rü inaxĩãchi nax chauégagu yadexagüxü̃.
22 Rü ngẽxguma chi nüxü̃ nacua̱xgügu i chorü ĩnü, rü chorü duü̃xü̃gümaxã chi nüxü̃ nixugüe i ngẽma chorü ore rü chi norü chixexü̃na nayaxĩgachitanüxẽxẽ rü chi ngẽmaãcü nüxü̃ narüxoe i ngẽma nacümagü i chixexü̃ —ñanagürü.
23 23:23-24 Rü nüma ya Cori ya Tupana rü ñanagürü: —Choma rü woo changaicamagu rüe̱xna chayáxü̃gu rü guxü̃wama changexma. ¿Rü texé tá tüxü̃́ natauxcha nax cha̱u̱xcha̱xwa iticúxü̃ nax tama tüxü̃ chadauxü̃ca̱x? Rü chomaxã nixĩ i napaxü̃ i daxũguxü̃ i naane rü ñoma i naane. Rü chomatama ya Cori ya Tupana nixĩ i ngẽma ñachaxü̃.
24 Nüü̃ nadau 23:23
25 Rü marü nüxü̃ chaxĩnü i norü doragü i ngẽma orearü uruü̃güneta i chauégagu idexagünetaxü̃ rü nüxü̃ yaxugüexü̃ nax choma namaxã chidexaxü̃ i nanegüwa.
26 ¿Rü ngẽma orearü uruü̃güneta rü ñuxguxüra tá ta nüxü̃ naxoexü̃ nax nüxü̃ yaxugüxü̃ i ore i doramare ixĩxü̃ rü nüxü̃ yaxugüxü̃ i ngẽma nügüãẽwa nayauxgümarexü̃?
27 Rü ngẽma nanegügü i nügümaxã nüxü̃ yaxugüexü̃maxã choxü̃ nüxü̃ inarüngü̃maexẽẽchaxü̃ i chorü duü̃xü̃gü, yexgumarüxü̃ ga yema nũxcümaü̃güxü̃ ga norü o̱xigü nax choxü̃ iyanangümaexü̃ nax Baáwe naxĩxü̃ca̱x.
28 23:28-29 Rü ngẽxguma wüxi i orearü uruxü̃ rü naxãnegügu, rü name nax nüxü̃ yaxuxü̃ nax wüxi i nanegü yixĩxü̃. Natürü ngẽxguma nayauxãgu i chorü ore rü name i aixcüma mea nüxü̃ nixu rü tama ínayatoxẽxẽ. Rü ngẽma naxchawena̱xã i trigu rü taxuacüma ngẽma trigumaxã nügügu tanangugü. Rü ngẽma chorü ore rü ñoma üxürüxü̃ nixĩ. Rü ñoma wüxi i martíyu i nutapüta ipuxẽẽxü̃rüxü̃ nixĩ. Rü choma ya Cori ya Tupana nixĩ i ngẽma ñachaxü̃.
29 Nüü̃ nadau 23:28
30 Rü ngẽmaca̱x nüxü̃ chixu rü namaxã chanu i ngẽma orearü uruü̃güneta i togüã̱xwa nüxü̃ naxĩnüxü̃ i ore, rü ñu̱xũchi nüxü̃ ixuxü̃ nax chorü ore yixĩxü̃. Rü chomatama ya Cori ya Tupana nixĩ i ngẽma ñachaxü̃.
31 Rü namaxã chanu i ngẽma orearü uruü̃güneta i nüxü̃ ixugüxü̃ nax chorü ore yixĩxü̃ i ngẽma ore i nügüãẽwamare nayauxgüxü̃.
32 Rü namaxã chanu i ngẽma orearü uruü̃güneta i doramare i nanegügüxü̃ ixugüxü̃. Rü ngẽma norü doragümaxã, rü ñu̱xũchi ngẽma nüxü̃ yaxugünetaxü̃maxã chorü duü̃xü̃güxü̃ ínatüexẽxẽ. Choma rü tama chanamuanetanü i ngẽma orearü uruü̃güneta, rü bai nax namaxã nüxü̃ chixuxü̃ nax nüxü̃ yaxugüxü̃ca̱x i ngẽma ore. Rü ngẽmaca̱x taxuwama nime nax chorü duü̃xü̃güxü̃ nangü̃xẽẽgüxü̃. Rü chomatama ya Cori ya Tupana nixĩ i ngẽma ñachaxü̃ —ñanagürü ya Cori ya Tupana.
Ore i doragümare ixĩxü̃
33 Cori ya Tupana rü Yeremíaxü̃ ñanagürü: —Pa Yeremíax, ngẽxguma duü̃xü̃gü cuxna cagügu, rüe̱xna wüxi i orearü uruxü̃neta cuxna caxgux, rüe̱xna wüxi i chacherdóte cuxna caxgux rü ñaxgu cuxü̃: “¿Ta̱xacü rü orexü̃ cumaxã nixu ya Tupana i to̱xca̱x?” ñaxgu cuxü̃, rü ñaãcü tá cunangãxü̃: “Ñaa nixĩ i ngẽma ore ya Tupana chomaxã nüxü̃ ixuxü̃ rü ñanagürü pexü̃: ‘Choma rü tá pexü̃ íchawogü’ ”, ñanagürü ya Tupana.
34 Rü ngẽxguma wüxi i orearü uruxü̃neta, rüe̱xna wüxi i chacherdóte, rüe̱xna wüxi i duü̃xü̃ ñaxgu: “Cori ya Tupana choxü̃ namu nax nüxü̃ chixuxü̃ca̱x i ñaa norü ore”, ñaxgu, rü choma rü tá chanapoxcu i ngẽma duü̃xü̃ wüxigu namaxã i napatacüã̱xgü, erü doraxü̃mare nixu.
35 Rü ngẽxguma nügüenexẽgümaxã rüe̱xna nügümücügümaxã yadexagügu rü ñaãcü tá nixĩ i namexü̃ nax nügüna nacagüxü̃: “¿Ta̱xacü nixĩ ya Tupana namaxã cuxü̃ ngãxü̃xü̃? ¿Ta̱xacü nixĩ i cumaxã nüxü̃ yaxuxü̃ ya Tupana?”
36 Natürü tama name nax ñapegüxü̃: “Cori ya Tupanaarü ore nixĩ i nüxü̃ tixuxü̃”, ñapegüxü̃. Erü ngẽma ore i nüxü̃ pixuxü̃, Pa Orearü Uruxü̃günetax, rü pexrütama ore nixĩ. Rü pema rü marü ípeyatoxẽxẽ i norü ore ya yimá tórü Tupana ya Maxü̃cü ya Guxãétüwa Ngẽxmacü —ñanagürü.
37 Rü Cori ya Tupana rü Yeremíaxü̃ ñanagürü: —Pa Yeremíax, ¡nüxna naca i ngẽma orearü uruü̃güneta rü ñanagürü nüxü̃: “¿Ta̱xacü nixĩ ya Tupana i namaxã pexü̃ ngãxü̃xü̃? ¿Ta̱xacü nixĩ ya Tupana i pemaxã nüxü̃ yaxuxü̃?” ñaãcü nüxna naca!
38 23:38-39 Rü ngẽxguma ngẽma orearü uruü̃güneta ñaãcü cuxü̃ nangãxü̃gügu: “Cori ya Tupanaarü ore nixĩ i nüxü̃ tixuxü̃”, ñagügu, rü cuma rü ñaãcü tá cungãxü̃gü: “Cori ya Tupana rü ñanagürü: ‘Ñu̱xma nax namaxã choxü̃ pengaxü̃xü̃ i ngẽma ore i pexna chachu̱xuxü̃, rü choma rü tá pexü̃ charüngüma rü tá chope̱xewa pexü̃ íchawoxü̃ wüxigu namaxã ya yima perü ĩane ga pexna chaxãxü̃ne rü perü o̱xigüna chaxãxü̃ne.
39 Nüü̃ nadau 23:38
40 Rü choma rü tá pexca̱x íchananguxẽxẽ nax guxü̃guma duü̃xü̃gü pexü̃ cugüexü̃. Rü tá pexca̱x íchananguxẽxẽ i wüxi i ãne i taxü̃ i tagutáma nüxü̃ iperüngümaexü̃’ ” —ñanagürü ga Cori ya Tupana.