Jeremías 24:1-10
24 Babiróniaanecüã̱xarü ãẽ̱xgacü ga Nabucudonochó rü Babiróniaanewa nanaga ga Yudáanecüã̱xarü ãẽ̱xgacü ga Yeconía ga Yoaquíü̃ nane ixĩcü. Rü wüxigu namaxã yéma nanaga ga Yeconíaarü ngü̃xẽẽruü̃gü ga ãẽ̱xgacügü, rü yema puracütanüxü̃ ga ta̱xacüarü üruxü̃xü̃ icuáxü̃. Rü yemawena ga Tupana rü choxü̃ nüxü̃ nadauxẽxẽ ga taxre ga pexchi ga igumaxã ixããcucü ga Tupanapata ga taxü̃nepe̱xegu nucü.
2 Rü wüxi ga guma pexchiwa rü nayexmagü ga igu ga mexü̃ ga nüxíra idauxü̃. Rü guma nai ga pexchiwa rü nayexma ga igugü ga poraãcü ichixexü̃ rü taxuacüma imúxü̃.
3 Rü nüma ga Cori ya Tupana rü choxna naca rü ñanagürü: —Pa Yeremíax ¿ta̱xacü yixĩxü̃ i ngẽma nüxü̃ cudauxü̃? —ñanagürü. Rü choma rü chanangãxü̃ rü ñachagürü: —Nüxü̃ chadau i ori̱x i igu i mexẽchixü̃ rü togü i chixexü̃chixü̃ i taxuacüma ingṍxü̃ —ñachagürü.
4 Rü yexguma ga nüma ga Cori ya Tupana rü ñanagürü choxü̃:
5 —Choma ya Cori ya Iraétanüxü̃arü Tupana rü ñachagürü: “Rü ngẽma igu i mexü̃rüü̃ãcü tá nüxü̃ chadau i ngẽma duü̃xü̃gü i Yudáanecüã̱xgü ga ñaa naanewa íchawoxü̃xü̃ rü Cadéugüchixü̃anewa chamugüxü̃. Rü ngẽmagü rü tá namaxã chataãxẽ rü tá nüxü̃ charüngü̃xẽxẽ.
6 Rü ngẽma naanewa rü nüxna tá chadau rü ñaa nachixü̃aneca̱x tá chanawoeguxẽxẽ. Rü nua tá nüxü̃ charüngü̃xẽxẽxü̃ rü tagutáma wena chanadai. Rü ñoma wüxi i nanetü itoxü̃rüxü̃ nua tá chanangexmagüxẽxẽ rü tagutáma wena íchanawoxü̃.
7 Rü cua̱x tá nüxna chaxã nax ngẽmaãcü choxü̃ nacua̱xgüxü̃ca̱x nax choma chixĩxü̃ ya Cori ya Tupana. Rü nümagü rü chorü duü̃xü̃gü tá nixĩgü, rü choma rü tá norü Tupana chixĩ erü guxü̃ma i norü ngúchaü̃maxã tá cha̱u̱xca̱x nawoegu.
8 Natürü i ngẽma Yudáanecüã̱xarü ãẽ̱xgacü i Chedequía rü norü ngü̃xẽẽruü̃gü i ãẽ̱xgacügü, rü ngẽma Yerucharéü̃cüã̱xgü i tama íchoxü̃xü̃, rü ngẽma duü̃xü̃gü i Equítuanewa maxẽxü̃, rü ngẽma igu i chixexü̃ i taxuacüma ingṍxü̃rüü̃ãcü tá namaxã chixĩ nax nüxü̃ chaxoxü̃.
9 Rü poraãcü tá chanapoxcue i ngẽma duü̃xü̃gü rü ngẽmaca̱x i ngẽma togü i nachixü̃anecüã̱xgü rü ngẽxguma ngẽmaxü̃ nadaugügu rü tá poraãcü namaxã naba̱i̱xãchie. Rü ngẽma nachixü̃anegü i nagu chanawoonexü̃wa rü duü̃xü̃gü rü tá nagu nidauxcüraxü̃gü rü nüxü̃ nacugüe rü nüxü̃ naxoe rü chixexü̃ namaxã nixugüe.
10 Rü ngẽma Yerucharéü̃wa yaxügüxü̃ rü tá naxca̱x íchanguxẽxẽxü̃ i guxchaxü̃gü. Rü ngẽxma tá nixĩ nax nadaiaxü̃, rü taiya naxca̱x íngugüxü̃ ñu̱xmatáta taxuxü̃táma íyaxü nawa i ñaa naane ga nüxna chaxãxü̃, rü norü o̱xigüna chaxãxü̃” —ñanagürü ga Cori ya Tupana.
