Jeremías 25:1-38
25 Rü yexguma Yoaquíü̃ ga Yochía nane ãgümücü ga taunecü Yudáanewa ãẽ̱xgacü ixĩxgu rü Cori ya Tupana rü Yeremíamaxã nidexa nachiga ga guxü̃ma ga yema Yudáanecüã̱xgü. Rü yexguma nixĩ nax wüxi ga taunecü Babiróniaanewa ãẽ̱xgacü yixĩxü̃ ga Nabucudonochó.
2 Rü Yeremía ga Tupanaarü orearü uruxü̃ ixĩcü rü guxü̃ma ga yema Yudáanecüã̱xgümaxã, rü ñu̱xũchi yema Yerucharéü̃cüã̱xgümaxã nüxü̃ nixu ga yema ore ga Tupana namaxã nüxü̃ ixuxü̃. Rü ñanagürü:
3 —Yexguma marü 13 ga taunecü Yudáanewa ãẽ̱xgacü yaxĩxgu ga Yochía ga Amóü̃ nane, ñu̱xmata ñaa ngunexü̃wa nangu rü 23 ga taunecü nixĩ nax Cori ya Tupana chomaxã yadexaxü̃ rü choma rü pemaxã nüxü̃ chixuechaxü̃ ga yema norü ore. Natürü ga pema rü tama chauga pexĩnüechaü̃.
4 Rü nüma ya Cori ya Tupana rü muẽ̱xpü̱xcüna petanüwa nanamugü i norü orearü uruü̃gü, natürü i pema rü tama naga pexĩnüechaü̃, rü bai nax nüxü̃́ iperüxĩnüechaü̃xü̃ rü ípeyachaxãchitanüxü̃ nax chixexü̃ pexüxü̃.
5 Rü nümagü ga yema Tupanaarü orearü uruü̃gü rü pexü̃ ñanagürügü: “¡Nüxü̃ perüxoe i ngẽma chixexü̃ i pecümagü, rü ngẽma chixexü̃ i pexügüxü̃! Rü ngẽxguma tá nixĩ i nawa pemaxẽxü̃ i ñaa naane i Cori ya Tupana nũxcümaü̃güxü̃ ga perü o̱xigüna ãxü̃ rü pexna ãxü̃.
6 ¡Rü taxṹ i nawe perüxĩxü̃ i ngẽma tupananetachicüna̱xãgü! ¡Rü taxṹ i naxca̱x pengutaque̱xegüxü̃ rü nüxü̃ picua̱xüü̃güxü̃! ¡Rü taxṹ i Cori ya Tupanaxü̃ penuxẽxẽxü̃ nagagu nax nüxü̃ picua̱xüü̃güxü̃ i ngẽma tupananetachicüna̱xãgü i pematama pexüxü̃! Rü ngẽxguma i nüma ya Cori ya Tupana rü taxuxü̃táma i guxchaxü̃ pexca̱x ínanguxẽxẽ”, ñanagürügü pexü̃.
7 Rü ñu̱xma ya Cori ya Tupana rü ñanagürü: “Pema rü tama chauga pexĩnüechaü̃, rü choxü̃ penuxẽxẽ namaxã nax nüxü̃ picua̱xüü̃güxü̃ i ngẽma pematama pexüxü̃ i tupananetachicüna̱xãgü. Rü ngẽma pexüxü̃ rü pexrütama poxcuca̱x nixĩ”.
8 Rü Cori ya Tupana ya Guxãétüwa Ngẽxmacü rü ñanagürü: “Ñu̱xma nax tama naga pexĩnüechaü̃xü̃ i ngẽma chorü ucu̱xẽ rü tá pexü̃ chapoxcue.
9 Rü naxca̱x tá changema i guxü̃ma i nachixü̃anegü i nórtewa ngẽxmagüxü̃ rü chorü mugüruxü̃ i Nabucudonochó ya Babiróniaanearü ãẽ̱xgacü. Rü nümagü rü tá nua naxĩ rü tá pexca̱x ínayaxüãchi, rü tá pexü̃ nadai, rü tá nanadai i guxü̃ma i nachixü̃anegü i perü ngaicamana ngẽxmagüxü̃. Rü ngẽmaãcü tá pexü̃ chagu̱xẽxẽ. Rü guxü̃gutáma pechicaxica tá ngéma nayaxǘ. Rü ngẽma duü̃xü̃gü i nüxü̃ daugüxü̃ rü tá poraãcü namaxã naba̱i̱xãchie rü namuü̃e.
10 Rü ngẽmaãcü i nua perü ĩanegüwa rü taxuxü̃táma i wiyaexü̃ taxĩnü, rü taxúetama tapetae rü tataãẽgü, rü taxuxü̃táma ãxma̱xarü wiyaexü̃ taxĩnü. Rü ngẽma tríguarü caruxü̃gü rü marü taxũtáma nüxü̃ taxĩnüe. Rü guxü̃watáma naxẽanemare erü taxuxü̃táma ninaigü i omügü.
11 Rü ñaa nachixü̃ane rü guxü̃watáma nachixe, rü nachitaxü̃xicatama ngéma nayaxü. Rü ngẽma norü duü̃xü̃gü i ngẽma nachixü̃anegü rü 70 ya taunecü rü Babiróniaanearü ãẽ̱xgacüme̱xẽwa tá nangẽxmagü.
12 Rü ngẽxguma 70 ya taunecü ínguxgu nax ngéma nangẽxmagüxü̃ i ngẽma duü̃xü̃gü, rü choma rü tá Babiróniaanearü ãẽ̱xgacüna chaca naxca̱x i ngẽma norü chixexü̃. Rü ngẽma Babiróniacüã̱x i Cadéugü rü choma rü tá íchayanaxoxẽxẽxü̃chi i ngẽma nachixü̃ane. Rü chomatama ya Cori ya Tupana nixĩ i nüxü̃ chixuxü̃ i ngẽma ore.
13 Rü ngẽma nachixü̃anegu tá chananguxẽxẽ i guxü̃ma i ngẽma guxchaxü̃gü i ñaa poperagu ümatüxü̃ ga Yeremía chauégagu nüxü̃ ixuxü̃ namaxã ga guxü̃ma ga yema togü ga nachixü̃anegü.
14 Erü muxü̃tama i nachixü̃anegü rü ãẽ̱xgacügü i poraexü̃ tá chixri ngẽma Babiróniaanemaxã inacua̱xgü, yema nüma ga Babiróniaanecüã̱x rü chixri chorü duü̃xü̃gümaxã inacua̱xgüxü̃rüxü̃. Rü ngẽmaãcü tá nüxü̃́ chaxütanü naxca̱x ga yema chixexü̃ ga chorü duü̃xü̃gümaxã naxügüxü̃”, ñanagürü ga Tupana —ñanagürü ga Yeremía.
Cori ya Tupana rü tá nanapoxcue i Yudáanecüã̱xgü rü Yerucharéü̃cüã̱xgü rü yema togü ga nachixü̃anecüã̱xgü
15 Rü Cori ya Iraétanüxü̃arü Tupana rü choxü̃ ñanagürü: —Pa Yeremíax, dücax i ñaa copu i changexü̃ i bínumaxã ããcuxü̃. Rü yima bínu rü chorü nuchiga nixĩ. ¡Rü choxna nayaxu i ñaa copu i bínumaxã ããcuxü̃ rü yimá bínuwa yaxaxegüxẽxẽ i guxü̃ma i ngẽma nachixü̃anegü i natanüwa cuxü̃ chamuxü̃!
16 Rü ngẽxguma tá yaxaxgüãgu, rü nawa tá nügü naxoxgüe, rü nawa tá naxãũãẽgü nagagu i ngẽma dai i naxca̱x tá íchanguxẽẽxü̃ —ñanagürü choxü̃.
17 Rü choma rü Cori ya Tupaname̱xẽwa chanayaxu ga yema copu, rü ñu̱xũchi nawa chayaxaxexẽẽgü ga guxü̃ma ga yema nachixü̃anecüã̱xgü ga Tupana natanüwa choxü̃ muxü̃.
18 Rü yema Yerucharéü̃cüã̱xgü, rü Yudáanearü ĩanegücüã̱xgü rü wüxigu norü ãẽ̱xgacügümaxã, yema copuwa chayaxaxexẽẽgü nax yemaacü nayuexü̃ca̱x ga norü duü̃xü̃gü rü nagu napogüexü̃ca̱x ga norü ĩanegü rü nachicaxica íyaxügüxü̃ca̱x. Rü ñu̱xma rü ta ya yima ĩanegü rü norü chixexü̃gagu baixãchixẽẽruü̃gü rü cugüruü̃gü nixĩgü. Rü duü̃xü̃gü rü chixri nachiga nidexagü.
19 Rü yexgumarüxü̃ ta yema copuwa chayaxaxexẽẽgü ga Equítuanearü ãẽ̱xgacü ga Faraóü̃, rü norü ngü̃xẽẽruü̃gü, rü yema togü ga ãẽ̱xgacügü ga duü̃xü̃gümaxã icua̱xgüxü̃, rü ñu̱xũchi guxü̃ma ga norü duü̃xü̃gü.
20 Rü yexgumarüxü̃ ta yema copuwa chayaxaxexẽẽgü ga guxü̃ma ga yema togü ga nachixü̃anecüã̱xgü ga Equítuanewa yexmagüxü̃. Rü nawa chayaxaxexẽẽgü ga guxü̃ma ga Úxchianearü ãẽ̱xgacügü, rü guxü̃ma ga Firitéugüanearü ãẽ̱xgacügü ga namaxã icua̱xgüxü̃ ga guma ĩanegü ga Acharóü̃ rü Gácha rü Ecróü̃ rü yema Adúxcüã̱x ga íyaxügüxü̃.
21 Rü yexgumarüxü̃ ta yema copuwa chayaxaxexẽẽgü ga yema Edóü̃anecüã̱xgü, rü Moáanecüã̱xgü, rü Amóü̃tanüxü̃.
22 25:22-23 Rü yema copuwa chayaxaxexẽẽgü ga guxü̃ma ga Tíruanearü ãẽ̱xgacügü rü Chidóü̃anearü ãẽ̱xgacügü, rü norü ãẽ̱xgacügü ga yema nachixü̃anegü ga Már Mediteráneuwa ügüxü̃ ga Dedáü̃tanüxü̃, rü Temátanüxü̃, rü Búxtanüxü̃, rü ñu̱xũchi guxü̃ma ga yema duü̃xü̃gü ga nügü ibáixpü̱xüerugüxü̃.
23 Nüü̃ nadau 25:22
24 Rü yema copuwa chayaxaxexẽẽgü ga guxü̃ma ga Arábiaanearü ãẽ̱xgacügü, rü guxü̃ma ga norü ãẽ̱xgacügü ga yema duü̃xü̃gü ga ínachianexü̃gu ãpatagüxü̃.
25 Rü guma bínuwa chayaxaxexẽẽgü ga guxü̃ma ga Zimríanearü ãẽ̱xgacügü, rü Eráü̃anearü ãẽ̱xgacügü, rü Médiaanearü ãẽ̱xgacügü.
26 Rü nawa chayaxaxexẽẽgü ga guxü̃ma ga norü ãẽ̱xgacügü ga yema nachixü̃anegü ga nórtewaama ügüxü̃ ga nügüna ngaicamagüxü̃ rüe̱xna nügüna yáxü̃gugüxü̃. Rü yemaacü guma bínuwa chayaxaxexẽẽgü ga guxü̃ma ga yema nachixü̃anearü ãẽ̱xgacügü ga ñoma ga naanewa yexmagüxü̃. Rü guma Babiróniaanearü ãẽ̱xgacü nixĩ ga nawa iyacuácü nax yaxaxaxü̃ ga guma bínu.
27 Rü ñu̱xũchi Cori ya Tupana rü choxü̃ ñanagürü: —Pa Yeremíax, ¡namaxã nüxü̃ ixugü nax choma i Cori ya Tupana ya Guxãétüwa Ngẽxmacü ga Iraétanüxü̃arü Tupana ixĩcü, rü chanamu nax yaxaxgüãxü̃ca̱x rü nawa nangãxẽxü̃ca̱x rü nügü naxoxgüexü̃ca̱x rü waixü̃müanegu yayixü̃ca̱x nax ngẽmaãcü taguma ngéma inachigüxü̃ca̱x, nagagu i ngẽma dai i naxca̱x tá íchanguxẽẽxü̃.
28 Rü ngẽxguma tama cuxna nayauxgüchaü̃ãgu i ngẽma copu nax nawa naxaxegüxü̃ca̱x, rü ñacugürü tá nüxü̃: “Cori ya Tupana ya Guxãétüwa Ngẽxmacü rü ñanagürü: ‘¡Nawa pexaxegü i ngẽma copu!
29 Rü tá ichanaxügü nax chorü ĩane ya Yerucharéü̃ca̱x íchananguxẽxẽxü̃ i poxcu. ¿Rü pema nagu perüxĩnüegu rü taxũtáma pexü̃ chapoxcue? Natürü aixcüma tá pepoxcue, erü guxü̃ma i ñoma i naanewa maxẽxü̃ i duü̃xü̃güca̱x tá íchananguxẽxẽ i dai. Rü chomatama ya Cori ya Tupana ya Guxãétüwa Ngẽxmacü nixĩ i nüxü̃ chixuxü̃ i ngẽma!’ ” ñanagürü.
30 Rü cumax, Pa Yeremíax, ¡rü chauégagu duü̃xü̃gümaxã nüxü̃ ixux i guxü̃ma i ngẽma cumaxã nüxü̃ chixuxü̃! Rü ñanagürü nüxü̃: “Nüma ya Cori ya Tupana rü ñoma duruanexü̃rüxü̃ nataga i daxũguxü̃ i naanewa i nachica i üünexü̃wa i nüma ínangexmaxü̃wa. Rü norü numaxã ningunecüxü̃ naxca̱x i norü duü̃xü̃gü. Rü ñoma duü̃xü̃gü i úba ípuxgüxü̃rüxü̃ nataga ya Tupana naxca̱x i guxü̃ma i duü̃xü̃gü i ñoma i naanewa maxẽxü̃.
31 Rü ngẽma naga i ñoma duruanexü̃rüxü̃ ixĩxü̃ rü guxü̃ i naanewa nangu, erü nüma ya Cori ya Tupana rü taxü̃ i poxcu tá naxca̱x ínanguxẽxẽ i guxü̃ma i nachixü̃anecüã̱x i duü̃xü̃gü. Rü norü chixexü̃ca̱x tá nüxna nicachigü i guxü̃ma i duü̃xü̃gü i ñoma i naanewa maxẽxü̃, rü tá yu namaxã naxuegu i ngẽma chixexü̃gu maxẽxü̃. Rü nümatama ya Cori ya Tupana nixĩ i nüxü̃ ixuxü̃ i ngẽma” —ñanagürü.
32 Rü nüma ya Cori ya Tupana ya Guxãétüwa Ngẽxmacü rü ñanagürü: —Ngẽma taxü̃ i guxchaxü̃ rü nachixü̃anegüwa tá ninguchigü. Rü ngẽma taxü̃ i guxchaxü̃ i ãũcümaxü̃ rü naane íyacuáxü̃wa tá ne naxũ —ñanagürü.
33 Rü ngẽma ngunexü̃gu rü ngẽma duü̃xü̃gü i Cori ya Tupana daixü̃ rü guxü̃wama i ñoma i naanegu tá nawoone. Rü taxúetama naxca̱x taxauxe, rü taxúetama texe tanade i ngẽma naxü̃negü nax itanata̱xgüxü̃ca̱x. Rü ñoma naü̃rüxü̃ tá waixü̃müanewa nawogümare.
34 ¡Ẽcü pexauxe, Pa Duü̃xü̃güarü Ãẽ̱xgacügüx! ¡Rü pema i duü̃xü̃gümaxã ipecuáxü̃ rü waixü̃müanegu pidixgü! Erü marü nawa nangu i ngunexü̃ nax pexü̃ nada̱i̱xü̃ ñoma carnérugü i ngüexü̃ ida̱i̱xü̃rüxü̃. Rü ñoma wüxi i axepáü̃ i mexẽchixü̃ irünguxü̃rüxü̃ tá perüyi.
35 Rü ngẽma duü̃xü̃güarü ãẽ̱xgacügü rü taxuacütáma nibuxmü. Rü ngẽma duü̃xü̃gümaxã icuáxü̃ rü taxucürüwa nibuxmü.
36 Rü ngẽma nachixü̃anegüarü ãẽ̱xgacügü rü aixta naxüe. Rü ngẽma togü i ãẽ̱xgacü i duü̃xü̃gümaxã icuáxü̃ rü taiyamaxã aita naxüe. Erü Cori ya Tupana rü marü inayanaxoxẽxẽ i norü naanegü rü ngẽmaca̱x nataxuma nax ta̱xacü nangõ̱xgüxü̃.
37 Rü nüma ya Cori ya Tupana rü poraãcü nanu, rü ngẽmaca̱x nayagu ga yema mexü̃ ga norü naanegü rü ñu̱xma rü chianexü̃xü̃ nixĩ.
38 Nüma ya Cori ya Tupana rü ñoma wüxi i leóü̃ i nuãcü naxmaü̃wa ixũxũxü̃rüxü̃ nixĩ. Rü yima nachixü̃ane rü wüxi i chianexü̃xü̃ nixĩ, erü Cori ya Tupana rü poraãcü nanu rü yemaca̱x dai naxca̱x ínanguxẽxẽ.
