Jeremías 26:1-24
26 Rü yexguma Yoaquíü̃ ga Yochía nane yexwacax ãẽ̱xgacüxü̃ ingucuchigu ga Yudáanewa, rü Cori ya Tupana rü Yeremíamaxã nidexa, rü ñanagürü nüxü̃:
2 —¡Ẽcü chopataa̱xtügu yachi! ¡Rü namaxã nüxü̃ ixu i guxü̃ma i ngẽma ore i cuxü̃ chamuxü̃ nax namaxã nüxü̃ quixuxü̃ca̱x i ngẽma duü̃xü̃gü i Yudáanearü ĩanegüwa ne ĩxü̃ nax chopatawa choxü̃ yanacua̱xüü̃güxü̃ca̱x! ¡Rü taxuxü̃táma nixĩ i cuxüpetüxü̃ nax nüxü̃ quixuxü̃ i guxü̃ma i ngẽma ore!
3 Rü ngürüãchi tá cuga naxĩnüe rü nüxü̃ narüxoe i ngẽma chixexü̃ i nacümagü nax ngẽmaãcü i choma rü tama chapoxcuexü̃ca̱x naxca̱x i ngẽma chixexü̃ i naxügüxü̃, ngẽma noxri nagu charüxĩnüxü̃rüxü̃.
4 26:4-6 ¡Rü namaxã nüxü̃ ixu nax choma ya Cori ya Tupana rü ñachaxü̃: “Rü ngẽxguma taxũtáma chauga pexĩnüegu, rü taxũtáma peyanguxẽẽgu i ngẽma ucu̱xẽgü i pexna chaxãxü̃, rü ñu̱xũchi taxũtáma naga pexĩnüegu i norü ucu̱xẽgü i chorü orearü uruü̃gü ga muẽ̱xpü̱xcüna petanüwa chamugüxü̃ ga pema tama naga pexĩnüexü̃, rü ngẽxguma i choma rü tá nagu chapogü ya daa chopata guma Chilówa yexmane ga chopatarüxü̃. Rü daa ĩane rü wüxi i cua̱xruxü̃ tá nixĩ naxca̱x i guxü̃ma i nachixü̃anegü i ñoma i naanewa ngẽxmagüxü̃” —ñanagürü ga Cori ya Tupana.
5 Nüü̃ nadau 26:4
6 Nüü̃ nadau 26:4
7 Rü yema chacherdótegü, rü orearü uruü̃gü, rü ñu̱xũchi guxü̃ma ga yema duü̃xü̃gü rü nüxü̃ naxĩnüe ga yema ore ga Yeremía Cori ya Tupanapatawa nüxü̃ ixuxü̃.
8 Rü yexguma Yeremía marü igúegagu nax nüxü̃ yaxuxü̃ ga yema Cori ya Tupana nüxü̃ ixuxẽẽxü̃, rü yema chacherdótegü, rü orearü uruü̃gü, rü ñu̱xũchi yema duü̃xü̃gü rü Yeremíaxü̃ niyauxgü rü ñanagürügü nüxü̃: —¡Ñu̱xma rü tá cuyu!
9 ¿Rü ta̱xacüca̱x Cori ya Tupanaégagu nüxü̃ quixu nax daa Tupanapata rü guma Chilówa yexmanerüxü̃ tá nagu napogüexü̃, rü nüxü̃ quixu rü daa ĩane rü tá nagu napogüexü̃ rü taxuxü̃táma i duü̃xü̃gü marü nawa maxẽxü̃? —ñanagürügü nüxü̃. Rü guxü̃ma ga duü̃xü̃gü rü Yeremíaca̱x nibuxmü ga guma Tupanapatawa.
10 Rü yexguma yema Yudáanearü ãẽ̱xgacügü nüxü̃ cua̱xgügu ga yema ngupetüxü̃, rü ínachoxü̃ ga guma ãẽ̱xgacüpatawa rü Tupanapata ga taxü̃newa naxĩ. Rü guma Tupanapataarü ĩã̱x ga ĩã̱x i Ngexwacaxü̃xü̃gu ãégaxü̃wa nayarütogü.
11 Rü yexguma ga yema chacherdótegü rü orearü uruü̃gü, rü ãẽ̱xgacügüxü̃ rü ñu̱xũchi guxü̃ma ga duü̃xü̃güxü̃ ñanagürügü: —Ñaa yatü rü name nax yu namaxã pexueguxü̃, erü daa ĩanechiga chixri nidexa. Pemax rü pechi̱xemaxã nüxü̃ pexĩnüe —ñanagürügü.
12 Rü yexguma ga nüma ga Yeremía rü yema ãẽ̱xgacügüca̱x, rü ñu̱xũchi yema duü̃xü̃güca̱x nixũ, rü nüxü̃ ñanagürü: —Cori ya Tupana nixĩ ya nua choxü̃ mucü nax naégagu pemaxã nüxü̃ chixuxü̃ca̱x nax taxü̃ i guxchaxü̃ tá nüxü̃ ngupetüxü̃ ya daa Tupanapata, rü ñu̱xũchi ya daa ĩane, ngẽma nüxü̃ pexĩnüexü̃rüxü̃.
13 ¡Ẽcü mea pemaxẽ, rü mexü̃ i nacümagu pexĩ, rü Cori ya perü Tupanaga pexĩnüe! Rü ngẽxguma i nüma rü taxũtáma pexca̱x ínanangu̱xẽxẽ i ngẽma poxcu i pemaxã nüxü̃ yaxuxü̃.
14 Natürü i choma rü pexme̱xwa changexma. ¡Ẽcü chomaxã penaxü̱x i ngẽma pema nagu perüxĩnüexü̃!
15 Natürü name nax mea nagu perüxĩnüexü̃, rü ngẽxguma tá choxü̃ pima̱xgügu rü tá nipeguãchi rü tá ninaguãchi i guxü̃ma i duü̃xü̃gü i daa ĩanegu ãchiü̃güxü̃ nagagu nax yama̱xgüãxü̃ i wüxi i duü̃xü̃ i taxuxü̃ma i chixexü̃ üxü̃. Erü aixcüma nixĩ nax Cori ya Tupana yixĩxü̃ i nua choxü̃ muxü̃ nax pemaxã nüxü̃ chixuxü̃ca̱x i guxü̃ma i ngẽma guxchaxü̃gü i tá pexca̱x íngugüxü̃ —ñanagürü.
16 Rü nüma ga yema ãẽ̱xgacügü rü duü̃xü̃gü, rü yema chacherdótegümaxã rü orearü uruü̃gümaxã nidexagü rü ñanagürügü: —Taxuca̱xma ta̱xacüca̱x peyama̱x i ñaa yatü, erü Cori ya tórü Tupanaégagu nixĩ i tamaxã yadexaxü̃ —ñanagürügü.
17 26:17-18 Rü nümaxü̃ ga ãẽ̱xgacügü rü inachigü rü ñanagürügü nüxü̃ ga yema duü̃xü̃gü ga yéma yexmagüxü̃: —Ü̃pa yexguma Echequía Yudáanearü ãẽ̱xgacü yixĩxgu, rü Miquéa ga Moréchecüã̱x rü guxü̃ma ga Yudáanecüã̱xgümaxã Cori ya Tupanaégagu nidexa, rü ñanagürü nüxü̃: “Cori ya Tupana ya Guxãétüwa Ngẽxmacü rü ñanagürü: ‘Chióü̃ rü wüxi i naane i caixegumüanexü̃rüxü̃ tá nixĩ. Rü Yerucharéü̃ rü norü nutagüxica tá ínayaxügü. Rü yima ma̱xpǘne ya Tupanapata ya taxü̃ne nawa ngẽxmane rü wüxi i maxẽnecü tá nixĩ’, ñanagürü ga Tupana.
18 Nüü̃ nadau 26:17
19 Rü yexguma ga ãẽ̱xgacü ga Echequía, rü guxü̃ma ga yema Yudátanüxü̃ rü tama Miquéaxü̃ nima̱xgü. Rü nüma ga ãẽ̱xgacü rü Cori ya Tupanaxü̃ namuü̃. Rü naxca̱x ínaca nax Tupanaaxü̃́ nangechaü̃tümüxü̃güxü̃ca̱x. Rü yemaca̱x ga Cori ya Tupana rü tama naxca̱x ínanangu̱xẽxẽ ga yema guxchaxü̃ ga marü namaxã naxueguchiréxü̃. Rü yíxema i ngẽxguma tá Yeremíaxü̃ ima̱xgügu rü tá nitaguãchi i taxü̃ i chixexü̃ i ãũcümaxü̃ ixügüxü̃” —ñanagürügü ga yema ãẽ̱xgacügü.
20 Rü nayexma ga to ga Tupanaarü orearü uruxü̃ ga Uría ga Chemaía nane ixĩcü. Rü nüma rü ĩane ga Quiriáx-yearíü̃cüã̱x nixĩ. Rü nüma ga Uría rü Yeremíarüxü̃ Tupanaégagu Yerucharéü̃chiga rü Yudáanechiga nidexa rü nüxü̃ nixu nax guxchaxü̃ tá naxca̱x íngugüxü̃
21 Rü guma ãẽ̱xgacü ya Yoaquíü̃, rü yema norü ngü̃xẽẽruü̃gü, rü ñu̱xũchi yema togü ga ãẽ̱xgacügü rü yexguma nüxü̃ naxĩnüegu ga yema Uría nüxü̃ ixuxü̃, rü nüma ga ãẽ̱xgacü rü norü duü̃xü̃güxü̃ namu nax yama̱xgüãxü̃ca̱x. Natürü yexguma Uría nüxü̃ cua̱xgu rü namuü̃, rü Equítuanewa naña.
22 Rü nüma ga ãẽ̱xgacü ga Yoaquíü̃ rü Equítuanewa nanamugü ga Enatáü̃ ga Abúx nane, rü ñu̱xũchi togü ga norü duü̃xü̃gü nax Uríaxü̃ yagagüxü̃ca̱x.
23 Rü nümagü ga yema yéma namugüxü̃ rü Equítuanewa Uríaxü̃ nayagagü, rü ãẽ̱xgacü ga Yoaquíü̃na nayamugü. Rü nüma rü norü duü̃xü̃güxü̃ namu nax yama̱xgüãxü̃ca̱x. Rü ñu̱xũchi wüxi ga ãxmaxü̃ ga ngexü̃rüüxü̃mare ga duü̃xü̃gü ga yuxü̃ nagu yata̱xcuchixü̃gu nayata̱xcuchigü ga yema naxü̃ne.
24 Natürü Aicáü̃ ga Chapáü̃ nane rü Yeremíaxétüwa nidexa. Rü yemaca̱x ga yema ãẽ̱xgacügü rü tama duü̃xü̃güna nanamugü nax yama̱xgüãxü̃ca̱x.
