Jeremías 3:1-25
3 Cori ya Tupana rü ñanagürü: —Rü ngẽxguma wüxi i yatü rü naxma̱xü̃ ínata̱xgu, rü ngẽxguma marü nüxna tixũgachigu i tüma rü to i yatümaxã taxãtegu, rü nüma i ngẽma tüxü̃ ítáxü̃ rü marü taxũtáma wena tümamaxã naxãxma̱x. Rü ngẽma rü wüxi i taxü̃ i chixexü̃ tá nixĩ naxca̱x i ngẽma nachixü̃ane. Natürü i pemax, Pa Yudátanüxü̃x, rü mucü ga tupananetachicüna̱xãgüwe perüxĩ. ¿Rü ñuxãcü nagu perüxĩnüe nax cha̱u̱xca̱x pewoeguxü̃? Rü choma ya Cori ya Tupana nixĩ i pemaxã nüxü̃ chixuxü̃ i ngẽma.
2 ¡Rü dücax, mea nüxü̃ perüdaunü i ngẽma ngüchitaerugüxü̃ i íba̱i̱xchitaerugüxü̃! ¿Rü ngexü̃rüü̃xü̃ yixĩxü̃ ga tama tupananetachicüna̱xãgüxü̃ nawa picua̱xüü̃güxü̃? Rü ñoma ngexü̃ i Arábiaanecüã̱x i ngeãẽxü̃ i ínachianexü̃wa namacüwawa rütoxü̃ nax yatügüca̱x nadauxü̃ rü pema rü ngẽxgumarüxü̃ ta pixĩgü nax naxca̱x pedaugüxü̃ i ngẽma tupananetachicüna̱xãgü nax nüxü̃ picua̱xüü̃güxü̃ca̱x. Rü ñu̱xma nax choxna pixĩgachixü̃, rü perü chixexü̃maxã penapaxẽxẽ i perü naane.
3 Rü ngẽmaca̱x ngẽxguma primaberawa nanguxgu nax petoegüxü̃ rü nataxutama ya pucü. Erü pema rü ñoma wüxi i ngexü̃ i naxü̃nemaxã taxexü̃rüxü̃ãcü pemaxẽ. Rü name i naxca̱x pexãnee i ngẽma chixexü̃ i pexüxü̃.
4 3:4-5 Rü pema rü ĩnetama choxna peca rü ñaperügügü choxü̃: “Pa Tonatüx ga Tomücü Ixĩcü ga Yexguma Tangextü̱xügügu, ¿rü guxü̃gutáma tomaxã cunuxü̃? ¿Rü guxü̃gutáma yixĩxü̃ i tomaxã cunuechaxü̃?” ñaperügügü. Natürü ga pema rü yexguma yema ñapegügügu rü naguxü̃raü̃xü̃ ga chixexü̃gü pexügü —ñanagürü.
5 Nüü̃ nadau 3:4
Cori ya Tupana rü Iraéanecüã̱xmaxã rü Yudáanecüã̱xmaxã nüxü̃ nixu nax nüxü̃ naxoexü̃ca̱x i norü chixexü̃gü
6 Rü yexguma Yochía ãẽ̱xgacü ixĩxgu ga Yudáanewa rü yexguma nixĩ ga Cori ya Tupana ga choxü̃ ñaxü̃: —¿Nüxü̃ cudauxü̃ i ngẽma naxügüxü̃ i ngẽma Iraéanecüã̱xgü i tama ixĩnüechaü̃xü̃? Rü nümagü rü guxü̃nema ya ma̱xpǘnegüwa, rü guxü̃ma i nai i imeetaxü̃tüü̃wa rü tupanachicüna̱xãxgüxü̃ nicua̱xüü̃gü. Rü ngẽmaãcü choxna nixĩgachi ñoma wüxi i nge i ngĩtena ngeãẽcürüxü̃.
7 Rü choma nagu charüxĩnügu rü chi yema chixexü̃ nax naxügüxü̃guwena rü cha̱u̱xca̱x nawoegu i ngẽma Iraéanecüã̱xgü, natürü tama cha̱u̱xca̱x nawoegu. Rü nüma ga Yudáanecüã̱xgü ga choxna naxĩgüxü̃ rü nüxü̃ nadaugü nax tama cha̱u̱xca̱x nawoeguxü̃ ga yema Iraéanecüã̱xgü.
8 Natürü woo nüxü̃ nadaugügu nax choma rü nüxü̃ chaxoxü̃ rü íchanawogüxü̃ ga yema Iraéanecüã̱xgü nagagu ga yema chixexü̃ ga naxügüxü̃, natürü nümagü ga yema Yudáanecüã̱xgü rü yema Iraéanecüã̱xgürüxü̃ chixexü̃ naxügü rü tama choxü̃ namuü̃e. Rü nümagü rü ta rü nagu namaxẽ ga yematama chixexü̃.
9 Rü yema Yudáanecüã̱xgü rü Iraéanecüã̱xgürüxü̃ tama naxca̱x nachixe ga yema chixexü̃ ga naxügüxü̃. Rü yemaacü norü taãẽmaxã nüxü̃ nicua̱xüü̃gü ga norü tupanachicüna̱xãgü ga nutanaxca̱x rü nainaxca̱x.
10 Rü naétüwa ga yema chixexü̃ ga naxügüxü̃ ga yema Yudáanecüã̱xgü ga choxna ĩgüxü̃, rü choxü̃ nawomüxẽẽgümare rü tama aixcüma cha̱u̱xca̱x nawoegu. Rü chomatama ya Cori ya Tupana nixĩ i nüxü̃ chixuxü̃ i ngẽma —ñanagürü.
11 Rü Tupana rü ñanagürü choxü̃: —Pa Yeremíax, ngẽma Iraéanecüã̱xgü i tama ixĩnüechaü̃xü̃arü yexera chixexü̃ naxügü i ngẽma Yudáanecüã̱xgü i choxna ĩgüxü̃ nax tupananetagüxü̃ yacua̱xüü̃güxü̃ca̱x.
12 ¡Rü nórtewa naxũ, rü ngéma nüxü̃ yarüxu i ñaa ore!: “Cori ya Tupana rü ñanagürü pexü̃, ‘¡Cha̱u̱xca̱x pewoegu, Pa Iraéanecüã̱xgü i Tama Ixĩnüechaü̃xü̃! Rü taxũtáma nuãcü pexü̃ chayaxu, rü taxũtáma guxü̃gu pemaxã chanuecha, erü choma rü ngechaü̃wa̱xecü chixĩ. Rü ngẽma nixĩ i chorü ore i choma ya Cori ya Tupana.
13 Pa Iraéanecüã̱xgüx, ¡nüxü̃ pixu i perü chixexü̃ i chope̱xewa pexüxü̃ nax chomaxã penuexü̃, rü guxü̃ma i nai i meetaxü̃tüü̃wa tupananetagüxü̃ picua̱xüü̃güxü̃ rü tama chauga pexĩnüexü̃! Rü choma ya Cori ya Tupana nixĩ i nüxü̃ chixuxü̃ i ngẽma chorü ore’ ” —ñanagürü.
14 Rü nüma ya Cori ya Tupana rü ñanagürü: —¡Cha̱u̱xca̱x pewoegu, Pa Chorü Duü̃xü̃gü ya Tama Ixĩnüechaü̃güxe! Erü choma nixĩ i perü yora chixĩxü̃. Rü wüxichigü ya ĩanewa rü wüxi i duü̃xü̃ tá chiyauxchigü, rü wüxichigü i natücumüwa rü taxre i duü̃xü̃ tá chiyauxchigü, rü ñu̱xũchi Chióü̃ca̱x tá chanawoeguxẽxẽ.
15 Rü choma rü tá pexca̱x ichanamugü i ãẽ̱xgacügü i choma chanaxwa̱xexü̃ãcü pemaxã icua̱xgüxü̃. Rü nümagü rü tá nüxü̃́ nangẽxma i cua̱x nax mea pemaxã inacua̱xgüxü̃ca̱x.
16 Rü ngẽxguma ngẽma nachixü̃anewa marü pimuxgu rü namuxgu i penegü rü pexacügü, rü taxúetama marü wena nachiga tidexa i ngẽma baú i chorü mugüchixü̃, rü taxúetama nagu tarüxĩnü, rü bai tá i texé nüxna cua̱xãchixü̃. Rü taxũtáma marü natauxchica, rü bai tá to i ngexwaca̱xü̃xü̃ naxügüxü̃. Rü choma ya Cori ya Tupana nixĩ i nüxü̃ chixuxü̃ i ngẽma.
17 Rü ngẽxguma ya Yerucharéü̃ rü Cori ya Tupanaarü tochicaxü̃gu tá naxãéga. Rü guxü̃ i nachixü̃anecüã̱xgü tá ngẽxma nangutaque̱xegü nax ngéma choxü̃ yacua̱xüü̃güxü̃ca̱x. Rü ñu̱xũchi ngẽma norü duü̃xü̃gü rü marü taxũtáma nagu namaxẽ i ngẽma chixexü̃gü i naãẽwa nagu naxĩnüexü̃.
18 Rü ngẽxguma tá nawa nanguxgu i ngẽma ngunexü̃, rü Yudáanecüã̱xgü rü Iraéanecüã̱xgü rü nügümaxã wüxiwa tá nangẽxmagügu. Rü wüxigu tá nüxna nawoegu i ngẽma nachixü̃ane i nórtewa ngẽxmaxü̃. Rü ngẽma naane ga nũxcümaü̃güxü̃ ga perü o̱xigüna chaxãxü̃wa tá naxĩ.
Iraéanecüã̱xgü rü chixexü̃gu namaxẽ
19 Pa Iraétanüxü̃x, choma rü ñoma chaunegüãcüma pexü̃ chayaxu, rü ñu̱xũchi wüxi ga naane ga mexẽchixü̃ pexna chaxã. Rü yema rü guxü̃ ga naanexü̃ rümemaexü̃ nixĩ. Rü choma nüxü̃ chacua̱xgu rü yemaca̱x chi: “Tonatü”, ñaperügü choxü̃, rü ñu̱xũchi taguchima choxna pixĩgachi.
20 Natürü i pema rü ñoma wüxi i ngexü̃ i natena ngeãẽxü̃rüxü̃ pixĩgü nax choxna pexĩgachixü̃ nax tupananetagüxü̃ picua̱xüü̃güxü̃ca̱x. Rü chomatama ya Cori ya Tupana nixĩ i nüxü̃ chixuxü̃ i ngẽma
21 Rü ngẽma auexü̃ i ngüchitaeruxü̃güwa rü chianexü̃güwa i duü̃xü̃gü nüxü̃ ĩnüexü̃ rü nümagü nixĩ i Iraétanüxü̃ i auxexü̃ rü ngechaü̃ca̱x ícagüxü̃. Erü chixexü̃gu namaxẽ, rü choxü̃ narüngümae i choma nax norü Cori ya Tupana chixĩxü̃.
22 ¡Cha̱u̱xca̱x pewoegu, Pa Chauxacügü ya Tama Ixĩnüechaxü̃xẽx! Rü choma rü tá pexü̃́ nüxü̃ icharüngüma i ngẽma perü pecadugü —ñanagürü ya Cori ya Tupana.
Iraétanüxü̃ rü Cori ya Tupanaxü̃ nangãxü̃gü
23 Rü ngẽma Iraétanüxü̃ rü ñanagürügü: —Taxuwama toxü̃́ name nax ngüchitaerugüxü̃wa taxĩxü̃ rü ma̱xpǘnegüwa tayaxãũgatanüxü̃, erü cumax, Pa Torü Cori ya Tupanax, rü cuxicatama nixĩ i toxü̃ ícupoxü̃xü̃ nüxna i torü uanügü.
24 Rü ngẽma tupananetagü i ãne toxna ãxü̃gagu, rü yexguma tabuegumama marü inarüxo ga guxü̃ma ga yema tonatügü nüxü̃́ yexmagüxü̃ ga carnérugü, rü wocagü, rü nanegü rü naxacügü.
25 Rü ñu̱xma tarümaxãchitanü rü poraãcü taxãnee erü torü chixexü̃gütüxü̃wa tangexmagü. Yerü yexguma ibuegucürüwa rü ñu̱xma rü ta wüxigu guxemagü nũxcümaü̃güxe ga torü o̱xigümaxã Cori ya Tupanape̱xewa chixexü̃ taxügüecha rü taguma naga taxĩnüe —ñanagürügü.
