Jeremías 30:1-24
30 Ñaa nixĩ i Cori ya Tupanaarü ore ga Yeremíamaxã nüxü̃ yaxuxü̃. Rü ñanagürü:
2 —Choma ya Cori ya Iraétanüxü̃arü Tupana rü ñachagürü: “Pa Yeremíax, ¡wüxi i poperagu naxümatü i guxü̃ma i ngẽma ore i cumaxã nüxü̃ chixuxü̃!
3 Rü tá nawa nangu i ngunexü̃ nax Babiróniawa íchanguxü̃xẽẽxü̃ i chorü duü̃xü̃gü i Iraéanecüã̱x rü Yudáanecüã̱x. Rü yema naane ga norü o̱xigüna chaxãxü̃ca̱x tá chanawoeguxẽxẽ. Rü ngẽma naane rü wenaxarü chorü duü̃xü̃güarü tá nixĩ” —ñanagürü ga Cori ya Tupana.
4 Ñaa nixĩ i Cori ya Tupanaarü ore ga Yeremíamaxã nüxü̃ yaxuxü̃ nachiga ga Iraéanecüã̱x rü Yudáanecüã̱x.
5 Rü ñanagürü: —Nüxü̃ taxĩnüe nax norü muü̃maxã rü baixãchiãẽmaxã aita naxüexü̃ i duü̃xü̃gü. Rü nataxuma i taãxẽ.
6 ¿Rü ñuxãcü i wüxi i yatü rü naxíxraxacü? ¿Rü ñu̱xma rü ta̱xacüca̱x i ngẽma yatügü rü ñoma ngexe ya íxraxacüxerüxü̃ nanguxnecaxü̃ rü ngúxü̃maxã nügü naxãũxü̃xü̃? ¿Rü ta̱xacüca̱x guxü̃ma i duü̃xü̃gü rü nadeãchichametüxü̃?
7 Rü marü ningaica i ngẽma ngunexü̃ i ãũcümaxü̃chixü̃ i taguma nüxü̃ idauxü̃. Rü ngẽma ngunexü̃gu rü poraãcü tá ngúxü̃ ningẽgü i Iraétanüxü̃ i Acóbutanüxü̃ ixĩgüxü̃. Natürü i choma rü tá ngẽma ngúxü̃wa íchananguxü̃xẽxẽ.
8 Rü choma ya Cori ya Tupana ya Guxü̃étüwa Ngẽxmaxe rü ñachagürü: “Choma rü tá íchananguxü̃xẽxẽ i chorü duü̃xü̃gü naxme̱xwa i ngẽma namugüexü̃. Rü tagutáma wena to i nachixü̃anecüã̱xgüarü mugüruxü̃ nixĩgü.
9 Rü nümagü i chorü duü̃xü̃gü rü chorü ngúchaü̃ tá nixĩ i naxügüxü̃ i choma ya Cori nax norü Tupana chixĩxü̃. Rü yimá Dabítaxa i choma nüxü̃ chaxunetacü tá nixĩ i norü ãẽ̱xgacü” —ñanagürü.
Tupana rü tá norü duü̃xü̃güxü̃ ínanguxü̃xẽxẽ
10 Rü choma ya Cori ya Tupana rü ñachagürü: —¡Taxṹ i pemuü̃exü̃, Pa Acóbutanüxü̃ i chorü duü̃xü̃gü pixĩgüxü̃! ¡Rü taxṹ i ta̱xacüca̱x peba̱i̱xãchiexü̃, Pa Iraétanüxü̃x! Erü choma rü tá pexü̃ rü pexacügüxü̃ íchanguxü̃xẽxẽ nawa i ngẽma yáxü̃guxü̃ i nachixü̃ane i nawa pegagüxü̃. Rü wenaxarü taãẽwa tá pemaxẽ rü taxũtáma i texé i pexü̃ ítaba̱i̱xgü.
11 Rü choma ya Cori ya Tupana rü ñachagürü: “Choma rü pemaxã changexma nax pexü̃ íchanguxü̃xẽxẽxü̃ca̱x naxme̱xwa i perü uanügü. Rü tá chayanaxoxẽxẽ i guxü̃ma i ngẽma nachixü̃anegü i nagu pexü̃ chawoonexü̃. Natürü i pema rü tagutáma pexü̃ ichayarüxoxẽxẽ. Natürü ngẽma pexna üxü̃ i poxcumaxã tá pexü̃ chapoxcue. Rü taxũtáma nüxü̃ chaxüpetümare nax pexü̃ chapoxcuexü̃” —ñanagürü.
Iraétanüxü̃arü chixexü̃gagu Tupana nanapoxcue
12 Rü Cori ya Tupana rü ñanagürü: —Ngẽma perü guxchaxü̃ rü ñoma o̱xri i ngearü üxüxü̃ã́xü̃rüxü̃ nixĩ nax nataxuxü̃ i norü mexẽẽruxü̃. Rü ngẽma perü chixexü̃ rü ñoma taixna i ngearü üxüxü̃ã́xü̃rüxü̃ nixĩ.
13 Rü tataxuma ya texé ya cuxü̃ ípoxü̃xẽ. Rü tataxuma ya texé ya naxüxü̃xẽ i curü o̱xri. Rü nataxuma i üxüxü̃ nax pexca̱x yataanexü̃ca̱x.
14 Rü yema nachixü̃anegü ga nüxü̃́ peyaxõgüxü̃ nax pexü̃ ínapoxü̃xü̃ca̱x rü pexü̃ inarüngü̃mae. Erü choma nixĩ i pexü̃ chapoxcuexü̃ ñoma wüxi i perü uanürüxü̃. Rü poraãcü pexü̃ chapoxcue nagagu ga yema muxũchixü̃ ga perü chixexü̃gü rü yema pecadugü ga taxucürüwa texé ixugüxü̃.
15 ¿Rü ta̱xacüca̱x naxca̱x pidexagü i ngẽma ngúxü̃ nax pingegüxü̃? Erü ngẽma ngúxü̃ rü nataxuma i norü üxüxü̃. Rü yema muxũchixü̃ ga perü chixexü̃gagu rü yema pecadugü ga taxucürüwa texé ixugüxü̃gagu nixĩ i pexü̃ chapoxcuexü̃ —ñanagürü.
Tupana tá nüxü̃ narüngü̃xẽxẽ i norü duü̃xü̃gü
16 Rü Tupana rü norü duü̃xü̃güxü̃ ñanagürü: —Guxü̃ma i ngẽma nachixü̃anegü i pexü̃ rüporamaegüxü̃ rü tá togü nüxü̃ narüporamaegü. Rü guxü̃ma i perü uanügü rü nüxí tá to i nachixü̃anewa nagagü. Rü ngẽma nachixü̃anegü ga perü yemaxü̃gü inaxü̃ rü tá nüxí to i nachixü̃ane nayana i norü ngẽmaxü̃gü. Rü ngẽma nachixü̃anegü ga naxca̱x ngĩ́xü̃ ga perü yemaxü̃gü rü tá nüxí to i nachixü̃ane naxca̱x nüxü̃́ nangĩ̱xgü i norü ngẽmaxü̃gü.
17 Rü choma rü tá pexü̃ charümeexẽxẽ nawa i perü guxchaxü̃gü woo perü uanügü rü ñanagürügü: “Chióü̃ rü ngéma nata̱xmare rü taxúema nagu tarüxĩnü”, ñanagürügü. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.
18 Rü Cori ya Tupana rü ñanagürü: —Choma rü tá nüxü̃ charüngü̃xẽẽxü̃ i guxü̃ma i Acóbutanüxü̃. Rü tá choxü̃́ nangechaxü̃tümüxü̃ i ngẽma nachixü̃ane. Rü yima norü ĩanegü i ñu̱xma nachitaxü̃xica íyaxügüne rü tá wena nachicawa tátama nimexẽẽgü. Rü yima ãẽ̱xgacüpatagü rü tá nachicagüwa tátama nimexẽẽgü.
19 Rü chorü duü̃xü̃gü rü tá norü wiyaewa choxna moxẽ naxãgü rü tá nacugüe rü tá nataãẽgü. Rü taxũtáma ínarüxĩ i norü mu, erü choma rü tá chayamuxẽxẽ. Rü ngẽma togü i duü̃xü̃gü rü taxũtáma nüxü̃ naxoe erü choma rü tá chanatachigaxẽxẽ i ngẽma chorü duü̃xü̃gü.
20 Rü ngẽma Iraétanüxü̃ rü noxrirüxü̃ tá naporae, erü choma rü tá natanüwa changexma. Rü tá chanapoxcue i ngéma nachixü̃anegü i chixri namaxã icua̱xgüxü̃.
21 30:21-22 Rü natanüwa tátama nango̱x i wüxi i namaxã icuáxü̃. Rü wüxi i Iraétanüxü̃xü̃ tá nixĩ i norü ãẽ̱xgacü ixĩxü̃. Rü choma rü tá chaugüna chanangaicamaxẽxẽ, rü nüma rü tá chaucüwawa nangẽxma. ¿Rü texé tapora nax tüechamatama choxna tangaicamaxü̃? Rü ngẽma Iraétanüxü̃ rü chorü duü̃xü̃gü tá nixĩgü, rü choma rü norü Tupana tá chixĩ. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.
22 Nüü̃ nadau 30:21
23 Rü ngẽma Cori ya Tupanaarü nu rü ñoma wüxi ya buanecü ya poracü rü ixã̱ũ̱xẽmacürüxü̃ ngẽma chixexü̃arü üruü̃güétügu nangu.
24 Rü ngẽma Cori ya Tupanaarü nu rü taxũtáma ínayachaxãchi ñu̱xmatáta yanguxẽẽã i ngẽma nüma nagu naxĩnüxü̃. Rü nawa tá nangu i ngunexü̃ i nagu tá nüxü̃ pecuáxü̃ i ta̱xacüchiga yixĩxü̃ i ngẽma pemaxã nüxü̃ chixuxü̃.
