Jeremías 33:1-26
33 Rü yexguma Yeremía yema poxcuchicaxü̃ ga ãẽ̱xgacüarü dauxü̃taechicaa̱xtüwa yexmaxü̃wa yexmagu, rü nüma ga Cori ya Tupana rü namaxã nidexa rü ñanagürü nüxü̃:
2 —Choma ya Cori ya Tupana ga nango̱xẽẽcü i ñaa naane, rü nachicagu naxücü nax tama ngéma yaxũgachixü̃ca̱x, rü choma nixĩ i cuxü̃ ñachaxü̃:
3 “¡Choxna naca rü tá cuxü̃ changãxü̃! Rü tá cuxü̃ nüxü̃ chacua̱xẽxẽ i ta̱xacü i taxü̃ i ẽxü̃guxü̃ i taguma nüxü̃ cucuáxü̃.
4 Erü choma ya Cori ya Iraétanüxü̃arü Tupana rü ñachagürü: ‘Daa ĩanearü ĩpatagü rü yima Yudáanearü ãẽ̱xgacüpatagü rü tá nagu napogüe nax yimá norü nutagümaxã rü omütagümaxã daa ĩanearü poxegutapü̱x namaxã nacaxcugüxü̃ca̱x nax tama ngẽma uanügüarü günagüanexü̃maxã yawa̱xgüxü̃ca̱x i ngẽma norü poxeguxü̃, rü tama ngẽmaãcü ngẽma uanügü i Cadéugü taramaxã nachocuxü̃ca̱x.
5 Rü ngẽma Babiróniacüã̱x rü tá naxca̱x ínayaxü̃ãchi ya daa ĩane, rü tá nanadaiãcu. Rü ngẽmaãcü tá yuexü̃maxã nanapaxẽxẽ ya daa ĩane. Erü choma rü chorü numaxã tá nüxü̃́ chanatauxchaxẽxẽ i ngẽma Babiróniacüã̱x nax nadaiaxü̃ca̱x ya daa ĩanearü duü̃xü̃gü. Rü marü na̱xcha̱xwa chidaugachi nagagu ga guxü̃ma ga norü chixexü̃gü.
6 Natürü wüxi i ngunexü̃ rü tá naxca̱x chayataanexẽxẽ i ngẽma Iraétanüxü̃. Rü wena táxarü chanataãxẽxẽxẽ nax ngẽmaãcü aixcüma nataãẽgüxü̃ca̱x rü tama ãũcümaxü̃wa nangẽxmagüxü̃ca̱x.
7 Rü marü taxũtáma nagu charüxĩnü nax chapoxcuexü̃ i ngẽma Yudáanecüã̱xgü rü Iraéanecüã̱xgü, rü tá nüxü̃́ chanatauxchaxẽxẽ nax nachixü̃aneca̱x nawoeguxü̃ca̱x. Rü tá nüxü̃ charüngü̃xẽxẽxü̃ nax ngẽmaãcü wenaxarü naxügüã̱xü̃ca̱x i norü ĩane nax noxrirüxü̃ naporaexü̃ca̱x.
8 Rü guxü̃ma ga norü chixexü̃gü ga chope̱xewa naxügüxü̃ rü tá nüxü̃́ íchayanaxoxẽxẽ. Rü tá nüxü̃́ nüxü̃ ichayarüngüma ga yema chixexü̃ ga naxügüxü̃ ga yexguma tama chauga naxĩnüegu rü chomaxã nanuegu.
9 Rü Yerucharéü̃ rü tá choxü̃ nataãxẽxẽxẽ rü tá choxü̃ natachigaxẽxẽ rü tá choxü̃ nicua̱xüxü̃ nape̱xewa i guxü̃ma i ngẽma togü i nachixü̃anegü i ñoma i naanewa ngẽxmagüxü̃. Rü ngẽxguma ngẽma nachixü̃anegü nüxü̃ cuáchigagügu i guxü̃ma i ngẽma ngü̃xẽẽgü i Yerucharéü̃arü duü̃xü̃güca̱x íchanguxẽẽxü̃ rü ngẽma mexü̃gü i nüxna chaxãxü̃, rü ngẽma nachixü̃anegü rü norü muü̃maxã tá nidu̱xruxe’ ” —ñanagürü.
10 Rü nüma ya Cori ya Tupana rü ñanagürü ta: —Ñu̱xma i pema rü nüxü̃ pixu nax wüxi i chianexü̃ yixĩxü̃ i ñaa naane, rü nataxuma i duü̃xü̃gü rü naeü̃gü, rü Yerucharéü̃arü namagü rü Yudáanearü ĩanegüarü namagü rü nangeãcugü rü taxúema nawa tamaxẽ rü bai i duü̃xü̃gü rü bai i naeü̃gü. Natürü pemaxã nüxü̃ chixu rü wenaxarü daa ĩanewa tá nüxü̃ pexĩnüe i duü̃xü̃gü.
11 Rü tá nüxü̃ pexĩnüe nax taãẽãcüma aita naxüexü̃ i duü̃xü̃gü rü tá nüxü̃ pexĩnüe nax taãẽãcüma nügümaxã yadexagüxü̃ i ngẽma ãxma̱xgüchaü̃xü̃ rü ãtegüchaü̃xü̃. Rü duü̃xü̃gü rü ñanagürügü tá: “¡Moxẽ nüxna pexã ya yima Cori ya Tupana ya Guxãétüwa Ngẽxmacü, erü nüma rü namecüma rü norü ngechaü̃ rü tagutáma nagu̱x!” ñanagürügü tá. Rü pema rü chopatawa tá penana i perü ãmaregü i namaxã moxẽ choxna pexãgüxü̃. Rü choma rü tá nüxü̃ charüngü̃xẽxẽxü̃ i ñaa naanearü duü̃xü̃gü nax noxrirüxü̃ nataãẽgüxü̃ca̱x. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.
12 Rü nüma ya Cori ya Tupana ya Guxãétüwa Ngẽxmacü rü ñanagürü: —Ñaa nachixü̃ane i ñu̱xma rü wüxi i chianexü̃ nixĩ rü nawa nataxuma i duü̃xü̃gü rü naeü̃gü. Natürü yixcüra rü guxü̃ma ya norü ĩanegüwa rü tá nangẽxmagü i maxẽchitaxü̃gü i ngexta ngẽma carnérugüarü dauruü̃gü nawa nagagüxü̃ i norü carnérugü nax ngẽxma nangü̃exü̃ca̱x.
13 Rü yima mápü̱xanexü̃wa, rü doxonexü̃wa, rü Négueanearü ĩanegüwa, rü Bẽyamíü̃anewa, rü yima ĩanegü ya Yerucharéü̃arü ngaicamana ngẽxmagünewa, rü guxü̃ma ya Yudáanearü ĩanegüwa rü wena tá nüxü̃ tadau i carnérugüarü dauruü̃gü i norü carnérugü ixugüxü̃. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.
14 Rü Cori ya Tupana rü ñanagürü: —Nawa tá nangu i ngunexü̃ i nagu tá chayanguxẽxẽxü̃ i chorü uneta nax nüxü̃ charüngü̃xẽxẽxü̃ i chorü duü̃xü̃gü i Iraéanecüã̱xgü rü Yudáanecüã̱xgü.
15 Rü ngẽxguma nawa nanguxgu i ngẽma ngunexü̃, rü wüxi i nataxüchi ya ãẽ̱xgacü ya Dabítaxa rü ñaa nachixü̃anearü ãẽ̱xgacü ya mecü tá nixĩ. Rü nüma rü aixcüma meama tá duü̃xü̃gümaxã inacua̱x i ñaa nachixü̃anewa.
16 Rü ngẽxguma nawa nanguxgu i ngẽma ngunexü̃, rü Yudáane rü tá nüxna ínanguxuchi i norü guxchaxü̃gü, rü taxũtáma ãũcümaxü̃wa nangẽxma ya Yerucharéü̃. Rü ngẽmaca̱x ya yima ĩane rü tá ñaxü̃gu nanaxüéga: “Cori ya Tupana rü Meama Tamaxã Inacua̱x”, ñaxü̃gu.
17 Rü choma ya Cori ya Tupana rü ñachagürü: “Tagutáma nataxu nax wüxi i nataxa ya Dabí nax ãẽ̱xgacü tá yixĩxü̃ i Iraéchixü̃anewa.
18 Rü tagutáma nataxu i chacherdótegü i Lebítaagü nax guxü̃ i ngunexü̃gu cha̱u̱xca̱x yagugüãxü̃ i carnérugü, rü cha̱u̱xca̱x yagugüãxü̃ i trigute̱xe rü togü i ãmaregü” —ñanagürü.
19 Rü nüma ga Cori ya Tupana rü Yeremíamaxã nidexa rü ñanagürü:
20 —Choma ya Cori ya Tupana rü ñachagürü: “Choma chanamu ya üa̱xcü nax ngunecü nabáxixü̃ca̱x rü chütacü tama nabáxixü̃ca̱x rü taxucürüwa i texé tayanaxoxẽxẽ i ngẽma nax tama yanguxü̃ca̱x.
21 Rü ngẽxgumarüxü̃ ta taxucürüwa texé tayanaxoxẽxẽ ga yema chorü uneta ga chorü duü̃ ga Dabímaxã nüxü̃ chixuxü̃ nax guxü̃gutáma wüxi i nataxa tá nixĩ i Iraéanearü ãẽ̱xgacü yixĩxü̃. Rü ngẽxgumarüxü̃ ta taxucürüwa texé tayanaxoxẽxẽ ga yema chorü uneta nax guxü̃gutáma Lebítaagü tá nixĩ i chorü chacherdótegü ixĩgüxü̃.
22 Rü yima chorü duü̃ i Dabítaagü rü ngẽma chorü puracütanüxü̃ i Lebítaagü rü tá chanamuxẽxẽ nax ñoma ẽxtagü i dauxü̃wa ngẽxmagücürüxü̃ namuxü̃ca̱x rü ñoma naxnücüte̱xe i márpechinüwa ngẽxmagüxü̃rüxü̃ namuxü̃ca̱x. Rü ngẽmaca̱x taxúexü̃táma natauxcha nax tayaxugüxü̃” —ñanagürü.
23 Rü Cori ya Tupana rü Yeremíamaxã nidexa rü ñanagürü nüxü̃:
24 —¿Tama ẽ̱xna nüxü̃ cuxĩnüxü̃ i ngẽma duü̃xü̃gü nüxü̃ ixuxü̃ nax choma rü marü nüxü̃ chaxoxü̃ i ngẽma Iraéanecüã̱xgü rü Yudáanecüã̱xgü, ñagüxü̃? Rü ngẽmaca̱x chixri chorü duü̃xü̃güxü̃ narüdaunü rü nüxü̃ naxoe, rü nüxü̃ nixugüe nax tama wüxi i nachixü̃ane yixĩxü̃ i ñu̱xma.
25 Rü choma ya Cori ya Tupana rü ñachagürü: “Choma nixĩ i üa̱xcümaxã chanaxueguxü̃ nax ngunecü nabáxixü̃ca̱x rü chütacü i tama. Rü choma nixĩ i dauxü̃guxü̃ i naanemaxã rü ñoma i naanemaxã ichaxunetaxü̃ nax namaxã ichacuáxü̃.
26 Rü ngẽxgumarüxü̃ ta Acóbumaxã rü chorü duü̃ ya Dabímaxã ichaxuneta nax nataagü tá nixĩ i namaxã icua̱xgüxü̃ i Abraáü̃taagü rü Ichaátaagü rü Acóbutaagü. Rü taxũtáma nüxü̃ charüngüma i ngẽma chorü uneta, erü choxü̃́ nangechaü̃tümüxü̃gü i chorü duü̃xü̃gü rü tá nüxü̃ charüngü̃xẽxẽ nax wena nachixü̃aneca̱x nawoeguxü̃ca̱x” —ñachagürü.
