Jeremías 35:1-19
35 Rü yexguma Yochía nane ga Yoaquíü̃ Yudáanearü ãẽ̱xgacü yixĩxgu, rü Cori ya Tupana chomaxã nidexa rü ñanagürü:
2 —¡Natanüwa naxũ i ngẽma Recáxtanüxü̃ rü namaxã idexa! ¡Rü ñu̱xũchi wüxi i ucapu i chopatawa ngẽxmaxü̃wa nagagü rü ngéma bínu nüxna naxã! —ñanagürü.
3 Rü choma i Yeremía rü naxca̱x chayadau ga Yaachanía ga to i Yeremía nane. Rü nüma ga Yaachanía rü Abachiníataxa nixĩ. Rü wüxigu Yaachaníamaxã naxca̱x chayadau ga naenexẽgü rü nanegü rü guxü̃ma ga yema togü ga Recáxtanüxü̃.
4 Rü Tupanapatawa chanagagü nawa ga yema Anáü̃ nanegüarü ucapu. Rü nüma ga Anáü̃ ga Idalía nane rü Tupanaarü duü̃xü̃ nixĩ. Rü yema ucapu rü yema Tupanapataarü ãẽ̱xgacügüarü ucapucüwawa nayexma. Rü Tupanapataarü ĩã̱xgüarü dauruxü̃ ga Maacheíaarü ucapuétüwa nayexma. Rü nüma ga Maachía rü Charúü̃ nane nixĩ.
5 Rü choma ga Yeremía rü yema Recáxtanüxü̃pe̱xegu chananu ga baepáxü̃gü rü copugü ga bínumaxã ããcuxü̃. Rü ñachagürü nüxü̃: —¡Peyaxaxgü ya daa íxracü ya bínu! —ñachagürü.
6 Rü nümagü rü choxü̃ nangãxü̃gü rü ñanagürügü: —Toma rü tama tayaxaxü ya bínu, yerü nũxcümaü̃cü ga torü o̱xi ga Yonadá ga Recáx nane rü guxü̃guca̱x toxna nanachu̱xu nax tama bínu tixaxgüxü̃ca̱x i toma rü tonegü rü totaagü.
7 Rü yexgumarüxü̃ ta toxna nanachu̱xu nax mexü̃ne ya ĩpata taxügüxü̃ca̱x, rü toxna nanachu̱xu nax taxüanegüxü̃ rü úbamaxã tatoegüxü̃ nax tama toxü̃́ nangẽxmaxü̃ca̱x i torü úbanecügu. Rü toxü̃ namu nax guxü̃guma naxchirunaxca̱x ga ĩpatawa tamaxẽxü̃ nax ngẽmaãcü mucü ya taunecü tamaxẽxü̃ca̱x nawa i ñaa naane i ngexta ñoma to i nachixü̃anecüã̱xrüxü̃ tixĩgüxü̃.
8 Rü toma rü mea naga taxĩnüe i guxü̃ma ga yema mugü ga torü o̱xi ga Yonadá tomaxã nüxü̃ ixuxü̃ nax nagu taxĩxü̃ca̱x, rü taguma tayaxaxü ga bínu rü bai i toma rü bai i toxma̱xgü rü bai i tonegü rü toxocügü.
9 Rü taguma tanaxü ya ĩpatagü ya mexü̃ne nax nawa tamaxẽxü̃ca̱x, rü taguma toxü̃́ nangẽxma i úbanecügü, rü taguma toxü̃́ nangẽxma i toonegü i nanetügü nagu togüxü̃.
10 Rü ĩpatagü i naxchirunaxca̱xwa tamaxẽ, rü tayanguxẽxẽ ga guxü̃ma ga yema torü o̱xi ga Yonadá toxü̃ muxü̃.
11 Natürü yexguma Babiróniaanearü ãẽ̱xgacü ñaa nachixü̃aneca̱x íyagoõchigu, rü nagu tarüxĩnüe nax Yerucharéü̃wa taxĩxü̃ nax naxcha̱xwa tibuxmüxü̃ca̱x ga yema Babiróniaanearü churaragü rü Chíriaanearü churaragü. Rü ngẽmaca̱x nixĩ i ñu̱xma Yerucharéü̃wa tamaxẽxü̃ —ñanagürügü.
12 Rü yexguma ga Cori ya Tupana rü Yeremíamaxã nidexa, rü ñanagürü:
13 —Choma ya Cori ya Guxãétüwa Ngẽxmacü ya Iraétanüxü̃arü Tupana rü cuxü̃ chamu nax ngẽma duü̃xü̃gü i Yudáanecüã̱xmaxã rü Yerucharéü̃cüã̱xmaxã nüxü̃ quixuxü̃ rü ñachagürü nüxü̃: “¡Naxca̱x pengúe i nacüma i ngẽma Recáxtanüxü̃ nax ñuxãcü norü o̱xiga naxĩnüexü̃! Rü ngẽxgumarüxü̃ ta chanaxwa̱xe nax naga pexĩnüexü̃ i chorü mugü. Rü choma ya Cori ya Tupana nixĩ i ngẽma ñachaxü̃.
14 Rü ngẽma Recáx nane ga Yonadátanüxü̃ rü meama naga naxĩnüe ga yema mugü ga norü o̱xi namaxã nüxü̃ ixuxü̃ rü tama nayaxaxgü ya bínu. Rü ñu̱xma rü ta tama nayaxaxgü, yerü naga naxĩnüe ga norü o̱xi. Choma rü marü muẽ̱xpü̱xcüna pemaxã nüxü̃ chixu ga chorü mugü, natürü tama naga pexĩnüe.
15 Rü choma rü marü muẽ̱xpü̱xcüna muxü̃ma ga chorü duü̃xü̃gü ga orearü uruü̃gü pexca̱x ngéma chamugüecha nax pemaxã nüxü̃ yaxugüexü̃ca̱x i ñaa chorü ore. Rü nümagü rü ñanagürügü pexü̃: ¡Nüxü̃ perüxoe i pecüma i chixexü̃ rü ngẽma chixexü̃gü i nagu pemaxẽxü̃! ¡Rü taxṹ i ngẽma tupananetagüwe perüxĩxü̃, rü taxṹ i nüxü̃ picua̱xüü̃güxü̃! Rü ngẽmaãcü tá nawa pemaxẽecha i ngẽma naane ga pexna rü perü o̱xigüna chaxãxü̃. Natürü i pema rü tama choxü̃ pecua̱xgüchaxü̃ rü tama chauga pexĩnüe.
16 Rü yema Recáx nane ga Yonadátanüxü̃ rü meama naga naxĩnüe ga yema mugü ga norü o̱xi namaxã nüxü̃ ixuxü̃. Natürü pema i Iraétanüxü̃ rü marü tama chauga pexĩnüe.
17 Rü ngẽmaca̱x i choma ya Cori ya Guxãétüwa Ngẽxmacü ya Iraétanüxü̃arü Tupana rü ñachagürü: Ngẽma Yudáanearü duü̃xü̃güca̱x rü Yerucharéü̃arü duü̃xü̃güca̱x tá íchananguxẽxẽ i guxü̃ma i ngẽma guxchaxü̃gü ga namaxã chaxuegugüxü̃. Yerü namaxã chidexa, natürü tama chauga naxĩnüe. Rü naxca̱x chaca, natürü tama cha̱u̱xca̱x naxĩ” —ñanagürü.
18 Rü nüma ga Yeremía rü yema Recáxtanüxü̃maxã nidexa rü ñanagürü nüxü̃: —Nüma ya Cori ya Guxãétüwa Ngẽxmacü ya Iraétanüxü̃arü Tupana rü ñanagürü: “Ñu̱xma nax mea naga pexĩnüexü̃ i perü o̱xi ga Yonadá rü nagu pexĩxü̃ i norü ucu̱xẽgü rü peyangu̱xẽẽgü ga guxü̃ma ga yema pemaxã nüxü̃ yaxuxü̃,
19 rü choma ya Cori ya Guxãétüwa Ngẽxmacü ya Iraétanüxü̃arü Tupana rü pemaxã nüxü̃ chixu rü tagutáma nataxu nax wüxi i nataxa ya Yonadá rü chorü ngü̃xẽẽruxü̃ yixĩxü̃ca̱x” —ñanagürü.
