Jeremías 36:1-32
36 Rü yexguma Yoaquíü̃ ga Yochía nane rü marü ãgümücü ga taunecü Yudáanearü ãẽ̱xgacü yixĩxgu, rü Cori ya Tupana rü Yeremíamaxã nidexa rü ñanagürü nüxü̃:
2 —¡Ẽcü nayaxu i wüxi i popera i dixpütaxü̃ rü ngẽmagu naxümatü i guxü̃ma i ngẽma ore i cumaxã nüxü̃ chixuxü̃ i Iraéanecüã̱xgüchiga, rü Yudáanecüã̱xgüchiga, rü ngẽma togü i nachixü̃anecüã̱xgüchiga! ¡Rü ngẽxma naxümatü ga yema ore ga cumaxã nüxü̃ chixuxü̃ ga yexguma Yochía ãẽ̱xgacü ixĩxgu rü ñu̱xmata nawa nangu i ngẽma ore i ñu̱xma cumaxã nüxü̃ chixuxü̃!
3 Rü ngẽxguma ngẽma Yudáanecüã̱xgü nüxü̃ nacuáchigagügu i ngẽma poxcu i nagu charüxĩnüxü̃ nax naxca̱x íchananguxẽẽxü̃ rü bexmana tá nüxü̃ naxoe i nacüma i chixexü̃, rü choma rü tá nüxü̃́ nüxü̃ charüngüma i ngẽma norü chixexü̃gü rü norü pecadugü —ñanagürü ga Tupana.
4 Rü nüma ga Yeremía rü Nería nane ga Barúxca̱x nangema rü gumamaxã nüxü̃ nixuchigü ga Tupanaarü ore nax naxümatüaxü̃ca̱x.
5 Rü ñu̱xũchi nüma ga Yeremía rü Barúxü̃ naxuxcu̱xẽ rü ñanagürü: —Dücax, ñu̱xma choma nax chapoxcuxü̃ rü taxucürüwa Tupanapatawa chaxũ.
6 Rü ngẽmaca̱x i ngẽxguma marü nawa nanguxgu nax wena naxaurexü̃ i duü̃xü̃gü rü name i cumax ngéma Tupanapatawa cuxũ nax ngéma namaxã nüxü̃ cudaumatüxü̃ca̱x ga yema ore ga poxcuchiga ga poperagu cuxü̃ chaxümatüxẽẽxü̃. Erü ngẽma ngunexü̃gu rü tá nangẽxmagü i muxü̃ma i duü̃xü̃gü i guxü̃wama i Yudáanewa ne ĩxü̃, rü ngẽmaãcü tá nüxü̃ naxĩnüe i Cori ya Tupanaarü ore.
7 Rü bexmana ngẽxguma ngẽmaxü̃ naxĩnüegu i ngẽma duü̃xü̃gü rü tá Cori ya Tupanana nacagüe nax nüxü̃́ nüxü̃ iyanangümaxü̃ca̱x i norü chixexü̃gü, rü tá nüxü̃ narüxoe i nacüma i chixexü̃, naxü̃pa nax napoxcuexü̃. Erü ngẽma Cori ya Tupanaarü poxcu i norü numaxã namaxã naxãxũneãxü̃ i ngẽma duü̃xü̃gü rü poraãcü naxãũcümaxü̃chi —ñanagürü ga Yeremía.
8 Rü nüma ga Barúx rü nanaxü ga guxü̃ma ga yema Yeremía namaxã nüxü̃ ixuxü̃. Rü Tupanapatawa naxũ rü yéma tagaãcü duü̃xü̃güpe̱xewa nüxü̃ nadaumatü ga yema ore ga yema poperagu ümatüxü̃.
9 Rü yexguma Yoaquíü̃ ga Yochía nane rü marü 5 ga taunecü Yudáanearü ãẽ̱xgacü yixĩxgu, rü gumá taunecüarü 9 ga tauemacügu nanaxunagü nax naxauregüxü̃ ga guxü̃ma ga Yerucharéü̃cüã̱x wüxigu namaxã ga yema togü ga duü̃xü̃gü ga naigü ga Yudáanearü ĩanegüwa ne ĩxü̃.
10 Rü Barúx rü yema Tupanapataa̱xtü ga dauxü̃wa yexmaxü̃wa naxũ rü yema Ĩã̱x i Ngexwacaxü̃xü̃gu nachi, nawa ga yema ucapu ga Guemaríaarü ucapugu ãégaxü̃. Rü Guemaría rü poperaarü ümatüruxü̃ ga Chapáü̃ nane nixĩ. Rü nüma ga Barúx rü nape̱xewa ga guxü̃ma ga duü̃xü̃gü ga yéma yexmagüxü̃ nüxü̃ nadaumatü ga yema popera ga Yeremíaarü ore nagu ümatüxü̃.
Barúx rü ãẽ̱xgacüarü ngü̃xẽẽruü̃güpe̱xewa nüxü̃ nadaumatü ga popera
11 Rü nüma ga Micaía ga Guemaría nane ga Chapáü̃taxa rü nüxü̃ naxĩnü ga yema Tupanaarü ore ga Barúx nüxü̃ daumatüxü̃.
12 Rü nüma ga Micaía rü ãẽ̱xgacüpatawa naxũ rü nagu naxücu ga yema poperaarü ümatüruxü̃arü ucapu ga nawa nangutaque̱xegüxü̃ ga guxü̃ma ga norü ngü̃xẽẽruü̃gü ga Yudáanearü ãẽ̱xgacü. Rü yéma nayexmagü ga Erichamá ga ãẽ̱xgacüarü poperaarü ümatüruxü̃, rü Deraía ga Chemaía nane, rü Enatáü̃ ga Abúru nane, rü Guemaría ga Chapáü̃ nane, rü Chedequía ga Ananía nane rü guxü̃ma ga togü ga ãẽ̱xgacüarü ngü̃xẽẽruü̃gü.
13 Rü nüma ga Micaía rü yema ãẽ̱xgacüarü ngü̃xẽẽruü̃gümaxã nüxü̃ nixu ga yema ore ga nüxü̃ naxĩnüxü̃ ga yexguma Barúx duü̃xü̃güpe̱xewa nüxü̃ daumatügu ga yema popera.
14 Rü yema ãẽ̱xgacüarü ngü̃xẽẽruü̃gü nanamu ga Yeudí ga Netanía nane ga Cheremíataxa rü Cúchitaxa ixĩxü̃ nax Barúxmaxã nüxü̃ yanaxuxü̃ca̱x nax yema ãẽ̱xgacüarü ngü̃xẽẽruü̃güxü̃tawa nangeaxü̃ca̱x ga yema popera ga duü̃xü̃güpe̱xewa nüxü̃ nadaumatüxü̃. Rü nüma ga Barúx rü nanayaxu ga yema popera rü ãẽ̱xgacüarü ngü̃xẽẽruü̃güxü̃tawa namaxã naxũ.
15 Rü nümagü rü ñanagürügü nüxü̃: —¡Irüto rü toxca̱x nüxü̃ nadaumatü i ngẽma popera! —ñanagürügü. Rü nüma ga Barúx rü nape̱xewa nüxü̃ nadaumatü.
16 Rü yexguma nüxü̃ naxĩnüegu ga yema ore rü nümagü ga yema ãẽ̱xgacüarü ngü̃xẽẽruü̃gü rü poraãcü namuü̃e. Rü nügüna nadaugü rü ñanagürügü: —Name nixĩ i ãẽ̱xgacümaxã nüxü̃ tixu i guxü̃ma i ñaa ore —ñanagürügü.
17 Rü ñu̱xũchi Barúxü̃ ñanagürügü: —¿Tomaxã nüxü̃ ixu rü ñuxãcü nixĩ i cunaxümatüxü̃ i guxü̃ma i ngẽma ore? ¿Ẽ̱xna Yeremía nixĩ i cuxü̃ naxümatüxẽxẽxü̃? —ñanagürügü.
18 Rü nüma ga Barúx nanangãxü̃ rü ñanagürü: —Ngẽmaãcü, nüma nixĩ i choxü̃ naxümatüxẽxẽãxü̃, rü choma nixĩ i tíntamaxã chanaxümatü nagu ga yema popera —ñanagürü.
19 Rü yexguma Barúxü̃ ñanagürügü: —Name nixĩ nax cuma rü Yeremíamaxã ipeyarücu̱xgüxü̃ nax taxúema pexü̃ cuáxü̃ca̱x nax ngextá pengẽxmagüxü̃ —ñanagürügü.
Ãẽ̱xgacü ga Yoaquíü̃ rü nayagu ga yema popera
20 Rü yema ãẽ̱xgacüarü ngü̃xẽẽruü̃gü rü poperaarü ümatüruxü̃ ga Erichamáarü ucapuwa nanange̱xgü ga yema popera. Rü ãẽ̱xgacüpatawa naxĩ nax ãẽ̱xgacümaxã nüxü̃ yanaxugüexü̃ca̱x ga yema ngupetüxü̃.
21 Rü nüma ga ãẽ̱xgacü rü Yeudíxü̃ namu nax poperaarü ümatüruxü̃ ga Erichamáarü ucapuwa yayauxãxü̃ca̱x ga yema popera. Rü yexguma ãẽ̱xgacüxü̃tawa nangeãgu rü ãẽ̱xgacüpe̱xewa rü guxü̃ma ga norü ngü̃xẽẽruü̃güpe̱xewa nüxü̃ nadaumatü.
Ãẽ̱xgacü ga Yoaquíü̃ rü nayagu ga yema popera
22 Rü norü 9 ga tauemacüwa nangu ga yexguma, rü yemaca̱x poraãcü nagáuane. Rü nüma ga ãẽ̱xgacü ga Yoaquíü̃ rü wüxi ga norü ucapuwa nayexma, rü yéma üxüétüwa nügü nanaxi.
23 Rü nüma ga Yeudí rü ãẽ̱xgacüca̱x nüxü̃ nadaumatü ga yema popera. Rü yexguma tomaepü̱xchimüü̃ rüe̱xna ãgümücüchimüxü̃ nagu̱xuchixẽẽgu ga nüxü̃ nax nadaumatüxü̃, rü nüma ga ãẽ̱xgacü rü norü cüxchi tüxü̃ nayaxu rü ínanawíe ga yema marü nüxü̃ nadaumatüxü̃, rü üxüwa nayata̱xcuchi. Rü yemaacü nanaxü rü ñu̱xmata nagu ga guxü̃ma ga yema popera.
24 Rü woo nüma ga ãẽ̱xgacü rü woo norü ngü̃xẽẽruü̃gü ga nüxü̃ ĩnüexü̃ ga yema ore ga Yexudí namaxã nüxü̃ daumatüxü̃ rü tama namuü̃e, rü bai ga nax nangechaü̃güxü̃.
25 Rü nümagü ga Enatáü̃ rü Deraía rü Guemaría, rü ãẽ̱xgacüxü̃ naca̱a̱xü̃gü nax tama yaguaxü̃ca̱x ga yema popera. Natürü ga nüma ga ãẽ̱xgacü rü tama inaxĩnü.
26 Rü nüma ga ãẽ̱xgacü rü nanamu ga nane ga Yerameé, rü Arié nane ga Cheraía, rü Adeé nane ga Cheremía, nax Yeremíaxü̃ yayauxgüxü̃ca̱x wüxigu namaxã ga Barúx ga norü poperaarü ümatüruxü̃. Natürü nüma ga Cori ya Tupana rü inayacu̱xgü.
Yeremía rü wena Barúxü̃ namu nax to ga poperagu naxümatüaxü̃ca̱x ga yematama ore
27 Rü yexguma ãẽ̱xgacü yagu̱xgu ga yema popera ga Barúx nagu naxümatüxü̃ ga yema ore ga Yeremía namaxã nüxü̃ ixuxü̃, rü nüma ga Cori ya Tupana rü Yeremíaxü̃ ñanagürü:
28 —¡To i popera nayaxu, rü ngẽmagu wena naxümatü ga yema ore ga nüxíraxü̃xü̃ ga popera ga Yudáanearü ãẽ̱xgacü ga Yoaquíü̃ iguxü̃gu ümatüxü̃!
29 ¡Rü Yoaquíü̃ ya Yudáanearü ãẽ̱xgacümaxã nüxü̃ ixu i ñaa ore: “Cori ya Tupana rü ñanagürü cuxü̃: ‘Cuma rü cuyagu ga yema popera rü ñu̱xũchi cunanga ga Yeremía yerü yema poperagu nanaxümatü nax Babiróniaanearü ãẽ̱xgacü rü aixcüma tá naxca̱x íyagoõchixü̃ i ñaa nachixü̃ane rü tá nachixexẽẽãxü̃ rü nadaiãcuãxü̃. Rü ngẽmaãcü taxuxü̃táma nawa íyaxügüxü̃ rü bai i duü̃xü̃gü rü bai i naxü̃nagü!
30 Rü ngẽmaca̱x i choma ya Cori ya Tupana rü cumaxã nüxü̃ chixu, Pa Yoaquíü̃, Pa Yudáanearü Ãẽ̱xgacüx, rü tagutáma wüxi i cune rü bai i wüxi i cutaxa ãẽ̱xgacü ya Dabíarü tochicaxü̃wa narüto nax Yudáanearü ãẽ̱xgacü yixĩxü̃ca̱x. Rü tá cuyu rü cuxune rü ngunecü rü üa̱xcüxetüwa tá nata̱x rü chütacü rü gáuanexü̃wa tá nata̱x.
31 Rü choma rü tá pexü̃ chapoxcue nagagu i ngẽma chixexü̃ i pexügüxü̃ i cuma rü cunegü rü cutaagü rü curü ngü̃xẽẽruü̃gü. Rü pexca̱x rü guxü̃ma i Yerucharéü̃arü duü̃xü̃güca̱x rü Yudáanearü duü̃xü̃güca̱x tá íchananguxẽxẽ i guxü̃ma i ngẽma poxcu i ãũcümaxü̃ ga pemaxã chaxueguxü̃, erü pema rü tama chauga pexĩnüe’ ” —ñanagürü.
32 Rü yexguma ga Yeremía rü to ga popera nayaxu. Rü Nería nane ga Barúxü̃ namu nax yemagu naxümatüaxü̃ca̱x ga yema ore ga nüxíraxü̃xü̃ ga popera ga ãẽ̱xgacü ga Yoaquíü̃ íguxü̃gu ümatüxü̃. Rü yema nüxíra naxümatüxü̃xü̃ narüma̱xmae, yerü muxü̃ma ga togü ga ore nanucu nawa ga yema popera.
