Jeremías 37:1-21
37 Rü Nabucudonochó ga Babiróniaanearü ãẽ̱xgacü rü nayangucuchixẽxẽ ga Chedequía ga Yochía nane nax Yudáanearü ãẽ̱xgacü yixĩxü̃ca̱x, nachicüxü ga Yeconía ga Yoaquíü̃ nane.
2 Natürü nüma ga Chedequía rü woo ga norü ngü̃xẽẽruü̃gü, rü woo ga duü̃xü̃gü rü tama naga naxĩnüe ga yema ore ga Cori ya Tupana Yeremíawa namaxã nüxü̃ ixuxü̃.
3 Rü nüma ga ãẽ̱xgacü ga Chedequía rü nanamu ga Cheremía nane ga Yucá rü chacherdóte ga Chofonía ga Maachía nane nax Yeremíaxü̃tawa naxĩxü̃ca̱x nax namaxã nüxü̃ yaxugüexü̃ca̱x: —¡Toxca̱x nayumüxẽ, Pa Yeremíax, nax Cori ya torü Tupana toxü̃ rüngü̃xẽẽxü̃ca̱x! —ñanagürü.
4 Rü yexguma ga Yeremía rü tauxta napoxcu, rü yemaca̱x nüxü̃́ natauxcha nax duü̃xü̃gütanüwa naxũxü̃.
5 Rü yoxni ga Equítuanearü ãẽ̱xgacüarü churaragü rü inaxĩãchi nax Babiróniaanearü churaragümaxã nügü nada̱i̱xü̃ca̱x. Rü yexguma yemaxü̃ nacuáchigagügu ga Babiróniaanearü churaragü ga Yerucharéü̃ca̱x íyaxüãchixü̃, rü nüxna nixĩgachi.
6 Rü yexguma ga Cori ya Tupana rü norü orearü uruxü̃ ga Yeremíamaxã nidexa rü ñanagürü nüxü̃:
7 —Ñaa nixĩ i chorü ore naxca̱x ya yima Yudáanearü ãẽ̱xgacü ya cuxü̃tawa namugücü i norü duü̃xü̃gü nax choxna yacagüxü̃ca̱x. Rü cumaxã nüxü̃ chixu rü ngẽma faraóü̃arü churaragü i marü ixĩãchichiréxü̃ nax pexü̃ yanangü̃xẽẽxü̃ca̱x, rü marü Equítuaneca̱x nawoegu.
8 Rü ngẽma Babiróniaanearü churaragü rü tá wenaxarü nawoegu nax Yerucharéü̃ca̱x íyaxü̃ãchixü̃ca̱x. Rü tá nagu nachocu rü tá nawa nanangixichigü.
9 Rü choma ya Cori ya Tupana rü pemaxã nüxü̃ chixu rü ñachagürü pexü̃: “¡Taxṹ i nagu perüxĩnüexü̃ nax aixcüma marü pexna nawoeguxü̃ i ngẽma Babiróniaanearü churaragü i Cadéugü! Erü wena táxarü pexca̱x nawoegu.
10 Rü woo marü nüxü̃ perüporamaegügu i ngẽma Cadéugüarü churaragü i pexca̱x íyaxüãchixü̃ rü ñuxrexicatama i norü churaragü i napíexü̃ íyaxügügu i norü pegüchicawa, rü ngẽmagü rü tá ínarüdagü rü tá nawa nanangixichigü ya daa ĩane ya Yerucharéü̃” —ñanagürü.
Yeremíaxü̃ napoxcugü
11 Rü yema Cadéugüarü churaragü rü nüxna nixĩgachi ga Yerucharéü̃, yerü nüxü̃ nacuáchigagü nax faraóü̃arü churaragü naxca̱x inaxĩãchixü̃.
12 Rü yexguma nixĩ ga nüma ga Yeremía rü nayoxniexü̃ nax Yerucharéü̃arü ĩanewa ínaxũxũxü̃ nax Bẽyamíü̃anewa naxũxü̃ca̱x nax yéma íyadauãxü̃ca̱x ga wüxi ga naane ga nüxna üxü̃.
13 Natürü yexguma Yerucharéü̃arü ĩã̱x ga Bẽyamíü̃gu ãégaxü̃wa nanguxgu, rü yéma nadauxü̃tae ga Iría ga Cheremía nane ga Ananíataxa. Rü nüma ga Iría rü yéma Yeremíaxü̃ nayachaxãchixẽxẽ, rü ñanagürü nüxü̃: —Cuma rü quiña nax natanüwa cuxüxü̃ca̱x i ngẽma torü uanügü i Babiróniaanecüã̱x —ñanagürü nüxü̃.
14 Rü Yeremía nanangãxü̃ga rü ñanagürü: —Aixcümaxü̃ chixu rü taxũtáma Babiróniaanecüã̱xtanüwa chaxũ —ñanagürü. Natürü ga Iría rü tama inaxĩnü rü Yeremíaxü̃ niyauxama rü ãẽ̱xgacügüpe̱xewa nanaga.
15 Rü nüma ga yema ãẽ̱xgacügü rü poraãcü Yeremíamaxã nanue. Rü norü churaragüxü̃ namu nax nacua̱i̱xgüãxü̃ca̱x. Rü ãẽ̱xgacüarü poperaarü ümatüruxü̃ ga Yonatáü̃patagu nanapoxcugü yerü guma ĩpata rü poxcupataxü̃ nayaxĩxẽẽgü.
16 Rü yemaacü ga Yeremía rü yema poxcuchica ga waixü̃mütüü̃wa yexmaxü̃gu nayata̱xcuchigü. Rü yemaacü muxü̃ma ga ngunexü̃ yéma nayexma.
17 Rü nüma ga ãẽ̱xgacü ga Chedequía rü norü churaragüxü̃ namu nax ãẽ̱xgacüpatawa Yeremíaxü̃ nagagüxü̃ca̱x. Rü yexguma Yeremía ãẽ̱xgacüpe̱xewa nagagüãgu, rü nüma ga ãẽ̱xgacü rü bexma Yeremíana naca rü ñanagürü: —¿Nangexmaxü̃ i to i ore i Cori ya Tupana cumaxã nüxü̃ yaxuxü̃? —ñanagürü. Rü nüma ga Yeremía rü nanangãxü̃ rü ñanagürü: —Ngü̃, ngẽmáacü nangẽxma. Rü Tupana rü ñanagürü: “Cumax, Pa Ãẽ̱xgacüx, rü naxme̱xgu tá cungu i ngẽma Babiróniaanearü ãẽ̱xgacü” —ñanagürü.
18 Rü ñu̱xũchi nüma ga Yeremía rü ãẽ̱xgacü ga Chedequíana naca rü ñanagürü: —¿Ta̱xacürü chixexü̃ cumaxã chaxü, Pa Ãẽ̱xgacüx, rü ta̱xacürü chixexü̃ namaxã chaxü i curü ngü̃xẽẽruü̃gü, rü ta̱xacürü chixexü̃ namaxã chaxü i ngẽma duü̃xü̃gü rü ngẽmaca̱x choxü̃ pepoxcuxü̃?
19 ¿Rü ngexü̃gü yixĩxü̃ i ñu̱xma ga yema orearü uruü̃gü ga cumaxã nüxü̃ ixugüexü̃ ga Babiróniaanearü ãẽ̱xgacü rü taxũtáma pexca̱x rü pechixü̃aneca̱x íyaxüãchixü̃?
20 ¡Rü irüxĩnü, Pa Ãẽ̱xgacüx, Pa Chorü Corix! Rü cuxü̃ chaca̱a̱xü̃ nax tama wena ngẽma poxcupataü̃wa choxü̃ cumuxü̃ca̱x nax tama ngẽxma chayuxü̃ca̱x —ñanagürü.
21 Rü yexguma ga ãẽ̱xgacü ga Chedequía rü norü churaragüxü̃ namu nax tama yema noxri nagu napoxcuxü̃ ga poxcupataü̃gu namugüãxü̃ca̱x. Rü yema ãẽ̱xgacüpataa̱xtüwa yexmaxü̃ ga poxcuchicaxü̃gu nayamugü. Rü yexguma guma ĩanewa taxũta nagu̱xgu ga paũ rü wüxichigü ga ngunexü̃gu rü yexwaca̱xü̃xü̃ ga paũ nüxna naxãgüxü̃. Rü yemaacü yema ãẽ̱xgacüpataa̱xtüwa yexmaxü̃ ga poxcuchicaxü̃gu nanamugü.
