Jeremías 39:1-18
39 Rü yexguma 9 ga taunecü marü ãẽ̱xgacü yixĩxgu ga Chedequía ga Yudáanewa, rü gumá taunecüarü 10 ga tauemacügü rü nüma ga Nabucudonochó rü norü churaragümaxã Yerucharéü̃ca̱x ínayaxüãchi rü nüxü̃ ínachomaeguãchi.
2 Rü yexguma 11 ga taunecü marü ãẽ̱xgacü yixĩxgu ga Chedequía rü meama norü ãgümücü ga tauemacüarü 9 ga ngunexü̃gu rü nayapoxnagü ga norü poxeguxü̃ ga guma ĩane rü yemaacü nachocu.
3 Rü yemaacü guxü̃ma ga yema Babiróniacüã̱xarü churaragüerugü rü nachocu rü yema ĩã̱x ga ngãxü̃wa üxü̃gu nügü ninu. Rü natanüwa nayexma ga Nerigá-charéche rü Chamgáx-nebú. Rü yéma nayexma ta ga Chachequíü̃ rü to ga Nerigá-charéche ga ãẽ̱xgacüarü ngü̃xẽẽruü̃erugü ixĩgüxü̃.
4 Rü yexguma nüma ga ãẽ̱xgacü ga Chedequía rü norü churaragü nüxü̃ daugügu ga yema ngupetüxü̃ rü nibuxmü nawa ga guma ĩane. Rü chütacü ínachoxü̃ nawa ga yema ãẽ̱xgacüpataarü putüranecüwa dapetüxü̃ ga nama. Rü yema ĩã̱x ga taxre ga naxtapü̱xarü ngãxü̃wa yexmaxü̃wa ínachoxü̃, rü nama ga natü ga Yudáü̃arü doxonexü̃wa nadaxü̃waama naxĩ.
5 Natürü nüma ga Babiróniacüã̱x rü Chedequíawe nangẽgü, rü Yericúarü metachinüanegu nayayauxgü. Rü Amáanewa yexmane ga ĩane ga Ribáwa nanagagü, yerü yéma nayexma ga ãẽ̱xgacü ga Nabucudonochó. Rü nüma ga Nabucudonochó rü yéma poxcu namaxã nanaxuegu ga Chedequía.
6 Rü ñu̱xũchi Chedequíape̱xegu tüxü̃ nadai ga nanegü rü guxü̃ma ga natanüxü̃ ga ãẽ̱xgacügü ixĩgüxü̃ ga Yudáanewa.
7 Rü yemawena rü nanamu nax Chedequíaxü̃ nacaxü̃xetügüxü̃ rü cadénamaxã yana̱i̱xgüãxü̃ Babiróniawa nagagüãxü̃.
8 Rü yoxni ga yema togü ga Babiróniacüã̱x ga churaragü rü nagu nanangixgü ga guma Yerucharéü̃ wüxigu namaxã ga guma ãẽ̱xgacüpata. Rü nagu napogüe ga naxtapü̱x ga guma Yerucharéü̃ poxeguxü̃.
9 Rü nüma ga yema churaragüeru ga Nabucharadáü̃, rü Babiróniawa nanagagü ga yema yéma yaxǘgüxü̃ ga duü̃xü̃gü, rü yema nawaama nügü ügüxẽẽxü̃.
10 Natürü guxü̃ma ga Yudáarü naanewa rü yéma tüxü̃ nawogü ga guxema ñuxre ga yexera ngearü diẽruã̱xgüxe. Rü tüxna nanaxãgü ga naanegü rü úbanecügü.
11 Rü nüma ga Babiróniaanearü ãẽ̱xgacü ga Nabucudonochó rü nanamu ga Nabucharadáü̃ ga naeru ga yema churaragü ga ãẽ̱xgacüna daugüxü̃, rü Yeremíachiga ñanagürü nüxü̃:
12 —¡Mea nüxna nadau i Yeremía rü taxṹ i chixri namaxã icucuáxü̃! ¡Rü nüxna naxã i guxü̃ma i cuxna naxca̱x naca̱xaxü̃! —ñanagürü.
13 39:13-14 Rü ñu̱xũchi nüma ga Nabucharadáü̃, rü wüxigu namaxã ga taxre ga ãẽ̱xgacügü ga poraexü̃ ga Nebuchabáü̃ rü Nerigá-charéche, rü guxü̃ma ga yema togü ga Nabucudonochóarü ãẽ̱xgacügümaxã nanamu nax Yeremíaxü̃ íyagaxüchigüxü̃ca̱x nawa ga yema poxcuchicaxü̃ ga Yudáanearü ãẽ̱xgacüpataa̱xtüwa yexmaxü̃. Rü Aicáü̃ nane ga Chapáü̃taxa ga Guedaríame̱xẽgu nanamu nax napatawa nagagüãxü̃ca̱x. Rü yemaacü ga Yeremía rü duü̃xü̃gütanüwa nayexma.
14 Nüü̃ nadau 39:13
15 Rü yexguma Yeremía taxũta ínguxuchigu nawa ga yema poxcuchicaxü̃ ga Yudáanearü ãẽ̱xgacüarü dauruü̃güpataa̱xtüwa yexmaxü̃, rü nüma ga Cori ya Tupana namaxã nidexa rü ñanagürü nüxü̃:
16 —Ngẽma Etiopíaanecüã̱x i Ébe-mérexü̃tawa naxũ rü ñanagürü nüxü̃: “Nüma ya Cori ya Tupana ya Guxãétüwa Ngẽxmacü rü ñanagürü: ‘Choma rü tá chayanguxẽxẽ ga yema poxcu ga daa ĩanemaxã chaxueguxü̃. Rü choma rü tá íchananguxẽxẽ i guxchaxü̃gü rü tama taãxẽ. Rü cuma rü tá nüxü̃ cudau i ngẽma tá chaxüxü̃
17 Natürü i choma rü tá cuxü̃ íchapoxü̃ nax tama naxme̱xgu cunguxü̃ca̱x i ngẽma duü̃xü̃gü i nüxü̃ cumuü̃xü̃.
18 Rü aixcüma tá cuxü̃ íchapoxü̃ nax tama cuxü̃ yamáxü̃ca̱x. Rü tá quiña rü tá cumaxü̃ erü choxü̃́ cuyaxõ. Rü choma ya Cori ya Tupana nixĩ i nüxü̃ chixuxü̃ i ngẽma, ñanagürü ga Tupana’ ” —ñanagürü.
