Jeremías 40:1-16
40 Rü nüma ga Babiróniaanecüã̱xarü churaragüeru ga Nabucharadáü̃ rü Ramágu nanangutaque̱xexẽxẽ ga yema Yerucharéü̃cüã̱xgü rü Yudáanecüã̱xgü ga Babiróniawa gagüchaü̃xü̃. Rü yematanügu Yeremíaxü̃ inayangau ga cadénamaxã ichotacü. Rü nüma ga Nabucharadáü̃ rü ínananguxuchixẽxẽ. Rü yemawena rü nüma ga Cori ya Tupana rü Yeremíamaxã nidexa.
2 Rü nüma ga churaragüeru rü nüxrüguma Yeremíamaxã nixũ, rü ñanagürü nüxü̃: —Nüma ya curü Cori ya Tupana rü marü ñaa perü naanewa nananguxẽxẽ i ñaa guxchaxü̃ ga marü pemaxã naxunagüxü̃.
3 Rü ñu̱xma rü marü ningu ga yema guxchaxü̃ ga namaxã pexü̃ naxãxũnexü̃. Erü ngẽma cutanüxü̃ rü Cori ya Tupanape̱xewa chixexü̃ naxügü, rü ngẽmaca̱x nixĩ i ngẽmaãcü pexü̃ nangupetüxü̃ erü tama naga pexĩnüe.
4 Dücax, ñu̱xmatatama íchayawẽ ya yimá cadéna ya namaxã quichotacü. Rü ngẽxguma cunaxwa̱xegu nax chowe curüxũxü̃ i Babiróniawa ¡rü ngĩxã rü chowe rüxũ! Rü choma rü tá cuxna chadau. Natürü ngẽxguma tama ngéma cuxũxchaü̃gu rü marü name i nuxã curüxã̱ũ̱x. Rü ñaa nixĩ i cuchixü̃ane, rü cuma i nüxü̃ cucuáxü̃ nax ngextá cuxca̱x namexü̃ nax cungexmaxü̃.
5 Rü ngẽxguma cunaxwa̱xegu nax nuxã cuchixü̃anegu curüxã́ũxü̃ ¡rü ẽcü Guedaría ya Aicáü̃ nane ya Chapáü̃taxaxü̃tawa naxũ! Rü yimáxü̃ nixĩ i naxunetaxü̃ ya Babiróniaanecüã̱xarü ãẽ̱xgacü nax Yudáanewa ngẽxmagüne ya ĩanegüarü ãẽ̱xgacü yixĩxü̃ca̱x. Rü name nixĩ nax yimáxü̃tawa cungexmaxü̃ namaxã i cutanüxü̃. ¡Rü ngextá cuma ícunaxwa̱xexü̃wa naxũ! —ñanagürü. Rü ñu̱xũchi nüma ga churaragüeru Yeremíana ãmare naxã, rü õnagü rü ta nüxna naxã, rü yemaacü nüxü̃ narümoxẽ.
6 Rü nüma ga Yeremía rü Aicáü̃ nane ga Guedaríamaxã Mispáwa naxũ. Rü yéma naxü̃tawa nayexma natanüwa ga yema duü̃xü̃gü ga yema nachixü̃anewa yaxǘgüxü̃.
Guedaríaxü̃ nima̱xgü
7 Rü yema Yudíugüarü churaragüarü ãẽ̱xgacügü rü norü churaragü ga ĩanearü düxétüwa ibuxmüxü̃ rü nüxü̃ naxĩnüe nax Babiróniaarü ãẽ̱xgacü rü Aicáü̃ nane ga Guedaríaxü̃ naxunetaxü̃ nax yema naanearü ãẽ̱xgacü yixĩxü̃ca̱x. Rü yexgumarüxü̃ ta nüxü̃ naxĩnüe nax Guedaríame̱xẽwa nanangexmagüxẽxẽ ga yema yatügü rü ngexü̃gü rü buxü̃gü rü yema duü̃xü̃gü ga yexera ngearü diẽruã̱xgüxü̃ ga tama Babiróniawa nagagüxü̃.
8 Rü nüma ga yema Yudíugüarü churaragüarü ãẽ̱xgacügü rü yexguma nüxü̃ nacua̱xgügu nax Guedaría yema naanearü ãẽ̱xgacü yixĩxü̃, rü norü churaragümaxã Mispáwa naxĩ nax íyadaugüãxü̃ca̱x. Rü natanüwa nayexmagü ga Netanía nane ga Ismaé, rü Caréa nanegü ga Yoanáü̃ rü Yonatáü̃, rü Tanúmex nane ga Cheraía, rü Netopácüã̱x ga Efái nanegü, rü Yechanía ga wüxi ga yatü ga Maacáxcüã̱x nane. Rü guxü̃ma ga yemagü wüxigu namaxã ga norü churaragü rü Guedaríaxü̃tawa ínayadaugü.
9 Rü nüma ga Guedaría rü Tupanaégagu namaxã nüxü̃ nixu rü ñanagürü nüxü̃: —¡Taxṹ i pemuü̃exü̃ nax ngẽma Babiróniaanecüã̱xme̱xẽwa pegü pengẽxmagüxẽẽxü̃! ¡Rü nua ñaa naanewa pemaxẽ rü Nabucudonochóme̱xẽwa pegü pengẽxmagüxẽxẽ! Rü mea tá pexü̃ nangupetü.
10 Rü choma rü nua Mispáwa tá changexma. Rü ngẽxguma nua naxĩxgu i ngẽma Cadéuanecüã̱xgü rü choma rü tá peétüwa chachogü. Rü name i pepatagu namaxã penguü̃ i perü bínu rü penetüarü ori̱xgü rü oribuarü chíxü̃. Rü ngẽmaãcü tá mea nawa pemaxẽ ya yima ĩanegü ya pexme̱xwa ngẽxmagüne —ñanagürü.
11 Rü yema Yudíugü ga Moáanewa, rü Amóü̃anewa, rü Edóü̃anewa rü yema togü ga naanegüwa yexmagüxü̃ rü nüxü̃ nacuáchigagü ga Babiróniaanearü ãẽ̱xgacü nax Iraéanewa yaxügüxẽẽãxü̃ ga ñuxre ga Yudíugü. Rü ñu̱xũchi nüxü̃ naxunetaxü̃ ga Guedaría ga Aicáü̃ nane ga Chapáü̃taxa nax norü ãẽ̱xgacü yixĩxü̃ca̱x ga yema yéma yaxügüxü̃.
12 Rü guxü̃ma ga yema duü̃xü̃gü ga togü ga nachixü̃anegügu woonexü̃ rü Yudáaneca̱x nawoegu rü Guedaríaxü̃tawa naxĩ ga Mispáwa. Rü nümagü rü ta rü napatagügu namaxã nanguü̃gü ga norü bínu rü yema muxü̃ma ga norü ori̱xgü.
Ismaé rü Guedaríaxü̃ nimáxchaü̃
13 Rü Caréa nane ga Yoanáü̃ rü guxü̃ma ga yema togü ga churaragüerugü ga naanegüwa yaxügüxü̃xü̃ rü Mispáwa naxĩ nax Guedaríaxü̃tawa íyadaugüxü̃ca̱x.
14 Rü ñanagürügü nüxü̃: —¿Tama ẽ̱xna nüxü̃ cucuáxü̃ nax Baalí ga Amóü̃cüã̱xarü ãẽ̱xgacü rü Netanía nane i Ismaéxü̃ namuxü̃ nax cuxü̃ yamáxü̃ca̱x? —ñanagürügü. Natürü ga Guedaría rü tama nüxü̃́ nayaxõ.
15 Rü ñu̱xũchi Caréa nane ga Yoanáü̃ rü bexma Guedaríaxü̃ ñanagürü: —¡Choxü̃ namu nax ngéma chaxũxü̃ca̱x rü Ismaéxü̃ chimáxü̃ca̱x! Rü taxúetama nüxü̃ tacua̱x nax texé yamáxü̃. ¿Rü tü̱xcüü̃ tá nüxü̃́ tanatauxchaxẽxẽ nax cuxü̃ yamáxü̃? Rü ngẽxguma cuxü̃ yama̱xgu rü wena tá nawoone i guxü̃ma i ngẽma duü̃xü̃gü i ñu̱xma cuxme̱xwa ngẽxmagüxü̃, rü yexera tá guxchaxü̃wa nangẽxmagü i ngẽma duü̃xü̃gü i ñu̱xma Yudáanewa yaxügüxü̃ —ñanagürü
16 Natürü Guedaría nanangãxü̃ rü ñanagürü: —¡Taxṹ i ngẽma cuxüxü̃! Ngẽma ore i Ismaéchiga nüxü̃ quixuxü̃ rü tama aixcüma nixĩ —ñanagürü.
