Jeremías 41:1-18
41 Norü 7 ga tauemacügu rü Netanía nane ga Ismaé rü Mispáwa naxũ nax Guedaríaxü̃ íyadauxü̃ca̱x. Rü nüma ga Ismaé rü Yudáanearü ãẽ̱xgacütanüxü̃ nixĩ rü norü o̱xi rü Erichamá nixĩ. Rü Ismaéxü̃ naxümücü ga 10 ga yatügü. Rü yexguma Mispáwa nayexmagu ga Ismaé rü namücügü, rü Guedaría nüxna naxu nax namaxã nachibüexü̃ca̱x.
2 Rü yexguma ínachibüeyane rü nüma ga Ismaé ga Netanía nane rü ngürüãchi wüxigu namücügümaxã inachigü rü taramaxã nayama̱xgü ga Guedaría ga Aicáü̃ nane ga Chapáü̃taxa ga Babiróniaanearü ãẽ̱xgacü nüxü̃ unetacü nax Yudáanearü ãẽ̱xgacü yixĩxü̃ca̱x.
3 Rü yexgumarüxü̃ ta ga Ismaé rü namücügü rü nanadai ga guxü̃ma ga yema Yudíugü rü Cadéugüarü churaragü ga yéma Mispáwa Guedaríaxü̃tawa yexmagüxü̃.
4 41:4-5 Rü yexguma Guedaríaxü̃ yama̱xgüguarü moxü̃ãcü, rü taxúetama nüxü̃ tacuáchiga ga yema ngupetüxü̃. Rü yema ngunexü̃gu rü Chiquéü̃wa rü Chilówa rü Chamáriawa ne naxĩ ga 80 ga yatügü. Rü nümagü rü marü nügü nidüxchinagugü, rü nügüchirugu nigáugügü rü poraãcü nügü nanapi̱xẽẽgü. Rü yéma nanana ga trigute̱xe rü pumarate̱xe nax Cori ya Tupanana naxãgüãxü̃ca̱x nawa ga guma Tupanapata ga Mispáwa yexmane.
5 Nüü̃ nadau 41:4
6 Rü nüma ga Ismaé rü Mispáwa ínaxũxũ nax nüxü̃ yangauxü̃ca̱x. Rü naxauxãcüma namawa naxũ. Rü yexguma yema yatügüxü̃ yangauxgu rü nüma ga Ismaé rü ñanagürü nüxü̃: —¡Ngĩxã ítayadaugü i Guedaría i Aicáü̃ nane! —ñanagürü.
7 Natürü yexguma meama ĩanearü ngãxü̃wa nangugügu, rü nüma ga Ismaé ga Netanía nane rü namücügümaxã nanadai ga yema yatügü ga Chiquéü̃wa rü Chilówa rü Chamáriawa ne ĩxü̃. Rü wüxi ga ãxmaxü̃gu nanawocu ga naxü̃negü.
8 Natürü yema 80 ga yatügütanüwa nayexma ga 10 ga yatügü ga Ismaéxü̃ ñagüxü̃: —¡Taxṹ i toxü̃ cuda̱i̱xü̃! Erü toma toxü̃́ nangẽxma i trigu rü chebáda rü chíxü̃ rü berure ga naanegu ticu̱xgüxü̃ —ñanagürügü. Rü yexguma ga Ismaé rü tama nanadai, naxrüxü̃ ga yema togü ga namücügü ga nada̱i̱xü̃rüxü̃.
9 Yema ãxmaxü̃gu nixĩ ga Ismaé yata̱xcuchiãxü̃ ga Guedaríaxü̃ne rü naxü̃negü ga guxü̃ma ga yema togü ga yatügü ga nada̱i̱xü̃. Rü yema ãxmaxü̃ nixĩ ga Yudáanearü ãẽ̱xgacü ga Achá üxü̃ ga yexguma nügü ínapoxü̃gu naxcha̱xwa ga Iraéanearü ãẽ̱xgacü ga Baachá. Rü yema ãxmaxü̃ rü nataxüchi, natürü namaxã naxããcu ga naxü̃negü ga yema yatügü ga Ismaé daixü̃.
10 Rü naétü, rü nüma ga Ismaé rü ínanayauxü̃ ga ãẽ̱xgacüxacügü rü yema togü ga duü̃xü̃gü ga Mispáwa yaxügüxü̃ ga Guedaríame̱xẽwa yexmagüxü̃. Yerü Nabucharadáü̃ ga Babiróniaanearü churaragüarü ãẽ̱xgacü rü Guedaríame̱xẽwa nanayexmagüxẽxẽ ga yema duü̃xü̃gü. Rü nüma ga Ismaé ínanayauxü̃ ga guxü̃ma ga yema duü̃xü̃gü rü ñu̱xũchi namaxã inaxũãchi nax Amóü̃anewaama namaxã naxũxü̃ca̱x.
11 41:11-12 Rü yexguma Caréa nane ga Yoanáü̃ rü yema togü ga churaragüerugü ga namaxã yexmagüxü̃ nüxü̃ cua̱xgügu ga yema chixexü̃ ga Ismaé üxü̃, rü nananutaque̱xe ga norü churaragü rü inaxĩãchi nax Ismaémaxã nügü nada̱i̱xü̃ca̱x. Rü yema taxü̃ ga puchu ga Gabaóü̃wa yexmaxü̃xü̃tagu nüxü̃ inayangaugü.
12 Nüü̃ nadau 41:11
13 Rü yexguma yema duü̃xü̃gü ga Ismaé igagüxü̃ nüxü̃ daugügu ga Yoanáü̃ rü guxü̃ma ga yema togü ga churaragüerugü ga naxümücügüxü̃, rü poraãcü nataãẽgü.
14 Rü Caréa nane ga Yoanáü̃ca̱x nibuxmü nax natanüwa naxügüxü̃ca̱x.
15 Natürü Ismaé rü 8 ga norü duü̃xü̃gü rü Yoanáü̃cha̱xwa nibuxmü rü Amóü̃anewaama naxĩ.
Yoanáü̃ rü Equítuaneca̱x nibuxmü
16 Rü nüma ga Caréa nane ga Yoanáü̃ rü namücügü ga churaragüerugü, rü namaxã inacua̱xgü ga yema duü̃xü̃gü ga Ismaé Mispáwa igagüxü̃ nawena nax Guedaríaxü̃ yamáxü̃. Rü yema Ismaé igagüxü̃tanüwa nayexma ga yatügü ga churaragü, rü ngexü̃gü, rü buxü̃gü, rü ãẽ̱xgacüarü ngü̃xẽẽruü̃gü. Rü nüma ga Yoanáü̃ rü namücügü rü Gabaóü̃na nawoegu namaxã ga yema duü̃xü̃gü ga Ismaé Gabaóü̃wa nüxna iñaxü̃.
17 41:17-18 Rü guma ĩanexacü ga Yerúx-quimáü̃ ga Beréü̃arü ngaicamana yexmanewa nayachaxãchitanü. Rü nagu narüxĩnüe nax Equítuanewaama naxĩxü̃. Yerü namuü̃e nagagu nax Ismaé marü yamáxü̃ ga Guedaría ga Babiróniaarü ãẽ̱xgacü nüxü̃ unetacü nax Yudáanemaxã inacuáxü̃ca̱x.
18 Nüü̃ nadau 41:17
