Jeremías 42:1-22
42 42:1-2 Rü guxü̃ma ga yema churaragüerugü wüxigu Caréa nane ga Yoanáü̃maxã rü Ochaía nane ga Acharíamaxã rü guxü̃ma ga duü̃xü̃gü ga iyaxü̃maxã rü ibuxü̃maxã Tupanaarü orearü uruxü̃ ga Yeremíaxü̃tawa naxĩ. Rü ñanagürügü nüxü̃: —Tanaxwa̱xe i toxü̃ cungãxü̃ i ngẽma tá naxca̱x cuxna tacaxü̃. ¡Rü taxṹ i nüxü̃ cuxoxü̃ nax toxü̃ cungãxü̃xü̃! Rü toma i noxretama ítayaxügüxü̃, rü tanaxwa̱xe nax toxca̱x curü Cori ya Tupanana cuca. Rü noxri rü tamu natürü i ñu̱xma rü noxretama tixĩgü nax ítayaxügüxü̃ ngẽma toxü̃ cudauxü̃rüxü̃.
2 Nüü̃ nadau 42:1
3 Rü tanaxwa̱xe i curü Cori ya Tupanana cuca nax toxü̃ nawéaxü̃ca̱x i ngẽma nama i mexü̃ nax nagu taxĩxü̃ rü ta̱xacü nixĩ i mexü̃ nax tanaxüxü̃ —ñanagürügü.
4 Rü Yeremía nanangãxü̃ rü ñanagürü: —Marü name. Choma rü tá pexca̱x tórü Cori ya Tupanana chaca rü namaxã tá nüxü̃ chixu i ngẽma choxna naxca̱x pecaxü̃. Rü tá pemaxã nüxü̃ chixu i guxü̃ma i ngẽma chomaxã nüxü̃ yaxuxü̃. Rü taxũtáma ta̱xacü pexcha̱xwa ichicu̱x —ñanagürü.
5 Rü nümagü rü Yeremíaxü̃ nangãxü̃gü rü ñanagürügü: —Curü Cori ya Tupana rü aixcüma toxü̃ nadau rü name nax toxü̃ napoxcuexü̃ ega tama tayangu̱xgu i ngẽma nüma cumaxã nüxü̃ yaxuxü̃ nax cuxí tomaxã nüxü̃ quixuxü̃ca̱x.
6 Rü woo namaxã tataãẽgügu rüe̱xna woo tama namaxã tataãẽgügu i ngẽma norü ngãxü̃, rü aixcüma tá naga taxĩnüe ya Cori ya tórü Tupana ya yimá ñu̱xma nüxna cuxü̃ taca̱xẽẽcü nax cumaxã nüxü̃ yaxuxü̃ca̱x i ngẽma nüma nanaxwa̱xexü̃ nax ngẽmaãcü mea tomaxã nangupetüxü̃ca̱x —ñanagürügü.
Tupana nüxü̃ nangãxü̃ i Yeremíaarü yumüxẽ
7 Rü 10 ga ngunexü̃guwena rü nüma ga Cori ya Tupana rü Yeremíamaxã nidexa.
8 Rü nüma ga Yeremía rü naxca̱x nangema ga Caréa nane ga Yoanáü̃, rü yema churaragüerugü ga íyaxümücügüxü̃, rü guxü̃ma ga yema duü̃xü̃gü ga ibuxü̃ rü ñu̱xmata yema iyaxü̃wa nangu.
9 Rü ñanagürü nüxü̃: —Nüma ya Cori ya Iraétanüxü̃arü Tupana ya pema choxna naxca̱x pecacü nax namaxã nüxü̃ chixuxü̃ca̱x i ngẽma pema penaxwa̱xexü̃ rü ñanagürü:
10 “Ngẽxguma chi penaxwa̱xegu nax ñaa naanewa pengẽxmagüxü̃ rü tá pexü̃ charüngü̃xẽxẽxü̃ nax mea pexü̃ nangupetüxü̃ca̱x. Rü taxũtáma pexü̃ chadai. Rü ñaa naanewa tá mea pexü̃ changexmagüxẽxẽ rü taxũtáma nawa pexü̃ íchawoxü̃, erü poraãcü choxü̃́ nangu̱x nax pexca̱x íchananguxẽxẽxü̃ i ngẽma poxcu i ñu̱xma nawa pengẽxmagüxü̃.
11 ¡Rü taxṹ i nüxü̃ pemuü̃exü̃ i Babiróniaanearü ãẽ̱xgacü i ñu̱xma poraãcü nüxü̃ pemuü̃exü̃! ¡Rü taxṹ i nüxü̃ pemuü̃exü̃ erü choma rü petanüwa changexma nax peétüwa chachogüxü̃ca̱x rü naxme̱xwa pexü̃ íchanguxü̃xẽxẽxü̃ca̱x! Rü choma ya Cori ya Tupana nixĩ i nüxü̃ chixuxü̃ i ngẽma.
12 Rü tá choxü̃́ pengechaxü̃tümüxü̃gü rü naãẽwa tá chananguxẽxẽ i Babiróniaanearü ãẽ̱xgacü nax nüma rü ta nüxü̃́ pengechaü̃tümüxü̃güxü̃. Rü tá pexü̃́ chanatauxchaxẽxẽ nax perü naaneca̱x pewoeguxü̃ca̱x.
13 Natürü ngẽxguma chi tama ñaa nachixü̃anewa pengẽxmagüchaü̃gu, rü tama chauga pexĩnüechaü̃gu i choma nax perü Cori ya Tupana chixĩxü̃ rü ngẽxguma chi ñapegügügu:
14 ‘Narümemae nax Equítuanewa tayamaxẽxü̃, erü ngéma rü taxũtáma nüxü̃ tadaugü i dai, rü taxũtáma nüxü̃ taxĩnüe i cornétaga i daica̱x taxca̱x ngẽmaxü̃, rü taxũtáma taiyamaxã tayuexü̃’, ñapegügügu,
15 42:15-16 rü pema ya Yudáanewa yaxügüxe ¡rü iperüxĩnüe i ñaa chorü ore i choma ya Cori ya Iraétanüxü̃arü Tupana ya Guxãétüwa Ngẽxmaxe pemaxã nüxü̃ chixuxü̃! Rü ñachagürü pexü̃: ‘Ngẽxguma Equítuanewa pexĩchaü̃gu nax ngéma pemaxẽxü̃ca̱x, rü tá pexca̱x ínangugü i dai rü ngẽma taiya i nüxü̃ pemuü̃exü̃. Rü ngẽxma tá peyue’.
16 Nüü̃ nadau 42:15
17 Rü aixcüma pemaxã nüxü̃ chixu rü guxãma i pema i Equítuanewa pexĩchaü̃xü̃ rü ngéma daimaxã rü taiyamaxã rü da̱xaweanemaxã tá peyue. Rü taxúema tá na̱xcha̱xwa tiña i ngẽma poxcu i tá pexca̱x íchanguxẽẽxü̃.
18 Erü choma ya Cori ya Guxãétüwa Changexmaxẽ ya Iraétanüxü̃arü Tupana rü ñachagürü: ‘Rü yexgumarüxü̃ ga yema Yerucharéü̃cüã̱xmaxã nax chanuxü̃, rü ngẽxgumarüxü̃ tá ta pemaxã chanu ega Equítuanewa pexĩxgu. Rü ngẽxguma ngẽma poxcu i pemaxã chaxueguxü̃ pexca̱x ínguxgu, rü pema rü wüxi i cua̱xruxü̃ tá pixĩ naxca̱x i ngẽma togü i duü̃xü̃gü rü tá pemaxã naba̱i̱xãchie. Rü pema rü taxũtáma wena ñaa nachicaca̱x pewoegu, ñachagürü pexü̃’ ” —ñanagürü.
19 Rü nüma ga Yeremía rü ñanagürü: —Ngẽma nixĩ i Cori ya Tupanaarü ore pexca̱x i pema ya Yudáanewa yaxügüxe. Rü nüma rü ñanagürü pexü̃: “¡Taxṹ i Equítuanewa pexĩxü̃! ¡Rü mea nagu perüxĩnüe i ngẽma pemaxã nüxü̃ chixuxü̃ i ñu̱xmax!” ñanagürü.
20 “Rü pema rü poraãcü ípetüe i ngẽxguma choxü̃ pemugügu nax Cori ya Tupanana chacaxü̃ i norü ucu̱xẽ. Rü pema rü ñapegürügü choxü̃: ‘¡Cori ya tórü Tupanamaxã toétüwa idexa, rü ñu̱xũchi tomaxã nüxü̃ ixu i ngẽma toxca̱x cumaxã nüxü̃ yaxuxü̃ nax toma rü tanaxüxü̃ca̱x i ngẽma!’ ñaperügügü choxü̃.
21 Rü choma rü ñoma i ngunexü̃ pexü̃ nüxü̃ chacua̱xẽxẽ i ngẽma Cori ya perü Tupana chomaxã nüxü̃ ixuxü̃ nax choma pemaxã nüxü̃ chixuxü̃ca̱x i ngẽma. Natürü i pema rü tama naga pexĩnüechaü̃.
22 Rü dücax, ngẽmaca̱x daigu rü taiyamaxã rü da̱xaweanemaxã tá peyue nagu i ngẽma nachixü̃ane i nawa pexĩchaü̃xü̃ nax ngéma pemaxẽxü̃ca̱x” —ñanagürü.
