Jeremías 43:1-13
43 43:1-2 Rü yexguma Yeremía igúegagu nax duü̃xü̃gümaxã nüxü̃ yaxuxü̃ ga yema ore ga Cori ya norü Tupana namaxã nüxü̃ ixuxü̃ nax nüxí duü̃xü̃gümaxã nüxü̃ yaxuxü̃ca̱x, rü Ochaía nane ga Acharía rü Caréa nane ga Yoanáü̃ rü togü ga yatügü ga taxúega ĩnüechaü̃xü̃ rü Yeremíaxü̃ ñanagürügü: —Ngẽma cuma tomaxã nüxü̃ quixuxü̃ rü doramare nixĩ. Rü nüma ya Cori ya tórü Tupana rü tama cuxü̃ namu nax tomaxã nüxü̃ quixuxü̃ nax tama Equítuanewa taxĩxü̃ca̱x nax ngéma tamaxẽxü̃ca̱x.
2 Nüü̃ nadau 43:1
3 Rü Nería nane i Barúx nixĩ i cuxü̃ ucu̱xẽxü̃ nax chixexü̃gu toxü̃ cuyixẽẽxü̃ca̱x rü ngẽmaãcü Cadéugüme̱xẽgu tayixü̃ca̱x rü toxü̃ nada̱i̱xü̃ca̱x rüe̱xna Babiróniawa toxü̃ nagagüxü̃ca̱x —ñanagürügü.
4 Rü yemaacü ga Caréa nane ga Yoanáü̃, rü yema churaragüerugü, rü yema duü̃xü̃gü, rü tama Yudáanewa nayexmagüchaü̃. Rü yemaacü tama Tupanaga naxĩnüe.
5 Rü yemaca̱x ga Caréa nane ga Yoanáü̃ rü guxü̃ma ga yema togü ga churaragüerugü rü nanangutaque̱xexẽxẽ ga yema noxretama ga duü̃xü̃gü ga Yudáanewa yaxügüxü̃ nawena nax togü ga nachixü̃anegügu nawoonexü̃ rü Yudáaneca̱x woeguxü̃ nax yéma namaxẽxü̃ca̱x.
6 43:6-7 Rü yemaacü nayagagü ga yema yatügü, rü ngexü̃gü, rü buxü̃gü, rü ãẽ̱xgacüxacügü, rü guxü̃ma ga yema togü ga duü̃xü̃gü ga Nabucharadáü̃ ga Babiróniaanearü churaragüarü ãẽ̱xgacü rü Guedaríame̱xẽwa yexmagüxẽẽxü̃. Rü yematanüwa nayexma ga Yeremía rü Barúx rü ta. Rü guxü̃ma ga yema duü̃xü̃gü rü Equítuanewa naxĩ rü ĩane ga Tafnéxwa nangugü, yerü tama Tupanaga naxĩnüe.
7 Nüü̃ nadau 43:6
8 Rü yéma Tafnéxwa rü Cori ya Tupana rü Yeremíamaxã nidexa rü ñanagürü nüxü̃:
9 —¡Nayaxu ya ñuxre ya nutagü ya tacü rü nape̱xewa i ngẽma duü̃xü̃gü i Yudáanecüã̱xgü rü inata̱xgü nagu i naa̱xtü i Equítuanearü ãẽ̱xgacüpatape̱xe i Tafnéxwa ngẽxmaxü̃!
10 ¡Rü namaxã nüxü̃ ixu i duü̃xü̃gü rü ñacurügü tá nüxü̃! “Nüma ya Cori ya Guxãétüwa Ngẽxmacü ya Iraétanüxü̃arü Tupana rü ñanagürü: ‘Nua tá chanamu i chorü ngü̃xẽẽruxü̃ i Babiróniaanearü ãẽ̱xgacü i Nabucudonochó. Rü choma rü daa nutagü ya nuxã chata̱xgücüétügu tá chanaxǘ i ngẽma Babiróniacüã̱xarü ãẽ̱xgacüarü tochicaxü̃. Rü daa nutagüétügu tá chayatexechi ya napata.
11 Rü nüma i Babiróniaanearü ãẽ̱xgacü rü tá Equítuanewa naxũ rü naxca̱x ínayagoõchi. Rü yíxema marü tümamaxã naxuegugüxe nax tayuexü̃, rü tá tayue. Rü yíxema marü tümamaxã naxuegugüxe nax ítawoxü̃xü̃ i ngẽma nachixü̃anewa rü tá ítawoxü̃. Rü yíxema marü tümamaxã naxuegugüxe nax daigu tayuexü̃, rü daigu tá tayue.
12 Rü nüma rü tá nawa nanangixichi ya napatagü ya Equítuanearü tupananetachicüna̱xãgü. Rü nawa tá nanangixichi i ngẽma tupananetachicü̃na̱xãgü rü togü rü tá nayana ñoma duü̃xü̃gü ígagügurüxü̃. Rü tá inayanaxoxẽxẽ i Equítuanearü chixexü̃ ñoma wüxi i carnéruarü dauruxü̃ rü carnéruchi naxchiruwa ibixü̃xü̃rüxü̃. Rü ngẽmawena rü tá ínixũ rü taxúetama ítayachaxãchixẽxẽ’ ” —ñanagürü.
13 Rü tá nagu napogü i Equítuanearü tupananeta i Bex-cheméchicüna̱xãgü. Rü tá nawa nanangixichi ya napatagü ya Equítuanearü tupananetagü, ñanagürü ya Cori ya Tupana.
