Jeremías 44:1-30
44 Ñaa nixĩ i Tupanaarü ore ga Yeremíamaxã nüxü̃ yaxuxü̃ naxca̱x ga guxü̃ma ga yema Yudíugü ga Equítuanewa yexmagüxü̃ ga ĩanegü ga Midóxwa, rü Tafnéxwa, rü Ménfiwa, rü ñu̱xũchi yema Yudíugü ga Equítuanearü súrwa yexmagüxü̃.
2 Rü nüma ya Cori ya Iraétanüxü̃arü Tupana ya Guxü̃étüwa Ngẽxmacü rü ñanagürü: —Pema rü marü nüxü̃ pedaugü ga yema taxü̃ ga guxchaxü̃gü ga Yerucharéü̃ca̱x rü yema togü ga Yudáanearü ĩanegüca̱x íchanguxẽẽxü̃. Rü ñu̱xma rü nachitaxü̃xicatama ínayaxügü, rü taxúema nawa tamaxẽ.
3 Rü yemaacü nüxü̃ nangupetü ga yema duü̃xü̃gü nagagu ga norü chixexü̃gü. Nümagü rü choxü̃ nanuxẽẽgü yerü nüxü̃ nicua̱xüü̃gü ga yema tupananetagü rü pumarate̱xe naxca̱x ínagu ga yema tupananetagü ga noxri taguma nüxü̃ nacua̱xgüxü̃ rü woo norü o̱xigü rü ta taguma nüxü̃ cua̱xgüxü̃.
4 Rü muẽ̱xpü̱xcüna petanüwa chanamu ga chorü orearü uruü̃gü nax pemaxã nüxü̃ yaxugüexü̃ca̱x nax tama penaxügüxü̃ca̱x ga yema chixexü̃gü i ãũãchixü̃gü i poraãcü naxchi chaxaixü̃.
5 Natürü ga pema rü tama chauga pexĩnüe rü tama penaxü ga yema pemaxã nüxü̃ chixuxü̃. Rü tama nüxü̃ perüxoe ga yema pecüma ga chixexü̃. Rü pumarate̱xe naxca̱x piguama ga yema tupananetagü.
6 Rü yemaacü choxü̃ penuxẽxẽ rü yemaca̱x chorü numaxã poraãcü chanapoxcu ga guma Yudáanearü ĩanegü rü Yerucharéü̃. Rü guma ĩanegü rü ñu̱xma rü ta nachitaxü̃xicatama ínayaxü, rü taxúema nawa tamaxẽ.
7 Rü ngẽmaca̱x i choma ya Cori ya Guxãétüwa Ngẽxmaxe ya Iraétanüxü̃arü Tupana rü ñachagürü: “¿Tü̱xcüü̃ pegüca̱x ípenangu̱xẽxẽgüchaü̃ i ngẽma poxcu i taxüchixü̃? ¿Rü tü̱xcüü̃ penaxwa̱xe nax penayuexẽẽxü̃ i guxü̃ma i ngẽma Yudátanüxü̃ i yatüxü̃gü rü ngexü̃gü rü buxü̃gü rü õxchanagü nax ngẽmaãcü taxúema íyaxüxü̃?
8 ¿Rü tü̱xcüü̃ choxü̃ penuxẽxẽ namaxã i ngẽma chixexü̃ i pexügüxü̃ rü ngẽma nax pumarate̱xe naxca̱x pigugüxü̃ i norü tupananetagü i Equítuane i nawa pengugüxü̃ nax nua pemaxẽxü̃ca̱x? Rü ngẽma chixexü̃ i pexügüxü̃gagu rü pematama naxca̱x pedaugü i perü poxcu. Rü ngẽmaãcü wüxi i cua̱xruxü̃ tá pixĩgü naxca̱x i guxü̃ma i ngẽma togü i nachixü̃anegü i ñoma i naanewa ngẽxmagüxü̃. Rü tá chixexü̃maxã pexü̃ narüdaunü rü tá pexü̃ nacugüe.
9 ¿Ẽ̱xna marü nüxü̃ perüngümae ga guxü̃ma ga yema chixexü̃gü ga perü o̱xigü ügüxü̃, rü ngẽma chixexü̃gü ga Yudáanearü ãẽ̱xgacügü rü naxma̱xgü ügüxü̃, rü ngẽma chixexü̃gü ga pematama rü pexma̱xgü ügüxü̃ i Yudáanewa rü Yerucharéü̃arü namagüwa?
10 Rü pema rü ñu̱xma rü ta tama nüxü̃ perüxoe i pecümagü i chixexü̃gü, rü tama choxü̃ pemuü̃e, rü tama naga pexĩnüe i chorü ucu̱xẽgü rü mugü ga pemaxã rü perü o̱xigümaxã nüxü̃ chixuxü̃.
11 Rü ngẽmaca̱x i choma ya Cori ya Guxãétüwa Ngẽxmaxe ya perü Tupana i pema i Iraétanüxü̃, rü ñachagürü pexü̃: ‘Marü pemaxã chanaxuegu rü marü íchame nax pexca̱x íchananguxẽxẽxü̃ i poxcu, nax ngẽmaãcü pexü̃ ichayarüxoxẽxẽxü̃ca̱x ya guxãma i pema ya íyaxügüxe ya Yudátanüxü̃.
12 Rü guxãma i pema i Yudátanüxü̃ i íyaxügüxe i Equítuanewa ĩxchaü̃xe nax ngéma pemaxẽxü̃ca̱x rü ngẽxma pexãchiü̃xü̃ca̱x rü tá pexü̃ ichayarüxoxẽxẽ. Rü guxãma i pema rü woo ngẽma buxü̃gü rü ñu̱xmata ngẽma iyaexü̃wa nangu, rü tá peyue nagu i ngẽma dai rü taiya. Rü ngẽmaãcü wüxi i cua̱xruxü̃ tá pixĩgü naxca̱x i ngẽma togü i nachixü̃anegü. Rü tá chixexü̃maxã pexü̃ narüdaunü, rü tá pexü̃ nacugüe, rü tá pexü̃ naxo.
13 Rü tá pexü̃ chapoxcue i pemax nax Equítuanewa pemaxẽxü̃ yexgumarüxü̃ nax Yerucharéü̃cüã̱xgü chapoxcuexü̃rüxü̃ namaxã ga dai, rü taiya, rü da̱xaweane.
14 Rü yíxema noxretama i pema i Yudátanüxü̃ i íyaxügüxe ga Equítuanewa ĩxẽ nax ngéma pemaxẽxü̃ca̱x rü bai tá texé tiña erü guxãtáma tayue. Rü woo texé tanaxwa̱xe nax Yudáaneca̱x tawoeguxü̃ nax ngẽxma tayaxãchiü̃xü̃ca̱x rü taxũtáma tawoegu. Rü yíxema noxretama ya tüxü̃ yagagümarexexicatama tá tawoegu’ ” —ñanagürü ga Yeremía.
15 Rü yema yatügü ga nüxü̃ cua̱xgüxü̃ nax naxma̱xgü pumarate̱xe yagugüxü̃ naxca̱x ga yema tupananetagü, rü yema ngexü̃gü ga yéma yexmagüxü̃ rü wüxitücumü ga muxü̃ma nixĩ. Rü naétü nayexmagü ga yema Yudíugü ga Equítuanearü súrwa maxẽxü̃. Rü guxü̃ma ga yema duü̃xü̃gü rü Yeremíaxü̃ nangãxü̃gü rü ñanagürügü:
16 —Taxũtáma naga taxĩnüe i ngẽma Tupanaarü ore i tomaxã nüxü̃ quixuxü̃.
17 Rü toma rü tá tanaxüama i ngẽma toma nagu tarüxĩnüexü̃ nax tanaxüxü̃. Rü torü tupana i “Dauxü̃guxü̃ i Naanearü Ãẽ̱xgacümaxã”, inaxugücü rü ngĩxca̱x tá tayagu i pumarate̱xe rü ngĩxna tá tanaxã ya bínu. Rü ngẽma ñu̱xma taxüxü̃ rü guxü̃gutáma tanaxü naxrüxü̃ ga yema torü o̱xigü, rü torü ãẽ̱xgacügü, rü Yudáanearü ĩanegüarü ãẽ̱xgacügü, rü yema Yerucharéü̃cüã̱xgü. Yerü ü̃pa rü toxü̃́ nayexma ga muxü̃ma ga õna, rü mea toxü̃ nangupetü rü taxuxü̃ma ga guxchaxü̃ toxca̱x ínangu.
18 Natürü yexguma ítayachaxãchigu nax ngĩxca̱x tayaguxü̃ ga pumarate̱xe rü ngĩxna tanaxãxü̃ ga bínu ga “Dauxü̃guxü̃ i Naanearü Ãẽ̱xgacümaxã”, inaxugücü rü guxü̃ma toxü̃́ nataxu. Rü torü duü̃xü̃gü rü taiyamaxã nayue rü daigu nayue —ñanagürügü.
19 Rü yema ngexü̃gü rü nanaxüétügü ga yema dexa rü ñanagürügü ta: —Toma ga yexguma rü tanaxü ga torü paũ ga maicuraxü̃ ga nawa yexmaxü̃ ga naxchicüna̱xã ga “Dauxü̃guxü̃ i Naanearü Ãẽ̱xgacümaxã”, inaxugücü rü ngĩxca̱x tayagu ga pumarate̱xe rü ngĩxna tanaxãmare ga bínu. Rü guxü̃ma ga yema nax taxügüxü̃ rü totegüarü mu nixĩ. Rü ngẽma i ñu̱xma taxügüxü̃ rü guxü̃gutáma tanaxügüecha —ñanagürügü.
20 Rü yexguma nüma ga Yeremía rü nanangãxü̃ ga guxü̃ma ga yema iyatüxü̃ rü yema ngexü̃gü ga yemaacü nangaxü̃güxü̃. Rü ñanagürü:
21 —¿Ẽ̱xna pema nagu perüxĩnüegu rü nüma ya Cori ya Tupana tama nüxü̃ nacuáx, rüe̱xna nüxü̃ yanangümaxü̃ ga yema pemax, rü perü o̱xigü, rü perü ãẽ̱xgacügü, rü norü ngü̃xẽẽruü̃gü, rü guxü̃ma ga yema duü̃xü̃gü ügüxü̃ ga yexguma yema tupananetagüca̱x pumarate̱xe pigugügu nawa ga Yudáanearü ĩanegü, rü Yerucharéü̃arü namagüwa?
22 Natürü nüma ga Cori rü marü tama yáxna namaxã naxĩnü ga yema chixexü̃ ga pexügüxü̃ ga nüma poraãcü naxchi naxaixü̃. Rü yemaca̱x ga pechixü̃ane rü ñu̱xma rü nachitaxü̃xicatama ínayaxü, rü taxúema nawa tamaxẽ. Rü ngẽmaãcü i ñu̱xma rü pechixü̃ane rü chixexü̃arü cua̱xruxü̃ nixĩ rü duü̃xü̃gü rü poraãcü namuü̃e i ngẽxguma nüxü̃ nadaugügu ga yema pechixü̃anemaxã ngupetüxü̃.
23 Rü ngẽma guxchaxü̃ i ñu̱xma nawa pengẽxmagüxü̃ rü marü pexca̱x ínangu nagagu nax yema tupananetagüca̱x pumarate̱xe pegugüxü̃. Rü yemaacü Cori ya Tupanape̱xewa poraãcü chixexü̃ pexü yerü tama naga pexĩnüe ga norü ucu̱xẽgü rü norü mugü, rü tama peyangu̱xẽxẽ ga yema pemaxã nüxü̃ yaxuxü̃ —ñanagürü.
24 Rü nüma ga Yeremía rü wenaxarü guxü̃ma ga yema duü̃xü̃gümaxã nidexa, rü yexera yema ngexü̃gümaxã nüxü̃ nixu, rü ñanagürü: —Pa Guxãma i Pema i Yudátanüxü̃ nax Equítuanewa Pemaxẽxü̃x, ¡rü iperüxĩnüe i ñaa Tupanaarü ore!
25 Rü nüma ya Cori ya Guxãétüwa Ngẽxmacü ya Iraétanüxü̃arü Tupana rü ñanagürü: “Pemax, Pa Yatügüx rü Ngexü̃güx, rü nüxü̃ pixu nax ngĩxca̱x tá peyaguxü̃ i pumarate̱xe rü ngĩxna tá penaxãxü̃ ya bínu i perü tupananeta i ‘Dauxü̃guxü̃ i Naanearü Ãẽ̱xgacümaxã’, inaxugücü. Rü nüxü̃ pixu nax aixcüma tá peyanguxẽxẽxü̃ i ngẽma. ¡Marü name, mea peyanguxẽxẽ i ngẽma nüxü̃ pixuxü̃!
26 ¡Natürü, iperüxĩnüe i guxãma i pemax i Yudátanüxü̃ i ñu̱xma Equítuanewa pemaxẽxü̃! Rü choma ya Cori ya Tupana rü ñachagürü pexü̃: ‘Choma rü chauéga i üünexü̃maxã pemaxã chanaxuegu rü guxü̃ma i Equítuanewa rü tama chanaxwa̱xe nax texé i Yudátanüxü̃ chauéga tanaxuxuchixü̃ rü ñatarügü: Cori ya Tupanaégagu cumaxã ichaxuneta, ñatarügü.
27 Erü choma rü marü íchame nax pexca̱x íchananguxẽẽxü̃ i taxü̃ i guxchaxü̃gü, rü tama i ta̱xacürü mexü̃gü. Rü guxü̃ma i Yudátanüxü̃ i ñu̱xma Equítuanewa maxẽxü̃ rü aixcüma tá nayue nagu i dai rüe̱xna nagu i taiya, rü ngẽmaãcü tá nagu̱x i guxü̃ma.
28 Rü noxre tátama tixĩ ya yíxema naétüwa maxẽxe i ngẽma dai rü ñu̱xũchi woeguxe nüxna i Equítuane nax wena Yudáanewa taxĩxü̃ca̱x. Rü guxü̃ma ga yema duü̃xü̃gü ga Yudáanewa íyaxügüxü̃ rü Equítuanewa ĩxü̃ nax ngéma namaxẽxü̃ca̱x, rü tá nüxü̃ nadaugü nax texéarü ore tá aixcüma inguxü̃, choxrü ore, rüe̱xna ngẽma duü̃xü̃güarü̃ ore.
29 Rü choma ya Cori ya Tupana rü tá pexna chanaxã i wüxi i cua̱xruxü̃ nax nawa nüxü̃ pecuáxü̃ca̱x nax aixcüma tá yanguxü̃ i ngẽma pexü̃ namaxã chaxãxũnexü̃. Rü aixcüma tá pexü̃ chapoxcue i pemax i Iraétanüxü̃ i Equítuanewa pengẽxmagüxü̃’ ” —ñanagürü.
30 Rü nüma ga Cori ya Tupana rü ñanagürü: —Choma rü yexgumarüxü̃ nax Chedequía ga Yudáanearü ãẽ̱xgacü rü Babiróniaanearü ãẽ̱xgacü ga Nabucudonochóme̱xẽgu chanangu̱xẽẽxü̃, nax yamáxü̃, rü choma rü ngẽxgumarüxü̃ tá ta norü uanügü i yama̱xgüxü̃me̱xẽgu chananguxẽxẽ i Ófa i Equítuanearü ãẽ̱xgacü —ñanagürü.
