Jeremías 46:1-28
46 Nüma ga Cori ya Tupana rü Yeremíamaxã nidexa nachiga ga yema togü ga nachixü̃anegü.
2 Rü ñaa nixĩ i ore i Equítuanechiga rü norü ãẽ̱xgacü ga Faraóü̃ ga Necáuchiga rü norü churaragüchiga ga yexguma ĩane ga Caquemíwa nayexmagu ga taxtü ga Eufrátecutüwa. Rü yéma Babiróniaanearü ãẽ̱xgacü ga Nabucudonochó Necáuxü̃ narüporamae ga yexguma Yoaquíü̃ ga Yochía nane norü ãgümücü ga taunecü Yudáanearü ãẽ̱xgacü yixĩxgu.
3 Rü Cori ya Tupana rü ñanagürü: —¡Ípenamexẽxẽ i perü poxü̃ruü̃gü! ¡Rü naxca̱x ípeyaxüãchi i perü uanügü!
4 ¡Rü penanuxcu i naxma̱xwe̱xegü i cowarugü! ¡Rü naétü petogü, Pa Churaragüx! ¡Rü penanuxcu i pepate̱xegü! ¡Rü mea pegü pexüchimüü̃gü! ¡Rü peyaxümagu ya perü wocaegü! ¡Rü pegüremüwa penanuxcu i perü poxü̃ruü̃gü!
5 ¿Natürü ta̱xacü nixĩ i nüxü̃ chadauxü̃? Ngẽma churaragü rü taxü̃ i norü muü̃maxã nügü nawoegu. Rü norü uanügücha̱xwa nügü nawoone. Rü nibuxmü rü tama nügü ínidaugü. Rü guxü̃wama nangẽxma i taxü̃ i ãũcümaxü̃. Rü choma ya Cori ya Tupana nixĩ i ngẽma ñachaxü̃.
6 Rü taxucürüwama nibuxmü i ngẽma rüporamaegüxü̃. Rü ngẽma tama muü̃wa̱xegüxü̃ rü taxucürüwa nibuxmü. Rü nórtewaama i taxtü i Eufrátecutüwa rü ngẽxma nayayi.
7 ¿Rü texé tixĩ ya yíxema ñoma taxtü i Níru rübaixü̃rüxü̃ rü poraxü̃chixü̃rüxü̃ tügü ixĩxẽẽchaü̃xe?
8 Rü nüma nixĩ i Equítuanearü ãẽ̱xgacü namaxã i norü churaragü i ñoma taxtü i Níru paxãma rübaixü̃ rü guxü̃wama nanguaneẽẽxü̃rüxü̃ nixĩ. Rü ñanagürügü: “Toma rü paxa tá guxü̃ i ñaa naanewa tangugü rü tá nagu tapogüe ya ĩanegü rü tá tanadai i norü duü̃xü̃gü”, ñanagürügü.
9 ¡Rü pema i cowarugu ĩxẽ rü ipexĩãchi naxca̱x i uanügü! ¡Rü ngẽxgumarüxü̃ ta i pema i carugu ĩxẽ rü ipexĩãchi! ¡Rü ipexĩãchi i pema i Etiopíaanearü churaragü rü Líbiaanearü churaragü i poxü̃ruü̃maxã ixãxnexü̃! ¡Rü ipexĩãchi i pemax i Lídiaanearü churaragü i mea würamaxã daixü̃ cua̱xgüxü̃!
10 Rü ñaa nixĩ i ngunexü̃ i Cori ya Tupana ya Guxãétüwa Ngẽxmacü tá nagu nada̱i̱xü̃ i norü uanügü. Rü taramaxã tá nanadai rü tacü ya nagü tá inaba ñu̱xmata mea nüxü̃́ yangu. Rü nüma ya Cori ya Tupana ya Guxãétüwa Ngẽxmacü rü ngẽma naane i nórtewa ngẽxmaxü̃wa tá nanadai i norü uanügü i taxtü i Eufrátearü ngaicamawa ngẽxmaxü̃.
11 Pa Equítuanecüã̱x ¡Garaáxanewa pexĩ nax ngẽxma naxca̱x peyadaugüxü̃ca̱x i üxüxü̃! Natürü woo muxü̃ i üxüxü̃maxã pexüxüxü̃gu rü taxuwatáma pexü̃́ name. Erü nataxuma i üxüxü̃ i pexca̱x mexü̃.
12 Rü guxü̃ma i ngẽma togü i nachixü̃anegü rü tá nüxü̃ nacua̱xgü nax perü uanü rü marü pexü̃ rüporamaexü̃. Rü guxü̃wama nüxü̃ taxĩnüe nax aita pexüexü̃. Rü perü churaragü rü nügü nadai rü wüxigu waixü̃müanegu nayi —ñanagürü ya Tupana.
13 Rü yexguma Nabucudonochó ga Babiróniaanearü ãẽ̱xgacü ixũãchigu nax Equítuaneca̱x íyagoõchixü̃ca̱x, rü nüma ga Cori ya Tupana rü Yeremíamaxã nidexa.
14 Rü ñanagürü: —¡Penaxunagü i Equítuanewa rü ĩanegü ga Midóxwa, rü Tafnéxwa, rü Ménfiwa, rü ñaperügügü! ¡Pexuãxẽ rü ípemexẽxẽgü! Erü perü uanü i taramaxã daiwa ĩxü̃, rü poraãcü nanadai i duü̃xü̃gü i perü ĩanegüarü ngaicamana ngẽxmagünewa.
15 ¿Rü tü̱xcüü̃ niwa̱x i perü tupananeta i Ápi i perü wocachicüna̱xã i pexca̱x üünexü̃? ¿Rü tü̱xcüü̃ tama ngẽxma nachi? Rü ngẽxma nangu erü choma ya Cori ya Tupana chayawa̱xẽxẽ.
16 Rü perü churaragü rü nügümaxã narüxü rü ngẽmaca̱x nügüétü nayi. Rü nügümaxã ñanagürügü: “¡Ngĩxã ítachoxü̃ i nua, rü tachixü̃ane i nagu ibuexü̃wa taxĩ! ¡Ngĩxã tibuxmü naxcha̱xwa i ngẽma dai i ãũcümaxü̃!” ñanagürügü.
17 Rü duü̃xü̃gü rü tagaãcü ñanagürügü: “Nüma i Equítuanearü ãẽ̱xgacü i Faraóü̃ rü nidexaechamare, natürü tama ngẽma ngunexü̃ i nagu naxunetaxü̃gu nayanguxẽxẽ i ngẽma nüxü̃ yaxuxü̃”, ñanagürügü.
18 Rü choma ya ãẽ̱xgacü ya Cori ya Tupana ya Guxãétüwa Ngẽxmacü rü chauégagu ichaxuneta rü ñachagürü: “Ngẽma uanü i tá pexca̱x íyaxüãchixü̃ rü ñoma ma̱xpǘne ya Tabóx ya naigü ya ma̱xpǘnexü̃ rümáchanemaenerüxü̃ tá nixĩ. Rü ñoma ma̱xpǘne ya Carméru i márpechinüwa máchanenerüxü̃ tá nixĩ i ngẽma uanü i tá pexca̱x ínguxü̃.
19 Pemax, Pa Equítuanecüã̱xgüx, ¡Pegü pimexẽxẽgü nax to i nachixü̃anewa pegagüxü̃ca̱x! Rü yima ĩane ya Ménfi rü tá chianexü̃xü̃ nayanguxuchi rü nachitaxü̃xica ngéma nayaxü rü taxúema nawa tamaxẽ.
20 Equítuane rü ñoma wüxi i ngexwaca yáxü̃ i wocaxacü i ngexü̃ i mexẽchixü̃rüxü̃ nixĩ, natürü tá naxca̱x ínangu i wüxi i mu̱xcü i nórtewaama ne ũxü̃ nax yapaiãxü̃ca̱x.
21 Pa Equítuanecüã̱xgüx, ngẽma perü churaragü i nüxü̃́ penaxütanüxü̃ nax pexü̃ nangü̃xẽẽgüxü̃ca̱x i daiwa rü ngẽmagü rü ñoma wocaxacügü i ngüexü̃rüxü̃ nixĩgü. Natürü i nümagü rü tá ta nibuxmü, rü taxucürüwa yáxna namaxã naxĩnüe i ngẽma uanü. Erü marü nawa nangu i ngẽma ngunexü̃ i nagu tá guxchaxü̃ pexca̱x ínguxü̃ rü ngẽma ora i nagu pepoxcuexü̃.
22 Rü ngẽma Equítuanearü churaragü rü ñoma wüxi i ãxtaperüxü̃ ningócaxü̃ãcü tá nibuxmü ngẽxguma norü uanügüarü churaragü norü yuemagümaxã naxca̱x íyaxüãchigu ñoma naigüarü tuxwa naxĩxü̃rüxü̃.
23 Rü ngẽma uanügü rü tá nanadai i Equítuanearü churaragü ñoma wüxi ya naixnecü ichexexü̃rüxü̃. Rü choma ya Cori ya Tupana nixĩ i nüxü̃ chixuxü̃ i ngẽma. Rü ngẽma uanügü rü munügüxü̃ narümumae rü taxúema nüxü̃ tacua̱x nax tayaxugüxü̃.
24 Rü Equítuane rü norü uanügü tá nüxü̃ narüporamae. Rü ngẽma ãẽ̱xgacü i nórtewaama ne ũxü̃me̱xẽgu tá nangu” —ñanagürü.
25 Rü nüma ya Cori ya Guxãétüwa Ngẽxmacü ya Iraétanüxü̃arü Tupana rü ñanagürü: —Tá chanapoxcu i Amóü̃ ya ĩane ya Tébaarü tupananeta. Rü ngẽxgumarüxü̃ tá ta chanapoxcu i Equítuane wüxigu namaxã i norü tupananetagü. Rü tá chanapoxcu i Equítuanearü ãẽ̱xgacügü, rü nüma i Faraóü̃ rü guxü̃ma i ngẽma duü̃xü̃gü i nagu yaxõgüxü̃
26 Rü norü uanü i Babiróniaanearü ãẽ̱xgacü i Nabucudonochóme̱xẽgu rü norü churaragüme̱xẽgu tá chanayixẽxẽ nax nadaiaxü̃ca̱x. Natürü ñuxre ya taunecüguwena rü Equítuane rü tá wena naxããcuane noxrirüxü̃. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.
Tupana rü tá ínananguxü̃xẽxẽ i norü duü̃xü̃gü
27 Rü ñanagürü ta: —¡Taxṹ i pemuü̃exü̃, Pa Chorü Duü̃xü̃gü i Chorü Duü̃ ya Acóbutaagüx! ¡Taxṹ i pemuü̃exü̃, Pa Iraétanüxü̃ i To i Nachixü̃anewa Gagüxe! Erü pema rü pexacügü rü tá pexü̃ íchanguxü̃xẽxẽ nawa i ngẽma yáxü̃guxü̃ i nachixü̃ane ga nawa pexü̃ nagagüxü̃. Rü pechixü̃aneca̱x tá pewoegu rü ngéma rü tá taãẽãcüma pemaxẽ, rü taxuxü̃táma i uanü pexü̃ ínabaixgü.
28 Rü choma ya Cori ya Tupana rü ñachagürü pexü̃: ¡Taxṹ i pemuü̃exü̃́, Pa Chorü Duü̃ i Acóbutaagüx! Erü choma rü petanüwa tá changexma. Rü tá chayanaxoxẽxẽ i guxü̃ma i ngẽma nachixü̃anegü i nagu pexü̃ chawoonexü̃. Natürü i pema rü tagutáma pexü̃ ichayarüxoxẽxẽ. Natürü ngẽma perü chixexü̃gagu tá pexü̃ chaxucu̱xẽ. Rü taxũtáma nüxü̃ chaxüpetümare nax pexü̃ chapoxcuexü̃ —ñanagürü.
