Jeremías 47:1-7
47 Ñaa nixĩ i Cori ya Tupanaarü ore ga norü orearü uruxü̃ ga Yeremíamaxã nüxü̃ yaxuxü̃ nachiga ga Firitéugü, naxü̃pa nax Equítuanearü ãẽ̱xgacü ga Faraóü̃ Gáchaca̱x íyagoõchixü̃.
2 Rü nüma ya Cori ya Tupana rü ñanagürü: —Nórtewaama tá ne naxĩ i muxü̃tama i churaragü. Rü ñoma wüxi i natü i poraãcü bainagüxü̃rüxü̃ tá nixĩgü. Erü tá nagu nachocu i ngẽma nachixü̃ane, rü guxü̃ i ngẽma naanewa tá nangugü. Rü guxü̃ma i ta̱xacü i ngẽma nachixü̃anewa ngẽxmagüxü̃ rü tá nanapuxü̃. Rü tá nagu nachocu ya ĩanegü rü tá ínanayauxü̃ i norü duü̃xü̃gü. Rü guxü̃ma i ngẽma nachixü̃anearü duü̃xü̃gü rü poraãcü tá aita naxüe erü ngúxü̃ ningẽgü.
3 Rü ngẽxguma nüxü̃ naxĩnüegu i naga i nacutügü i cowarugü rü ngẽma taxü̃ i naga i carugü rü nachicugü, rü ngẽma papagü rü tá naxacügüna ngéma nibuxmü erü nipaexüchi nax yagagüãxü̃.
4 Erü marü nawa nangu i norü ngunexü̃ i nagu tá nayuexü̃ i ngẽma Firitéugü. Rü woo Tíruane rü Chidóü̃anexicatama nixĩ i nüxü̃ íyaxüxü̃ nax nüxü̃ nangü̃xẽẽxü̃, natürü taxũtáma nüxü̃ narüngü̃xẽxẽ. Rü ngẽmaãcü ya Cori ya Tupana rü tá inayanaxoxẽxẽ i ngẽma Firitéugü ga nũcüma capaxũ ga Crétawa ne ĩxü̃ —ñanagürü.
5 Rü ngẽma duü̃xü̃gü i Gáchacüã̱x rü nügü nidüerugü, rü ngẽma Acharóü̃cüã̱x rü narüchianegümare. Rü pema i ípeyaxügüxü̃ natanüwa ga yema nũxcümaü̃güxü̃ ga duü̃xü̃gü ¿rü ñuxgura tá nüxü̃ perüchauxü̃ nax perü ngechaü̃maxã pegüxünegu pewígüexü̃?
6 Pa Tupanax, poraãcü ngúxü̃ tingegü. ¿Rü ñuxgura tá ta nüxü̃ curüchauxü̃ nax curü taramaxã toxü̃ cuda̱i̱xü̃? ¡Nachixü̃gu yaxǘcuchi i curü tara nax tama namaxã toxü̃ cuda̱i̱xü̃ca̱x!
7 ¿Natürü cumax, Pa Tarax, rü ñuxãcü tá ícuyachaxãchixü̃ ega Cori ya Tupana cuxna ãgagu rü cuxü̃ namuxgu nax naxca̱x ícuyagoõchixü̃ ya ĩane ya Acharóü̃ rü guxü̃ma i ngẽma duü̃xü̃gü i márcutüwa ngẽxmagüxü̃?
