Jeremías 48:1-47
48 Ñaa nixĩ i Cori ya Guxãétüwa Ngẽxmacü ya Iraétanüxü̃arü Tupanaarü ore nachiga ya Moáane. Rü ñanagürü: —Wüxi i taxü̃ i ngechaü̃ nixĩ i ngẽma nüxü̃ ngupetüxü̃ ya ĩane ya Nébu i ñu̱xma nagu napogüene. Rü yima ĩane ya Quiriataíü̃ rü norü uanügü rü marü nanapugü rü nüxü̃ narüporamaegü. Rü norü poxeguxü̃tápü̱xgü rü marü nayawa̱xgüxẽxẽ.
2 Rü ngẽma Moáane ga noxri mexẽchixü̃ rü ñu̱xma rü marü nataxuma. Rü ĩane ya Ebóü̃wa rü ngẽma norü uanügü rü nagu narüxĩnüe nax iyanaxoxẽẽgüaxü̃ i ngẽma nachixü̃ane i Moá. Rü yima ĩane ya Maxméü̃ rü tá ta nagu napogüe. Rü guxü̃wama nangẽxma i dai rü tama ínayachaxãchi nax naxãxũnetaexü̃
3 Rü ĩane ya Oronaíü̃wa rü norü duü̃xü̃gü rü poraãcü aita naxüe rü ñanagürügü: “Guxü̃wama nagu napogüe ya torü ĩane”, ñanagürügü.
4 Rü guxü̃wama i Moáanewa rü nachitaü̃icatama ínayaxü. Rü ngẽmaca̱x aita naxüe i duü̃xü̃güxacügü ñu̱xmata Chóawa nangu.
5 Rü duü̃xü̃gü rü naxauxeãcüma dauxü̃ naxĩgü nawa ya ma̱xpǘne ya Luíx. Rü ngẽma duü̃xü̃gü ya ĩane ya Oronaíü̃ca̱x írüxĩgüxü̃ rü poraãcü aita naxüe naxcha̱xwa i ngẽma chixexü̃ ya yima ĩanexü̃ ngupetüxü̃.
6 ¡Pibuxmü! Rü texé ya tüxü̃́ natauxchaxe rü name nax tiñaxü̃. Rü pema rü ñoma wüxi i chuxchuxü̃ i chianexü̃wa rüxüxü̃rüxü̃ tá pixĩ.
7 Pa Moáanex, cuma rü curü poragu cuyaxõ rü curü diẽrugu cuyaxõ, natürü curü uanügü rü tá cuxü̃ narüporamae. Rü nachixü̃anewa tá nanangegü i curü tupananeta i Quemó wüxigu namaxã i Quemóxarü chacherdótegü rü ngẽma curü duü̃xü̃gü i tachigagüxü̃.
8 Rü guxü̃nema ya curü ĩanegüwa tá nangu nax nagu napogüexü̃, rü bai i wüxi tá íyaxüxü̃ne. Rü yima ĩanegü ya natügüarü doxonexü̃wa ngẽxmagüne rü yima ĩanegü ya ma̱xpǘnearü doxonexü̃wa ngẽxmagüne rü tá nachitaxü̃xica ínayaxügü. Rü choma ya Cori ya Tupana nixĩ i ngẽma ñachaxü̃.
9 ¡Namexẽxẽ i naxma̱xü̃ i Moá i nagu tá natáxü̃ erü tá inayarütaxu! Rü norü ĩanegü rü nachitaxü̃xica tá ínayaxügü rü nataxutáma i duü̃xü̃gü i nawa maxẽxü̃ —ñanagürü ya Cori ya Tupana.
10 ¡Rü chixexü̃ tümamaxã naxuegu ya yíxema tama naxǘxe i ngẽma puracü i Cori ya Tupana tüxü̃ üxẽẽxü̃! ¡Rü chixexü̃ tümamaxã naxuegu ya yíxema tama naxüxchaü̃xe nax curü duü̃xü̃güxü̃ tadaixü̃!
11 Rü ngẽma Moácüã̱xgü rü guxü̃guma taãẽwa nayexma rü taguma togü ga nachixü̃anewa nagagü i norü duü̃xü̃gü. Rü ñoma bínu ya meama wüxitama ya nachiü̃wa ngẽxmacü rü taguma to i nachiü̃wa bacürüxü̃ nixĩ. Rü ngẽmaca̱x ya yimá bínu rü napora rü taguma inayagoema. Rü ngẽma Moácüã̱xgü rü ngẽxgumarüxü̃ nixĩgü.
12 Natürü nüma ya Cori ya Tupana rü ñanagürü: —Rü tá nawa nangu i ngunexü̃ i tá wüxi i norü uanüxü̃ chamu nax Moáaneca̱x íyagoõchixü̃ca̱x rü nadaiaxü̃ca̱x i norü duü̃xü̃gü rü ngẽmaãcü tá nangeãcuanemare. Rü ñoma wüxi i bínuchíü i baãcuxü̃ rü ipuxẽẽxü̃rüxü̃ tá nixĩ i Moáane.
13 Rü ñu̱xũchi i Moá rü tá naxãnee nagagu i norü tupananeta i Quemó, yexgumarüxü̃ ga Iraétanüxü̃ nax naxãneexü̃ nagagu ga yema norü tupananeta ga Betéwa yexmaxü̃ ga nüxü̃́ yaxõgüãxü̃.
14 Rü tama name i Moáanecüã̱xgü ñanagürügü: “Toma rü tama tamuü̃e, rü daitanüxü̃ i poraexü̃ tixĩgü”, ñanagürügü.
15 Rü paxa tá ínangu i norü uanü i tá Moáanegu rü norü ĩanegügu pogüexü̃. Rü norü churaragü i rümemaexü̃ rü tá nayue. Rü choma i Ãẽ̱xgacü nixĩ i ngẽma ñachaxü̃. Rü Cori ya Tupana ya Guxü̃étüwa Ngẽxmacü nixĩ i chauéga.
16 Rü marü ningaica nax nagu yanachixexü̃ i Moáane. Rü paxa tá ínangugü i norü uanügü nax nadaiaxü̃ca̱x.
17 Rü ngẽma nachixü̃anegü i Moáanena ngaicamagüxü̃ rü guxü̃ma i ngẽma togü i nüxü̃ cua̱xgüxü̃ nax naporaexü̃ rü tá naxca̱x naxauxe rü ñanagürügü tá: “¡Dücax i ñuxãcü nax nachixexü̃ i ngẽma nachixü̃ane i poraxü̃ rü mexẽchixü̃!” ñanagürügü tá.
18 Pa Ĩane ya Dibóü̃x nax mexü̃wa cungexmaxü̃, rü name nax curüxüexü̃ nawa i cuchica i mexü̃, ¡rü waixü̃müane i paxü̃wa rüto! Erü ngẽma Moáanearü chixexẽẽruxü̃ rü cuxca̱xama nixũ rü marü nayawa̱xgüxẽxẽ i curü poxegutapü̱xgü.
19 Rü pemax, Pa Duü̃xü̃gü ya Ĩane ya Aroéwa Maxẽxex, ¡rü namacüwagu peyachigü rü nüxna peca i ngẽma ibuxmüxü̃ i yatüxü̃ rü ngexü̃gü rü ñapegürügü: “¿Ta̱xacü nixĩ i pexü̃ ngupetüxü̃?” ñaperügügü!
20 Moáane rü naxãnee erü norü uanügü rü marü nüxü̃ narüporamae. Rü poraãcü namuü̃e i norü duü̃xü̃gü. ¡Rü perü ngechaü̃maxã naxca̱x pexauxe! ¡Rü natü i Arnóü̃wa penaxunagü nax marü nagu napogüexü̃ i Moáanearü ĩanegü! —ñanagürü.
21 Rü marü nawa nangu i ngẽma poxcu i namaxã ueguxü̃ ya yima ĩanegü ya ma̱xpǘnearü doxonexü̃wa ngẽxmagüne ya Oróü̃ rü Yaácha rü Mepáax,
22 rü Dibóü̃, rü Nébu, rü Bex-dibataíü̃,
23 rü Quiriataíü̃, rü Bex-gamúx, rü Bex-meóü̃,
24 rü Querióx, rü Bochrá, rü guxü̃nema ya yima naigü ya Moáanearü ĩanegü ya ngaicamagüne rü yáxü̃gugüne.
25 Rü Cori ya Tupana rü ñanagürü: —Moáanearü pora rü marü nagu narüchixe. Rü marü nataxuma.
26 Moá rü marü Tupanamaxã nanu. Rü ngẽmaca̱x name i norü uanügü nanaxãnexẽxẽ rü nüxü̃ nacugüe ñoma wüxi i ngaxü̃xü̃xü̃ nacugüexü̃rüxü̃ i ngẽxguma norü oxüétüwa yadixegucüügu.
27 Rü pema i Moáanecüã̱xgüx, ¿tama ẽ̱xna ga ü̃pa rü nüxü̃ pecugüexü̃ ga Iraétanüxü̃ rü chixri nachiga pidexagüxü̃, ñoma wüxi i ngĩ́ta̱xaxü̃rüxü̃?
28 ¡Rü nüxna pexĩgü ya perü ĩanegü, Pa Moáanecüã̱xgüx, rü nuta ya tacügüarü ãxmaxü̃wa peyamaxẽ ñoma muxtucugü i ma̱xpǘnechitaerugu üxchiaü̃güxü̃rüxü̃!
29 Rü mea nüxü̃ tacua̱x nax poraãcü nügü yacua̱xüü̃güxü̃ i Moáanecüã̱xgü, rü taxúega naxĩnüechaü̃xü̃, rü nügügu naxĩnüexü̃ nax togüarü yexera yaxĩgüxü̃.
30 Rü choma ya Cori ya Tupana rü nüxü̃ chacua̱x nax taxúega naxĩnüechaü̃xü̃, rü nügü yacua̱xüü̃güxü̃, rü nügügu naxĩnüexü̃ nax togüarü yexera yaxĩgüxü̃ —ñanagürü ya Cori ya Tupana.
31 Rü ngẽmaca̱x i choma i Yeremía rü tá chaxaxu rü ta naxca̱x changechaü̃ i guxü̃ma i ngẽma Moáanearü duü̃xü̃gü rü Quíru-eréchearü yatügü.
32 Rü cuxca̱x tá chaxaxu, Pa Chibáarü Úbanecüx, yema Yachéxca̱x chaxaxuxü̃arü yexera. Rü cuchacüügü rü márwa nangugü ñu̱xmata Yachéxwa nangugü. Natürü i ñu̱xma rü ngẽma curü úbagü rü curü uanüme̱xẽwa nangẽxmagü.
33 Rü ñu̱xma i Moáanearü naanegü i mexü̃wa rü marü tama nüxü̃ taxĩnüe nax taãẽmaxã aita naxügüxü̃ i duü̃xü̃gü. Rü yima bínu rü marü nataxuma i nachiü̃wa. Rü taxúema tayapumügü i úbagü nax bínu taxügüxü̃ca̱x. Rü tataxuma nax texé taãẽãcü tawiyaegüxü̃.
34 Rü ngẽma duü̃xü̃gü i Ebóü̃cüã̱x rü ngúxü̃ ningẽgü rü aita naxügü. Rü ngẽma naga nax aita naxügüxü̃ rü Eraréwa, rü Yaáchawa nangu. Rü Chóawa inaxügü rü ñu̱xmata Oronaíü̃wa rü Égrax-cherichíyawa nüxü̃ taxĩnüe nax aita naxügüxü̃, erü Nimríü̃arü natüxacügü rü marü nipagü.
35 Rü nüma ya Cori ya Tupana rü ñanagürü: —Choma rü tá chanadai i ngẽma duü̃xü̃gü i Moácüã̱xgü i ma̱xpǘnechitaerugu ĩgüxü̃ nax ngéma norü tupananetaxü̃ yanacua̱xüxü̃güxü̃ca̱x rü ãmare nüxna naxãgüxü̃ca̱x rü pumarate̱xe naxca̱x yagugüxü̃ca̱x —ñanagürü.
36 Rü ngẽmaca̱x Moáanearü duü̃xü̃güca̱x changechaü̃ ñoma wüxi i woweru i ngechaxü̃gane ega yuetaca̱x yacuexgurüxü̃. Rü ngẽxgumarüxü̃ ta ngẽma yatügü i Quíru-erécheca̱x changechaü̃ yerü marü nataxuma ga yema muxü̃ ga norü yemaxü̃gü ga nügüca̱x nadexü̃.
37 Rü guxü̃ma i duü̃xü̃gü rü norü ngechaü̃maxã nügü nidüerugü, rü nügü nidüxchinagugü, rü nügü nawixme̱xgü, rü naxchiru i témüxü̃gu nicu̱xgü.
38 Rü Cori ya Tupana rü ñanagürü: —Guxü̃ma ya Moáanearü ĩxarü doxétügüwa rü guxü̃ma ga namagüwa rü ngẽma nüxü̃ ixĩnüxü̃ rü ngechaü̃ rü axuxicatama nixĩ. Erü choma rü íxraxü̃gu chanapo ya Moáanearü ĩanegü ñoma wüxi i tüxü̃ i taxuwama mexü̃gu ipogüxü̃rüxü̃. Rü choma ya Cori ya Tupana nixĩ i ngẽma ñachaxü̃ —ñanagürü
39 ¡Rü poraãcü naxca̱x pexauxe i Moáarü naane! Rü taxü̃ i muü̃wa nangẽxma erü norü ãnemaxã tüxna naxãca̱xwe̱xmare. Rü Moáane i ñu̱xma rü wüxi i ãũãchixü̃ nixĩ, rü wüxi i cugüruxü̃ nixĩ, rü wüxi i baixãchixẽẽruxü̃ nixĩ naxca̱x i guxü̃ma i ngẽma togü i nachixü̃anegü i nüxna ngaicamagüxü̃.
40 Rü nüma ya Cori ya Tupana rü ñanagürü: —Ngẽma Moáanearü uanügü rü naxca̱x ínayaxüãchi ñoma wüxi i ĩyü rü naeü̃ca̱x nagoxü̃rüxü̃.
41 Rü Moáanearü ĩanegü rü norü poxeguruü̃gü rü ngẽma uanügüme̱xẽgu tá nayi. Rü ngẽma ngunexü̃gu rü Moáanearü churaragü rü tá norü muü̃maxã nidu̱xrue ñoma wüxi i ngexe i íxraxacüxchaü̃xü̃rüxü̃.
42 Rü Moá rü tá inarüxo nax wüxi i nachixü̃ane yixĩxü̃, yerü chomaxã narüxuanü.
43 Rü ngẽmaca̱x i choma ya Cori ya Tupana rü ñachagürü: “Moáanearü duü̃xü̃gü rü ñoma naixnecücüã̱x i naeü̃gü i cuenetanüxü̃ nawe ingẽxü̃tanüxü̃rüxü̃ tá nixĩgü. Rü ñoma naeü̃gü i ãxmaxü̃gu rüe̱xna yütagu nguxü̃rüxü̃ tá nixĩgü”, ñanagürü ya Cori ya Tupana.
44 Rü yíxema cuenetanüxü̃cha̱xwa ñaxe rü tá ãxmaxü̃gu tingucuchi. Rü yíxema ãxmaxü̃wa ixũxũxe rü tá yütagu tangu. Erü choma ya Cori ya Tupana rü tá Moáaneca̱x íchananguxẽxẽ i norü poxcu. Rü choma ya Cori ya Tupana nixĩ i ngẽma ñachaxü̃.
45 Rü ñuxre i Moáanecüã̱xgü i marü turaexü̃ rü tá ĩane ya Ebóü̃ca̱x nibuxmü nax ngẽxma yanacu̱xgüxü̃ca̱x. Natürü yima ĩane ya ãẽ̱xgacü ya Chióü̃arü ĩane ya Ebóü̃ rü nixa. Rü ngẽma üxüema rü nixũchigü rü nayaxaxẽxẽ ya Moáanearü ma̱xpǘnegü rü nacatügü i ngẽma duü̃xü̃gü i Tupanamaxã nuexü̃.
46 Pa Moátanüxü̃x, wüxi i ngechaü̃ nixĩ i pexca̱x, erü pema i tupananeta i Quemóxarü duü̃xü̃güx nax pixĩgüxü̃ rü marü pexü̃ nadai. Rü penegü rü pexacügü rü to i nachixü̃anewa nagagü.
47 Natürü wüxi i ngunexü̃ rü tá Moátanüxü̃güxü̃ charüngü̃xẽẽxü̃ rü nachixü̃aneca̱x tá chanawoeguxẽxẽ. Rü choma ya Cori ya Tupana nixĩ i ngẽma ñachaxü̃ —ñanagürü. Rü nua nixĩ i yacuáxü̃ i ore i Yeremía nüxü̃ ixuxü̃ i Moáanearü poxcuchiga.
