Jeremías 5:1-31
5 Nüma ya Cori ya Tupana rü ñanagürü: —¡Yerucharéü̃arü namagügu pixĩagütanü, rü mea ngẽxma pidauagütanü, rü plázagügu naxca̱x pedau rü aixcüma tá tüxü̃ peyangau ya texé ya mea maxü̃́xẽ rü ixaixcümachaü̃xẽ! Rü ngẽxguma tá tüxü̃ ipeyangauxgu rü taxũtáma chanapoxcu ya Yerucharéü̃.
2 Rü nangẽxmagü i duü̃xü̃gü i chauégagu ixunetagüxü̃, natürü tama nayanguxẽẽgü i norü unetagü —ñanagürü ya Cori ya Tupana.
3 Pa Corix, ngẽma naxca̱x cudauxü̃ nixĩ i duü̃xü̃gü i aixcüma cuga ĩnüexü̃. Natürü woo cunapoxcue, rü tama cuga naxĩnüechaü̃. Rü cunadai, natürü tama inaxĩnüechaü̃. Yerü nutaarü yexera nataiarü maxü̃ã̱xgü, rü tama nüxü̃ narüxoechaü̃ i nacüma i chixexü̃.
4 Rü choma nagu charüxĩnügu rü yíxema ngearü diẽruã̱xgüxexica tixĩ ya tümaechitamare maxẽxe erü tama nüxü̃ tacua̱xgü nax ta̱xacü yixĩxü̃ i ngẽma Cori ya Tupana tüxü̃́ naxwa̱xexü̃, rü ñu̱xũchi tama nüxü̃ tacua̱xgü i ngẽma Tupana tüxü̃ muxü̃.
5 Rü yemaca̱x nagu charüxĩnü nax yema ãẽ̱xgacügümaxã chidexaxü̃. Yerü ngürüãchi nümagü rü nüxü̃ nacua̱xgü i ngẽma Cori ya Tupana nüxü̃́ naxwa̱xexü̃, rü ngẽma Tupana tüxü̃ muxü̃. Natürü guxü̃ma ga nümagü rü Cori ya Tupanamaxã nanue, rü tama naga naxĩnüechaü̃.
6 Rü ngẽmaca̱x naixnecüwa tá ínachoxü̃ i leóü̃gü i nangõ̱xcuxü̃, rü airugü i ínachianexü̃wa maxẽxü̃ tá nagu niwagügü. Rü ngẽma aigü rü norü ĩanegügu tá nanangõ̱xcu, rü tá nagu niwagügü i ngẽxguma ínachoxü̃gu. Yerü yema duü̃xü̃gü rü muxü̃ma ga chixexü̃ naxügü rü muẽ̱xpü̱xcüna nidoraemare.
7 Rü nüma ya Cori ya Tupana rü ñanagürü: —¿Ñuxãcü tá pexü̃́ nüxü̃ charüngümaxü̃ i guxü̃ma i ngẽma chixexü̃ i pexüxü̃, Pa Yerucharéü̃cüã̱xgüx? Rü pexacügü rü marü choxna nixĩgachitanü, rü ngẽma tupananetachicüna̱xãgü i tama aixcüma Tupana ixĩgüxü̃maxã inaxunetagü. Rü choma rü taxü̃ ga õna nüxna chaxã, natürü nümagü rü tama chauga naxĩnüechaü̃. Rü guxü̃ma wüxigu tupananetagüwe narüxĩ ñoma yatügü i ngexü̃gü i ngĩxü̃nemaxã taxexü̃we rüxĩxü̃rüxü̃.
8 Rü nümagü rü ñoma cowarugü ya worexeca̱x daugüxü̃rüxü̃ nixĩ nax namücüma̱x nüxü̃́ ngúchaü̃xü̃.
9 Rü aixcüma guxü̃ma i ngẽma chixexü̃ i naxügüxü̃ca̱x tá chanapoxcue. Rü ñu̱xma rü tá chaxí chaxütanü naxca̱x nax choxna yaxĩgachixü̃ i ngẽma duü̃xü̃gü.
10 Rü ngẽmaca̱x chanangexrü nax norü uanügü chocuxü̃ca̱x rü nadaiaxü̃ca̱x ñoma úbanecü nada̱i̱xü̃rüxü̃, woo tama guxü̃ nadaixgu. Rü marü name nax nabüü̃chacüüãxü̃ erü ngẽma úbanecü rü marü tama choxrü nixĩ.
11 Rü ngẽma Iraéanecüã̱xgü rü Yudáanecüã̱xgü rü marü tama chomaxã nixaixcümagü. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü ya Cori ya Tupana.
Cori ya Tupana rü nüxü̃ nixu i ngẽma poxcu i Iraéaneca̱x rü Yudáaneca̱x tá ínguxü̃
12 Rü ngẽma Iraéanecüã̱xgü rü Yudáanecüã̱xgü rü tama Cori ya Tupanaxü̃ nacua̱xgüchaü̃ rü ñanagürügü: —Tupana rü nataxuma. Rü taxuxü̃táma i chixexü̃ tüxü̃ nangupetü, rü tagutáma tüxü̃ nadai rü bai tá ñuxgu itaiyaexü̃ —ñanagürügü.
13 5:13-14 Rü ngẽma orearü uruü̃güneta rü ñoma buanecürüü̃mare nixĩgü, erü tama nawa nangẽxma ya Cori ya Tupanaarü ore. Rü ngẽmaca̱x i nüma ya Cori ya Tupana ya Guxãétüwa Ngẽxmacü rü choxü̃ ñanagürü: —Rü nagagu nax ngẽma ñagüxü̃ i nümagü rü chorü ore rü ñoma üxüemarüxü̃ tá nixĩ i cua̱xwa. Rü ngẽma duü̃xü̃gü rü ñoma üxümena̱xãrüxü̃ tá nixĩgü. Rü ngẽma üxüema tá ínanagu —ñanagürü.
14 Nüü̃ nadau 5:13
15 Rü nüma ya Cori ya Tupana rü nüxü̃ nixu rü ñanagürü: —Pa Iraétanüxü̃x, petanüwa tá chanamugü i duü̃xü̃gü i yáxü̃wa ne ĩxü̃. Rü nümagü rü duü̃xü̃gü i poraexü̃ i nũxcüma yexmagüxü̃ nixĩgü. Pemax rü tama nüxü̃ pecua̱x i ngẽma naga i nawa yadexagüxü̃, rü bai i nüxü̃ pexĩnüexü̃ i ngẽma nüxü̃ yaxugüxü̃.
16 Rü guxü̃ma i nümagü rü daitanüxü̃ i tama muü̃exü̃ nixĩgü. Rü ngẽxguma norü würa tüxü̃ namaxü̃gu rü tama naguxchinü rü wüxicana tüxü̃ nima̱x.
17 Rü tá nanangõ̱xgü i ngẽma penetügü, rü pewemügü. Rü woo yíxema penegü rü pexacügü rü tá tüxü̃ nadai rü tá tüxü̃ nangõ̱xcu. Rü yíxema perü carnérugü rü perü wocagü rü tüxü̃ tá nangõ̱xcu. Rü perü úbagü rü perü igunecüarü o rü tá ta nanangõ̱xgü. Rü naxnegümaxã tá nagu nipogügü ya yima perü ĩanegü ya ípoxegugüne ya namaxã pegü íperüporaene —ñanagürü.
18 Natürü nüma ya Cori ya Tupana rü ñanagürü: —Natürü ngẽma ngunexü̃gu rü taxũtáma guxü̃ chadai.
19 Rü ngẽxguma ngẽma íyaxügüxü̃ cuxna cagügu rü ñagügu: “¿Rü ta̱xacüca̱x nixĩ i guxü̃ma i ñaa tomaxã naxüxü̃ ya yimá tórü Cori ya Tupana?” ñagügu, rü cuma rü ñaãcü tá cunangãxü̃ rü ñacurügü tá: “Ngẽma nax Cori ya Tupanana pixĩgachixü̃ rü to i nachixü̃anecüã̱xgüarü tupananetachicüna̱xãgüxü̃ picua̱xüü̃güxü̃ i perü naanegüwatama, rü ngẽmaca̱x i pemax rü tá to i nachixü̃anecüã̱xgüaxü̃́ pepuracüe i norü naanewatama”, ñacugürü tá —ñanagürü ya Tupana.
Ucu̱xẽgü i Iraétanüxü̃ca̱x ixĩxü̃
20 Rü Cori ya Tupana rü Yeremíaxü̃ ñanagürü: —¡Ẽcü Iraéanewa rü Yudáanewa naxunagü i ñaa chorü ore i ñaxü̃!
21 “¡Nüxü̃ pexĩnüe i ñaa ore, Pa Duü̃xü̃gü i Naechitamare Maxẽxü̃ rü Tama Peãẽxü̃ Cua̱xgüxü̃! Rü pema rü pixãxetügüchire̱x natürü tama nüxü̃ pedaugü. Rü pixãxmachi̱xẽgüchire̱x natürü tama nüxü̃ pexĩnüe.
22 Rü choma ya Cori ya Tupana rü pexna chaca rü ñachagürü: ‘¿Tama ẽ̱xna choxü̃ pemuü̃e? ¿Tama ẽ̱xna chope̱xewa pidu̱xrue?’ Choma rü chanango̱xẽxẽ ya naxnecü nax márxü̃ yatoxyepe̱xexü̃ca̱x. Rü ngẽma toxyepe̱xewa rü taxucürüwama naxüpetü i már. Rü woo poraãcü nayuapegu rü natagagu rü taxucürüwama naxüpetü nawa i ngẽma toxyepe̱xe.
23 Pema rü penuewa̱xexü̃ rü tama ipexĩnüechaü̃. Rü choxna pixĩgachi rü choxü̃ ipeyarüngümae.
24 Rü tama nagu perüxĩnüe rü bai nax ñapegügüxü̃: ‘Ngĩxã Cori ya tórü Tupanaga taxĩnüe erü nüma nixĩ i taxca̱x napuxẽẽãxü̃ i otóñogu rü primaberagu, rü ñu̱xũchi nüma nixĩ i taxca̱x ínaxüxüchiãxü̃ i ngẽma ngunexü̃gü i nagu yabuxgǘxü̃ i torü nanetügü’, ñapegügüxü̃.
25 Natürü perü chixexü̃gagu tama pexca̱x chanango̱xẽxẽ i ngẽma mexü̃gü. Rü perü pecadugagu tama pexü̃́ nangẽxma i ngẽma mexü̃gü.
26 Erü chorü duü̃xü̃gütanüwa rü nangẽxma i yatügü i chixexü̃ ügüxü̃. Rü ngẽma yatügü rü ñoma werigüca̱x yüta ixüxü̃rüxü̃ norü doramaxã chixexü̃gu nanayixẽxẽ i ngẽma togü i duü̃xü̃gü.
27 5:27-28 Rü ngẽma ngẽmaxü̃gü i womüxẽẽãcüma nadexü̃ i ngẽma yatügü rü napatagü namaxã nanapáxẽẽgü ñoma wüxi i naxpüü̃ rü werigümaxã napaxẽẽxü̃rüxü̃. Rü ngẽmaãcü nixĩ i naporaexü̃ rü nadiẽruã̱xgüxü̃, rü ñu̱xũchi meama nachibüexü̃ rü yangüexü̃. Rü ngẽma nax chixexü̃ naxügüxü̃ rü taguma nayagu̱x. Rü tama tüxü̃ narüngü̃xẽxẽ ya yíxema taxcutagü, rü tama tüxü̃ nacua̱xgüchaü̃ ya yíxema ngearü diẽruã̱xgüxe rü tama tümaétüwa nachogü.
28 Nüü̃ nadau 5:27
29 Rü aixcüma guxü̃ma i ngẽma chixexü̃ i naxügüxü̃ca̱x tá chanapoxcue. Rü ñu̱xma rü tá chaxí chaxütanü naxca̱x nax choxna yaxĩgachixü̃ i ngẽma duü̃xü̃gü. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü.
30 Rü ñanagürü: —Wüxi i taxü̃ i chixexü̃ i ãũcümaxü̃ nixĩ i ñaa nachixü̃anewa ngupetüxü̃.
31 Rü ngẽma ore i nüxü̃ yaxugügüxü̃ i ngẽma orearü uruü̃gü rü doramare nixĩ. Rü ngẽma chacherdótegü rü nümagü nanaxwa̱xegüxü̃ãcü duü̃xü̃gümaxã inacua̱xgü. Rü ngẽma chorü duü̃xü̃gü rü ngẽmamaxã nataãẽgü. ¿Natürü ta̱xacü tá pexüxü̃ i ngẽxguma ínanguxgu i ngẽma guxchaxü̃ i ãũcümaxü̃? —ñanagürü.
