Jeremías 52:1-34
52 Nüma ga Chedequía rü 21 ga taunecü nüxü̃́ nayexma ga yexguma yangucuchigu nax Yudáanearü ãẽ̱xgacü yixĩxü̃. Rü 11 ga taunecü nixĩ nax ãẽ̱xgacü yixĩxü̃ ga Yerucharéü̃wa. Rü naé rü Amutá nixĩ ga tümaéga. Rü tüma rü Yeremía ga Lixnácüã̱xacü tixĩ.
2 Natürü Tupanape̱xewa rü yema Chedequía üxü̃ rü poraãcü nachixe yema Yoaquíü̃ üxü̃rüxü̃.
3 Rü yemaca̱x ga Cori ya Tupana rü nanu namaxã ga yema Yerucharéü̃cüã̱xgü rü Yudáanecüã̱xgü rü nügüpe̱xewa ínanawogü. Rü yemawena ga Chedequía rü Babiróniaanearü ãẽ̱xgacümaxã nanu rü tama naga naxĩnü.
Yerucharéü̃ rü norü uanüme̱xẽgu nangu
4 Rü yexguma 9 ga taunecü marü ãẽ̱xgacü yixĩxgu ga Chedequía ga Yudáanewa, rü gumá taunecüarü 10 ga tauemacügu rü nüma ga Nabucudonochó rü guxü̃ma ga norü churaragümaxã Yerucharéü̃ca̱x ínayaxüãchi rü nüxü̃ ínachomaeguãchi. Rü guma ĩanetapü̱xwa waixü̃mümaxã nanagünagügü nax yemawa nagu nachocuxü̃ca̱x ga guma ĩane.
5 Rü Nabucudonochó rü norü churaragümaxã taxre ga taunecü nüxü̃ ínachomaeguãchi ga guma ĩane. Rü yéma nayexmagü ñu̱xmata norü 11 ga taunecüwa nangu nax Yudáanearü ãẽ̱xgacü yixĩxü̃ ga Chedequía.
6 Rü gumá taunecüarü ãgümücüarü tauemacüarü 9 ga ngunexü̃gu rü poraãcü taiya ínangu ga guma ĩanewa. Rü duü̃xü̃gü rü nüxü̃́ nataxuma ga õna.
7 Rü yexguma nüma ga ãẽ̱xgacü ga Chedequía rü norü churaragü nüxü̃ daugügu ga yema ngupetüxü̃ rü nibuxmü nawa ga guma ĩane woo ga yema Cadéugü nüxü̃ ínachomaeguãchi. Rü Chedequía rü norü churaragü nayaponatapü̱xgü rü chütacü ínachoxü̃ nawa ga yema ãẽ̱xgacüpataarü putüranecüwa dapetüxü̃ ga nama. Rü yema ĩã̱x ga taxre ga naxtapü̱xarü ngãxü̃wa yexmaxü̃wa ínachoxü̃, rü nama ga natü ga Yudáü̃arü doxonexü̃wa nadaxü̃waama naxĩ.
8 Natürü nüma ga Babiróniacüã̱x rü Chedequíawe nangẽgü, rü Yericúarü metachinüanegu nayayauxgü. Rü guxü̃ma ga Chedequíaarü churaragü rü nüxna yéma nibuxmü rü nügü nawoone.
9 Rü yema Cadéugü rü ãẽ̱xgacü ga Chedequíaxü̃ niyauxgü rü Amáanewa yexmane ga ĩane ga Ribáwa nanagagü, yerü yéma nayexma ga ãẽ̱xgacü ga Nabucudonochó. Rü nüma ga Nabucudonochó rü yéma poxcu Chedequíamaxã naxuegu.
10 Rü ñu̱xũchi Chedequíape̱xegu tüxü̃ nadai ga nanegü rü guxü̃ma ga natanüxü̃ ga ãẽ̱xgacügü ixĩgüxü̃ ga Yudáanewa.
11 Rü yemawena rü nanamu nax Chedequíaxü̃ nacaxü̃xetügüxü̃ rü cadénamaxã yana̱i̱xgüãxü̃ Babiróniawa nagagüãxü̃. Rü yéma poxcupataxü̃wa nayexma ñu̱xmata nayu̱x.
Nagu napogüe ga Tupanapata
12 Rü yexguma 19 ga taunecü marü ãẽ̱xgacü yixĩxgu ga Nabucudonochó ga Babiróniawa, rü gumá taunecüarü 5 ga tauemacügu rü nüma ga yema churaragüeru ga Nabucharadáü̃ rü Yerucharéü̃wa nangu. Rü nüma ga Nabucharadáü̃ rü Babiróniaanearü ãẽ̱xgacü ga Nabucudonochóarü ngü̃xẽẽruxü̃ nixĩ.
13 Rü yexguma Yerucharéü̃wa nanguxgu rü nawa nanangixichi ga Tupanapata ga taxü̃ne, rü ãẽ̱xgacüpata, rü guxü̃nema ga guma ĩanearü ĩpatagü wüxigu namaxã ga napatagü ga yema duü̃xü̃gü ga tachigagüxü̃ ga Yerucharéü̃wa.
14 Rü yema churaragü ga íyaxümücügüxü̃ rü nayawa̱xgüxẽxẽ ga guma Yerucharéü̃arü poxeguxü̃tápü̱xgü.
15 Rü ñu̱xũchi nüma ga Nabucharadáü̃ rü Babiróniawa nanagagü ga yema duü̃xü̃gü ga ĩanewa íyaxügüxü̃, rü yema duü̃xü̃gü ga Babiróniaanearü ãẽ̱xgacüwaama ügüxü̃. Rü yexgumarüxü̃ ta yéma nanagagü ga guxü̃ma ga yema duü̃xü̃gü ga ta̱xacü rü puracüxü̃ mea icuáxü̃.
16 Natürü yéma tüxü̃ nawogü ga guxema ñuxre ga yexera ngearü diẽruã̱xgüxe. Rü tüxü̃ namugü nax nawa tapuracüegüxü̃ca̱x ga naanegü rü úbanecügü.
17 Rü yema Cadéugü rü nagu napogüe ga yema Tupanapata ga taxü̃nearü yemaxü̃gü ga bróũche naxca̱xgü, rü guma taxre ga caxtagü ga itaxüne ga norü ücuchicawa yexmagüne, rü yema 10 ga ya̱u̱xme̱xü̃páxü̃gü, rü yema taxü̃ ga dexápáxü̃. Rü guxü̃ma ga yema bróũche rü Babiróniawa nayana.
18 Rü yexgumarüxü̃ ta nayana ga yema tanimacapáü̃gü, rü paragü, rü pirañagü ga omüchiraü̃arü yoyeruxü̃gü, rü tacháũgü, rü cucharóü̃gü, rü guxü̃ma ga Tupanapataarü yemaxü̃gü ga bróũchenaxca̱x ixĩgüxü̃.
19 Rü nüma ga yema churaragüeru ga Nabucharadáü̃ rü yexgumarüxü̃ ta nayana ga guxü̃ma ga Tupanapataarü yemaxü̃gü ga úirunaxca̱x rü diẽrumünaxca̱x ga bachíagu, rü pumarate̱xearü guruü̃gü, rü tacháũgü, rü tanimacapáü̃gü, rü omügü, rü cucharóü̃gü, rü copugü ga ãmare ga bínupáxü̃gü.
20 Rü nayana ga guma taxre ga caxtagü ga itaxü̃ne, rü yema taxü̃ ga dexápáxü̃, rü yema 12 ga woca i yatüxü̃chicüna̱xãgü ga bróũchenaxca̱x ga dexápaxü̃paragü ixĩgüxü̃, rü yema 10 ga ya̱u̱xme̱xü̃páxü̃gü ga ãẽ̱xgacü ga Charomóü̃ Tupanapata ga taxü̃neca̱x üxü̃. Rü guxü̃ma ga yema bróũche rü nayana. Rü yema nax nayaxüchixü̃ ga guxü̃ma ga yemaxü̃gü ga bróũchenaxca̱x ga yanaxü̃, rü taxúema nüxü̃ tacua̱x nax ñuxregu nayaxü̃.
21 Rü wüxichigü ga guma taxre ga caxtagü ga itaxü̃ne rü norü ma̱x rü 8 metru nixĩ ga norü máchane. Rü norü buxmenaxã rü 5 metruarü ngãxü̃ nixĩ ga wüxichigü. Rü norü aixepewa rü naxãxma̱x. Rü norü yaxcü ga yema bróũche rü 7 chentímetru nixĩ.
22 Rü yema natape̱xewa ga guma caxtagü rü nüxü̃́ nayexma ga norü nga̱xãẽruxü̃ ga bróũchenaxca̱x ga 2 metruarü yexeragu ixüxü̃. Rü nacüwawa ga yema ngã̱xãẽruü̃gü rü nayexma ga wüxi ga mutachinüxü̃ ga bróũchenaxca̱x ga ãpü̱xüxü̃maxã nga̱xãẽxü̃. Rü guma taxre ga caxtagü rü nawüxigumare.
23 Rü guma caxtatape̱xearü nga̱xãẽruü̃gügu ínanabaeguãchi ga cadénagü. Rü guma cadénagüwa nananucu ga 100 ibopü̱xüxü̃. Rü yema caxtape̱xewa narütugü ga to ga 96 ga ibopü̱xüxü̃.
Yudíugü rü Babiróniawa nagagü
24 Rü nüma ga Nabucharadáü̃ rü ínanayauxü̃ ga Cheraía ga chacherdótearü ãẽ̱xgacü rü Chofonía ga naweama ücü. Rü yexgumarüxü̃ ta Tupanapatawa ínanayauxü̃ ga yema tomaepü̱x ga ĩã̱xarü dauruü̃gü.
25 Rü yexgumarüxü̃ ta nayayauxgü ga yema churaragüeru ga yema churaragümaxã icuáxü̃, rü naétü ga 7 ga yatügü ga ãẽ̱xgacüarü ngü̃xẽẽruü̃gü ga ĩanewa yexmagüxü̃. Rü nayayauxgü ta ga yema ãẽ̱xgacü ga ngextü̱xücügüxü̃ íyauxü̃xü̃ nax churaragü yaxĩgüxü̃ca̱x, rü naétü ga 60 ga yatügü ga ĩanewa tachigagüxü̃.
26 52:26-27 Rü nüma ga Nabucharadáü̃ rü Babiróniaanearü ãẽ̱xgacüpe̱xewa nayagagü ga guxü̃ma ga yema duü̃xü̃gü. Rü nüma ga Babiróniaanearü ãẽ̱xgacü rü Amáanearü ĩane ga Ribáwa nayexma ga yexguma. Rü nüma ga ãẽ̱xgacü rü yéma namaxã nanaxuegu nax nadaiaxü̃ca̱x. Rü yemaacü ga Yudáanecüã̱xgü rü nachixü̃anewa ínanagaxü̃.
27 Nüü̃ nadau 52:26
28 Rü yexguma 7 ga taunecü ãẽ̱xgacü yixĩxgu ga Nabucudonochó rü 3,023 nixĩ ga norü mu ga yema Yudátanüxü̃ ga Babiróniaanewa nagagüxü̃.
29 Rü yexguma 18 ga taunecü ãẽ̱xgacü yixĩxgu rü 832 nixĩ ga norü mu ga yema Yerucharéü̃cüã̱xgü ga Babiróniaanewa nagagüxü̃.
30 Rü yexguma 23 ga taunecü ãẽ̱xgacü yixĩxgu ga Nabucudonochó rü 745 nixĩ ga norü mu ga yema Yudátanüxü̃ ga Babiróniaanewa nagagüxü̃ ga Nabucharadáü̃. Rü guxü̃wama rü 4,600 nixĩ ga norü mu ga yema Babiróniaanewa nagagüxü̃.
Ãẽ̱xgacü ga Yoaquíü̃ rü ínanguxuchi
31 Yexguma 36 ga taunecü ngupetügu nax Babiróniawa nagagüxü̃ ga Yudáanearü ãẽ̱xgacü ga Yoaquíü̃, rü norü 12 ga tauemacüarü 25 ga ngunexü̃gu rü Ebí-merodáx ningucuchi nax Babiróniaanearü ãẽ̱xgacü yixĩxü̃ca̱x. Rü nüma rü Yoaquíü̃maxã namecüma rü ínanamuxũchi ga poxcupataxü̃wa.
32 Rü mea namaxã inacua̱x rü yema togü ga ãẽ̱xgacügü ga Babiróniaanegu namaxã napoxcuexü̃arü yexera nüxü̃ narüngü̃xẽxẽ.
33 Rü yemaacü ga Yoaquíü̃ rü ínacuxuchi ga yema naxchiru ga poxcupataxü̃wa nagu yacúxü̃. Rü nüma rü Babiróniaanearü ãẽ̱xgacüarü mechawa nachibü ga yexguma namaxü̃gu.
34 Rü naétü guxü̃ ga ngunexü̃gü ga nagu namaxü̃gu ga Yoaquíü̃ rü nüma ga Babiróniaanearü ãẽ̱xgacü rü wüxichigü i ngunexü̃gu nüxna nanaxã ga wüxi ga diẽru ñu̱xmata nayu̱x.
