Jeremías 6:1-30
6 ¡Pa Duü̃xü̃gü i Bẽyamíü̃anecüã̱gü, ẽcü paxa ípechoxü̃ nawa ya yima ĩane ya Yerucharéü̃ rü pibuxmü! ¡Rü pema i Tecóawa ngẽxmagüxe rü cornéta picuegü nax naxuãẽgüxü̃ca̱x i duü̃xü̃gü! ¡Rü Bex-aqueréü̃wa rü wüxi i ta̱xacüwa penangĩxichi nax wüxi i cua̱xruxü̃ i caixemaxü̃ pu̱xnagüxü̃ca̱x! Erü wüxi i taxü̃ i ãũcümaxü̃ rü nórtewaama ne naxũ.
2 6:2-3 Erü yima ĩane ya Chióü̃ ya mexẽchine rü tá nagu chapogü. Rü ñoma carnérugüarü dauruü̃gü rü muxü̃ i norü carnérugümaxã ngéma ngugüxü̃rüxü̃ tá ngéma nangugü i ngẽma norü uanügü i ãẽ̱xgacügü rü norü churaragümaxã. Rü tá nüxü̃ ínachomaeguãchi ya yima ĩane. Rü wüxichigü tá nügü ninu nachicagu.
3 Nüü̃ nadau 6:2
4 Rü ngẽma norü uanügü rü ñanagürügü: —¡Pegü ípimexẽxẽgü erü Yerucharéü̃cüã̱xgüxü̃ ta tadai! ¡Nua pexĩ, erü tocuchigu tá nixĩ i nada̱i̱xü̃! Natürü wüxi i taxü̃ i ngechaü̃ nixĩ erü marü nayáuane rü nachütachaü̃.
5 ¡Rü ngĩxã chütacü tanadai! Rü nagu tá tipogügü i ngẽma norü daxũtaechicagü —ñanagürügü.
6 Rü nüma ya Cori ya Tupana ya Guxãétüwa ngẽxmacü rü ñanagürü: —¡Nai ne pedaxü̃ rü wüxi ya toxṍõne pexü̱x nax ngẽmaãcü naxca̱x ípeyaxüãchixü̃ca̱x ya yima Yerucharéü̃! Rü yima ĩane rü poxcu tá naxca̱x ínangu erü chixexü̃maxã nayapa.
7 Rü Yerucharéü̃wa nixĩ i nangóxü̃ i chixexü̃ ñoma wüxi ya puchuwa dexá ngóxü̃rüxü̃. Rü máetachiga rü chixexü̃chigaxicatama taxĩnü i Yerucharéü̃wa. Ngéma rü yapíxexü̃ rü ngúxü̃ ingexexü̃xicatama nixĩ i chadauxü̃.
8 ¡Pa Yerucharéü̃cüã̱xgüx, nüxü̃ perüxoe i ngẽma chixexü̃ i pecümagü nax tama pexna chixũgachixü̃ca̱x! Erü ngẽxguma tama nüxü̃ perüxoegu rü choma rü tá pexü̃ íchawogü rü perü ĩane rü wüxi i chianexü̃ tá chayaxĩxẽxẽ —ñanagürü.
Cori ya Tupana rü nüxü̃ nixu nax poxcu tá ínguxü̃
9 Rü Cori ya Tupana ya Guxãétüwa Ngẽxmacü rü ñanagürü: —Ngẽma Iraétanüxü̃ i íyaxügüxü̃, rü norü uanügü rü tá guxü̃ i nachicagu naxca̱x nayadaugü ñoma úbatanügu meama úbaca̱x idauxü̃rüxü̃ ñu̱xmata taxuxü̃ma i úba ngéma yaxü natanüwa —ñanagürü.
10 Rü yexguma ga choma rü chanangãxü̃ rü nüxü̃ ñachagürü: —¿Rü texé tá choxü̃ taxĩnü i ngẽxguma namaxã chidexagu rü namaxã nüxü̃ chixuxgu i ngẽma curü ore? Erü nümagü, Pa Corix, rü nügü narüpoxtamachiẽ̱xgü rü ngẽmaca̱x taxucürüwa nüxü̃ naxĩnüe. Rü nüxü̃ nacugüe i ngẽma curü ore, erü tama norü me nixĩ.
11 Pa Corix, choma rü ta curüxü̃ poraãcüxüchi namaxã chanu i ngẽma duü̃xü̃gü i tama cuga ĩnüechaü̃xü̃. Rü tama yáxna chaxĩnü nax namaxã chanuxü̃ —ñachagürü. Rü yexguma ga nüma ga Cori ya Tupana rü ñanagürü choxü̃: —¡Ẽcü namaxã nanu i ngẽma namawa ngẽxmagüxü̃ i buxü̃gü rü ngẽma ngextü̱xü̃gütücumügü i chixexü̃gu maxẽxü̃! Rü ngẽma uanügü rü tá tüxü̃ ínayauxü̃ ya yíxema iyatüxe tümama̱xmaxã. Rü ngẽxgumarüxü̃ ta, tá tüxü̃ ínayauxü̃ ya yíxema o̱xigü rü yaxguã̱xgü.
12 Rü yima tümapatagü, rü tümaanegü, rü tümama̱xgü rü ngẽma uanügüarü tá nixĩgü. Erü tá chanapoxcu i ngẽma duü̃xü̃gü i ñaa nachixü̃anewa maxẽxü̃. Rü choma ya Cori ya Tupana nixĩ i cumaxã nüxü̃ chixuxü̃ i ngẽma —ñanagürü.
13 Rü ñanagürü: —Guxü̃ma i ngẽma muarü diẽruã́xü̃ rü ngẽma noxrearü diẽruã́xü̃, rü nagu narüxĩnüe nax chixexü̃wa nayauxgüãxü̃ i diẽru. Rü guxü̃ma i ngẽma orearü uruü̃gü rü chacherdótegü rü duü̃xü̃güxü̃ nawomüxẽxẽ.
14 Rü ngẽma chorü duü̃xü̃gü i poraãcü ngúxü̃ ingegüxü̃ rü íxrarüwatama nüxü̃ narüngü̃xẽẽgü, ñoma wüxi i o̱xri i düxétüwaxica ixüxüxü̃rüxü̃. Natürü woo guxü̃ma ãũcümaxü̃wa nangẽxmagu, rü nüma nüxü̃ yaxugüegu rü guxü̃ma name rü nataxuma i guxchaxü̃.
15 Rü name chi nax na̱xcha̱xwa naxãneexü̃ i ngẽma naxügüxü̃ i chixexü̃gü i marü tama yáxna namaxã chaxĩnüxü̃. Natürü tama naxãnee, rü marü tama nüxü̃ nacua̱xgü nax ta̱xacü yixĩxü̃ nax naxãneexü̃. Rü ngẽmaca̱x ngẽxguma chanapoxcuegu i duü̃xü̃gü, rü ngẽma orearü uruü̃gü rü chacherdótegü rü tá ta nayue. Rü chomatama ya Cori ya Tupana nixĩ i cumaxã nüxü̃ chixuxü̃ i ngẽma —ñanagürü.
Cori ya Tupana rü tá Iraétanüxü̃xü̃ napoxcue
16 Cori ya Tupana rü norü duü̃xü̃güxü̃ ñanagürü: —¡Ẽcü namagügu peyachigü rü penadauanegü! ¡Rü naxca̱x ípeca̱x rü ngexü̃rüü̃xü̃ yixĩxü̃ i ngẽma nũxcümaü̃xü̃ i nama, rü ngextá yixĩxü̃ i nangẽxmaxü̃ i ngẽma nama i mexü̃! ¡Rü ngẽmagu pexĩ rü tá petaãẽgü! —ñanagürü. Natürü nümagü rü ñanagürügü: —Tama nagu taxĩchaxü̃ —ñanagürügü.
17 Rü nüma ga Cori ya Tupana rü daxũtaeruü̃gü yexma namugü. Rü ñu̱xũchi ñanagürü nüxü̃ ga yema norü duü̃xü̃gü: —¡Ẽcü mea naxca̱x iperüxĩnüe i ngẽma ãũcümaxü̃arü cua̱xruxü̃! —ñanagürü. Natürü ga yema duü̃xü̃gü rü ñanagürügü: —Tama naga taxĩnüechaxü̃ —ñanagürügü.
18 Rü ngẽmaca̱x Cori ya Tupana rü ñanagürü: —¡Nüxü̃ pexĩnüe, Pa Togü i Nachixü̃anecüã̱xgü! ¡Rü chanaxwa̱xe i nüxü̃ pecua̱x i ngẽma chorü duü̃xü̃güxü̃ tá ngupetüxü̃.
19 ¡Pa Duü̃xü̃gü i Ñoma i Naanewa Maxẽxü̃x rü nüxü̃ pexĩnüe i ñaa ore! Rü ñaa chorü duü̃xü̃güca̱x tá íchananguxẽxẽ i wüxi i taxü̃ i guxchaxü̃ i ãũcümaxü̃, nagagu i ngẽma chixexü̃ i nagu naxĩnüexü̃. Erü tama naga naxĩnüechaü̃ i chorü ucu̱xẽgü. Rü ñu̱xũchi nüxü̃ naxoe i ngẽma chorü mugü.
20 ¿Ta̱xacüca̱x i pema rü Chabáwa cha̱u̱xca̱x ne penana i pumaragü iyixichixü̃, rü ñu̱xũchi nanetügü i yixichixü̃ i yáxü̃guxü̃ i nachixü̃anegüwa ne penaxü̃? Choma rü tama chorü me nixĩ i ngẽma perü ãmaregü i cha̱u̱xca̱x ípeguxü̃, rü woo ngẽma togümare i perü ãmaregü i choxna pexãgüxü̃ —ñanagürü.
21 Rü ngẽmaca̱x ya Cori ya Tupana rü ñanagürü: —Ngẽma duü̃xü̃gü rü guxchaxü̃ tá naxca̱x íchanguxẽxẽ. Rü ngẽma nanatügü, rü nanegü, rü ngẽma norü ngaixcamagu ãchiü̃güxü̃, rü namücügü, rü guxü̃táma wüxigu nayue —ñanagürü.
Nórtewaama ne naxĩ i uanügü i Yerucharéü̃anegu chocuxü̃
22 Rü nüma ya Cori ya Tupana rü ñanagürü: —Wüxi i naane i yáxü̃guxü̃ i nórtewa ngẽxmaxü̃ i nachixü̃ane i poraxü̃ rü nügü ínamexẽxẽ nax pexca̱x íyaxü̃ãchixü̃ca̱x.
23 Nümagü rü würamaxã, rü wocaemaxã nixãxne, rü taxúexü̃ma nangechaxü̃gü, rü taxúexü̃ma nüxü̃́ tangechaxü̃tümüü̃gü. Rü ngẽxguma yacaetanügu rü ñoma már arü yuaperüxü̃ nixĩ nax natagaxü̃. Rü nümagü rü cowaruétügu naxĩ. Rü marü ínamegümare nax Chióü̃cüã̱xgümaxã nügü nada̱i̱xü̃ca̱x —ñanagürü.
24 Rü Yerucharéü̃wa i duü̃xü̃gü rü ñanagürügü: —Marü nüxü̃ taxĩnüe i nachiga i ngẽma uanügü. Rü ngẽma nax tamuü̃exü̃ rü taturae. Rü poraãcü tangechaü̃gü, rü ngúxü̃ tingegü ñoma wüxi i ngexü̃ i íxraxacüchaü̃xü̃rüxü̃.
25 ¡Rü taxṹ i naanewa pexĩxü̃! ¡Rü taxṹ i namagüwa pexĩxü̃! Erü ngẽma uanügü rü nixãxne. Rü guxü̃wama nangẽxma i muü̃ —ñanagürügü.
26 Rü yexguma ga choma rü ñachagürü: —¡Pa Chorü Duü̃xü̃güx, ẽcü naxchiru i témüxü̃gu picu̱xgü nax ngẽmaãcü penawéxü̃ca̱x nax ngúxü̃ pingegüxü̃! ¡Rü tanimacate̱xegu pidixgü! ¡Rü pingechaü̃gü, rü taxü̃ i perü ngechaü̃maxã pexauxe ñoma nügümaxã wüxicáxü̃ i tane yu̱xgurüxü̃! Erü ngẽma tá tüxü̃ yadaixü̃ rü paxa tá nua tatanüwa nangugü —ñachagürü.
27 Rü yexguma nüma ga Cori ya Tupana rü choxü̃ ñanagürü: —Cuxü̃ chamu nax nüxü̃ cuxüxü̃ca̱x i chorü duü̃xü̃gü nax ngẽmaãcü nüxü̃ cudauxü̃ca̱x nax ta̱xacü yixĩxü̃ i nacümagü —ñanagürü.
28 Rü ñachagürü: —Pa Corix, guxü̃ma i nümagü rü tama cuga naxĩnüechaü̃. Rü duü̃xü̃gü i oregüta̱a̱xgüxü̃ i chixexü̃gu maxẽxü̃ nixĩgü. Nümagü rü ñoma bróũcherüxü̃ rü fierurüxü̃ nitaiarü maxü̃neã̱x. Rü guxü̃ma poraãcü chixexü̃ naxügü.
29 Rü ngẽxguma poraãcü yabuxgu ya üxü rü inanadexẽxẽ i plomu nax ínayixü̃ca̱x i norü ãũãchixü̃ nax aixcüma namexü̃ca̱x. Natürü ngẽma duü̃xü̃gü i chixexü̃arü üruü̃gü rü taxuwama name nax yamexẽẽgüxü̃, erü taguma nüxü̃ narüxoe i norü chixexü̃.
30 Rü ngẽmaca̱x “diẽrumüarü ãũãchixü̃gu”, tanaxüéga i ngẽma duü̃xü̃gü. Erü cumax, Pa Corix, rü marü nüxü̃ cuxo —ñachagürü.
