Jeremías 7:1-34
7 Rü nüma ga Cori ya Tupana rü Yeremíamaxã nidexa rü ñanagürü nüxü̃:
2 7:2-3 —¡Ngẽxma chopata ya taxü̃nearü ĩã̱xgu nachi rü ngéma duü̃xü̃gümaxã nüxü̃ ixu i ñaa ore! “Pa Duü̃xü̃gü i Yudátanüxü̃ i Ñaa ĩã̱xwa Ichocuxü̃ nax Corixü̃ Peyarücua̱xüü̃güxü̃ca̱x, rü dücax, rü iperüxĩnüe i norü ore ya Iraétanüxü̃arü Cori ya Tupana ya Guxü̃étüwa Ngẽxmacü! Rü nüma rü ñanagürü: ‘¡Penamexẽxẽ i perü maxü̃ rü nüxü̃ perüxoe i pecüma i chixexü̃ i chope̱xewa pexügüxü̃! Rü ngẽxguma i choma rü tá nawa pexü̃ chamaxẽxẽxẽ i ñaa naane rü taxũtáma pexü̃ íchawoxü̃.
3 Nüü̃ nadau 7:2
4 ¡Rü taxṹ i nüxü̃́ peyaxõgüxü̃ i ngẽma duü̃xü̃gü i pexü̃ womüxẽẽgüxü̃ rü ñagüxü̃: Nua Yerucharéü̃wa nangẽxma ya yima Cori ya Tupanapata ya taxü̃ne rü ngẽmaca̱x Tupana taxũtáma nanapoxcu ya daa ĩane woo chixexü̃ íxügügu, ñagüxü̃!
5 7:5-7 Natürü ngẽxguma chi penamexẽẽgu i perü maxü̃ rü nüxü̃ perüxoegu nax chixexü̃ pexügüxü̃, rü chi wüxichigü pegü pengechaü̃gügu rü aixcümaxü̃ pegümaxã pixuxgu, rü chi mea nüxü̃́ penaxütanügu i ngẽma to i nachixü̃anecüã̱xgü i pexü̃́ puracüexü̃, rü chi mea namaxã ipecua̱xgux i ngẽma taxcutagü rü yutegüxe, rü chi tama ñaa nachicagu natüca̱xmamare tüxü̃ pima̱xgu ya yíxema tama chixexü̃ ügüchiréxe, rü chi nüxü̃ perüxoegu nax nüxü̃ picua̱xüü̃güxü̃ i ngẽma tupananetachicüna̱xã i ngearü maxü̃ã́xü̃ i pegütama namaxã pechixexẽẽgüxü̃, rü ngẽxguma i choma rü tá nawa pexü̃ chamaxẽxẽxẽ i ñaa naane ga perü o̱xigüna chaxãxü̃ nax guxü̃gutáma noxrü yixĩxü̃ca̱x.
6 Nüü̃ nadau 7:5
7 Nüü̃ nadau 7:5
8 Rü pemax, Pa Yerucharéü̃cüã̱xgüx, nagu perüxĩnüe rü marü taxũtáma pexü̃ chapoxcue naxca̱x i perü chixexü̃ erü daa perü ĩanewa nangexma ya chopata. Natürü pegütama nagu pewomüxẽẽgümare i ngẽma perü ĩnü.
9 Erü pengĩ́e, rü pemáetagü, rü nai i ngexü̃maxã pemaxẽ, rü natüca̱xma chauégagu ipexuneta rü pidorae, rü Baáca̱x pumarate̱xe pigugü, rü naxca̱x pengutaque̱xegü i togü i nachixü̃anegüarü tupananetagü ga tama nüxü̃ pecuáxü̃ ga ü̃pa.
10 Rü ngẽmaétüwa rü nua chope̱xewa pengugü nawa ya daa ngutaque̱xepataxü̃ ya cha̱u̱xca̱x ixĩxü̃ne. Pema nagu perüxĩnüegu i nua rü taxuxü̃táma pexü̃ nangupetü, rü marü taxũtáma pexü̃ chapoxcu ega woo penaxügüechagu i ngẽma chixexü̃ i choma tama namaxã chataãẽxü̃.
11 ¿Ẽ̱xna nagu perüxĩnüegu ya daa ngutaque̱xepataxü̃ ya cha̱u̱xca̱x ixĩxü̃ne rü ngĩ́ta̱a̱xgüxü̃pataxü̃ nixĩ? Rü guxü̃ma i ngẽma chixexü̃ i pexüxü̃ rü nüxü̃ chadau i chomax. Rü chomatama ya Cori ya Tupana nixĩ i nüxü̃ chixuxü̃ i ngẽma.
12 Rü dücax, ípeyadau i nachica ga guma chopata ga Chilówa yexmane. Rü yema nixĩ ga nachica ga nüxíra nüxü̃ chaxunetaxü̃ nax yéma chayexmaxü̃ca̱x. ¡Rü dücax, nüxü̃ peda̱u̱x ga yema namaxã chaxüxü̃ ga yema nachica nagagu ga yema chixexü̃ ga chorü duü̃xü̃gü ga Iraétanüxü̃ ügüxü̃!
13 Rü woo mue̱xpü̱xcüna pexna chanachu̱xu ga yema pecüma ga chixexü̃, natürü pema rü tama chauga pexĩnüechaü̃, rü bai choxü̃ pengãxü̃güxü̃. Rü chomatama ya Cori ya Tupana nixĩ i nüxü̃ chixuxü̃ i ngẽma.
14 Rü ngẽmaca̱x guma chopata ga Chilówa yexmanemaxã chaxüxü̃ tátama namaxã chaxü ya daa chopata ga pexna chaxãxü̃ne rü nũxcümaü̃güxü̃ ga perü o̱xigüna chaxãxü̃ne. Rü ñu̱xma i pema rü daa chopatamaxã pegü íperüporae nax pexü̃ ínapoxü̃xü̃ca̱x.
15 Natürü choma rü chope̱xewa tá pexü̃ íchawoxü̃, Pa Yudátanüxü̃x, yexguma ü̃pa peenexẽgü ga Efraíü̃tanüxü̃xü̃ íchawoxü̃gurüxü̃’ ” —ñanagürü.
Iraétanüxü̃ rü poraãcü chixexü̃ naxügü
16 Cori ya Tupana rü Yeremíaxü̃ ñanagürü: —Cuma Pa Yeremíax, tama chanaxwa̱xe i naxca̱x cuyumüxẽ i ñaa duü̃xü̃gü. Rü tama chanaxwa̱xe i choxü̃ cuca̱a̱xü̃ rü naxca̱x choxü̃ cuchixewe. Rü tama chanaxwa̱xe i chomaxã nüxü̃ quixuecha, erü taxũtáma cuxü̃ chaxĩnü.
17 ¿Tama ẽ̱xna nüxü̃ cudau i ngẽma nümagü naxügüxü̃ i Yudáarü ĩanegüwa rü Yerucharéü̃arü namagüwa?
18 Rü ngẽma nanegü rü üxümena̱xãgü nanutaque̱xegü, rü nanatügü rü üxü ninaixẽẽgü, rü ngẽma ngexü̃gü rü arína niñumücharagü nax ngẽmaãcü paũ i maixcuraxü̃ naxügüxü̃ca̱x ngĩxca̱x i ngẽma tupananeta i “Dauxü̃guxü̃ i Naanearü Ãẽ̱xgacümaxã”, inaxugücü. Rü choxü̃ nachixeãẽgü erü tupananetagüna nanaxãgü ya bínu.
19 Natürü ngẽma nax choxü̃ nachixeãẽgüxü̃ rü naétü nügütama nachixeãẽgü rü ngẽmaãcü taxü̃ i ãne nügüca̱x ínanguxẽẽgü. Rü chomatama ya Cori ya Tupana nixĩ i nüxü̃ chixuxü̃ i ngẽma.
20 Rü ngẽmaca̱x i choma ya Cori ya Tupana ya Guxü̃étüwa Ngẽxmacü rü ñachagürü: Guxü̃ma i chorü numaxã tá taxü̃ i guxchaxü̃ naxca̱x íchanguxẽxẽ i ñaa nachica, rü duü̃xü̃gü, rü woo naxü̃nagü, rü woo naigü i naanewa rüxügüxü̃, rü nanetügü. Rü ñoma wüxi i üxüema i tama ixoxü̃rüxü̃ tá nixĩ —ñanagürü.
21 Rü yima Cori ya Tupana ya Guxü̃étüwa Ngẽxmacü ya Iraétanüxü̃arü Tupana ixĩcü rü norü duü̃xü̃güxü̃ ñanagürü: —¡Cha̱u̱xca̱x ípenagu i guxü̃ma i ãmaregü i naxü̃nagü i ípeguxchaü̃xü̃, rü ñu̱xũchi penangõ̱x i ngẽma namachi!
22 Natürü yexguma Equítuanewa íchanagaxü̃gu ga yema nũxcümaü̃güxü̃ ga perü o̱xigü, rü tama namaxã nüxü̃ chixu rü tama chanamu nax ãmare choxna naxãgüxü̃ca̱x rüe̱xna cha̱u̱xca̱x ínagugüaxü̃ca̱x ga naxü̃nagü.
23 Natürü yema namaxã nüxü̃ chixuxü̃ nixĩ nax chauga naxĩnüexü̃ca̱x nax ngẽmaãcü i choma rü norü Tupana chixĩxü̃ca̱x, rü ñu̱xũchi i nümagü rü chorü duü̃xü̃gü yaxĩgüxü̃ca̱x. Rü yema namaxã nüxü̃ chixuxü̃ nixĩ nax choma chanaxwa̱xexü̃ãcü namaxẽxü̃ nax yemaacü mea nüxü̃ nangupetüxü̃ca̱x.
24 Natürü ga nümagü rü tama chauga naxĩnüe, rü bai nax choxü̃́ inaxĩnüexü̃, natürü nanueama rü norü ngúchaü̃gü i chixexü̃güweama narüxĩ. Rü tama cha̱u̱xca̱x nawoegu. Rü choxna naxãgüca̱xweama.
25 Rü yexguma Equítuanewa íchanagaxü̃gucürüwa ñu̱xmata ñoma i ngunexü̃wa nangu rü pexca̱x ngéma chanamugüecha i muxü̃ma i chorü duü̃xü̃gü i orearü uruü̃gü.
26 Natürü ga pemax rü tama chauga pexĩnüexü̃ rü tama choxü̃́ ipexĩnüechaü̃, rü yema nũxcümaü̃güxü̃ ga petanüxü̃arü yexera chomaxã penue rü chixri pemaxẽ —ñanagürü.
27 Rü choxü̃ ñanagürü: —¡Rü cumax, Pa Yeremíax, ẽcü ngẽma duü̃xü̃gümaxã nüxü̃ ixu i guxü̃ma i ngẽma cumaxã nüxü̃ chixuxü̃, woo tama cuga naxĩnüegu! ¡Rü nataga woo tama cuxü̃ nangãxü̃gügu!
28 ¡Rü namaxã nüxü̃ ixu rü ñanagürü nüxü̃! “Ñaa nixĩ i ngẽma nachixü̃ane i tama norü Cori ya Tupanaga ĩnüexü̃ rü tama naxwa̱xexü̃ nax texé naxucu̱xẽxü̃. Rü norü duü̃xü̃gü rü marü tama naã̱xwa ínaxũxũ i ore i aixcüma ixĩxü̃”, ñacurügü nüxü̃ —ñanagürü.
Yerucharéü̃wa rü tupananetachicüna̱xãgüxü̃ nicua̱xüü̃gü
29 ¡Pa Yerucharéü̃cüã̱xgü, pegü ípeyoeyaegü, rü ípenawogü! ¡Rü ñu̱xũchi ínachianexü̃wa i ngüchitaeruxü̃güwa wüxi i ngechaü̃arü wiyaegu peyawiyaegü! Erü Cori ya Tupana rü pemaxã nanu, rü pexü̃ ínawogü, rü pexü̃ naxo.
30 Rü Cori ya Tupana rü ñanagürü: —Ngẽma duü̃xü̃gü i Yudátanüxü̃ rü taxü̃ i chixexü̃maxã choxü̃ nanuxẽẽgü. Rü daa chopatagu nananucu ga naxchicüna̱xãgü i nawa chanaxoégaxü̃. Rü yemaacü taxü̃ ga chixexü̃ rü ãũãchixü̃ chopatawa naxügü.
31 Rü naétü ga yema chixexü̃ ga naxügüxü̃, rü Ben-inóü̃arü doxonexü̃gu ga Tópegu rü norü tupananetaca̱x nanaxügü ga wüxi ga ãmarearü guruxü̃ nax yéma nanegü rü naxacügü tüxü̃ ínaguxü̃ca̱x. Rü choma rü tama chanamu nax yema naxügüxü̃, rü bai ga chorü ĩnüwa nagu charüxĩnüxü̃.
32 Rü ngẽmaca̱x i choma ya Cori ya Tupana rü nüxü̃ chixu nax nawa tá nanguxü̃ i ngunexü̃ i taxũtáma marü nagu Ben-inóü̃gu naxãégaxü̃ i ngẽma nachica. Rü Máetaarü Doxonexü̃gu tá naxãéga. Rü Tópegu tá nixĩ i tüxü̃ nata̱xgüxü̃ ya yíxema yuexe erü nataxutama i to i nachica.
33 Rü tümaxü̃negü ya yíxema yuexe rü ngurucugüwemü rü naeü̃gü i idüraexü̃wemü tá nixĩgü. Rü taxúetama ya texé tayabuxmüxẽxẽ i ngẽma ngurucugü rü ngẽma naeü̃gü i tüxü̃ ngõ̱xgüxü̃ ya yíxema yuexe.
34 Rü ngẽma Yudáanearü ĩanegüwa rü Yerucharéü̃arü namagüwa tá ichayanaxoxẽxẽ nax nagu nawiyaegüxü̃ i petaarü wiyaegü, rü taãẽarü wiyaegü, rü ngĩgüarü wiyaegü. Rü guxü̃táma i ngẽma nachixü̃ane rü wüxi i chianexü̃mare tá nixĩ —ñanagürü.
