Jeremías 8:1-22
8 Cori ya Tupana rü nüxü̃ nixu rü ñanagürü: —Ngẽma ngunexü̃gügu rü ngẽma Yudáanearü uanügü rü naxmaxü̃wa tá nanade ya naxchina̱xãgü ga yema Yudáanearü ãẽ̱xgacügü, rü naxchina̱xãgü ga yema Yudátanüxü̃maxã icua̱xgüxü̃, rü naxchina̱xãgü ga yema chacherdótegü, rü naxchina̱xãgü ga yema orearü uruü̃gü, rü ñu̱xũchi naxchina̱xãgü ga yema Yerucharéü̃gu ãpatagüxü̃.
2 Rü ñu̱xũchi nüma i uanügü rü yima naxchina̱xãgü ga yema duü̃xü̃gü rü ü̱a̱xcüemagu, rü tauemacüemagu, rü guxü̃ma i ẽxtagüemagu tá nayapagü, yerü yema duü̃xü̃gü rü üa̱xcüxü̃ rü tauemacüxü̃ rü ẽxtagüxü̃ nixĩ ga nangechaxü̃güxü̃, rü nüxü̃́ napuracüexü̃, rü nawe naxĩxü̃, rü namaxã yadexagüxü̃, rü ñu̱xũchi nüxü̃ yacua̱xüü̃güxü̃. Rü taxúetama tanade ya yima naxchina̱xãgü nax itanata̱xgüxü̃ca̱x. Rü ngẽmaãcü tá ñoma naü̃rüxü̃ waixü̃müxü̃ nixũ.
3 Rü ngẽma duü̃xü̃gü i chixexü̃ ügüxü̃ i ñu̱xma maxẽxü̃wa íyaxügüxü̃, rü choma rü tá to i nachixü̃anegu chanawoone. Rü ngẽma ínachamugüxü̃wa rü tá nagu narüxĩnüe rü chi narümemae ga noxtacüma nax nayuexü̃ rü tama namaxẽxü̃. Rü chomatama ya Cori ya Tupana ya Guxãétüwa Ngẽxmaxe nixĩ i nüxü̃ chixuxü̃ i ngẽma ore —ñanagürü.
Tupana rü Iraétanüxü̃xü̃ napoxcu norü chixexü̃gügagu
4 Cori ya Tupana rü Yeremíaxü̃ ñanagürü: —Cuma Pa Yeremíax, ¡chauégagu duü̃xü̃gümaxã nüxü̃ ixu i ñaa ore! “Rü ngẽxguma wüxíe iyanguxgu, rü wena itachi. Rü ngẽxguma namana ítaxücugu, rü tügü tataegu naxca̱x i nama i noxri nagu tixũxü̃.
5 Pa Iraétanüxü̃x ¿ta̱xacüca̱x chixri choxna pemaxẽ? Pa Yerucharéü̃cüã̱xgüx, ¿ta̱xacüca̱x choxna pixĩgachi? Pema rü nawe perüxĩ i ngẽma dora ixĩxü̃, rü tama cha̱u̱xca̱x pewoeguchaü̃.
6 Rü pegaca̱x meama icharüxĩnü, natürü taxúexü̃ma chaxĩnü nax texé chomaxã nüxü̃ ixuxü̃ nax nüxü̃ tarüxoxü̃ i tümaarü chixexü̃. ¡Rü chomaxã nüxü̃ tixu nax ta̱xacürü guxchaxü̃ yixĩxü̃ i pemaxã chaxüxü̃! Rü guxü̃ma rü napaxaãxẽ nax chixexü̃ naxüxü̃, ñoma cowaru i paxãma daiwa ñaxü̃rüxü̃.
7 Rü woo ngẽma cówa i dauxü̃gu iñaxü̃ rü nüxü̃ nacua̱x nax ñuxgu tá íyaxexü̃ i dexá. Rü ngẽma muxtucugü, rü ngẽma chirugü, rü ngẽma togü i werigü rü nüxü̃ nacua̱xgü nax ñuxgu tá to i nachicawa naxĩxü̃. Natürü i pema, Pa Chorü Duü̃xü̃güx, rü tama nüxü̃ pecua̱xgü i ngẽma chorü mugü rü tama chauga pexĩnüe.
8 ¿Rü ñuxãcü i pema rü nüxü̃ pixugüxü̃ nax nüxü̃ picuáxü̃, rü pexü̃́ nangẽxmaxü̃ i chorü mugü? Erü ngẽma chorü mugü ümatügüxü̃ rü chixri nanaxümatügü rü ínayatõxẽẽgü.
9 Natürü ngẽma nüxü̃ icuáxü̃ rü tá naxãnee, rü tá namuü̃e ñoma naeü̃ i yütagu nguxü̃rüxü̃. ¿Rü ngexü̃ i perü cua̱x i ñu̱xma nax tama penayauxgüxü̃ i ngẽma chorü ore?
10 Rü ngẽmaca̱x ya yíxema naxma̱xgü rü togü i yatügüna tá tüxü̃ chamugü, rü ñu̱xũchi ngẽma norü naanegü rü togüna tá chanana. Erü guxü̃ma i ngẽma muarü diẽruã́xü̃ rü ngẽma noxrearü diẽruã́xü̃, rü nagu narüxĩnüe nax chixexü̃wa nayauxgüãxü̃ i diẽru. Rü woo ngẽma orearü uruü̃gü, rü ngẽma chacherdótegü rü guxü̃ma womüxẽẽgu namaxẽ.
11 Rü ngẽma chorü duü̃xü̃gü i poraãcü ngúxü̃ ingegüxü̃ rü íxrarüwatama nüxü̃ narüngü̃xẽẽgü, ñoma wüxi i o̱xri i düxétüwaxica ixüxüxü̃rüxü̃. Natürü woo guxü̃ma ãũcümaxü̃wa nangẽxmagu, rü nüma nüxü̃ yaxugüegu rü guxü̃ma name rü nataxuma i guxchaxü̃.
12 Rü name chi nax naxcha̱xwa naxãneexü̃ i ngẽma naxügüxü̃ i chixexü̃gü i marü tama yáxna namaxã chaxĩnüxü̃. Natürü tama naxãnee, rü marü tama nüxü̃ nacua̱xgü nax ta̱xacü yixĩxü̃ nax naxãneexü̃. Rü ngẽmaca̱x ngẽxguma chanapoxcuegu i duü̃xü̃gü, rü ngẽma orearü uruü̃gü rü chacherdótegü rü tá ta nayue. Rü chomatama ya Cori ya Tupana nixĩ i nüxü̃ chixuxü̃ i ngẽma” —ñanagürü.
13 Rü nüma ya Cori ya Tupana rü ñanagürü: —Ñoma trigu iyarüxoxẽẽxü̃rüxü̃ tá chayanaxoxẽxẽ i ngẽma chorü ngü̃xẽxẽ ga noxri chorü duü̃xü̃güna chaxãxü̃. Rü taxuxü̃táma i úba ínayaxü i norü úbanecügüwa, rü bai tá i wüxi i igu íyaxüxü̃ i norü igunecüwa. Rü naatügü i rüngẽ̱xẽgüxü̃xica tátama ínayaxügü —ñanagürü.
14 Rü ngẽma duü̃xü̃gü rü ñanagürügü tá: —¿Rü ta̱xacüca̱x nuatama tangexmagü? ¡Ngĩxã rü yima ĩanegü ya ípoxegugünewa taxĩ i guxãma i yixema nax ngẽxma wüxicana tüxü̃ nada̱i̱xü̃ca̱x! Rü nüma ya Cori ya tórü Tupana rü dexá i üxü̃chiüxü̃wa tá tüxü̃ nixaxexẽẽgü, rü ngẽmaãcü tá tüxü̃ nadai, erü nape̱xewa chixexü̃ taxügü.
15 Rü yixema rü ítayangu̱xẽẽgü nax mexü̃ taxca̱x ínguxü̃, natürü taxuxü̃ma i mexü̃ taxca̱x ínangu. Rü ítayangu̱xẽẽgü nax nataxuxü̃ i guxchaxü̃gü, natürü muü̃xíca nangẽxma.
16 Rü marü yea ne naxĩ i uanügü. Rü ñu̱xmata Dáü̃anegu nüxü̃ taxĩnü nax ngéma ne nangü̃xnetanüxü̃ i norü cowarugü. Rü ngẽxguma yacagügu rü naxĩã̱xãchi i guxü̃ i naane. Rü nua naxĩ nax yanaxoxẽẽgüãxü̃ca̱x i ñaa tachixü̃ane, guxü̃ma i norü ngẽmaxü̃gü, rü norü ĩanegü, rü guxãma ya yíxema ya nagu ãchiü̃güxe —ñanagürügü.
17 Rü nüma ya Cori ya Tupana rü ñanagürü: —Petanüwa tá chanamugü i ãxtapegü i idüraexü̃ i pexü̃ tá ngõ̱xcuxü̃. Ngẽmagü rü taxuacütáma yuüxü̃ nayaxĩgachitanüxẽxẽ —ñanagürü.
Yeremía rü norü duü̃xü̃güca̱x ngúxü̃ ninge
18 Rü ngẽma ngúxü̃ i chingexü̃ rü nangearü üxüxü̃ã̱x, rü yima chorü maxü̃ne rü natura.
19 Rü ngẽma nax aixta naxüexü̃ i chorü duü̃xü̃gü rü guxü̃ i tachixü̃anegu nüxü̃ taxĩnü. Rü ñanagürügü: —Marü tama Chióü̃wa nangẽxma ya Cori ya Tupana. Rü marü nataxuma ya yima tachixü̃anearü ãẽ̱xgacü —ñanagürügü. Rü Cori ya Tupana nanangãxü̃ rü ñanagürü: —¿Tü̱xcüü̃ choxü̃ pinuxẽxẽ namaxã nax nüxü̃ picua̱xüü̃güxü̃ i ngẽma naxchicüna̱xãgü i tupananetagü i taxuwama mexü̃ i to i nachixü̃anearü ixĩxü̃? —ñanagürü.
20 Rü marü nangupetü ya tauemacügü nax nangu̱xetüechaxü̃ ya üa̱xcü, rü marü nagu̱x i nanetügüarü buxgü, natürü nataxuma i ta̱xacürü mexü̃ i taxca̱x ínguxü̃.
21 Rü poraãcü choxü̃ nangu̱x nax ngúxü̃ yangegüxü̃ i chorü duü̃xü̃gü. Rü ngẽma ngechaü̃ rü muü̃ choxna nangu.
22 ¿Rü nataxuma e̱xna i üxüxü̃ i Garaáxanewa? ¿Rü ngéma rü tataxuma e̱xna ya texé ya naxüxü̃xẽ? ¿Rü ta̱xacüca̱x tama naxca̱x nitaanegüchaü̃ i ngẽma chorü duü̃xü̃gü?
