Jeremías 9:1-26
9 Choma rü ngunecü rü chütacü naxca̱x chaxauxecha i ngẽma chorü duü̃xü̃gü i yuexü̃. Rü chierü ñoma wüxi i dexá i íchuxchuechaxü̃rüxü̃ yixĩxgu i chauxgüxü̃etü.
2 Rü chierü ngextá ínachianexü̃wa choxü̃́ nangẽxmagu i wüxi i nachica nax ngẽxma chaxãpataxü̃ca̱x nax ngẽmaãcü chorü duü̃xü̃güna yáxü̃wa changexmaxü̃ca̱x. Erü guxü̃ma chixexü̃gu namaxẽ, rü duü̃xü̃gü i naechitamare maxẽxü̃ nixĩgü.
3 Rü guxü̃guma ínamegümare nax doraxü̃ yaxugüxü̃ca̱x ñoma wüxi ya würamaxã chuxchigü inamaxgüxü̃rüxü̃. Ngẽma nachixü̃anewa rü nataxüchi i dora rü bai i mexü̃. Rü yexeraãcü chixexü̃wa naxĩ. Rü nümatama ya Cori ya Tupana rü ñanagürü: —Chorü duü̃xü̃gü rü marü tama choxü̃ nacua̱xgüchaü̃ —ñanagürü ya Cori ya Tupana.
4 Rü wüxichigü i pema rü pegüna pedaugü nax tama pexü̃ nawomüxẽẽxü̃ca̱x i pemücü. Rü woo i peenexẽxü̃chi rü tama name i nüxü̃́ peyaxõgü. Erü guxü̃ma i ngẽma peenexẽgü rü nawomüxẽẽwa̱xegü. Rü guxü̃ma i pemücügü rü chixri pechiga nidexagü.
5 Rü wüxichigü i duü̃xü̃ rü nügü nawomüxẽẽgü, rü nataxuma i aixcümaxü̃ ixuxü̃. Rü nagu naxãcümagü nax doraxü̃ yaxugüexü̃. Rü chixexü̃gu namaxẽ, rü nataxuma nax mexü̃ naxügüxü̃.
6 Rü Cori ya Tupana rü ñanagürü —Cumax, Pa Yeremíax, rü duü̃xü̃gü i womüxẽẽgüwa̱xexü̃tanüwa cungexma. Rü ngẽma doragu nax namaxẽxü̃gagu tama choxü̃ nacua̱xgüchaü̃.
7 Rü ngẽmaca̱x i choma ya Cori ya Tupana rü ñachagürü: “¿Ta̱xacü chi i to i namaxã chaxüxü̃ i ngẽma chorü duü̃xü̃gü nax nüxü̃ naxoexü̃ca̱x i norü chixexü̃? Rü ñu̱xma rü tá taxü̃ i guxchaxü̃ naxca̱x íchanguxẽxẽ nax ngẽmaãcü nüxü̃ naxoexü̃ca̱x i ngẽma chixexü̃ i nagu namaxẽxü̃.
8 Rü yima norü conügü rü ñoma chuxchigü i ãũcümaxü̃rüxü̃ nixĩgü, rü yexü̃cürü doraxü̃ nixugüecha. Rü mea namücügüxü̃ narümoxẽgüneta, natürü naãẽwa nagu narüxĩnüe nax chixexü̃gu tüxü̃ nangu̱xẽẽgüxü̃.
9 Rü ngẽmaca̱x i choma rü tá chanapoxcue i ngẽma duü̃xü̃gü naxca̱x i ngẽma chixexü̃ i chope̱xewa naxügüxü̃. Erü ngẽma poxcu nixĩ i nüxna üxü̃ naxca̱x i norü chixexü̃. Rü choma ya Cori ya Tupana rü chanaxuegu nax aixcüma tá chanaxüxü̃ i ngẽma” —ñanagürü.
10 Rü duü̃xü̃gü rü yima ma̱xpǘnegüca̱x rü wocachitaü̃güca̱x naxaxu rü ningü̃necüü, erü nixae rü marü taxúema ngéma taxüpetü. Rü marü taxuxü̃ma i wocagaxü̃ taxĩnü. Rü werigü rü naeü̃gü i idüraexü̃ rü nibuxmü.
11 Rü Tupana rü ñanagürü: —Nutagüxü̃ tá chayanguxuchixẽxẽ ya Yerucharéü̃, rü wüxi i ngowagüarü pegüchicaxü̃ tá chayaxũxẽxẽ. Rü yima Yudáanearü ĩanegü rü chianexü̃xü̃ tá chananguxuchixẽxẽ, rü taxuxü̃táma i duü̃xü̃gü nawa namaxẽ —ñanagürü.
12 ¿Texé tixĩ ya nüxü̃ cua̱xüchixe nax ngẽmaãcü nüxü̃ tacuáxü̃ca̱x i ngẽma tá ngupetüxü̃? ¿Rü texéxü̃ nixĩ i nüxü̃ nacua̱xẽxẽxü̃ ya Cori ya Tupana i guxü̃ma i ngẽma tá ngupetüxü̃ nax ngẽmaãcü togümaxã nüxü̃ tixuxü̃ca̱x? ¿Rü ta̱xacüca̱x yixĩxü̃ i chixexü̃wa nangẽxmaxü̃ i ñaa nachixü̃ane? ¿Rü ta̱xacüca̱x yixĩxü̃ i ñoma chianexü̃ i taxúema nawa üpetüxü̃rüxü̃ yixĩxü̃?
13 Rü nüma ya Cori ya Tupana rü nanangãxü̃ rü ñanagürü: —Guxü̃ma ga yema rü nangupetü yerü nüma ga Iraétanüxü̃ rü tama naga naxĩnüe ga yema mugü ga choma nüxna chaxãxü̃, rü tama chauga naxĩnüe, rü ñu̱xũchi tama nagu namaxẽ ga yema mugü.
14 Rü nümagü rü norü ngúchaü̃ i chixexü̃güweama narüxĩ, rü nanatügü nangúexẽẽxü̃rüxü̃ tupananeta i Baáchicüna̱xãgüwe narüxĩ.
15 Rü ngẽmaca̱x i choma ya Cori ya Tupana ya Guxãétüwa Ngẽxmacü ya Iraétanüxü̃arü Tupana rü ñachagürü: “Choma rü tá õna i üxüxü̃ tá nüxü̃ changõ̱xẽxẽ, rü dexá i nawa iyuxü̃wa tá chayaxaxexẽxẽgü.
16 Rü nagu tá chanawoone i nachixü̃anegü i nümagü rü nanatügü rü woo norü o̱xigü tama nüxü̃ cua̱xgüxü̃. Rü norü uanügü rü taramaxã tá nawe changegüxẽxẽ nax nadaiaxü̃ca̱x nax ngẽmaãcü bai i wüxi íyaxüxü̃ca̱x” —ñanagürü ga Cori ya Tupana.
Yerucharéü̃wa rü ngechaü̃maxã naxauxe i duü̃xü̃gü
17 Rü Cori ya Tupana ya Guxãétüwa Ngẽxmacü rü ñanagürü: —¡Iperüxĩnüe! ¡Rü naxca̱x peyacagü i ngẽma ngexü̃gü i nüxü̃ cua̱xgüxü̃ nax mea naxauxexü̃! —ñanagürü.
18 ¡Rü paxãma nua naxĩ, rü taxca̱x nua yaxauxe nax ngẽmaãcü i yíxema rü ta ixauxexü̃ca̱x rü taxgüxü̃xetümaxã napaxü̃ca̱x ya taxetügü rü tachipaxetügü!
19 Rü Chióü̃gu nüxü̃ taxĩnü i naga i duü̃xü̃gü nax aixta naxüexü̃ namaxã nax ngúxü̃ yangegüxü̃. Rü ñaãcü aixta naxüe: Taxü̃ i ngechaü̃wa tangexmagü erü tórü ĩane rü nachitaxü̃xica ínayaxü. Rü ngẽmaca̱x poraãcü taxãnee. Rü ñu̱xma i tórü uanügü rü tachixü̃anena to i nachixü̃anewa tá tüxü̃ nagagü. Rü tapatagü rü nachitaxü̃xica ngéma nayaxügü.
20 Pa Ngexü̃güx, ¡iperüxĩnüe i ngẽma Cori ya Tupanaarü ore, rü iperüxĩnüe i ngẽma nüxü̃ yaxuxü̃! ¡Rü penangúexẽxẽ i pexacügü nax naxauxexü̃! ¡Rü ngẽxgumarüxü̃ ta pemücügüxü̃ pengúexẽxẽ nax ñaãcü ngechaü̃ãcü naxauxexü̃!
21 —Ngẽma yu rü tapatagüwa nangu, rü tórü ãẽ̱xgacügüpatawa nangu. Rü ngẽma uanügü rü namagügu tüxü̃ nadai ya buxegü, rü ñu̱xũchi plázagügu nanadai i ngextü̱xüxü̃gü.
22 Rü tümaxü̃negü ya duü̃xẽgü rü ñoma naü̃rüxü̃ naanewa ninuamare ñoma trigu i ngẽma yachexexü̃we iyietanüxü̃ rü taxúema dexü̃rüxü̃ —ngẽmaãcü ngechaü̃ãcü naxauxe. Rü nümatama ya Cori ya Tupana nixĩ i nüxü̃ yaxuxü̃ i ngẽma ore.
23 Rü nüma ya Cori ya Tupana rü ñanagürü: —Yíxema cua̱x tüxü̃́ ngẽxmaxe rü tama name i tügü namaxã ticua̱xüxü̃ i ngẽma tümaarü cua̱x. Rü woo yíxema nüxü̃ cuáxe nax duü̃xü̃gümaxã itacuáxü̃ rü tama name i ngẽmamaxã tügü ticua̱xüxü̃. Rü woo ya yíxema diẽruã́xẽ rü tama name i tümaarü diẽrumaxã tügü ticua̱xüxü̃.
24 Natürü ngẽxguma texé tügü icua̱xüxü̃chaü̃gu rü name i tügü ticua̱xüxü̃ naxca̱x nax choxü̃ tacuáxü̃. Rü ẽcü tügü ticua̱xüxü̃ naxca̱x nax nüxü̃ tacuáxü̃ nax choma nax tümaarü Cori ya Tupana chixĩxü̃ rü ñoma i naanewa nüxü̃ changechaü̃xü̃ i duü̃xü̃gü rü mea namaxã nax ichacuáxü̃ rü aixcüma nawe̱xguxü̃ i chorü ĩnü. Rü ngẽma nixĩ i namaxã chataãẽxü̃. Rü chomatama ya Cori ya Tupana nixĩ i nüxü̃ chixuxü̃ i ngẽma —ñanagürü.
25 Rü nüma ya Cori ya Tupana rü nüxü̃ nixu rü ñanagürü: —Tá inangu i ngunexü̃ i nagu chanapoxcuexü̃ i guxü̃ma i duü̃xü̃gü i nügü iwiü̃cha̱xmüü̃pe̱xechiraü̃gümarexü̃ natürü tama chauga ĩnüexü̃.
26 Rü ngẽmaãcü tá chanapoxcue i ngẽma Equítuanecüã̱xgü, rü Yudátanüxü̃, rü Edóü̃tanüxü̃, rü Amóü̃tanüxü̃, rü Moátanüxü̃, rü ñu̱xũchi guxü̃ma i ngẽma duü̃xü̃gü i ínachianexü̃wa maxẽxü̃ rü nügü idüerugüxü̃ i nügü iwiü̃cha̱xmüü̃pe̱xechiraü̃gümarexü̃ natürü tama chauga ĩnüexü̃. Rü tá chanapoxcue i guxü̃ma i ngẽma Iraétanüxü̃ erü chixexü̃gu namaxẽ rü tama chauga naxĩnüe —ñanagürü.
