Jonás 1:1-17
1 Nüma ga Cori ya Tupana rü Amitái nane ga Yonámaxã nidexa rü ñanagürü:
2 —¡Ẽcü inaxũãchi rü nawa naxũ ya yima ĩane ya taxü̃ne ya Nínibe rü norü duü̃xü̃gümaxã nüxü̃ ixu rü tá chanapoxcue! Erü chauxü̃tawa nanguchiga nax poraãcü chixexü̃ naxügüxü̃ —ñanagürü.
3 Natürü nüma ga Yoná rü tama Tupanaga naxĩnü, rü naxca̱x nadau nax ñuxãcü naxcha̱xwa yaxũxü̃. Rü yemaca̱x Yópearü türewa naxũ, rü yexma nüxü̃ inayangau ga wüxi ga wapuru ga ixũãchichaxü̃ne ga Tárchixwa ũxũne. Rü gumawa nanaxütanü nax yexma yaxũxü̃ca̱x.
4 Natürü nüma ga Cori ya Tupana rü wüxi ga buanecü ga tacü inanaxǘxẽxẽ ga yexguma már arü ngãxü̃tüwa nanguxgu. Rü guma wapuru rü ñoma yapuxchaü̃xü̃rüxü̃ nixĩ, yerü nataxüchi ga yuape.
5 Rü yema norü duü̃xü̃gü ga guma wapuru rü poraãcü namuü̃e, rü yemaca̱x wüxichigü norü tupanaarü ngü̃xẽẽca̱x ínaca. Rü yema nax iyangüãchixü̃ca̱x ga guma wapuru rü ínanawoxü̃ ga guxü̃ma ga yema naãcu. Natürü nüma ga Yoná rü guma wapuruarü aixepegu naxücu rü yéma nayape.
6 Rü nüma ga wapuruarü capitáü̃ rü yéma Yoná ípexü̃wa naxũ rü ñanagürü nüxü̃: —¿Ta̱xacü ngéma cuxü Pa Pexwa̱xexü̃x? ¡Írüda rü curü Tupanana naca! Rü bexmana nüxü̃́ ingechaü̃tümüxü̃gü nax tama iyuexü̃ca̱x —ñanagürü.
7 Rü yoxni ga yema norü duü̃xü̃gü ga guma wapuru rü nügümaxã ñanagürügü: —Ngĩxã tanañanagü i wüxi i diẽru nax ngẽmaãcü nüxü̃ icuáxü̃ca̱x nax texégagu yixĩxü̃ nax guxchaxü̃ tüxü̃ ngupetüxü̃ —ñanagürügü. Rü nanañanagügü, rü Yonágu nangu nax nagagu yixĩxü̃ ga yema nüxü̃ ngupetüxü̃.
8 Rü nümagü rü nüxna nacagüe rü ñanagürügü nüxü̃: —¡Tomaxã nüxü̃ ixu rü ta̱xacüca̱x nixĩ i taxca̱x ínanguxü̃ i ñaa guxchaxü̃! ¿Rü ta̱xacü nixĩ i curü puracü i naxca̱x nua cuxũxü̃? ¿Rü nge̱xtácüã̱x quixĩ? ¿Rü ta̱xacü nixĩ i cuchixü̃ane? ¿Rü ta̱xacürü duü̃xü̃ quixĩ? —ñanagürügü.
9 Rü nüma ga Yoná rü nanangãxü̃ rü ñanagürü: —Choma rü Iraétanüxü̃ chixĩ. Rü Cori ya Tupana i daxũguxü̃ i naanearü üruxü̃ rü már arü üruxü̃ rü ñoma i naanearü üruü̃axü̃́ nixĩ i chayaxõxü̃ rü nüxü̃ chicua̱xüxü̃ —ñanagürü.
10 Rü ñu̱xũchi nüma ga Yoná rü meama guma wapuruarü duü̃xü̃gümaxã nüxü̃ nixu nax Cori ya Tupanacha̱xwa nax yaxũxü̃. Rü yexguma yemaxü̃ naxĩnüegu ga nümagü, rü nüxü̃ nadaugü ga yema már ga nax yexeraãcü nayuapexü̃, rü poraãcü namuü̃e. Rü nüxna nacagüe rü ñanagürügü:
11 —¿Tü̱xcüü̃ ngẽmaãcü cunaxü? ¿Rü ta̱xacü tá cumaxã taxüexü̃ i ñu̱xmax nax íyachaxãchixü̃ca̱x ya yima yuape? —ñanagürügü.
12 Rü nüma ga Yoná rü nanangãxü̃ rü ñanagürü: —¡Ẽcü choxü̃ ípetáe nachiü̃wa i ñaa már! Rü ngẽxguma rü tá ínayachaxãchi ya yuape. Rü choma rü nüxü̃ chacua̱x nax chaugagu yixĩxü̃ ya daa buanecü ya tacü i nuxã pexü̃ naxüxü̃ —ñanagürü.
13 Rü nümagü ga yema wapuruarü duü̃xü̃gü rü poraãcü inixãgü nax naxãnacüwa nangugüxü̃ca̱x, natürü tama yéma nangugü yerü ga már rü yexeraãcü poraãcü nayuape.
14 Rü yexguma ga nümagü rü Cori ya Tupanana nacagüe rü ñanagürügü: —Pa Cori Pa Tupanax ¡Taxṹ i nuxã toxü̃ cuyuexẽxẽxü̃ nagagu i ñaa yatü! Rü ngẽxguma chi taxuxü̃ma i chixexü̃ naxü̱xgux rü ¡taxṹ i cuyatoguãchixẽxẽxü̃ nax nayuxü̃! Erü cumax, Pa Corix, Pa Tupanax, rü cunaxü i ta̱xacü i cuma cunaxwa̱xexü̃ãcüma —ñanagürügü.
15 Rü yema ñagüguwena rü márwa Yonáxü̃ nataegu, rü ínayachaxãchi ga yuape.
16 Rü yexguma yemaxü̃ nadaugügu ga yema wapuruarü duü̃xü̃gü rü poraãcü Cori ya Tupanaxü̃ nicua̱xüü̃gü rü naxca̱x nayama̱xgü ga wüxi ga naxü̃na rü nayagugü. Rü Tupanamaxã inaxunetagü nax naga tá naxĩnüexü̃.
17 Rü yoxni ga nüma ga Cori ya Tupana rü yéma nanamu ga wüxi ga choxni ga taxüchixü̃ nax Yonáxü̃ ínagaxü̃ca̱x. Rü nüma ga Yoná rü tomaepü̱x ga ngunexü̃ rü tomaepü̱x ga chütaxü̃ yema choxni ga taxüchixü̃ãnüwa nayexma.
