Jonás 4:1-11
4 Rü tama Yonáãẽwa name ga yema mexü̃ ga Nínibecüã̱xmaxã naxüxü̃ ga Tupana rü poraãcü nanu.
2 Rü yemaca̱x ñaãcü nayumüxẽ: —Dücax, Pa Cori Pa Tupanax, rü ngẽma ñu̱xma Nínibewa ngupetüxü̃ nixĩ ga yema nüxü̃ chixuxü̃ ga yexguma chauchixü̃anewatama chayexmagu. Rü yemaca̱x nixĩ ga cuxcha̱xwa chixũxü̃táa̱x nax Tárchixwa chaxũxü̃ca̱x, yerü nüxü̃ chacua̱x rü cuma rü wüxi ya Tupana ya mecümacü rü ngechaü̃wa̱xecü quixĩ rü tama paxa cunu. Rü ngẽma curü ngechaü̃ rü nataxüchi. Rü ngẽmaca̱x woo texémaxã poxcu cuxuegu̱xgu rü paxãma nagu curüxĩnü, rü tama tüxü̃ cupoxcu ega nüxü̃ tarüxoegu i tümacüma i chixexü̃.
3 Rü ngẽmaca̱x Pa Cori Pa Tupanax, rü chanaxwa̱xe nax noxtacüma choxna cunayaxuxü̃ i ñaa chorü maxü̃. Erü cha̱u̱xca̱x narümemae nax chayuxü̃ rü tama nax chamaxechaxü̃ —ñanagürü.
4 Natürü nüma ga Cori ya Tupana rü nanangãxü̃ rü ñanagürü: —¿Cuxü̃́ namexü̃ nax ngẽmaãcü cunuxü̃? —ñanagürü.
5 Rü nüma ga Yoná rü ínaxũxũ nawa ga guma ĩane. Rü guma ĩanearü éstewaama naxũ rü yexma nanaxü ga norü düxenü ga naixatünaxca̱x. Rü yéma nüxü̃ nadawenü rü tá ta̱xacü nüxü̃ ngupetü ga guma ĩane.
6 Rü nüma ga Tupana rü naxca̱x yéma nanaxüxẽxẽ ga wüxi ga nanetü ga ãátüxü̃ nax yemamaxã naga̱u̱xchipetaxü̃ca̱x, rü tama nangechaü̃xü̃ca̱x. Rü nüma ga Yoná rü poraãcü yemamaxã nataãxẽ.
7 Natürü ga moxü̃ãcü yangunegu rü Tupana yéma nanamu ga wüxi ga õxmi nax yema yawaemaxü̃ãxü̃ca̱x, rü narüñexẽ.
8 Rü yexguma üa̱xcü ngunagügu rü Tupana yéma nanamu ga wüxi ga buanecü ga naiemacü ga éstewaama ne bucü. Rü nüma ga üa̱xcü rü Yonáerugu nabáxi rü yemaacü poraãcü nüxü̃́ nangu̱xema rü namaxã nayuéga yerü poraãcü nangu̱xema. Rü yemaca̱x ñanagürü: —Narümemae nixĩ nax noxtacüma chayuxü̃ rü tama nax chamaxü̃xü̃ —ñanagürü.
9 Natürü nüma ga Tupana rü nanangãxü̃ rü ñanagürü: —¿Cuxca̱x rü namexü̃ nax ngẽmaãcü cunuxü̃ nagagu nax nayumaxü̃xü̃ i ngẽma nanetü? —ñanagürü. Rü nüma ga Yoná rü Tupanaxü̃ nangãxü̃ rü ñanagürü: —Ngẽmáacüx, cha̱u̱xca̱x name i ngẽma, erü ngẽma chorü numaxã chayuxchaü̃ —ñanagürü.
10 Rü yexguma ga nüma ga Cori ya Tupana rü nanangãxü̃ rü ñanagürü nüxü̃: —Cuma rü tama icunato ga yema nanetü rü tama cunayaxẽxẽ. Rü wüxitama ga chütaxü̃ rü nango̱x rü to ga chütaxü̃ rü marü nayu. Natürü i cumax rü cuxü̃́ nangu̱x nax nayuxü̃.
11 Rü dücax, choma rü yexeraãcü choxü̃́ nangu̱x nax nayuexü̃ i ngẽma duü̃xü̃gü i Nínibecüã̱xgü, erü yima ĩanewa nangẽxmagü i 120,000 i buxü̃gü i taxuxü̃ma i chixexü̃ ügüxü̃ rü muxü̃ma i naxü̃nagü —ñanagürü.
