San Lucas 10:1-42
10 Rü yemawena ga Cori ya Ngechuchu rü nayadexechi ga 72 ga to ga norü ngúexü̃gü. Rü taxrechigü yoxni nügüpe̱xegu nayamugü nax nawa naxĩxü̃ca̱x ga guxü̃nema ga gumá ĩanegü rü nachicagü ga Ngechuchu nawa ũxchaü̃güne.
2 Rü ñanagürü nüxü̃: —Aixcümaxü̃chi nangẽxma i muxũchixü̃ i duü̃xü̃gü i ímemaregüxü̃ nax yaxõgüãxü̃ natürü ngẽma Tupanaarü orearü uwa puracüexü̃ rü noxretama nixĩ. Rü ngẽmaca̱x name i perü yumüxẽwa nüxna peca ya Tupana ya puracüarü yora ixĩcü nax ngẽma norü puracüwa namugüãxü̃ca̱x i togü i puracütanüxü̃ nax nüxü̃ yaxugüxü̃ca̱x i norü ore.
3 ¡Rü ipexĩãchi rü ngéma pexĩ! Rü dücax, ñoma carnérugü i aigütanüwa imugüxü̃rüxü̃ nixĩ i pexü̃ chimugüxü̃.
4 ¡Rü taxũtáma choca ípinge, rü bai i perü diẽru, rü bai i perü chapatu! Rü tama chanaxwa̱xe i namagu penuxcü i ngẽxguma namawa texéxü̃ perümoxẽgügu.
5 Rü ngẽxguma wüxi ya ĩpatawa pengugügu, rü ñaaãcü tá nüxü̃ perümoxẽgü i ngẽma duü̃xü̃gü: “¡Petaãxẽ erü Tupana rü napetanügu!” ñaperügügü tá.
6 Rü ngẽxguma ngéma nangẽxmagu i duü̃xü̃gü i Tupanaxü̃ cua̱xgüchaü̃xü̃ rü Tupana rü tá nüxna nanaxã i taãxẽ. Natürü ngẽxguma ngéma nataxuxgu i duü̃xü̃gü i Tupanaxü̃ cua̱xgüchaü̃xü̃, rü ngẽma Tupanaarü taãxẽ rü pexrütama tá nixĩ.
7 ¡Rü wüxi ya ĩpatagutama perücho, rü ngéma pechibüe rü peyaxaxü̱x i ngẽma nüxü̃́ ngẽxmaxü̃ i ngẽma ĩpatacüã̱xgü! Erü wüxi i puracütanüxü̃ rü name nixĩ nax naya̱u̱xãxü̃ i norü natanü naxca̱x i norü puracü. Rü yima ĩanewa pengẽxmagüyane rü tama chanaxwa̱xe i nai ya ĩgu peyapegü.
8 Rü ngẽxguma wüxi ya ĩane ya nawa mea pexü̃ nayaxunewa pengugügu, ¡rü penangõ̱x i ngẽma õna i pexna naxãgüxü̃!
9 ¡Rü penameexẽxẽ i ngẽma ida̱xaweexü̃ ya yima ĩanewa ngẽxmagüxü̃! ¡Rü namaxã nüxü̃ pixu rü ñapegügü nüxü̃: “Tupana ya Ãẽ̱xgacü ixĩcü rü marü pexna nangaicama”, ñapegügü nüxü̃!
10 Natürü ega nawa pengugügu ya wüxi ya ĩane i ngextá duü̃xü̃gü tama mea pexü̃ íyauxgüxü̃wa, ¡rü yima ĩanearü namagu ípechoxü̃ rü ñapegügü nüxü̃ i ngẽma ĩanecüã̱x!:
11 “Rü woo ñaa perü ĩanearü üxaxü̃ i tocutüwa yaxũxü̃, rü itanapagü, nax ngẽmawa nüxü̃ pecuáxü̃ca̱x nax Tupana rü tama pemaxã nataãẽxü̃. ¡Natürü tama nüxü̃ ipeyarüngümae nax marü pexna nangaicamachiréxü̃ ya Tupana nax perü ãẽ̱xgacü yixĩxü̃”, ñaperügügü tá nüxü̃ i ngẽma ĩanecüã̱x!
12 Rü pemaxã nüxü̃ chixu rü ngẽma ngunexü̃ i nagu nagúxü̃ i naane, rü Chodómacüã̱x i duü̃xü̃güarü yexera Tupana tá nanapoxcue i ngẽma duü̃xü̃gü i tama mea pexü̃ yauxgüxü̃.
Ĩanegü ga tama Tupanaga ĩnüene
13 Rü wüxi i ngechaü̃ nixĩ i pexca̱x, Pa Corachíü̃cüã̱x rü Bechaídacüã̱x i Duü̃xü̃güx. Yerü yexguma chi Tíruarü ĩanewa rü Chidóü̃arü ĩanewa chanaxüxgu ga yema mexü̃gü ga cua̱xruü̃gü ga Tupanaarü poramaxã petanüwa chaxüxü̃, rü woo nax poraãcü yachixexü̃ ga yema Tírucüã̱x rü Chidóü̃cüã̱x ga duü̃xü̃gü rü nũxcümama chitama nüxü̃ narüxoe ga nacüma ga chixexü̃, rü poraãcü chi nügümaxã nangechaü̃gü rü naxauxe, yerü chi nügü nicua̱xãchitanü nax yapecaduã̱xgüxü̃.
14 Natürü pemaxã nüxü̃ chixu rü ngẽma ngunexü̃ ya Tupana nagu napoxcuexü̃ i pecaduã̱xgüxü̃, rü ngẽma ngunexü̃gu rü Tírucüã̱xarü yexera rü Chidóü̃cüã̱xarü yexera tá pexü̃ napoxcue i pemax, Pa Corachíü̃cüã̱x rü Pa Bechaídacüã̱x.
15 Rü pemax, Pa Capernáü̃cüã̱xgü i Duü̃xü̃güx ¿ẽ̱xna pema nagu perüxĩnüegu rü daxũguxü̃ i naanewa tá pexĩxü̃? Pemaxã nüxü̃ chixu rü poxcuchicaxü̃ i naanetüü̃wa tá nixĩ i pewogüxü̃ —ñanagürü.
16 Rü ñu̱xũchi norü ngúexü̃güxü̃ ñanagürü: —Rü yíxema pega ĩnüexe, rü chauga rü ta taxĩnüe. Natürü yíxema tama pega ĩnüexe, rü chauga rü ta tama taxĩnüe. Rü yíxema tama chauga ĩnüexe, rü tama naga taxĩnüe ya Chaunatü ya núma choxü̃ mucü —ñanagürü ga Ngechuchu.
Nawoegu ga yema 72 ga Ngechuchuarü ngúexü̃gü
17 Rü taãẽãcüma nawoegu ga yema 72 ga norü ngúexü̃gü ga yamugüxü̃. Rü ñanagürügü nüxü̃: —Pa Corix, ngẽxguma cuégagu tidexagügu, rü aixrüxü̃ i ngo̱xogü rü toga naxĩnüe —ñanagürügü.
18 Rü Ngechuchu rü ñanagürü nüxü̃: —Ngẽmáacü aixcüma nixĩ. Yerü nüxü̃ chadau ga Chataná ga daxũguxü̃ ga naanewa nax nanguxü̃ wüxi ga ãẽmacürüxü̃.
19 Rü choma rü marü pexna chanaxã ga pora nax tama ta̱xacürü chixexü̃ pemaxã naxügüxü̃ca̱x ega woo ãxtapegüwa rüe̱xna tuxchinawegüwa pengagügu. Rü yexgumarüxü̃ ta pexna chanaxã ga pora nax nüxü̃ perüyexeraxü̃ca̱x i guxü̃ma i Chatanáarü pora nax tama ta̱xacürü chixexü̃ pemaxã naxüxü̃ca̱x.
20 ¡Natürü taxṹ i petaãẽgüxü̃ naxca̱x i ngẽma nax pega naxĩnüexü̃ i ngo̱xogü! Rü name nixĩ i petaãẽgü naxca̱x nax marü naxümatüxü̃ i peéga i Tupanaarü poperawa i daxũguxü̃ i naanewa —ñanagürü.
Ngechuchu rü nataãxẽ
21 Rü yexgumatama ga Tupanaãxẽ ga Üünexü̃ rü poraãcü Ngechuchuxü̃ nataãẽxẽxẽ. Rü ñanagürü ga Ngechuchu: —Pa Chaunatüx, Pa Dauxü̃guxü̃ i Naane rü Ñoma i Naanearü Yorax, cuxü̃ chicua̱xüxü̃, yerü ñaa chorü ngúexü̃güxü̃ nüxü̃ cucua̱xẽxẽ i ngẽma ore ga na̱xcha̱xwa quicúxü̃ i ngẽma duü̃xü̃gü i ñoma i naanewa nüxü̃ cua̱xüchigüxü̃. Rü yemaacü cunaxü, Pa Chaunatüx yerü yemaacü nixĩ ga cunaxwa̱xexü̃ —ñanagürü.
22 Rü ñanagürü ga Ngechuchu: —Chaunatü rü marü choxna nanaxã ga guxü̃ma. Rü taxúema ya toguxe nüxü̃ tacua̱x nax texe yixĩxü̃ ya Tupana Nane rü Nanatüxicatama nixĩ i aixcüma nüxü̃ cuácü. Rü taxúema ya toguxe nüxü̃ tacua̱x nax texe yixĩxü̃ ya Nanatü, rü nüma ya Nanexicatama nixĩ ya nüxü̃ cuácü. Rü ngẽxgumarüxü̃ ta yíxema Nane tüxü̃ nüxü̃ nacua̱xẽẽchaü̃güxe nixĩ i aixcüma Nanatüxü̃ cua̱xgüxe —ñanagürü.
23 Rü yexguma norü ngúexü̃güxü̃ nadawenü, rü namaxãxica ñanagürü: —Tataãẽgü ya yíxema tümaxetümaxã nüxü̃ daugüxe i ñaa ñu̱xma pema nüxü̃ pedaugüxü̃.
24 Erü pemaxã nüxü̃ chixu, rü muxü̃ma ga nũxcümaü̃güxü̃ ga Tupanaarü orearü uruü̃gü rü nachixü̃anegüarü ãẽ̱xgacügü, rü nüxü̃́ nangúchaü̃ nax nüxü̃ nadaugüxü̃ i ñaa ñu̱xma pema chauxü̃tawa nüxü̃ pedaugüxü̃. Natürü tama nüxü̃ nadaugü. Rü nüxü̃́ nangúchaü̃ nax nüxü̃ naxĩnüexü̃ i ñaa ñu̱xma pema chauxü̃tawa nüxü̃ pexĩnüexü̃. Natürü tama nüxü̃ naxĩnüe —ñanagürü.
Ore ga mecü ga Chamáriacüã̱xgu ixuxü̃
25 Rü yexguma inachi ga wüxi ga ngúexẽẽruxü̃ ga Moichéarü mugüwa ngu̱xẽẽtaexü̃, rü Ngechuchuxü̃tawa naxũ nax namaxã yanadexaxü̃ca̱x. Rü Ngechuchuxü̃ naxüxchaü̃, rü yemaca̱x nüxna naca rü ñanagürü: —Pa Ngúexẽẽruxü̃ ya Ngechuchux, ¿Ta̱xacü nixĩ i mexü̃ nax chanaxüxü̃ nax choxü̃́ nangẽxmaxü̃ca̱x i maxü̃ i taguma gúxü̃? —ñanagürü.
26 Rü Ngechuchu nanangãxü̃, rü ñanagürü: —¿Ñuxũ ñaxü̃ i ngẽma ore i Moichéarü mugüwa ümatüxü̃? ¿Rü ta̱xacüxü̃ i cumaxã yaxuxü̃? —ñanagürü.
27 Rü yema ngúexẽẽruxü̃ ga Moichéarü mugüwa ngu̱xẽẽtaexü̃, rü Ngechuchuxü̃ nangãxü̃, rü ñanagürü: —¡Nüxü̃ nangechaü̃ ya Cori ya curü Tupana i guxü̃ma i curü maxü̃maxã, rü guxü̃ i cuãẽmaxã, rü guxü̃ i curü poramaxã, rü guxü̃ i nagu curüxĩnüxü̃maxã! ¡Rü nüxü̃ nangechaü̃ i cumücü ngẽma nax cugütama cungechaü̃xü̃rüxü̃! —ñanagürü.
28 Rü yexguma ga Ngechuchu rü ñanagürü nüxü̃: —Ngẽma ore i choxü̃ namaxã cungãxü̃xü̃ rü marü name. Rü ngẽxguma ngẽma ore quinguxẽẽ̱xgu, rü tá cunayaxu i maxü̃ i taguma gúxü̃ —ñanagürü.
29 Natürü ga yema ngúexẽẽruxü̃ ga Moichéarü mugüwa ngu̱xẽẽtaexü̃, rü nügüétüwa nachogüchaü̃. Rü yemaca̱x Ngechuchuna naca, rü ñanagürü: —¿Rü texé tixĩ ya chomücü? —ñanagürü.
30 Rü yexguma ga Ngechuchu rü nanangãxü̃, rü ñanagürü nüxü̃: —Wüxi ga yatü Yerucharéü̃wa ne naxũ, rü Yericúwa naxũ. Rü namagu nüxü̃ nangaugü ga ngĩ́ta̱xagüxü̃. Rü guxü̃ma ga norü yemaxü̃ca̱x nangĩ̱xgü, rü aixrüxü̃ ga naxchiru rü ta naxca̱x nangĩ̱xgü. Rü nanacua̱i̱xgü, rü nayayuãchixẽẽgü, rü yemaacü yéma nanata̱xgü.
31 Rü yematama namawa naxüpetü ga wüxi ga Yudíugüarü chacherdóte. Natürü yexguma yema yatüxü̃ nada̱u̱xgu rü nüxü̃ yéma naxüpetümare.
32 Rü yéma naxüpetü ta ga wüxi ga Lebítanüxü̃, rü yexguma yema yatüxü̃ nada̱u̱xgu, rü nüma rü ta nüxü̃ naxüpetümare.
33 Natürü yixcüra rü wüxi ga Chamáriaanecüã̱x ga yatü rü yematama namawa naxüpetü. Rü yexguma gumá yatüxü̃ nada̱u̱xgu rü nüxü̃́ nangechaü̃tümüxü̃.
34 Rü gumá yatüca̱x nixũ. Rü chíxü̃maxã rü bínumaxã nanaxüxü̃ ga norü o̱xrigü, rü meama nayana̱i̱xgü ga yema norü o̱xrigü. Rü ñu̱xũchi norü búrugu nanamunagü, rü wüxi ga pegüchicawa nanaga. Rü yéma nüxna nadau.
35 Rü moxü̃ãcü ga yexguma inaxũãchigu ga yema Chamáriaanecüã̱x, rü ngĩxü̃ nayaxu ga taxretachinü ga norü diẽru, rü yema pegüchicaarü yorana ngĩxü̃ naxã. Rü ñanagürü nüxü̃: “¡Nüxna nadau i ñaa yatü! Rü ngẽxguma yexeragu naxãtanügu nax nua nangẽxmaxü̃, rü choma tá cuxü̃́ chanaxütanü i ngẽxguma chataeguxgu” —ñanagürü.
36 Rü ñanagürü ga Ngechuchu nüxü̃: —Ñu̱xma chanaxwa̱xe i chomaxã nüxü̃ quixu i ngexü̃rüüxü̃ nixĩ ga yema tomaepü̱xtanüwa ga aixcüma namücü ixĩxü̃ ga yema yatü ga ngĩ́ta̱xagüxü̃ ima̱xgüxü̃ —ñanagürü ga Ngechuchu.
37 Rü yexguma ga yema ngúexẽẽruxü̃ ga Moichéarü mugüwa ngu̱xẽẽtaexü̃ rü ñanagürü: —Yema Chamáriaanecüã̱x nixĩ ga yema yatümücü ixĩxü̃, yerü nüxü̃́ nangechaü̃tümüxü̃ —ñanagürü. Rü yexguma ga Ngechuchu rü ñanagürü nüxü̃: —¡Ñu̱xma rü íixũ rü yema Chamáriaanecüã̱x üxü̃rüxü̃ naxü! —ñanagürü nüxü̃.
Márta rü Maríapatawa nangu ga Ngechuchu
38 Rü yexguma Ngechuchu namagu ixũxgu norü ngúexü̃gümaxã, rü wüxi ga ĩanexacüwa nangu. Rü yéma guma ĩanexacüwa rü wüxi ga nge ga Mártagu ãégacü ngĩgüpatawa inanguxẽxe.
39 Rü Martaaxü̃́ iyexma ga wüxi ga ngĩeya̱x ga Maríagu ãégacü. Rü ngĩma rü Ngechuchucutüxü̃tawa irüto nax inaxĩnüxü̃ca̱x ga Ngechuchuarü ore.
40 Natürü ga Márta rü itaarü puracüã̱x rü yemaacü ngĩrü puracüguama irüxĩnü. Rü yemaca̱x Ngechuchuca̱x iyaxũ, rü ngĩgürügü nüxü̃: —Pa Corix, ¿tama ẽ̱xna nagu curüxĩnü i ngẽma nax chataarü puracüã́xü̃ rü ngẽma chaueya̱x rü choxnaxica nax natáãxü̃ i guxü̃ma i ngẽma puracü? ¡Rü namaxã nüxü̃ ixu nax choxü̃ nangü̃xẽxẽxü̃ca̱x! —ngĩgürügü.
41 Natürü Ngechuchu rü ngĩxü̃ nangãxü̃, rü ñanagürü ngĩxü̃: —Pa Mártax, Pa Mártax, cuma rü poraãcü curü puracügu curüxĩnü, rü naxca̱x cuxoegaãxẽ.
42 Natürü wüxixicatama nixĩ i guxü̃arü yexera i mexü̃ nax nagu curüxĩnüxü̃. Rü María iyixĩ i nayaxucü i ngẽma rümemaxü̃. Rü taxúetama tá ngĩxna tayanuxü̃ i ngẽma —ñanagürü ga Ngechuchu.
