San Lucas 15:1-32
15 Rü Ngechuchuca̱x naxĩ ga muxü̃ma ga duü̃xü̃gü ga Rómaarü ãẽ̱xgacüca̱x diẽru ngĩxü̃ ideetanüxü̃, rü duü̃xü̃gü ga chixexü̃ ga nacümagu ĩxü̃, yerü nüxü̃ naxĩnüechaü̃ ga norü ore.
2 Rü yemaca̱x ga Parichéugü rü ngúexẽẽruü̃gü ga Moichéarü mugüwa ngu̱xẽẽtaegüxü̃, rü Ngechuchuxü̃ nixugüe, rü ñanagürügü: —Ñaa yatü rü norü me nixĩ i pecaduã̱xgüxü̃maxã naxãmücüxü̃, rü namaxã nachibüxü̃ —ñanagürügü.
3 Rü yexguma ga Ngechuchu rü ñaa ore ga cua̱xruxü̃xü̃ namaxã nixu, rü ñanagürü:
4 —¿Texé i petanüwa rü ngẽxguma tüxü̃́ nangẽxmagu i 100 i tümaarü carnérugü rü wüxi tüxü̃́ iyarütaxu̱xgu, rü taux ẽ̱xna i nachitaxü̃wa tanawogüxü̃ i ngẽma 99, rü naxca̱x tayadauxü̃ i ngẽma tüxü̃́ iyarütaxuxü̃ ñu̱xmata nüxü̃ itayangau?
5 Rü ngẽxguma nüxü̃ itayangauxgu rü taãẽãcüma tügüãtügu tayaga.
6 Rü ngẽxguma tümapatawa tanguxgu, rü tanangutaque̱xexẽxẽ i tümamücügü, rü duü̃xü̃gü i tümaarü ngaicamagu pegüxü̃, rü nüxü̃ ñatagürü: “¡Wüxigu chomaxã petaãxẽgü, Pa Chomücügüx! Erü marü nüxü̃ ichayangau i ngẽma chorü carnéru ga iyarütaxuxü̃”, ñatagürü.
7 Rü pemaxã nüxü̃ chixu rü daxũguxü̃ i naanewa rü naxca̱x nataãẽgü i 99 i duü̃xü̃gü i marü Tupanaarü ixĩgüxü̃, natürü yexera naxca̱x nataãẽgü i ngẽma wüxi i pecaduã́xü̃ i nüxü̃ rüxoxü̃ i nacüma i chixexü̃ rü Tupanaaxü̃́ yaxõxü̃.
Ore ga diẽru ga iyarütaxu̱xcügu ixuxü̃
8 Rü ngẽxguma chi wüxi i ngecüaxü̃́ nangẽxmagu i 10 tachinü i diẽru i tatanüxü̃, rü wüxi ngĩxü̃́ iyarütaxu̱xgu, ¿rü taux ẽ̱xna i omüwa nangĩxichiãxü̃ rü nabixichiãxü̃ ya ngĩpata, rü meama ngĩxca̱x nadauxü̃ ñu̱xmata ngĩxü̃ iyangau?
9 Rü ngẽxguma ngĩxü̃ iyangauxgu, rü inangutaque̱xexẽxẽ i ngĩmücügü i ngexü̃gü rü ngĩtanüxü̃ i ngĩrü ngaicamagu pegüxü̃, rü nüxü̃ ngĩgürügü: “¡Wüxigu chomaxã petaãxẽgü, Pa Chomücügüx! Erü marü ngĩxü̃ ichayangau i ngẽma chorü diẽru ga iyarütaxu̱xcü”, ngĩgürügü.
10 Rü pemaxã nüxü̃ chixu rü ngẽxgumarüxü̃ ta nataãẽgü i daxũcüã̱x i Tupanaarü orearü ngeruü̃gü i ngẽxguma wüxi i duü̃xü̃ i pecaduã́xü̃ nüxü̃ rüxoxgu i nacüma i chixexü̃ rü Tupanaaxü̃́ yaxõõgu —ñanagürü ga Ngechuchu.
Ore ga wüxi ga ngextü̱xücü ga nanatüna ixũcügu ixuxü̃
11 Rü ñanagürü ta ga Ngechuchu: —Nayexma ga wüxi ga yatü ga taxre ga nane nüxü̃́ yexmacü.
12 Rü gumá rübumaecü, rü nanatüxü̃ ñanagürü: “Pa Pax, ¡choxna naxã i ngẽma curü ngẽmaxü̃gü i choxna üxü̃!” ñanagürü. Rü yexguma ga nanatü rü yema taxre ga nanemaxã nayatoye ga norü yemaxü̃gü.
13 Rü ñuxre ga ngunexü̃guwena rü gumá nane ga rübumaecü rü nananutaque̱xe ga guxü̃ma ga norü yemaxü̃gü rü namaxã nataxe. Rü yema diẽrumaxã to ga nachixü̃anewa naxũ. Rü chixri yéma namaxü̃, rü yemaacü ngĩxü̃ nagu̱xẽxẽ ga guxcüma ga norü diẽru.
14 Natürü yexguma marü ngĩxü̃ nagu̱xẽẽguwena ga guxcüma ga norü diẽru, rü poraãcü nataxu ga õna ga yema nachixü̃anewa. Rü yemaca̱x ga gumá ngextü̱xücü rü inanaxügü nax taiya nüxü̃́ ngúxü̃.
15 Rü yexguma norü puracüca̱x nadau naxü̃tagu ga wüxi ga yatü ga yema nachixü̃anecüã̱x. Rü nüma ga yema yatü rü norü naanewa nanamu nax yéma norü cuchigüna yadauxü̃ca̱x.
16 Rü düxwa nüxü̃́ nachi̱xéga ga yema cuchiwemü, yerü poraãcü nataiyaxüchi. Natürü taxúema õna nüxna taxã.
17 Rü yexguma naãxẽwa nagu narüxĩnü, rü ñanagürü: “¿Ñuxre i chaunatüarü puracütanüxü̃ rü nüxü̃́ nangẽxma i õna rü nüxü̃́ ínayaxü? Rü choma i nua rü taiyamaxã tá nuxma chayu.
18 Rü chaunatüca̱x tá chataegu, rü ñachagürü tá tüxü̃: ‘Pa Papax, marü chixexü̃ Tupanape̱xewa chaxü rü cupe̱xewa rü ta.
19 Rü marü tama chame nax chaune, ñacuxü̃ choxü̃. ¡Rü wüxi i curü puracütanüxü̃xü̃ choxü̃ ixĩxẽxẽ!’ ñacharügü tá tüxü̃ ya chaunatü”, ñanagürü.
20 Rü inaxũãchi rü nanatüpataca̱x nataegu. Rü yexguma yangaicagu ga nanatüpata, rü yáxü̃gu nüxü̃ tadau ga nanatü, rü tüxü̃́ nangechaü̃tümüxü̃. Rü naxca̱x tiña, rü nüxna tana̱i̱xãchi, rü nüxü̃ tachúxu.
21 Rü yexguma ga nüma ga tümane rü ñanagürü tüxü̃: “Pa Papax, marü chixexü̃ Tupanape̱xewa chaxü, rü cupe̱xewa rü ta. Rü ngẽmaca̱x marü tama name nax ‘chaune’, ñacuxü̃ choxü̃”, ñanagürü.
22 Natürü tüma ga nanatü rü tümaarü duü̃xü̃güxü̃ ñatarügü: “¡Paxa nua penange i naxchiru i mexẽchixü̃ rü peyacuxcuchix! ¡Rü wüxi i ãnera ta naxme̱xwa ngĩxü̃ pinga̱xcuchi! ¡Rü chapatu rü ta nua penge, rü peyacuaixcuchi!
23 ¡Rü peyayaxu̱x i ngẽma wocaxacü i rüngü̃maexü̃, rü peyamá, rü ngĩxã namaxã tachibüe rü tapetae!
24 Erü daa chaune rü cha̱u̱xca̱x rü marü nayu, natürü maxü̃cü cha̱u̱xca̱x ínangu. Rü marü inayarütauxchire̱x, rü wenaxarü nango̱x”, ñanagürü. Rü yexguma inanaxügüe nax napetaegüxü̃.
25 Rü yoxni ga gumá nane ga rüyamaẽcü, rü naanewa nayexma. Rü yexguma nataeguxgu rü marü ĩarü ngaicamana nanguxgu, rü nüxü̃ naxĩnü nax ínapaxetagüxü̃ rü íyaxü̃ãchitanüxü̃xü̃.
26 Rü wüxi ga nanatüarü duü̃xü̃ca̱x naca, rü nüxna naca nax ta̱xacü ínaxüexü̃ ga ĩwa.
27 Rü yema nanatüarü duü̃xü̃ rü nanangãxü̃, rü ñanagürü: “Cuenexẽ rü marü ínangu. Rü ngẽmaca̱x cunatü toxü̃ tamu nax tayamáxü̃ca̱x i ngẽma wocaxacü i rüngü̃maexü̃, erü cuenexẽ rü mecü ínangu rü tama nida̱xawe”, ñanagürü nüxü̃.
28 Natürü ga gumá naenexẽ ga rüyamaẽcü rü nanu, rü tama ĩgu naxücuchaü̃. Rü yemaca̱x düxwa ga nanatü rü naxca̱x ítaxũxũ, rü nüxü̃ tayaca̱xaxü̃ nax yaxücuxü̃ca̱x.
29 Rü nüma rü ñanagürü tüxü̃ ga nanatü: “Cuma nüxü̃ cucua̱x ñuxre ya taunecü cuxü̃́ chapuracü, rü taguma chixri cuga chaxĩnü. Rü bai i ñuxgu wüxicana wüxi i chíbuxacü choxna cumu nax chomücügümaxã chapetaexü̃ca̱x.
30 Natürü ñu̱xma nax ínanguxü̃ i ngẽma cune i chixri curü diẽru ngĩxü̃ gu̱xẽẽxü̃ nagu i ngexü̃gü i naxü̃nemaxã taxexü̃, rü naxca̱x cuyama̱x i ngẽma wocaxacü i rüngü̃maexü̃”, ñanagürü.
31 Rü yexguma ga nanatü rü ñatarügü nüxü̃: “Pa Chaunex, cuma rü guxü̃guma chauxü̃tawa cungexma, rü guxü̃ma i chorü ngẽmaxü̃gü rü cuxrü nixĩ.
32 Natürü ñu̱xma rü name nixĩ nax ipetaãxẽgüxü̃ rü itaãẽgüxü̃ erü cuenexẽ ga gumá cha̱u̱xca̱x rü marü yucü, rü maxü̃cü taxca̱x ínangu. Rü woo tüxna inayarütaxu, rü wenaxarü taxca̱x nango̱x” —ñatarügü.
