San Lucas 16:1-31
16 Rü ñanagürü ta ga Ngechuchu norü ngúexü̃güxü̃: —Nayexma ga wüxi ga cori ga muarü diẽruã̱xü̃chixü̃. Rü nüxü̃́ nayexma ga wüxi ga norü duü̃xü̃ ga norü yemaxü̃arü dauruxü̃. Natürü togü ga duü̃xü̃gü rü norü corimaxã nüxü̃ nixugü nax yema norü duü̃xü̃ rü chixri norü yemaxü̃na nax nadauxü̃.
2 Rü yexguma ga yema cori rü yema norü duü̃xü̃ca̱x naca, rü ñanagürü nüxü̃: “Dücax, cuchigaxü̃ chomaxã nixugügü i duü̃xü̃gü. ¿Rü ta̱xacü nixĩ i ngẽma? ¡Rü chomaxã nüxü̃ ixu rü ñuxãcü nixĩ i curü puracü, erü marü taxũtáma chorü ngẽmaxü̃arü dauruü̃xü̃ cuxü̃ chixĩxẽxẽ!” ñanagürü nüxü̃.
3 Rü yexguma ga yema coriarü duü̃xü̃ rü nagu narüxĩnü, rü nügüãẽwa ñanagürü: “¿Ta̱xacü tá chaxü i ñu̱xmax, erü chorü cori rü marü choxü̃ ínata̱xüchi i ngẽma chorü puracüwa? Tama chapora nax naanewa chapuracüxü̃ca̱x, rü chaxãne nax diẽruca̱x íchaca̱xaxü̃ nüxna i togü.
4 Rü marü nüxü̃ chacua̱x nax ta̱xacü tá chaxüxü̃ nax choxü̃́ nangẽxmaxü̃ca̱x nax texé tümapatawa choxü̃ yaxuxü̃ i ngẽxguma changearü puracüã̱xgu”, ñanagürü.
5 Rü yexguma ga nüma rü nügüxü̃tawa naxca̱x nangema ga wüxichigü ga yema duü̃xü̃gü ga norü coriaxü̃́ nangetanügüxü̃. Rü yema nüxíra naxü̃tawa ũxü̃na naca, rü ñanagürü: “¿Ñuxre i nüxü̃́ cungetanüxü̃ i chorü cori?” ñanagürü.
6 Rü nüma nanangãxü̃, rü ñanagürü: “Nüxü̃́ chanangetanü i 100 i bidóü̃ i chíxü̃”, ñanagürü. Rü yema coriarü duü̃xü̃ rü ñanagürü nüxü̃: “Ñaa nixĩ i ngẽma popera i curü ngetanü nawa ngóxü̃. ¡Rü paxa írüto rü to i popera naxü, rü 50 i bidóü̃guxicatama naxü i curü ngetanü!” ñanagürü.
7 Rü yemawena rü yema to ga duü̃xü̃ ga norü coriaxü̃́ nangetanüxü̃na naca, rü ñanagürü: “¿Cuma rü ñuxre yixĩxü̃ i nüxü̃́ cungetanüxü̃ i chorü cori?” ñanagürü. Rü nüma rü nanangãxü̃, rü ñanagürü: “Nüxü̃́ chanangetanü i 100 i choca i trigu”, ñanagürü. Rü yema coriarü duü̃xü̃ rü ñanagürü nüxü̃: “Ñaa nixĩ i popera i curü ngetanü nawa ngóxü̃. ¡Rü paxa írüto rü to i popera naxü rü 80 i chocaguxicatama naxü i curü ngetanü!” ñanagürü.
8 Rü norü cori rü nüxü̃ nicua̱xü̃ama ga yema norü duü̃xü̃ ga chixexü̃, yerü nüxü̃ nadau nax nüxü̃ nacua̱xüchixü̃ nax duü̃xü̃güaxü̃́ nangúchaü̃ẽẽãxü̃ ega ta̱xacü naxü̱xgu. Rü pemaxã nüxü̃ chixu rü ñoma i naanecüã̱x i duü̃xü̃gü, rü ngẽma yaxõgüxü̃arü yexera paxa naxca̱x nadaugü nax duü̃xü̃güaxü̃́ nangúchaü̃xẽẽãxü̃ ega ta̱xacü naxü̱xgu.
9 Rü pemaxã nüxü̃ chixu rü ngẽma diẽru i tama aixcüma mexü̃ i ñoma i naanewa pexü̃́ ngẽxmaxü̃ rü name nixĩ i ngẽmamaxã nüxü̃́ penangúchaü̃xẽxẽ i duü̃xü̃gü nax Tupanaxü̃tawa nangugüxü̃. Rü ngẽmaãcü i ngẽxguma nagu̱xgu i ngẽma ñoma i naanewa pexü̃́ ngẽxmaxü̃ rü peyuegu, rü tá pexü̃́ nangẽxma ya pemücügü ya pexü̃ yaxugüxü̃ i daxũguxü̃ i naanewa.
10 Yíxema mea namaxã icuáxe ega woo noxretama tümame̱xẽwa ngẽxmagu, rü ngẽxguma muxü̃ma tümame̱xẽwa ngẽxmagu rü tá ta mea namaxã itacua̱x. Natürü yíxema chixri namaxã icuáxe ega noxretama tümame̱xẽwa ngẽxmagu, rü ngẽxguma muxü̃ma tümame̱xẽwa ngẽxmagu rü ngẽxgumarüxü̃ tá ta chixri namaxã itacua̱x.
11 Rü ngẽxguma tama mea namaxã ipecua̱xgux i ngẽma diẽru i tama aixcüma mexü̃ i pexme̱xwa ngẽxmaxü̃ i ñoma i naanewa, ¿rü texé tá pexme̱xgu tanaxǘ i ngẽma aixcüma mexü̃ i Tupanaarü ixĩxü̃?
12 Rü ngẽxguma tama mea namaxã ipecua̱xgu i ngẽma togüarü ixĩxü̃, ¿rü texé tá pexna tanaxã i ngẽma pexna üxü̃?
13 Taxucürüwama i wüxi i duü̃xü̃ rü nataxrearü coriã̱x. Erü wüxi i norü corichi rü tá naxai, rü ngẽma to rü tá nüxü̃ nangechaü̃. Rüe̱xna wüxica̱x rü tá mea napuracü rü ngẽma to rü tá nüxü̃ naxo. Rü pema rü taxucürüwama Tupanaca̱x pemaxẽ ega perü diẽruguama perüxĩnüegu —ñanagürü ga Ngechuchu.
14 Natürü ga yema Parichéugü rü poraãcü norü diẽruguama narüxĩnüe. Rü yemaca̱x Ngechuchuxü̃ nacugüe ga yexguma nüxü̃ naxĩnüegu ga guxü̃ma ga yema ore.
15 Rü yexguma ga Ngechuchu rü ñanagürü nüxü̃: —Pema rü duü̃xü̃güpe̱xewa mea pemaxẽneta, natürü Tupana pexü̃ nacua̱x nax ta̱xacügu perüxĩnüexü̃. Rü woo duü̃xü̃gü pexü̃ nicua̱xüü̃gü naxca̱x i ngẽma pexüxü̃, natürü Tupana rü naãxẽwa nangu̱x i ngẽma —ñanagürü ga Ngechuchu.
Ore i taãẽxẽẽruü̃chiga
16 Rü yexguma ga Ngechuchu rü ñanagürü: —Tupana duü̃xü̃güna nanaxã ga norü mugü ga Moiché namaxã ngúexẽxẽtaexü̃, rü ñu̱xũchi norü orearü uruü̃güarü mugü nax nagu naxĩxü̃ca̱x ga duü̃xü̃gü ñu̱xmata ínangu ga Cuáü̃ ga baiü̃ẽẽruxü̃. Rü yemawena nixĩ ga naxunagüxü̃ i ore i taãẽxẽẽruxü̃ nax nüma ya Tupana rü ãẽ̱xgacü yixĩxü̃. Rü ñu̱xma rü guxü̃ma i duü̃xü̃gü rü poraãcü nügü naporaexẽxẽ nax yachocuxü̃ca̱x i nüma ínangexmaxü̃wa.
17 Natürü ngẽma Tupanaarü mugü rü taxucürüwama texé itayanaxoxẽxẽ rü bai i wüxi i íxraxü̃. Rü narütauxchamae nixĩ nax iyanaxoxü̃ i daxũguxü̃ i naane rü ñoma i naane.
Ngechuchu namaxã nangúexẽẽtae nax tama namexü̃ nax texé tümama̱xü̃ ítáxü̃
18 Ngẽxguma wüxi ya yatü ítáma̱xgu rü nai i ngexü̃maxã naxãxma̱xgu rü Tupanape̱xewa pecadu naxü. Rü texé ya yíxema ngĩmaxã ãmaxe i wüxi i nge i ngĩte ngĩxü̃ íta̱xcü, rü Tupanape̱xewa pecadu taxü.
Yatü ga diẽruã̱xü̃chixü̃chiga rü Lácharo ga ngearü diẽruã́cüchiga
19 Nayexma ga wüxi ga yatü ga diẽruã̱xü̃chixü̃ ga guxü̃guma mexẽchixü̃ ga naxchirugu icúxü̃. Rü guxü̃ ga ngunexü̃gu rü taxü̃ma ga õna naxü rü napetaexü̃.
20 Rü nayexma ta ga wüxi ga yatü ga ngearü diẽruã́cü ga rüxo̱xo̱xnecü ga Lácharogu ãégacü. Rü guxü̃guma yema diẽruã̱xü̃chixü̃pataa̱xwa nayarütooxü̃.
21 Rü gumá Lácharo rü nanangṍxchaü̃ ga yema õnatüchi ga yema yatü ga diẽruã̱xü̃chixü̃arü mechawa rüyixixü̃. Rü naxca̱x naxĩ ga airugü, rü nanawearü o̱xriã̱xgü.
22 Rü wüxi ga ngunexü̃ nayu ga gumá ngearü diẽruã́cü, rü daxũcüã̱x ga Tupanaarü orearü ngeruü̃gü rü daxũguxü̃ ga naanewa nanagagü nax wüxiwa Abraáü̃xü̃tawa nayexmaxü̃ca̱x. Rü nayu ta ga yema yatü ga noxri diẽruã̱xü̃chixü̃, rü inayata̱xgü.
23 Rü ngẽma nachica ya Tupana ngo̱xogüxü̃ nagu poxcuxü̃wa naxũ ga yema yatü ga noxri diẽruã̱xü̃chixü̃ rü yéma poraãcü ngúxü̃ ninge. Rü daxũ nadau, rü yáxü̃gu Abraáü̃xü̃ nadau nax Lácharomaxã wüxiwa nayexmaxü̃.
24 Rü yexguma ga yema yatü ga noxri diẽruã̱xü̃chixü̃ rü aita naxü rü ñanagürü: “Pa O̱xi Pa Abraáü̃x, ¡cuxü̃́ changechaü̃tümüxü̃, rü nua namu ya Lácharo nax dexámaxã nügü yawaixpe̱xeme̱xẽãcüma choxü̃ yanawaixpe̱xearü conüã́xü̃ca̱x! Erü poraãcü choxü̃́ nangu̱x i nua üxüwa”, ñanagürü.
25 Natürü Abraáü̃ rü ñanagürü nüxü̃: “Pa Chaunex, ¡nüxna nacua̱xãchi nax taxuxü̃ma cuxü̃́ taxuxü̃ ga yexguma cumaxü̱̃xgu! Natürü Lácharo rü poraãcü guxchaxü̃wa nayexma. Rü ngẽmaca̱x i ñu̱xma rü nua mexü̃wa nangẽxma i Lácharo, rü cuma rü ngéma poxcuchicawa ngúxü̃ quinge.
26 Rü ñu̱xũchi nangẽxma i wüxi i taxüchixü̃ i ãxmaxü̃ i tórü ngãxü̃wa üxü̃. Rü ngẽmaca̱x ega númacüã̱x ngéma ĩxchaü̃gu, rü taxucürüwama ngéma nangugü. Rü woo ngémacüã̱x núma ĩxchaü̃gu rü taxucürüwama núma naxĩ”, ñanagürü.
27 Rü yexguma ga yema yatü ga noxri diẽruã̱xü̃chixü̃ rü ñanagürü: “Cuxü̃ chaca̱a̱xü̃, Pa O̱xi, Pa Abraáü̃x, nax chaunatüpatawa cunamuxü̃ca̱x ya Lácharo.
28 Erü ngéma nangẽxmagü ya wüxime̱e̱xpü̱x ya chauenexẽgü. Rü chanaxwa̱xe nax namaxã nüxü̃ nax yanaxuxü̃ca̱x nax tama nua ñaa poxcuchica i poraãcü choxü̃́ ínangúxü̃wa naxĩxü̃ca̱x”, ñanagürü.
29 Natürü ga Abraáü̃ rü ñanagürü nüxü̃: “Cuenexẽgü nüxü̃́ nangẽxma i Tupanaarü mugü ga Moiché ümatüxü̃ rü yema ore ga nũxcümaü̃güxü̃ ga Tupanaarü orearü uruü̃gü ümatüxü̃. Rü name nixĩ i ngẽma orega nax naxĩnüexü̃”, ñanagürü.
30 Rü yexguma ga yema yatü ga noxri diẽruã̱xü̃chixü̃ rü Abraáü̃xü̃ nangãxü̃, rü ñanagürü: “Ngẽmáacüx, Pa O̱xi, Pa Abraáü̃x, natürü ngẽxguma chi wüxi i duü̃xü̃ i yuchiréxü̃ ngéma ũxgu rü namaxã nüxü̃ yanaxuxgu, rü chi nüxü̃ narüxoe i nacüma i chixexü̃”, ñanagürü.
31 Natürü Abraáü̃, rü ñanagürü nüxü̃: “Ngẽxguma tama naga naxĩnüegu ga yema ore ga Moiché ümatüxü̃ rü yema ore ga nũxcümaü̃güxü̃ ga Tupanaarü orearü uruü̃gü ümatüxü̃, rü woo chi wüxi i marü yuwa írüdaxü̃ i duü̃xü̃ ngéma ũxgu, rü namaxã nüxü̃ yanaxuxgu i ore, rü taxũchima nüxü̃́ nayaxõgü” —ñanagürü.
